ಇಬ್ರಿಯ 11 - ಕೊಡವ ಬೈಬಲ್ನಂಬಿಕೇಕ್ ಉದಾರಣವಾಯಿತುಳ್ಳ ದೇವಡ ಮಕ್ಕ 1 ಇಕ್ಕ, ನಂಬಿಕೆ ಎಂತ ಎಣ್ಣ್‌ಚೇಂಗಿ, ಕಂಡಿತವಾಯಿತ್ ಆಪಾಕುಳ್ಳ ನಿರಿಕ್ಷೇರ ದೈರ್ಯವು, ಕಣ್ಣ್‌ಕ್ ಕಾಂಗತ ವಿಷಯತ್‍ರಮೇಲೆ ಉಳ್ಳ ನಿಶ್ಚಯವು ಆಯಿತುಂಡ್. 2 ಇದ್ಂಡ ಮೂಲಕ ನಂಗಡ ಮುತ್ತಜ್ಜಂಗಕ್ ನಲ್ಲರಿಕೆ ಕ್‍ಟ್ಟ್‌ಚಿ. 3 ನಂಬಿಕೇರ ಮೂಲಕ, ದೇವ ಈ ಲೋಕತ್‍ನ ಅಂವೊಂಡ ತಕ್ಕ್‌ರ ಮೂಲಕ ಸೃಷ್ಟಿ ಮಾಡ್‌ಚೀಂದು, ಅನ್ನನೆ ನಂಗಡ ಕಣ್ಣ್‌ಕ್ ಕಾಂಬ ವಿಷಯವೆಲ್ಲ, ಕಣ್ಣ್‌ಕ್ ಕಾಂಬಕಯ್ಯುವ ವಿಷಯತ್‍ರಗುಂಡ್ ಮಾಡಿತ್‌ಲ್ಲೇಂದು ನಂಗಕ್ ಗೊತ್ತುಂಡ್. 4 ನಂಬಿಕೇರ ಮೂಲಕ, ಹೇಬೆಲ ತಾಂಡ ಅಣ್ಣ ಕಾಯಿನ ಮಾಡ್‍ನ ಬಲಿಕಿಂಜ ವಿಶೇಷವಾನ ಬಿಲೀನ ದೇವಕ್ ಅರ್ಪಣೆ ಮಾಡ್‍ಚಿ; ಅದ್ಂಗಾಯಿತ್ ಅಂವೊಂಗ್ ನೀತಿವಂತಂವೋಂದ್ ಸಾಕ್ಷಿ ಕ್‍ಟ್ಟ್‌ಚಿ; ಹೇಬೆಲಂಡ ಕಾಣಿಕೆರ ವಿಷಯತ್ ದೇವ ಸಹ ಸಾಕ್ಷಿ ಕೊಡ್‍ತತ್, ಅಂವೊ ಚತ್ತ್ ಪೋಚೇಂಗಿಯು ಇಂದ್ ಸಹ ತಕ್ಕ್ ಪರ್ಂದಂಡುಂಡ್. 5 ನಂಬಿಕೇರ ಮೂಲಕ, ಹನೋಕ ಚಾವ್‍ನ ಅನುಬವಿಚಿಡತೆ ಈ ಲೋಕತ್ಂಜ ದೇವ ಅಂವೊನ ಎಡ್‍ತಂಡತ್; ದೇವ ಅಂವೊನ ಎಡ್‍ತಗುಂಡ್, ಅಂವೊ ಕಾಂಗತ ಆಯಿಪೋಚಿ; ಅಂವೊನ ದೇವ ದುಂಬ ಪ್ರೀತಿ ಮಾಡ್‍ಚೀಂದ್ ಅಂವೊನ ದೇವ ಎಡ್‍ಪಕ್ ಮಿಂಞಲೇ ಅಂವೊಂಗ್ ಸಾಕ್ಷಿ ಕೊಡ್‍ತತ್. 6 ನಂಬಿಕೆ ಇಲ್ಲತಪೋನಕ ದೇವನ ಕುಶಿ ಪಡ್‍ತ್‍ವಕ್ ಸಾದ್ಯ ಇಲ್ಲೆ; ಎನ್ನಂಗೆಣ್ಣ್‌ಚೇಂಗಿ, ದೇವಡ ಪಕ್ಕ ಕೂಡ್‍ವಂವೊ ದೇವ ಉಂಡ್‍ೕಂದು, ಅಂವೊನ ತ್‍ೕಡ್‌ವ ಜನಕ್ ಅಂವೊ ಪ್ರತಿಫಲ ತಪ್ಪಾಂದು ನಂಬಂಡು. 7 ನಂಬಿಕೇರ ಮೂಲಕ ನೋಹ, ಅಂವೊ ಬದ್‍ಕಿಯಂಡ್ ಇಂಜ ಕಾಲತ್‍ಲ್, ಮಿಂಞಕ್ ಬಪ್ಪಕುಳ್ಳ ವಿಷಯತ್‍ಲ್ ದೇವಡಿಂಜ ಎಚ್ಚರ ಕ್‍ಟ್ಟಿತ್, ದೇವಡ ಬಕ್ತಿ ಉಳ್ಳಂವೊನಾಯಿತ್, ತಾಂಡ ಮನೆಲ್ ಉಳ್ಳಯಿಂಗಳ ಕಾಪಾಡ್‌ವಕ್ ಒರ್ ಕಪ್ಪಲ್‌ನ ಮಾಡ್‍ಚಿ; ಅದ್‍ನಗುಂಡ್, ಈ ಲೋಕಕ್ ದಂಡೆನೇರ ತೀರ್ಪ್ ಕ್‍ಟ್ಟ್‌ಚೀಂದ್ ತೀರ್ಪ್ ಮಾಡಿತ್, ನಂಬಿಕೇರ ಮೂಲಕ ಕ್‍ಟ್ಟುವ ನೀತಿಕ್ ಬಾದ್ಯತೆ ಕ್‌ಟ್ಟ್‌ನಂವೊನಾಚಿ. 8 ನಂಬಿಕೇರ ಮೂಲಕ, ಅಬ್ರಹಾಮ ತಾಂಗ್ ಬಾದ್ಯತೆಯಾಯಿತ್ ಕ್‍ಟ್ಟ್‌ವಕುಳ್ಳ ಜಾಗಕ್ ಪೋಪಕ್ ದೇವ ಕಾಕ್‍ವಕ, ತಗ್ಗಿತ್, ತಾನ್ ಎಲ್ಲಿ ಪೋಯಂಡುಳ್ಳ್‌ಂದ್ ಗೊತ್ತಿಲ್ಲತೆ ಪೊರಟಿತ್ ಪೋಚಿ. 9 ನಂಬಿಕೇರ ಮೂಲಕ, ಅಂವೊ ವಾಗ್ದಾನತ್‍ರ ದೇಶತ್‍ಲ್ ಬೋರೆ ದೇಶತ್‍ರಂವೊನೆಕೆ ಇಂಜಂಡ್, ಆ ವಾಗ್ದಾನತ್‍ರ ಬಾದ್ಯತೆಕಾರಳಾನ ಇಸಾಕ ಪಿಂಞ ಯಾಕೋಬಂಡ ಕೂಡೆ ಗುಡಾರತ್‍ಲ್ ವಾಸ ಮಾಡಿಯಂಡ್ ಇಂಜತ್. 10 ಎನ್ನಂಗೆಣ್ಣ್‌ಚೇಂಗಿ, ದೇವ ತಯಾರ್ ಮಾಡಿತ್ ರೂಪ್‍ಚಿಡುವ, ಅಡಿಪಾಯ ಉಳ್ಳ ಪಟ್ಟಣಕಾಯಿತ್ ಪಾರಕಾತಂಡಿಂಜತ್. 11 ನಂಬಿಕೇರ ಮೂಲಕ, ಸಾರಳ ಸಹ, ವಾಗ್ದಾನ ಮಾಡ್‍ನಂವೊ ಸತ್ಯವಂತಂವೋಂದ್ ನಂಬಿತ್, ಕುಂಞಿ ಪೆರುವಕುಳ್ಳ ವಯಸ್ ಆಯಿಪೋಯಿತ್ಂಜತೇಂಗಿಯು, ಕೆಲಕರ್ತಿ ಆಪಕುಳ್ಳ ಶಕ್ತಿನ ಪಡ್ಂದಿತ್ ಕುಂಞಿನ ಪೆತ್ತತ್. 12 ಆನಗುಂಡ್, ತಡೀಲ್ ಇಂಞು ಮಿಂಞಕ್ ಒಂದು ಮಾಡ್‌ವಕ್ ಕಯ್ಯತ, ತಡಿ ಚತ್ತ್ ಪೋಚೀಂದ್ ಎಣ್ಣುವಕಾಪ ಒಬ್ಬನಗುಂಡ್, ಎಣ್ಣ್‌ವಕಯ್ಯತ ಬಾನತ್ ಮೀನ್‍ರನೆಕೆಯು, ಕಡಕರೆಲ್ ಲೆಕ್ಕ ಮಾಡ್‌ವಕ್ ಕಯ್ಯತ ಮಣತ್‍ರನೆಕೆಯು ದುಂಬ ಜನ ಪುಟ್ಟ್‌ಚಿ. 13 ಈಂಗೆಲ್ಲಾ ದೇವ ವಾಗ್ದಾನ ಮಾಡ್‍ನದ್‍ನ ಪಡಯತೆ, ದೂರತ್‍ಲ್ ಅದ್‍ನ ನೋಟಿತ್, ನಂಬಿಕೇಲ್ ಮನಸ್ಸ್‌ಲ್ ಎಡ್‍ತಂಡ್, ಈ ಲೋಕತ್‍ಲ್ ಅಯಿಂಗಳ ಅನ್ಯ ಜನ ಪಿಂಞ ಜಾಗ ಇಲ್ಲತಯಿಂಗಾಂದ್ ಅರಿಕೆ ಮಾಡಿಯಂಡ್ ನಂಬಿಕೇಲ್ ಚತ್ತ್ ಪೋಚಿ. 14 ಇನ್ನನೆ ಅರಿಕೆ ಮಾಡ್‌ವಯಿಂಗ ಅಯಿಂಗಡ ಸ್ವಂತ ದೇಶಕ್ ಪೋಯಂಡ್ ಉಂಡ್‍ೕಂದ್ ಎಣ್ಣಿಯಂಡುಂಡ್. 15 ಅಯಿಂಗ ಬುಟ್ಟಿತ್ ಬಂದ ದೇಶತ್‍ನ ಗೇನ ಮಾಡಿಯಂಡ್ ಇಂಜತೇಂಗಿ, ಅಯಿಂಗ ಪುನಃ ವಾಪಸ್ ಪೋಪಕ್ ಅಯಿಂಗಕ್ ಸಮಯ ಕ್‍ಟ್ಟ್‌ವಕಿಂಜತಲ್ಲಾ? 16 ಆಚೇಂಗಿ, ಅಯಿಂಗ ಬುಟ್ಟಿತ್ ಬಂದ ದೇಶಕಿಂಜ ವಿಶೇಷವಾಯಿತುಳ್ಳ ಪರಲೋಕತ್‍ರ ದೇಶತ್‍ನ ಕುಶಿಪಟ್ಟತ್; ಆನಗುಂಡ್ ದೇವ, ಅಯಿಂಗಡ ದೇವಾಂದ್ ಕಾಕುವಕ್ ಞಾಣ ಪಡುಲೆ; ಅಯಿಂಗಕಾಯಿತ್ ಒರ್ ಪಟ್ಟಣತ್‍ನ ತಯಾರ್ ಮಾಡ್‍ಚಿ. 17 ನಂಬಿಕೇರ ಮೂಲಕ, ಅಬ್ರಹಾಮ ದೇವ ಅಂವೊನ ಪರೀಕ್ಷೆ ಮಾಡ್‌ವಕ, ಇಸಾಕನ ಬಲಿಯಾಯಿತ್ ಅರ್ಪಿಚಿಟ್ಟತ್. ದಾಡ ವಿಷಯತ್ ವಾಗ್ದಾನ ಕ್‍ಟ್ಟ್‌ಚೋ, ಅಂವೊ ತಾಂಡ ಒರೇ ಮೋಂವೊನಾಯಿತ್ಂಜತೇಂಗಿಯು ಅರ್ಪಣೆ ಮಾಡ್‍ಚಿ. 18 ಈ ಇಸಾಕಂಡ ಮೂಲಕವೇ ನೀಡ ಸಂತಾನ ಕಾಕ್‍ವಕ್ ಆಪಾಂದ್ ಅಬ್ರಹಾಮಂಗ್ ಎಣ್ಣಿತ್ಂಜತ್. 19 ಇಸಾಕ ಚತ್ತ್ ಪೋಚೇಂಗಿಯು, ಅಂವೊನ ದೇವ ಜೀವವಾಯಿತ್ ಎಪ್ಪ್‌ಚಿಡ್‌ವಕ್ ಶಕ್ತಿ ಉಳ್ಳಂವೋಂದ್ ನಂಬ್‍ಚಿ, ಅನ್ನನೆ ಅಂವೊಂಗ್ ಇಸಾಕ ಪುನಃ ಚಾವ್‍ಯಿಂಜ ಕ್‍ಟ್ಟ್‌ನನೆಕೆ ಆಚಿ. 20 ನಂಬಿಕೇರ ಮೂಲಕ ಇಸಾಕ, ಮಿಂಞಕ್ ಬಪ್ಪ ವಿಷಯತ್‍ಲ್ ಯಾಕೋಬನ ಪಿಂಞ ಏಸಾನ ಆಶೀರ್ವಾದ ಮಾಡ್‍ಚಿ. 21 ನಂಬಿಕೇರ ಮೂಲಕ, ಯಾಕೋಬ, ತಾನ್ ಚಾವಕ್ ಸಮಯ ಬಪ್ಪಕ, ಯೋಸೇಫಂಡ ದಂಡ್ ಮೋನಿಯಂಗಳ ಆಶೀರ್ವಾದ ಮಾಡಿತ್, ತಾಂಡ ಕೈಯಿಲ್ ಇಂಜ ಕೋಲ್‍ಲ್ ತಾಂಗಿಯಂಡ್ ಆರಾದನೆ ಮಾಡ್‍ಚಿ. 22 ನಂಬಿಕೇರ ಮೂಲಕ ಯೋಸೇಫ, ಇಸ್ರಾಯೇಲ್ ಜನ ಐಗುಪ್ತ ದೇಶತ್ಂಜ ಪೊರಟಿತ್ ಪೋಪಾಂದ್ ಅಂವೊಂಡ ವಯಸಾನ ಕಾಲತ್‍ಲ್ ಗೊತ್ತಾಯಿತ್, ಅಯಿಂಗ ಪೋಪಕ, ತಾಂಡ ಮೂಳೆಯಳ ಎಡ್‍ತಂಡ್ ಪೋಪಕ್ ಹುಕುಮ್ ಕೊಡ್‍ತತ್. 23 ನಂಬಿಕೇರ ಮೂಲಕ, ಮೋಶೇರ ಅಪ್ಪವ್ವ, ಮೋಶೆ ಚಾಯಿ ಉಂಡ್‍ೕಂದ್ ನೋಟಿತ್, ಐಗುಪ್ತ ರಾಜಂಡ ಆಜ್ಞೆಕ್ ಬೊತ್ತತೆ, ಮೂಂದ್ ತಿಂಗ ಒಳ್‌ಪ್‌ಚಿಟ್ಟಿತ್ ಬೆಚ್ಚತ್. 24 ನಂಬಿಕೇರ ಮೂಲಕ, ಮೋಶೆ ಬಲ್ಯಂವೊನಾಪಕ, ಐಗುಪ್ತ ದೇಶತ್‍ರ ರಾಜನಾನ ಫರೋಹನಂಡ ಮೋವಡ ಕ್‍ಣ್ಣಂದ್ ಜನ ಕಾಕ್‌ವದ್‍ನ ತಿರಸ್ಕಾರ ಮಾಡ್‍ಚಿ. 25 ಚೆನ್ನ ಕಾಲ ಮಾತ್ರ ಕುಶಿ ತಪ್ಪ ಪಾಪಕಿಂಜ, ದೇವಡ ಮಕ್ಕಡ ಕೂಡೆ ಕಷ್ಟತ್‍ನ ಅನುಬವಿಚಿಡುವದ್‍ನ ಗೊತ್ತ್ ಮಾಡ್‍ಚಿ. 26 ಐಗುಪ್ತ ದೇಶತ್‍ರ ಆಸ್ತಿಕಿಂಜ ಕ್ರಿಸ್ತಂಗಾಯಿತ್ ಕ್‍ಟ್ಟುವ ಅವಮಾನತ್‍ನ ಬಲ್ಯ ಆಸ್ತಿಯಾಯಿತ್ ಲೆಕ್ಕ ಮಾಡಿತ್, ಇಂಞು ಮಿಂಞಕ್ ಬಪ್ಪಕುಳ್ಳ ಪ್ರತಿಫಲಕಾಯಿತ್ ನೋಟಿಯಂಡಿಂಜತ್. 27 ನಂಬಿಕೇರ ಮೂಲಕ ಅಂವೊ, ಐಗುಪ್ತ ದೇಶತ್‍ನ ಬುಟ್ಟಿತ್ ಅಲ್ಲಿಯತ್‍ರ ರಾಜಂಡ ಚೆಡಿಕ್ ಬೊತ್ತತೆ ಪೊರಟಿತ್ ಪೋಚಿ. ಎನ್ನಂಗೆಣ್ಣ್‌ಚೇಂಗಿ, ದಾರೂ ಕಾಂಬಕಯ್ಯತ ದೇವನ ಅಂವೊ ನೋಟ್‌ನನೆಕೆ ತಾಳ್ಮೆಲ್ ಮಿಂಞಕ್ ಪೋಚಿ. 28 ನಂಬಿಕೇರ ಮೂಲಕ, ಐಗುಪ್ತ ದೇಶತ್ ಜನತ್‍ರ ಆದ್ಯ ಕ್‍ಣ್ಣ ಮಕ್ಕಳ ದೇವ ಒರ್ ದೂತನ ಅಯಿಚಿತ್ ಕೊಲ್ಲ್‌ವಕ, ಆ ದೂತ ಇಸ್ರಾಯೇಲ್ ಜನತ್‍ಲ್ ದಾರ್‌ನು ಮುಟ್ಟತನೆಕೆ, ಪಸ್ಕ ನಮ್ಮೆರ, ಚೋರೆನ ಮನೆರ ಪಡಿಲ್ ತಳಿಪ ನೇಮತ್‍ನ ಮಾಡ್‍ಚಿ. 29 ನಂಬಿಕೇರ ಮೂಲಕ, ಇಸ್ರಾಯೇಲ್ ಜನ ಚೋಂದ ಸಮುದ್ರತ್‍ನ ಒರ್ ಒಣಂಗ್‍ನ ನೆಲತ್‌ಲ್ ನಡ್ಂದ್ ಪೋಪನೆಕೆ ದಾಟಿತ್ ಪೋಚಿ; ಐಗುಪ್ತ ದೇಶತ್‍ರ ಜನ ಅನ್ನನೆ ಮಾಡ್‌ವಕ ಅಯಿಂಗ ಮುಳ್‍ಗಿ ಪೋಚಿ. 30 ನಂಬಿಕೇರ ಮೂಲಕ ಯೆರಿಕೋ ಪಟ್ಟಣತ್‍ರ ಗೋಡೆನ ಏಳ್ ದಿನ ಅಯಿಂಗ ಸುತ್ತ್‌ನ ಪಿಂಞ ಆ ಗೋಡೆ ಬುದ್ದತ್. 31 ನಂಬಿಕೇರ ಮೂಲಕ, ಯೆರಿಕೋ ಪಟ್ಟಣತ್‍ರ ರಾಹಾಬ ಎಣ್ಣುವ ವೇಶಿ, ಗುಪ್ತಚಾರಂಗಳ ಸಮಾದಾನತ್‍ಲ್ ವಾಪಸ್ ಅಯಿಚಿತ್, ತಗ್ಗಿತ್ ನಡ್‌ಕತಯಿಂಗಡ ಕೂಡೆ ಪಾಳಾಯಿ ಪೋಕತೆ ಬಚಾವಾಚಿ. 32 ಇಂಞು ಮಿಂಞಕ್ ನಾನ್ ಎಂತ ಎಣ್ಣ್‌ವಿ? ಗಿಡಿಯೋನ, ಬಾರಾಕ, ಸಂಸೋನ, ಎಫ್‌ಥ, ದಾವೀದ, ಸಮುವೇಲ, ಪಿಂಞ ಪ್ರವಾದಿಯಂಗಡ ವಿಷಯತ್‍ನ ವಿವರಿಚಿಡಂಡೂಂದ್ ಎಣ್ಣ್‌ಚೇಂಗಿ, ಇಕ್ಕ ಸಮಯ ಇಲ್ಲೆ. 33 ನಂಬಿಕೇರ ಮೂಲಕ ಅಯಿಂಗ ರಾಜ್ಯಂಗಳ ಗೆದ್ದತ್, ನೀತಿಲ್ ಆಳ್ವಿಕೆ ಮಾಡ್‍ಚಿ, ವಾಗ್ದಾನ ಪಡ್ಂದತ್, ಸಿಂಹತ್‍ರ ಬಾಯಿನ ಮುಚ್ಚತ್. 34 ತಿತ್ತ್‌ಕ್ ಇಟ್ಟತೇಂಗಿಯು ಬೆಂಜಿತ್‌ಲ್ಲೆ, ಬಾಳ್‌ಕತ್ತಿಕ್ ಬಚಾವಾಚಿ, ಶಕ್ತಿ ಇಲ್ಲತೆ ಇಪ್ಪಕ ಶಕ್ತಿ ಪಡ್ಂದತ್, ಯುದ್ದ ಮಾಡ್‌ವದ್‍ಲ್ ಬಲ್ಯಂಗಳಾಚಿ, ಅನ್ಯ ಸೇನೇನ ದೌತ್‌ಚಿ. 35 ಚತ್ತ್ ಪೋನಯಿಂಗಳ, ಪೊಣ್ಣಾಳುವ ಪುನಃ ಜೀವತ್‍ಲ್ ಪಡ್ಂದತ್; ಬೋರೆ ಚೆನ್ನ ಜನ ಬಲ್ಯ ವಿಶೇಷವಾಯಿತುಳ್ಳ ಜೀವತ್‍ನ ಪಡೆಯುವಕಾಯಿತ್ ಬುಡುಗಡೆ ಆಪಕ್ ಒತ್ತತೆ, ಹಿಂಸೆನೆ ಸಹಿಸಿಯಂಡತ್. 36 ಬೋರೆ ಚೆನ್ನ ಜನ, ಅವಮಾನ ಪಟ್ಟಂಡ್, ಜನಡ ಕೈಯಿಂಜ ಪೊಯಿತ್ ಕ್‌ಟ್ಟಿಯಂಡ್, ಸರ್ಪಣಿಲ್ ಕೈದಿಯಾಯಿತ್ ಇಂಜಂಡ್ ಜೈಲ್‌ಕ್ ಪೋಚಿ. 37 ಚೆನ್ನ ಜನಕ್ ಕಲ್ಲ್ ಕನ್‍ಚತ್, ಈರ್ಚ್ ಬಾಳ್‍ರಗುಂಡ್ ದಂಡಾಯಿತ್ ಮುರಿಚತ್, ಬಾಳ್‌ಕತ್ತಿರಗುಂಡ್ ಕೊಂದತ್, ಆಡ್‍ರ ತೋಲ್ ಪಿಂಞ ಕೊರಿರ ತೋಲ್‍ನ ಇಟ್ಟಂಡ್ ತಿರ್‌ಗಿಯಂಡ್, ಬೋಂಡಿಯಾನದ್ ಇಲ್ಲತೆ, ಕಷ್ಟಪಟ್ಟಿತ್, ಹಿಂಸೆನೆ ಸಹಿಸಿಯಂಡ್ ಇಂಜತ್. 38 ಈ ಲೋಕ ಅಯಿಂಗಕ್ ಯೋಗ್ಯವಾಯಿತ್ಂಜಿತ್‌ಲ್ಲೆ; ಅಯಿಂಗ ಮಣಬೂಮಿಲ್, ಕುಂದ್‍ಲ್, ಗುವೆಲ್, ನೆಲತ್‍ರ ತೂತತ್‍ಲ್ ತಿರ್‌ಗಿಯಂಡ್ ಇಂಜತ್. 39 ಈಂಗ ಎಲ್ಲಾರ್‌ಕು ನಂಬಿಕೇರ ಮೂಲಕ ಚಾಯಿ ಸಾಕ್ಷಿ ಕ್‍ಟ್ಟಿಪೋಚೇಂಗಿಯು, ವಾಗ್ದಾನ ಮಾಡ್‍ನದ್‍ನ ಪಡೆಯುವಕ್ ಕಯಿಂಜಿತ್‌ಲ್ಲೆ. 40 ಅಯಿಂಗ ನಂಗಳ ಬುಟ್ಟಿತ್ ಪೂರ್ತಿಯಾನಯಿಂಗಳಾಯಿತ್ ಆಕತನೆಕೆ, ವಿಷೇವಾಯಿತುಳ್ಳ ಒರ್ ಬಲ್ಯ ವಿಷಯತ್‍ನ ದೇವ ನಂಗಕಾಯಿತ್ ಮಿಂಞಲೇ ನೇಮಿಚಿಟ್ಟಿತುಂಡ್. |
© 2017, New Life Literature (NLL)