ಇಬ್ರಿಯ 10 - ಕೊಡವ ಬೈಬಲ್1 ನ್ಯಾಯಪ್ರಮಾಣಾಂದ್ ಎಣ್ಣುವದ್, ಇಂಞು ಮಿಂಞಕ್ ಬಪ್ಪಕುಳ್ಳ ನಲ್ಲ ವಿಷಯಕ್ ಒರ್ ನೆಳವಾಯಿತ್ ಮಾತ್ರ ಇಂಜತ್, ಅದಾಯಿತೇ ನೇರಾನದ್ ಅಲ್ಲ. ಈ ಕಾರಣಕಾಯಿತ್, ಕಾಲಕಾಲಕ್ ಎಡೆಬುಡತೆ ಮಾಡ್‌ವ ಒರೇ ತರ ಬಲೀರಗುಂಡ್, ಆರಾದನೆ ಮಾಡ್‌ವಕ್ ಬಪ್ಪಯಿಂಗಳ ಏದ್ ಕಾಲಕು ದೇವಡ ಮಿಂಞತ್ ತ್‍ೕರ ಪೂರ್ತಿ ಮಾಡ್‌ವಕ್ ಕಯ್ಯುಲೆ. 2 ಅನ್ನನೆ ತ್‍ೕರ ಪೂರ್ತಿಮಾಡ್‌ವದಾಚೇಂಗಿ, ಆರಾದನೆ ಮಾಡ್‌ವಯಿಂಗ ಒರ್ ಕುರಿ ತ್‍ೕರ ಕತ್ತಿತಾನ ಪಿಂಞ, ಇಂಞು ಅಯಿಂಗಡಲ್ಲಿ ಪಾಪ ಉಂಡ್‍ೕಂದ್ ಅಯಿಂಗಕ್ ಎಣ್ಣುವ ಅಯಿಂಗಡ ಮನಸಾಕ್ಷಿ ಇಲ್ಲತಾಯಿ ಪೋಪ. ಅಕ್ಕ, ಇನ್ನನೆ ಬಲಿ ಕೊಡ್‍ಪದ್‍ನ ನಿಪ್ಪ್‌ಚಿಡುವಲ್ಲ? 3 ಅನ್ನನೆ ಬಲಿನ ನಿಪ್ಪ್‌ಚಿಡತಗುಂಡ್, ಪಾಪ ಇಂಞು ಉಂಡ್‍ೕಂದ್ ಓರೋರ್ ಕಾಲಕು ಅದ್ಂಡ ಮೂಲಕ ಗೇನ ಬಂದಂಡುಂಡ್. 4 ಎನ್ನಂಗೆಣ್ಣ್‌ಚೇಂಗಿ, ಎತ್ತ್ ಪಿಂಞ ಕೋಬಾಡ್‍ರ ಚೋರೆ, ಒಬ್ಬನ ಪಾಪತ್ಂಜ ವಿಮೋಚನ ಮಾಡ್‌ವಕ್ ಕಯ್ಯುಲೆ. 5 ಆನಗುಂಡ್, ಕ್ರಿಸ್ತ ಈ ಲೋಕತ್‍ಲ್ ಬಪ್ಪಕ ಅಂವೊ ದೇವಡ ಪಕ್ಕ: ಬಲಿ ಪಿಂಞ ಕಾಣಿಕೆ ನೀಕ್ ಕುಶಿಯಿಲ್ಲೆ, ಒರ್ ತಡೀನ ನಾಕಾಯಿತ್ ನೀನ್ ತಯಾರ್ ಮಾಡಿಯ; 6 ದಹನ ಬಲಿಯು, ಪಾಪ ಪರಿಹಾರತ್‍ರ ಬಲಿಯು ನೀಕ್ ಕುಶಿಯಿಲ್ಲೇಂದ್ ಎಣ್ಣಿಯ. 7 ಅಕ್ಕ ಕ್ರಿಸ್ತ: ದೇವಾ, ನೀಡ ಪುಸ್ತಕತ್‍ಲ್ ನಾಡ ವಿಷಯತ್ ಎಣ್ಣಿತುಂಡ್; ನೋಟಿ, ನೀಡ ಚಿತ್ತತ್‍ರನೆಕೆ ಮಾಡ್‌ವಕ್ ನಾನ್ ಬಂದಂಡುಳ್ಳ್‌ಂದ್ ಎಣ್ಣ್‌ಚಿ. 8 ನ್ಯಾಯಪ್ರಮಾಣತ್‍ರನೆಕೆ, ಅಯಿಂಗ ಮಾಡಿಯಂಡುಳ್ಳ ಬಲಿರ ವಿಷಯತ್, ಮಿಂಞ ಎಣ್ಣ್‌ನನೆಕೆ: ಬಲಿನ, ಕಾಣಿಕೆನೆ, ದಹನ ಬಲಿನ ಪಿಂಞ ಪಾಪ ಪರಿಹಾರತ್‍ರ ಬಲಿನ ನೀನ್ ಕ್‍ೕಟಿತ್‌ಲ್ಲೆ, ನೀಕ್ ಅದ್‍ಲ್ ಕುಶಿ ಇಲ್ಲೇಂದ್, ಪಿಂಞ 9 ದೇವ, ನೀಡ ಚಿತ್ತತ್‍ರನೆಕೆ ಮಾಡ್‌ವಕ್, ಇಕ್ಕ ನಾನ್ ಬಂದಂಡುಳ್ಳ್‌ಂದ್ ಅಕ್ಕ ಎಣ್ಣ್‌ಚಿ. ದಂಡನೆ ಒಪ್ಪಂದತ್‍ನ ಸ್ತಿರಪಡ್‌ತ್‍ವಕಾಯಿತ್ ಆದ್ಯ ಒಪ್ಪಂದತ್‍ನ ಅಂವೊ ತಳ್ಳಿರ್‌ತ್. 10 ಯೇಸು ಕ್ರಿಸ್ತಂಡ ತಡಿ ಒರೇ ಕುರಿ ಬಲಿಯಾನಗುಂಡ್, ದೇವಡ ಚಿತ್ತತ್‍ರನೆಕೆ ಅದ್ಂಡ ಮೂಲಕ ನಂಗಳ ಪವಿತ್ರವಾನಯಿಂಗಳಾಯಿತ್ ಮಾಡ್‍ಚಿ. 11 ಏದ್ ಯಾಜಕನು, ದಿನಾಲು ಸೇವೆ ಮಾಡ್‍ವಂವೊನಾಯಿತು, ಪಾಪಕ್ ಏದ್ ಕಾಲತ್‍ಲು ವಿಮೋಚನ ತಪ್ಪಕ್ ಕಯ್ಯತ ಒರೇ ತರ ಬಲಿನ ಪುನಃ ಪುನಃ ಅರ್ಪಿಚಿಡುವಂವೊನಾಯಿತು ಇಂಜತ್. 12 ಆಚೇಂಗಿ ಕ್ರಿಸ್ತನಾನ ಈ ಮಾಹಾ ಯಾಜಕ, ಪಾಪತ್‍ರ ವಿಮೋಚನಕಾಯಿತ್ ಒರೇ ಬಲಿನ ಕೊಡ್‌ತಿತ್ ದೇವಡ ಬಲ್‌ತೆ ಬರಿಲ್ ಅಳ್‌ತತ್. 13 ತಾಂಡ ವಿರೋದಿಯಳ ತಾಂಡ ಕಾಲ್‍ರ ಅಡಿಕ್ ಇಡ್‍ವಕತ್ತನೆ ಅಲ್ಲಿ ಇಂಜಿತ್ ಪಾರಕಾತಂಡುಂಡ್. 14 ಎನ್ನಂಗೆಣ್ಣ್‌ಚೇಂಗಿ, ಪವಿತ್ರವಾನಯಿಂಗಳಾಯಿತ್ ಮಾಡ್‍ನಯಿಂಗಳ ಒರೇ ಬಲಿರ ಮೂಲಕ ಇಂವೊ ಎಕ್ಕಾಲು ಪೂರ್ತಿ ಮಾಡಿತುಂಡ್. 15 ಈ ವಿಷಯತ್ ಪವಿತ್ರಾತ್ಮ ಸಹ ನಂಗಕ್ ಸಾಕ್ಷಿಯಾಯಿತ್ ಎಣ್ಣಿಯಂಡುಂಡ್. 16 ಈ ಕಾಲ ಆನ ಪಿಂಞ ನಾನ್ ಅಯಿಂಗಡ ಕೂಡೆ ಮಾಡ್‌ವ ಒಪ್ಪಂದ ಎಂತ ಎಣ್ಣ್‌ಚೇಂಗಿ: ನಾನ್ ನಾಡ ನ್ಯಾಯಪ್ರಮಾಣತ್‍ನ ಅಯಿಂಗಡ ಹೃದಯತ್‍ಲ್ ಬೆಚ್ಚಿತ್, ಅಯಿಂಗಡ ಮನಸ್ಸ್‌ಲ್ ಅದ್‍ನ ಒಳ್‍ದ್‌ವೀಂದ್ ಒಡೆಯ ಎಣ್ಣಿಯಂಡುಂಡ್‍ೕಂದ್ ಉಳ್ಳದೇ ಆ ಒಪ್ಪಂದ. 17 ಅಯಿಂಗಡ ಪಾಪತ್‍ನ ಪಿಂಞ ಅಯಿಂಗಡ ಅಕ್ರಮತ್‌ನ ಅದಲ್ಲತೆ ಅಯಿಂಗಡ ಪಾಪತ್‍ನ ಪಿಂಞ ದಷ್ಟತನತ್‌ನ ಇಂಞು ಮಿಂಞಕ್ ನಾಡ ನೆನಪ್‍ಲ್ ಬೆಪ್ಪ್‌ಲೇಂದ್ ಉಳ್ಳದ್‍ನ ಎಣ್ಣಿಯಂಡುಂಡ್. 18 ಅನ್ನನೆ ಪಾಪಕ್ ಮನ್ನಿಪ್ ಕ್‍ಟ್ಟಿತುಂಡೇಂಗಿ, ಇಂಞು ಮಿಂಞಕ್ ಬಲಿ ಕೊಡ್‍ಪಕ್ ಅವಸ್ಯ ಇಲ್ಲೆ. ನಂಗಕ್ ದೇವಡ ಪಕ್ಕ ಬಪ್ಪಕುಳ್ಳ ಬಟ್ಟೆ 19 ಆನಗುಂಡ್ ನಾಡ ಅಣ್ಣತಮ್ಮಣಂಗಳೇ, ಯೇಸುರ ಚೋರೆರ ಮೂಲಕ ಅತಿಪವಿತ್ರವಾನ ಜಾಗಕ್ ಪೋಪಕುಳ್ಳ ದೈರ್ಯ ನಂಗಕ್ ಇಕ್ಕ ಕ್‍ಟ್ಟ್‌ಚಿ. 20 ಅದ್ ಎನ್ನನೆ ಎಣ್ಣ್‌ಚೇಂಗಿ, ಪಡಿರ ಬಟ್ಟೇರನೆಕೆ ಉಳ್ಳ ತಾಂಡ ತಡೀರ ಮೂಲಕ ನಂಗಕಾಯಿತ್ ಪುದಿಯ ಪಿಂಞ ಜೀವವಾಯಿತುಳ್ಳ ಬಟ್ಟೇನ ತೊರ್ಂದತ್. 21 ಪಿಂಞ ದೇವಡ ಮನೆರ ಮೇಲೆ ಅದಿಕಾರಿಯಾಯಿತುಳ್ಳ ಮಹಾ ಯಾಜಕನಾನ ಒಬ್ಬ ನಂಗಕಾಯಿತ್ ಉಂಡ್. 22 ಆನಗುಂಡ್, ದೇವಡ ಪಕ್ಕ, ನೇರಾನ ಹೃದಯ ಉಳ್ಳಯಿಂಗಳಾಯಿತ್, ನಂಬಿಕೇರ ಪೂರ್ತಿ ನಿಶ್ಚಯ ಉಳ್ಳಯಿಂಗಳಾಯಿತ್ ಪೋಕ. ನಂಗಡ ಪಾಳಾಯಿ ಪೋನ ಮನಸಾಕ್ಷಿನ ಕಳೆಂದಿತ್ ಶುದ್ದ ಆಪಕಾಯಿತ್ ಕ್ರಿಸ್ತಂಡ ಚೋರೆನ ತಳಿಚತ್, ಶುದ್ದವಾನ ನೀರ್‌ಲ್ ನಂಗಡ ತಡೀನ ಕತ್ತ್‌ನಯಿಂಗಳಾಯಿತ್ ಪೋಕ. 23 ನಂಗಡ ನಂಬಿಕೇನ ಅರಿಕೆ ಮಾಡ್‌ವದ್‍ಲ್ ದೈರ್ಯತ್‍ಲ್ ಸ್ತಿರವಾಯಿತ್ ನಿಕ್ಕಂಡು, ಎನ್ನಂಗೆಣ್ಣ್‌ಚೇಂಗಿ ವಾಗ್ದಾನ ಮಾಡ್‍ನಂವೊ ಸತ್ಯವಂತಂವೊನಾಯತುಂಡ್. 24 ನಂಗ ಒಬ್ಬೊಬ್ಬಂಗ್ ಪ್ರೀತಿಲ್ ಪಿಂಞ ನಲ್ಲ ಕೆಲಸ ಮಾಡ್‌ವದ್‍ಲ್ ಎನ್ನನೆ ಸಹಾಯ ಮಾಡ್‌ವಕ್ ಕಯ್ಯೂಂದ್ ಗೇನ ಮಾಡಿಯಂಡ್ ಇರಂಡು. 25 ಚೆನ್ನ ಜನ ಸಬೇಕ್ ಬಪ್ಪದ್‍ನ ಬುಡುವನೆಕೆ ನಂಗಳು ಬುಡತೆ, ಒಬ್ಬೊಂಗೊಬ್ಬ ಬುದ್ದಿ ಎಣ್ಣಿಯಂಡ್ ಇಕ್ಕಂಡು. ಅಂವೊ ಪುನಃ ಬಪ್ಪ ದಿವಸ ಪಕ್ಕ ಬಂದಂಡ್ ಉಳ್ಳದ್‍ನ ನಿಂಗ ಎಚ್ಚಕ್ ನೋಟಿಯಂಡುಳ್ಳಿರೋ, ಅಚ್ಚಕ್ ಎಚ್ಚರ ಎಡ್‌ಕಂಡು. 26 ಸತ್ಯ ಎಂತ್‍ೕಂದ್ ಗೊತ್ತಾನ ಪಿಂಞ, ನಂಗ ಮನಪೂರ್ವವಾಯಿತ್ ಪಾಪ ಮಾಡ್‍ಚೇಂಗಿ, ಪಾಪತ್‍ರ ವಿಮೋಚನಕಾಯಿತ್ ಕೊಡ್‍ಪಕ್, ಬೋರೆ ಏದ್ ಬಲಿಯು ಇಲ್ಲೆ. 27 ಆನಗುಂಡ್, ದೇವಡ ನ್ಯಾಯತೀರ್ಪ್ ಬಪ್ಪಾಂದ್ ಪೋಡಿಲ್ ನೋಟಿಯಂಡ್ ಮಾತ್ರ ಬದ್‍ಕಂಡು. ಅಯಿಂಗಕ್, ವಿರೋದಿಯಳ ಕತ್ತ್‌ಚಿಡುವ ದೇವಡ ಚೆಡಿರ ತಿತ್ತ್ ಉಂಡ್‍ೕಂದ್ ಗೊತ್ತಿರಡ್. 28 ಮೋಶೇರ ನ್ಯಾಯಪ್ರಮಾಣತ್‍ನ ತ್‍ಕ್ಕಾರ ಮಾಡ್‍ನಂವೊಂಗ್ ದಂಡ್ ಅಥವ ಮೂಂದ್ ಸಾಕ್ಷಿರ ಮೂಲಕ ಮರಣ ಶಿಕ್ಷೆ ಕೊಡ್‍ಪಕ್ ಬಟ್ಟೆ ಉಂಡಲ್ಲಾ? 29 ದೇವಡ ಮೋಂವೊನ ತಾಂಡ ಕಾಲ್‍ರ ಅಡಿಕ್ ಇಟ್ಟಿತ್ ಬೋಂಡಾಂದ್ ಎಣ್ಣಿತ್, ತನ್ನ ಪವಿತ್ರ ಮಾಡ್‍ನ ಒಪ್ಪಂದತ್‍ರ ಚೋರೆನ ಅಶುದ್ದಾಂದ್ ಗೇನ ಮಾಡಿತ್, ಕೃಪೇರ ಆತ್ಮತ್‌ನ ತ್‍ಕ್ಕಾರ ಮಾಡ್‌ವಂವೊ ಎಚ್ಚಕ್ ಬಲ್ಯ ದಂಡನೆಕ್ ಯೋಗ್ಯನಾಯಿತ್‌ಪ್ಪಾಂದ್ ಗೇನ ಮಾಡಿಯೊಳಿ. 30 ಪಗೆ ತ್‍ೕಪದ್ ನಾಡ ಕೆಲಸ, ನಾನೇ ಪಗೆ ತ್‍ೕಪೀಂದ್ ಒಡೆಯ ಎಣ್ಣ್‌ಚೀಂದು, ಒಡೆಯ ತಾಂಡ ಜನಕ್ ನ್ಯಾಯತೀರ್ಪ್ ತಪ್ಪಾಂದ್ ಎಣ್ಣ್‌ನಂವೊ ದಾರ್‍ೕಂದು ನಂಗಕ್ ಗೊತ್ತುಂಡ್. 31 ಜೀವವಾಯಿತುಳ್ಳ ದೇವಡ ಕೈಯಿಲ್ ಚಿಕ್ಕಿ ಪೋಪದ್ ಎಚ್ಚಕ್ ಬಯಂಕರವಾಯಿತ್‌ಪ್ಪ. 32 ಕ್ರಿಸ್ತಂಡ ವಿಷಯತ್‍ನ ಗೊತ್ತ್ ಮಾಡ್‍ನ ಆ ದಿವಸತ್‍ನ ಗೇನ ಮಾಡಿಯೊಳಿ. ಆ ಕಾಲತ್‍ಲ್ ಎಚ್ಚಕ್ ಬಲ್ಯ ಹಿಂಸೆನ ನಿಂಗ ಸಹಿಸಿಯಂಡ್ ಇಂಜಿರ. 33 ಆ ಕಾಲತ್‍ಲ್ ಚೆನ್ನ ಸಮಯತ್‍ಲ್ ನಿಂಗಳ ಎಲ್ಲಾಡ ಮಿಂಞತ್ ಅವಮಾನ ಮಾಡಿತ್, ಹಿಂಸೆಯು ಮಾಡ್‍ಚಿ. ಚೆನ್ನ ಸಮಯತ್‍ಲ್, ನಿಂಗಡ ಕೂಟ್‌ಲ್ ಇಂಜಯಿಂಗಕ್ ಅನ್ನನೆ ಮಾಡ್‍ಚಿ, ಅದ್‍ನಗುಂಡ್ ನಿಂಗಕ್ ಕಷ್ಟ ಆಚಿ. 34 ಕ್ರಿಸ್ತಂಗಾಯಿತ್ ಜೈಲ್‍ಲ್ ಕೈದಿಯಾಯಿತ್ ಇಂಜಯಿಂಗಕ್ ಕನಿಕರ ಕಾಟಿತುಳ್ಳಿರ, ನಿಂಗಡ ಆಸ್ತಿ ನಿಂಗಳ ಬುಟ್ಟಿತ್ ಪೋಪಕ, ನಿಂಗಕ್ ಪರಲೋಕತ್‍ಲ್ ಇದ್‌ಂಗಿಂಜ ಚಾಯಾನದು, ಪಾಳಾಯಿ ಪೋಕತದುವಾಯಿತುಳ್ಳ ಆಸ್ತಿ ಉಂಡ್‍ೕಂದ್ ಗೊತ್ತಾನಗುಂಡ್, ಸುಲ್‌ಗೆ ಮಾಡ್‌ವಕ್ ಕುಶೀಲ್ ಬುಟ್ಟಿರ. 35 ಆನಗುಂಡ್, ನಿಂಗಡ ದೈರ್ಯತ್‍ನ ಕಳೆಯುವಕ್ಕಾಗ, ಅದ್ ನಿಂಗಕ್ ಬಲ್ಯ ಪ್ರತಿಫಲ ತಪ್ಪ. 36 ನಿಂಗ ದೇವಡ ಚಿತ್ತತ್‍ರನೆಕೆ ಮಾಡಿತ್ ವಾಗ್ದಾನ ಮಾಡ್‍ನದ್‍ನ ಪಡೆಯುವಕ್ ನಿಂಗಕ್ ದುಂಬ ತಾಳ್ಮೆ ಬೋಂಡಿತುಂಡ್. 37 ಇಂಞು ಚೆನ್ನ ಸಮಯತ್‍ಲ್ ಬಪ್ಪಾಂದ್ ಎಣ್ಣ್‌ನಂವೊ ಬಪ್ಪ, ತಡೆ ಮಾಡುಲೆ. 38 ನಂಬಿಕೇರ ಮೂಲಕ ನೀತಿವಂತಯಿಂಗ ಬದ್‍ಕ್‍ವ, ಅದ್‍ನ ಅಂವೊ ಬುಟ್ಟಿತ್ ಪೋಚೇಂಗಿ, ನಾನ್ ಅಂವೊಂಡ ಮೇಲೆ ಕುಶಿಪಡುಲೇಂದ್ ದೇವ ಎಣ್ಣ್‌ಚಿ. 39 ಆಚೇಂಗಿ ನಂಗ ದೇವನ ಬುಟ್ಟಿತ್ ಪಾಳಾಯಿ ಪೋಪಯಿಂಗ ಅಲ್ಲ, ಆತ್ಮಕ್ ರಕ್ಷಣೆ ಕ್‍ಟ್ಟುವಕಾಯಿತ್ ನಂಬಿಕೆ ಉಳ್ಳಯಿಂಗಳಾಯಿತುಂಡ್. |
© 2017, New Life Literature (NLL)