ಆದ್ಯತ್‌ರ ಪುಸ್ತಕ 6 - ಕೊಡವ ಬೈಬಲ್ನೋಹಂಡ ಚರಿತ್‌ರ 1 ಜನ ಬೂಮಿರ ಮೇಲೆ ದುಂಬಿಯಂಡ್‌ ಇಂಜತ್. ಅನ್ನನೆ ಅಯಿಂಗಕ್‌ ಮೂಡಿ ಮಕ್ಕ ಪುಟ್ಟ್‌ವಕ, 2 ದೇವಡ ಗುಣಕ್‌ ಕೂಡ್‌ನ ಕ್‌ಣ್ಣ ಮಕ್ಕ, ಈ ಲೋಕತ್‌ರ ಗುಣಕ್‌ ಕೂಡ್‌ನ ಮೂಡಿಯ ಕಾಂಬಕ್‌ ಚಾಯ ಉಂಡ್‍ೕಂದ್‌ ಕಂಡಿತ್, ಅಯಿಂಗಕ್‌ ಕುಶಿಯಾನ ಮೂಡಿಯಳ ಅಯಿಂಗಕಯಿಂಗಕ್‌ ಪೊಣ್ಣಾಯಿತ್‌ ಗೊತ್ತ್‌ ಮಾಡಿಯಂಡತ್. 3 ಅಕ್ಕ ಯೆಹೋವ: ನಾಡ ಆತ್ಮ ಮನುಷ್ಯಂಗಡಗುಂಡ್‌ ಕಾಲಕಾಲಕು ಪೊರುಮೆಯಾಯಿತ್‌ ಇಪ್ಪುಲೆ, ಅಂವೊ ನಾಶ ಆಯಿಪೋಪ ಜೀವ ತಾನೇ, ಅಂವೊಂಡ ಬದ್‌ಕ್‌ ನೂಟ್ಯ ಇರ್ವದ್‌ ಕಾಲ ಇರಡ್‍ೕಂದ್‌ ಎಣ್ಣ್‌ಚಿ. 4 ಆ ಕಾಲತ್‌ ಲೋಕತ್‌ಲ್‌ ರಾಕ್‌ಶಸ ಮನುಷ್ಯಂಗ ಇಂಜತ್. ಅಲ್ಲಿಯಿಂಜ, ದೇವಡ ಗುಣಕ್‌ ಕೂಡ್‌ನಯಿಂಗ ಈ ಲೋಕತ್‌ರ ಗುಣಕ್‌ ಕೂಡ್‌ನ ಮೂಡಿಯಡ ಕೂಡೆ ಕೂಡ್‌ನಗುಂಡ್‌ ಅಯಿಂಗಕ್‌ ಪುಟ್ಟ್‌ನ ಮಕ್ಕ ಸಹ ಆ ಕಾಲತ್‌ಲ್‌ ಈ ಬೂಮಿರ ಮೇಲೆ ಬಲ್ಯ ಜನಳು ಶಕ್ತಿವಂತಯಿಂಗಳು ಆಯಿತ್‌ಂಜತ್. 5 ಮನುಷ್ಯಂಗಡ ದುಷ್ಟತನ ಬೂಮಿರ ಮೇಲೆ ದುಂಬಿತ್‌ ಅಯಿಂಗ ಗೇನಮಾಡ್‌ವದೆಲ್ಲಾ ಎಕ್ಕಾಲು ಕೆಟ್ಟದಾಯಿತ್‌ ಉಂಡ್‍ೕಂದ್‌ ಯೆಹೋವ ನೋಟ್‌ಚಿ. 6 ಯೆಹೋವ ಮನುಷ್ಯನ ಬೂಮಿರ ಮೇಲೆ ಸೃಷ್ಟಿ ಮಾಡ್‌ನಂಗಾಯಿತ್‌ ಅಂವೊಂಡ ಮನಸ್ಸ್‌ ದುಂಬ ನೊಂದತ್. 7 ಪಿಂಞ ಯೆಹೋವ: ನಾನ್‌ ಸೃಷ್ಟಿ ಮಾಡ್‌ನ ಮನುಷ್ಯ ಜಾತಿನ ಬೂಮಿಯಿಂಜ ನಾಶಮಾಡುವಿ. ಮನುಷ್ಯನ, ಪ್ರಾಣಿಯಳ, ಪಕ್ಷಿಯಳ ಬೂಮಿರ ಮೇಲೆ ಉಳ್ಳ ಎಲ್ಲಾ ಜೀವಜಂತುವಳ ನಾಶಮಾಡುವಿ. ಎನ್ನಂಗೆಣ್ಣ್‌ಚೇಂಗಿ ಅಯಿಂಗಳ ಸೃಷ್ಟಿ ಮಾಡ್‌ನಂಗಾಯಿತ್‌ ನಾಡ ಮನಸ್ಸ್‌ಕ್ ನೊಂಬಲ ಆಯಂಡುಂಡ್‍ೕಂದ್‌ ಎಣ್ಣ್‌ಚಿ. 8 ಆಚೇಂಗಿ ನೋಹಂಗ್ ಯೆಹೋವಂಡ ದಯೆ ಕ್‌ಟ್ಟ್‌ಚಿ. 9 ಇದ್‌ ನೋಹಂಡ ವಂಶಾವಳಿ: ಆ ಕಾಲತ್‌ಲ್‌ ಇಂಜ ಜನಡ ಮದ್ಯತ್‌ ನೋಹ, ನೀತಿವಂತಂವೊನಾಯಿತು, ಓರ್‌ ಕುತ್ತವು ಇಲ್ಲತೆ ಬದಿಕಿಯಂಡಿಂಜ ಒರೇ ಮನುಷ್ಯನು ಆಯಿತ್‌ಂಜತ್. ಅಂವೊ ದೇವಡ ಕೂಡೆ ದುಂಬ ಐಕ್ಯತ್‌ಲ್‌ ನಡ್‌ದಂಡಿಂಜತ್. 10 ನೋಹಂಗ್ ಶೇಮ್, ಹಾಮ್, ಯೆಫತ್‌ ಎಣ್ಣುವ ಮೂಂದ್‌ ಕ್‌ಣ್ಣ ಮಕ್ಕ ಇಂಜತ್. 11 ದೇವಡ ಮಿಂಞತ್‌ ಈ ಲೋಕ ಮೋಸವಾಯಿತ್‌ಂಜತ್‌ ಪಿಂಞ ಈ ಲೋಕತ್‌ಲ್‌ ಅನ್ಯಾಯ ದುಂಬಿತಿಂಜಿತ್. 12 ದೇವ ಈ ಲೋಕತ್‌ನ ನೋಟ್‌ವಕ ಅದ್‌ ಪಾಳಾಯಿತ್‌ಂಜತ್‌ ಪಿಂಞ ಬೂಲೋಕತ್‌ವುಳ್ಳಯಿಂಗೆಲ್ಲಾರು ದುಷ್ಟತನತ್‌ಲ್‌ ಬದ್‌ಕಿಯಂಡಿಂಜತ್. 13 ಅಕ್ಕ ದೇವ ನೋಹಂಗ್: ನಾನ್‌ ಈ ಬೂಲೋಕತ್‌ಲ್‌ ಉಳ್ಳ ಎಲ್ಲಾ ಜೀವಜಂತುವಳ ನಾಶಮಾಡುವಿ, ಅಯಿಂಗಡಗೊಂಡ್‌ ಈ ಬೂಮಿಲ್‌ ಅನ್ಯಾಯ ದುಂಬಿತುಂಡ್, ನಾನ್‌ ಅಯಿಂಗಳ ಪಿಂಞ ಈ ಬೂಮಿನ ನಾಶ ಮಾಡುವಿ. 14 ನೀನ್ ತೂರಾಯಿ ಮರತ್‌ಂಜ ಒರ್‌ ಹಡಗ್‌ನ ಮಾಡ್. ಅದ್‌ಲ್‌ ದುಂಬ ಕೋಂಬರೆ ಇರಂಡು, ಒಳ್‌ಲ್‌ ಪಿಂಞ ಪೊರಮೆ ತಾರ್‌ ಇಡಂಡು. 15 ನೀನ್ ಅದ್‌ನ ಮಾಡ್‌ವ ರೀತಿ ಎನ್ನನೆ ಇರಂಡು ಎಣ್ಣ್‌ಚೇಂಗಿ: ಹಡಗ್‌ ನಾನೂಟ್ಯ ಐಂಬದ್‌ ಅಡಿ ಉದ್ದ, ಎಳ್‌ವತಂಜಿ ಅಡಿ ಅಗಲ, ನಾಪತಂಜಿ ಅಡಿ ಎತ್ತರವಾಯಿತಿರಂಡು. 16 ಹಡಗ್‌ಕ್ ಮೋಂದಾಯತ್‌ನ ಮಾಡಿತ್, ಅದ್‌ಂಡ ಕ್‍ೕದ್‌ಲ್‌ ಪದ್‌ನೆಟ್ಟ್‌ ಅಂಗುಲ ಜಾಗ ಬುಡಂಡು, ಅದ್‌ಂಡ ಪಕ್ಕತ್‌ಲ್‌ ಪಡಿ ಇಡಂಡು. ಹಡಗ್‌ಲ್‌ ಒಂದಡ ಮೇಲೆ ಒಂದಾಯಿತ್‌ ಮೂಂದ್‌ ಮಾಡಿ ಮಾಡಂಡು. 17 ನೋಟ್! ನಾನ್‌ ಈ ಬೂಮಿನ ಜಲಪ್ರಳಯತ್‌ಂಜ ಮುಚ್ಚಿತ್, ಅದ್ಯಿಂಜ ಉಸಿರಾಡಿಯಂಡ್‌ ಉಳ್ಳ ಎಲ್ಲಾ ಜೀವಿಯತ್‌ನ ನಾಶ ಮಾಡುವಿ. ಬೂಮಿರ ಮೇಲೆ ಉಳ್ಳದೆಲ್ಲ ಚತ್ತ್‌ ಪೋಪ. 18 ಆಚೇಂಗಿ ನೀಡ ಕೂಡೆ ನಾನ್‌ ಒಪ್ಪಂದತ್‌ನ ಮಾಡಿತ್ ದೃಡ ಪಡ್‌ತ್‌ವಿ. ಆನಗುಂಡ್, ನೀನ್, ನೀಡ ಕ್‌ಣ್ಣ ಮಕ್ಕ, ನೀಡ ಪೊಣ್ಣ್‌ ಪಿಂಞ ನೀಡ ಮೈಮಕ್ಕ ಹಡಗ್‌ರ ಒಳ್‌ಕ್‌ ಪೋಂಡು. 19 ಇದಲ್ಲತೆ ಜೀವವುಳ್ಳ ಎಲ್ಲಾ ತರತ್‌ರ ಪ್ರಾಣಿಯಡತ್‌ ಆಣ್‍ ಪೊಣ್ಣಾಯಿತ್‌ ಓರೋರ್‌ ಜೊತೆಯಾಯಿತ್‌ ಹಡಗ್‌ರ ಒಳ್‌ಲ್‌ ನೀಡ ಕೂಡೆ ಜೀವಂತವಾಯಿತ್‌ ಇಪ್ಪಕ್‌ ಕೂಟಿಯಂಡ್‌ ಪೋಂಡು. 20 ಎಲ್ಲಾ ತರತ್‌ರ ಪಕ್ಷಿಯಡ ಒರ್‌ ಜೊತೆ, ಎಲ್ಲಾ ತರತ್‌ರ ಪ್ರಾಣಿಯಡತ್‌ ಒರ್‌ ಜೊತೆ ಪಿಂಞ ಬೂಮಿರ ಮೇಲೆ ಪರ್ಪ ಎಲ್ಲಾ ತರತ್‌ರ ಜೀವಜಂತು ಒರ್‌ ಜೊತೆ ಜೀವಂತವಾಯಿತ್‌ ಇಪ್ಪಕ್‌ ನೀಡ ಪಕ್ಕ ಬಪ್ಪ. 21 ನೀಡ ಮನೆಕಾರಕು, ಪ್ರಾಣಿಯಕು ಉಂಬಕ್‌ ಬೋಂಡಿಯಚ್ಚಕ್‌ ಎಲ್ಲಾ ತರತ್‌ರ ಆಹಾರತ್‌ನ ಕೂಟಿ ಬೆಚ್ಚಾಂದ್‌ ಎಣ್ಣ್‌ಚಿ. 22 ದೇವ ಅಪ್ಪಣೆ ಕೊಡ್‌ತನೆಕೆ ನೋಹ ಎಲ್ಲಾನ ಮಾಡ್‌ಚಿ. |
© 2017, New Life Literature (NLL)