ಆದ್ಯತ್‌ರ ಪುಸ್ತಕ 48 - ಕೊಡವ ಬೈಬಲ್1 ಇದಾಯಿತ್‌ ಚೆನ್ನ ಸಮಯ ಆನ ಪಿಂಞ, ಅಂವೊಂಡ ಅಪ್ಪ ದುಂಬ ತಳಂದ್‌ ಪೋಯಂಡುಂಡ್‌ ಎಣ್ಣಿಯಂಡ್‌ ಯೋಸೇಫಂಗ್ ಸುದ್ದಿ ಬಾತ್. ಅಕ್ಕ ಯೋಸೇಫ ತಾಂಡ ದಂಡ್‌ ಕ್‌ಣ್ಣ ಮಕ್ಕಳಾನ ಮನಸ್ಸೆ ಪಿಂಞ ಎಫ್ರಾಯಿಮನ ಕಾಕಿಯಂಡ್‌ ಪೊರ್‌ಟತ್. 2 ಯಾಕೋಬಂಗ್‌ ಯೋಸೇಫ ಬಂದಿತ್‍ೕಂದ್‌ ಗೊತ್ತಾಪಕ, ಅಂವೊ ಶಕ್ತಿ ಕೂಟಿಯಂಡ್‌ ಕಟ್ಟ್‌ರ ಮೇಲೆ ಅಳ್‌ತಂಡತ್. 3 ಯಾಕೋಬ ಯೋಸೇಫನ ನೋಟಿತ್: ಸರ್ವಶಕ್ತನಾನ ದೇವ ಕಾನಾನ್‌ ದೇಶತ್‌ರ ಲೂಜ್ ಎಣ್ಣುವ ಜಾಗತ್‌ಲ್‌ ಅಂವೊನ ನಾಕ್‍ ಕಾಂಬ್‌ಚಿಟ್ಟಿತ್, ನನ್ನ ಆಶೀರ್ವಾದ ಮಾಡಿತ್: 4 ನಾನ್‌ ನಿನ್ನ ಅಬಿವೃದ್ದಿ ಮಾಡಿತ್ ಲೆಕ್ಕ ಮಾಡ್‌ವಕ್‌ ಕಯ್ಯತಚ್ಚಕ್‌ ಜಾಸ್ತಿ ಮಾಡಿತ್, ನಿನ್ನ ಬಲ್ಯ ಗುಂಪ್ರ ಜನಾಂಗಳಾಯಿತ್‌ ಮಾಡುವಿ. ನಾನ್‌ ಈ ಕಾನಾನ್‌ ದೇಶತ್‌ನ ನೀಕು ನೀಡ ಬಯ್ಯ ಬಪ್ಪ ನೀಡ ಸಂತಾನಕು ಕಾಲಕಾಲಕ್‌ ಸ್ವಂತವಾಯಿತ್‌ ತಪ್ಪೀಂದ್‌ ಎಣ್ಣ್‌ಚಿ. 5 ನಾನ್‌ ಐಗುಪ್ತ ದೇಶಕ್‌ ಬಪ್ಪಕಿಂಜ ಮಿಂಞ ನೀಕ್‌ ಪುಟ್ಟ್‌ನ ಈ ದಂಡ್‌ ಕ್‌ಣ್ಣ ಮಕ್ಕಳು ನಾಡ ಮಕ್ಕ. ರೂಬೇನ, ಸಿಮೆಯೋನಂಡನೆಕೆ, ಎಫ್ರಾಯಿಮನು ಮನಸ್ಸೆಯು ನಾಡ ಮಕ್ಕಳಾಯಿತ್‌ಪ್ಪ. 6 ಈ ದಂಡ್‌ ಮಕ್ಕಕ್‌ ಬಯ್ಯ ಪುಟ್ಟ್‌ವ ಮಕ್ಕ ನೀಡ ಮಕ್ಕಳಾಯಿತ್‌ಪ್ಪ. ಎಫ್ರಾಯಿಮ್‌ ಪಿಂಞ ಮನಸ್ಸೆರ ಸೊತ್ತ್‌ಯಿಂಜ ಇಯಿಂಗಕ್‌ ಪಾಲ್‌ ಕ್‌ಟ್ಟುವ. 7 ನಾನ್‌ ಪದ್ದನ್‌ ಅರಾಮ್ಯಿಂಜ ತಿರಿತ್‌ ಬಪ್ಪಕಾಪಕ, ಕಾನಾನ್‌ ದೇಶತ್‌ಲ್‌ ಎಫ್ರಾತಕ್‌ ಎತ್ತ್‌ವಕ್‌ ಇಂಞು ಚೆನ್ನ ದೂರ ಇಪ್ಪಕ ರಾಹೇಲ ಬಟ್ಟೆಲ್‌ ಚತ್ತ್‌ ಪೋಚಿ. ಅವಳ ಅಲ್ಲೇ ಬೇತ್‌ಲೆಹೇಮ್‌ಂದ್‌ ಕಾಕುವ ಎಫ್ರಾತಕ್‌ ಪೋಪ ಬಟ್ಟೆಲ್‌ ಪೂತಂದ್‌ ಎಣ್ಣ್‌ಚಿ. 8 ಇಸ್ರಾಯೇಲ ಯೋಸೇಫಂಡ ಮಕ್ಕಳ ನೋಟಿತ್: ಇಯಿಂಗ ದಾರ್‌ಂದ್‌ ಕ್‍ೕಟತ್. 9 ಯೋಸೇಫ: ಇಯಿಂಗ ಐಗುಪ್ತ ದೇಶತ್‌ಲ್‌ ಯೆಹೋವನಾನ ದೇವ ನಾಕ್‍ ತಂದ ಮಕ್ಕಾಂದ್‌ ಎಣ್ಣ್‌ಚಿ. ಅದ್‌ಂಗ್‌ ಯಾಕೋಬ: ಅಯಿಂಗಳ ನಾಡ ಪಕ್ಕ ಕಾಕಿಯಂಡ್‌ ಬಾ. ನಾನ್‌ ಅಯಿಂಗಳ ಆಶೀರ್ವಾದ ಮಾಡಂಡೂಂದ್‌ ಎಣ್ಣ್‌ಚಿ. 10 ಯಾಕೋಬಂಗ್‌ ವಯಸ್ಸಾನಂಗ್‌ ಕಣ್ಣ್‌ ಸರಿಯಾಯಿತ್‌ ಕಾಂಬಯಿಂಜಿತ್‌ಲ್ಲೆ. ಅದ್‌ಂಗ್‌ ಯೋಸೇಫ ಮಕ್ಕಳ ಅಂವೊಂಡ ಪಕ್ಕ ಕಾಕಿಯಂಡ್‌ ಪೋಚಿ. ಅಕ್ಕ ಯಾಕೋಬ ಅಯಿಂಗಕ್‌ ಮುತ್ತ್‌ ಕೊಡ್‌ತಿತ್‌ ತಬ್ಬಿಯಂಡತ್. 11 ಅಕ್ಕ ಯಾಕೋಬ ಯೋಸೇಫಂಗ್: ನಾನ್‌ ಪುನಃ ನೀಡ ಮೂಡ್‌ ನೋಟ್‌ವೀಂದ್‌ ಗೇನ ಮಾಡಿತ್‌ಂಜ್‌ತ್‌ಲ್ಲೆ, ಆಚೇಂಗಿ ದೇವ ನೀಡ ಮಕ್ಕಳ ಸಹ ನೋಟ್‌ವನೆಕೆ ಮಾಡಿತ್‍ೕಂದ್‌ ಎಣ್ಣ್‌ಚಿ. 12 ಅಕ್ಕ ಯೋಸೇಫ ಅಯಿಂಗಳ ಅಪ್ಪಂಡ ಮೊಣಕಾಲ್‌ರ ಮದ್ಯತ್‌ ಇಂಜ ಮಕ್ಕಳ ಕಾಕಿತ್, ಅಂವೊಂಡ ಅಪ್ಪಂಗ್‌ ಅಡ್ಡ ಬುದ್ದತ್. 13 ಅಲ್ಲಿಂಜ ಯೋಸೇಫ ಎಫ್ರಾಯಿಮ್‌ನ ತಾಂಡ ಬಲತೆ ಬರಿಯಿಂಜ ಇಸ್ರಾಯೇಲ್‌ಂಡ ಎಡ್‌ತ ಬರಿಕು, ಮನಸ್ಸೆನ ತಾಂಡ ಎಡತ ಬರಿಯಿಂಜ ಇಸ್ರಾಯೇಲ್‌ಂಡ ಬಲತೆ ಬರಿಕು ನಿಪ್ಪ್‌ಚಿಟ್ಟತ್. 14 ಆಚೇಂಗಿಯು ಇಸ್ರಾಯೇಲ್‌ ತಾಂಡ ಕೈಯಿನ ಅಡ್ಡ ನ್‍ೕಟಿತ್‌ ಚೆರಿಯಂವೊನಾನ ಎಫ್ರಾಯಿಮಂಡ ಮಂಡರೆ ಮೇಲೆ ಬಲತೆ ಕೈಯಿನ ಪಿಂಞ ಪೆರಿಯಂವೊನಾನ ಮನಸ್ಸೆರ ಮಂಡರೆ ಮೇಲೆ ಎಡತ ಕೈಯಿನ ಬೆಚ್ಚತ್. 15 ಅಲ್ಲಿಂಜ ಯೋಸೇಫನ ಆಶೀರ್ವಾದ ಮಾಡಿತ್: ನಾಡ ಮುತ್ತಜ್ಜಂಗಳಾನ ಅಬ್ರಹಾಮನು, ಇಸಾಕನು ಆರಾದನೆ ಮಾಡ್‌ನ ದೇವ ಇಯಿಂಗಳ ಆಶೀರ್ವಾದ ಮಾಡಡ್. ನಾನ್‌ ಪುಟ್ಟ್‌ನ ದಿವಸತ್‌ಂಜ ಇಲ್ಲಿಕತ್ತನ ನನ್ನ ನಡ್‌ತಿಯಂಡ್‌ ಬಂದ ದೇವ ಇಯಿಂಗಳ ಆಶೀರ್ವಾದ ಮಾಡಡ್. 16 ನನ್ನ ಎಲ್ಲಾ ಕ್‍ೕಡಿಂಜ ಕಾಪಾಡ್‌ನ ದೇವದೂತ ಈ ಕ್‌ಣ್ಣ ಮಕ್ಕಳ ಆಶೀರ್ವಾದ ಮಾಡಡ್. ಈ ದಂಡ್‌ ಕ್‌ಣ್ಣ ಮಕ್ಕ ನಾಡ ಪೆದತ್‌ನ, ನಾಡ ಅಜ್ಜ ಅಬ್ರಹಾಮ ಪಿಂಞ ನಾಡ ಅಪ್ಪ ಇಸಾಕಂಡ ಪೆದತ್‌ನ ಕಾಪಾಡಡ್. ಇಯಿಂಗಡ ಸಂತಾನ ಬೂಮಿರ ಮೇಲೆ ಬೊಳ್‌ಂದಿತ್‌ ಬಲ್ಯದಾಡ್‌ಂದ್‌ ಎಣ್ಣ್‌ಚಿ. 17 ತಾಂಡ ಅಪ್ಪ ಬಲತೆ ಕೈಯಿನ ಚೆರಿಯಂವೊನಾನ ಎಫ್ರಾಯಿಮಂಡ ಮೇಲೆ ಬೆಚ್ಚದ್‌ನ ಕಂಡಿತ್, ಅದ್‌ನ ಅಂವೊ ಕುಶಿಪಡತೆಗುಂಡ್, ಅಂವೊ ತಾಂಡ ಅಪ್ಪಂಡ ಬಲತೆ ಕೈಯಿನ ಎಡ್ತಿತ್ ಮನಸ್ಸೆರ ಮಂಡೆರ ಮೇಲೆ ಬೆಪ್ಪಕ್‌ ಎಡ್ತಿತ್: 18 ಅಪ್ಪಾ, ಇಂವೊ ಪೆರಿಯಂವೊ, ಇಂವೊಂಡ ಮಂಡೆರೆ ಮೇಲೆ ನೀಡ ಬಲತೆ ಕೈಯಿನ ಬೆಕ್ಕಂಡೂಂದ್‌ ಎಣ್ಣ್‌ಚಿ. 19 ಆಚೇಂಗಿ ಅಂವೊಂಡ ಅಪ್ಪ ಅದ್‌ಂಗ್‌ ಒತ್ತತೆ: ನಾನ್‌ ಎಂತ ಮಾಡಿಯಂಡುಳ್ಳ ಎಣ್ಣಿಯಂಡ್‌ ನಾಕ್‍ ಗೊತ್ತುಂಡ್‌ ನಾಡ ಮೋನೇ. ಮನಸ್ಸೆಯು ಬಲ್ಯ ಜನಾಂಗ ಆಪ. ಇಂವೊಂಡ ಸಂತಾನವೂ ಬಲ್ಯದಾಪ. ಆಚೇಂಗಿ ಇಂವೊಂಡ ತಮ್ಮಣ ಇಂವೊಂಗಿಂಜ ಇಂಞು ಬಲ್ಯ ಜನಾಂಗಳಾಪ. ಅಂವೊಂಡ ಸಂತಾನ ಎಚ್ಚಕೋ ಬಲ್ಯ ಜನಾಂಗಳಾಯಿತ್‌ ಬೊಳೆಯುವಾಂದ್‌ ಎಣ್ಣ್‌ಚಿ. 20 ಇನ್ನನೆ ಅಂದ್‌ ಯಾಕೋಬ ಆ ದಂಡ್‌ ಕ್‌ಣ್ಣ ಮಕ್ಕಳ ಆಶೀರ್ವಾದ ಮಾಡಿತ್: ಇಸ್ರಾಯೇಲ್‌ ದೇಶತ್‌ರ ಜನ ಒಬ್ಬನ ಆಶೀರ್ವಾದ ಮಾಡ್‌ವಕ ನಿಂಗಡ ಪೆದತ್‌ನ ಉಪಯೋಗಿಚಿಡುವ. ಅಯಿಂಗ: ನಿಂಗಳ ಎಫ್ರಾಯಿಮ್‌ ಪಿಂಞ ಮನಸ್ಸೆರನೆಕೆ ದೇವ ಆಶೀರ್ವಾದ ಮಾಡಡ್‍ೕಂದ್‌ ಎಣ್ಣ್‌ವಾಂದ್‌ ಎಣ್ಣ್‌ಚಿ. ಇನ್ನನೆ ಯಾಕೋಬ ಮನಸ್ಸೆಕಿಂಜಿ ಮಿಂಞ ಎಫ್ರಾಯಿಮ್‌ನ ಇಟ್ಟತ್. 21 ಅಲ್ಲಿಂಜ ಯಾಕೋಬ ಯೋಸೇಫನ ನೋಟಿತ್: ಇದಾ, ನಾನ್‌ ಚಾವಕ್‌ ಉಳ್ಳ. ಆಚೇಂಗಿ ದೇವ ನೀಡ ಕೂಡೆ ಇಪ್ಪ. ಅಂವೊ ನೀಡ ಮುತ್ತಜ್ಜಂಗಡ ದೇಶವಾನ ಕಾನಾನ್‌ ದೇಶಕ್‌ ತಿರಿತ್‌ ಕಾಕಿಯಂಡ್‌ ಪೋಪ. 22 ನೀಡ ಅಣ್ಣತಮ್ಮಣಂಗಕ್‌ ಕೊಡ್‌ತ ಜಾಗಕಿಂಜಿ, ನಾನ್‌ ಅಮೋರಿಯಂಗಡ ಕೈಯಿಂಜ ನಾಡ ಕತ್ತಿಯಿಂಜ, ಬಿಲ್ಲ್‌ಯಿಂಜ ಎಡ್‌ತ ಜಾಗತ್‌ನ ಒರ್‌ ಪಾಲ್‌ ಜಾಸ್ತಿಯಾಯಿತ್‌ ನೀಕ್‌ ತಂದಂಡುಳ್ಳಂದ್‌ ಎಣ್ಣ್‌ಚಿ. |
© 2017, New Life Literature (NLL)