ಆದ್ಯತ್‌ರ ಪುಸ್ತಕ 41 - ಕೊಡವ ಬೈಬಲ್ಫರೋಹನಂಡ ಸ್ವಪ್ನ 1 ದಂಡ್‌ ಕಾಲ ಆನ ಪಿಂಞ ಫರೋಹನ ಒರ್‌ ಸ್ವಪ್ನ ಕಂಡತ್. ಆ ಸ್ವಪ್ನತ್ಲ್ ಅಂವೊ ನೈಲ್‌ ಪೊಳೆರ ಬರಿಲ್‌ ನಿಂದಂಡಿಂಜತ್. 2 ಅಕ್ಕಣೆಕ್ ನೈಲ್‌ ಪೊಳೆಯಿಂಜ ಚಾಯಿ ಪಿಂಞ ಕೊಬ್ಬಿತುಳ್ಳ ಏಳ್‌ ಪೈಯುವ ನೈಲ್‌ ಪೊಳೆಯಿಂಜ ಪೊರ್ಮೆ ಬಂದಿತ್‌ ಪೊಳೆರ ಬರಿಲ್‌ ಪಿಲ್ಲ್‌ನ ಮೇಯಿಂಜಂಡಿಂಜತ್. 3 ಅದ್‌ಂಡ ಬಯ್ಯತ್‌ ಅಸಹ್ಯವಾಯಿತ್‌ ಚೆರ್‌ಂಗನೆ ಉಳ್ಳ ಇಂಞು ಏಳ್‌ ಪೈಯ್ಯುವ ನೈಲ್‌ ಪೊಳೆಯಿಂಜ ಪೊರ್ಮೆ ಬಂದಿತ್‌ ಪೊಳೆರೆ ಬರಿಲ್‌ ಬೋರೆ ಪೈಯ್ಯುರ ಕೂಡೆ ನಿಂದತ್. 4 ಅಸಹ್ಯವಾಯಿತ್‌ ಚೆರ್‌ಂಗನೆ ಉಳ್ಳ ಪೈಯ್ಯುವ ಚಾಯಿ ಪಿಂಞ ಕೊಬ್ಬಿತುಳ್ಳ ಪೈಯ್ಯುವಳ ಮುಗ್ಗಿರ್‌ತ್. ಇನ್ನನೆ ಸ್ವಪ್ನ ಕಂಡಿತ್‌ ಫರೋಹನ ವರ್‌ಕ್‌ಯಿಂಜ ಎದ್ದ್‌ರ್‌ತ್. 5 ಅಂವೊ ಪುನಃ ವರೀರ್‌ತ್. ಅಕ್ಕ ಇಂಞೊರ್‌ ಸ್ವಪ್ನ ಕಂಡತ್. ಈ ಕುರಿ, ಅಂವೊಂಡ ಸ್ವಪ್ನತ್ಲ್, ಏಳ್‌ ಕಾಳ್‌ರ ಮಂಡೆ ದುಂಬಿತ್‌ ಚಾಯಿತೆ ಬೊಳ್‌ಂದಿತ್‌ ಒರೇ ಕದ್ದ್‌ಲ್‌ ಉಳ್ಳನ ಕಂಡತ್. 6 ಅಕ್ಕಣೆಕ್ ಚೆರ್‌ಂಗ್‌ನೆ ಪಿಂಞ ಕ್‍ೕಕ್‌ ದಿಕ್ಕ್‌ಲ್‌ ಬಂದ ಗಾಳಿಕ್‌ ಚುಟ್ಟ್‌ ಪೋನನೆಕೆ ಇಂಜ ಇಂಞು ಏಳ್‌ ಕಾಳ್‌ವಡ ಮಂಡೆನ ಕಂಡತ್. 7 ಚೆರ್‌ಂಗ್‌ನೆ ಇಂಜ ಕಾಳ್‌ವಡ ಮಂಡೆ, ನಲ್ಲ ಕಾಳ್‌ರ ಮಂಡೆನ ಮುಗ್ಗಿರ್‌ತ್. ಅಕ್ಕ ಫರೋಹನ ವರ್‌ಕ್‌ಯಿಂಜ ಎಚ್ಚರ ಆಯಿತ್, ಅದ್‌ ಸ್ವಪ್ನ ಎಣ್ಣಿಯಂಡ್‌ ಅಂವೊಂಗ್‌ ಗೊತ್ತಾಚಿ. 8 ಪೊಲಾಕ ಇದ್‌ನ್ನೇ ಗೇನಮಾಡಿತ್‌ ಅಂವೊಂಡ ಮನಸ್ಸೆ ಬಾರಿ ಬೇಜಾರತ್‌ಲ್‌ ಇಂಜತ್. ಅಂವೊಂಗ್‌ ಸ್ವಪ್ನತ್‌ರ ಅರ್ಥ ಗೊತ್ತಾಂಡೂಂದ್‌ ಐಗುಪ್ತ ದೇಶತ್‌ರ ಮಂತ್‌ರವಾದಿಯಳ ಪಿಂಞ ಜ್ಞಾನಿಯಳ ಕಾಕ್‌ಚಿಟ್ಟಿತ್‌ ಅಂವೊಂಡ ಸ್ವಪ್ನತ್‌ನ ಅಯಿಂಗಕ್ ಎಣ್ಣ್‌ಚಿ. ಆಚೇಂಗಿ ದಾರ್‌ಕು ಅದ್‌ಂಡ ಅರ್ಥತ್‌ನ ಎಣ್ಣ್‌ವಕ್‌ ಕಯಿಂಜಿತ್‌ಲ್ಲೆ. 9 ಇನ್ನನೆ ಇಪ್ಪಕ ದ್ರಾಕ್ಷಿರಸ ಮಾಡಿ ಕೊಡ್‌ಪಯಿಂಗಡ ಮುಖ್ಯಸ್ತ ಫರೋಹನನ ನೋಟಿತ್: ನಾನ್‌ ಮಾಡ್‌ನ ತಪ್ಪ್‌ನ ಇಂದ್‌ ನಾನ್‌ ಗೇನ ಮಾಡಿಯೊವಿ. 10 ಚೆನ್ನ ಕಾಲಕ್‌ ಮಿಂಞ ನಿಂಗಕ್‌ ಚೆಡಿ ಬಂದಿತ್‌ ನನ್ನ ಪಿಂಞ ಅಡಿಗೆ ಮಾಡ್‌ವಯಿಂಗಡ ಮುಖ್ಯಸ್ತನ ಕೈದಿಯಳ ಕಾಪಂವೊನಾನ ಜೈಲ್‌ರ ಮುಖ್ಯಸ್ತಂಡ ಮನೆರ ಜೈಲ್‌ಕ್‌ ಇಟ್ಟಿರ. 11 ಒರೇ ಬಯಿಟ್ ನಾನು ಅಂವೊನು ಬೋರೆ ಬೋರೆ ಸ್ವಪ್ನ ಕಂಡತ್. ಆ ದಂಡ್‌ ಸ್ವಪ್ನಕ್‌ ಅದ್‌ಂಡದೇ ಆನ ಅರ್ಥ ಇಂಜತ್. 12 ಅಕ್ಕ ಕೈದಿಯಳ ಕಾಪಂವೊನಾನ ಮುಖ್ಯಸ್ತಂಗ್‌ ಆಳ್‌ ಆಯಿತ್‌ಂಜ ಒರ್‌ ಇಬ್ರಿಯ ಬಾಲೆಕಾರ ಅಲ್ಲಿ ಇಂಜತ್. ಅಂವೊಂಗ್‌ ಆ ಸ್ಪಪ್ನತ್‌ನ ನಂಗ ಎಣ್ಣ್‌ವಕ, ಅಂವೊ ಆ ದಂಡ್‌ ಸ್ವಪ್ನತ್‌ರ ಅರ್ಥತ್‌ನ ಎಣ್ಣಿ ತಾತ್. 13 ಅದ್‌ಲ್ಲಾತೆ ಅಂವೊ ಎಣ್ಣ್‌ನನೆಕೆ ಎಲ್ಲಾ ಕಾರ್ಯವು ನಡ್ಂದತ್. ನನ್ನ ಕೆಲಸಕ್‌ ಪುನಃ ನೇಮಿಚಿಟ್ಟಿರ, ಇಂಞೊಬ್ಬನ ಮರತ್‌ಲ್‌ ತೂಕಿರಾಂದ್‌ ಎಣ್ಣ್‌ಚಿ. 14 ಇದ್‌ನ ಕ್‍ೕಟ ಪಿಂಞ ಫರೋಹನ ಯೋಸೇಫನ ಕಾಕ್‌ಚಿಟ್ಟತ್. ಯೋಸೇಫನ ಬೆರಿಯ ಜೈಲ್ಯಿಂಜ ಕಾಕಿಯಂಡ್‌ ಬಾತ್. ಅಂವೊ ಚೌರ ಮಾಡಿತ್, ಬಟ್ಟೆ ಬದ್‌ಲಾಯಿಚಿಟ್ಟಿತ್, ಫರೋಹನಂಡ ಮಿಂಞತ್‌ ಬಾತ್. 15 ಅಕ್ಕ ಫರೋಹನ ಯೋಸೇಫನ ನೋಟಿತ್: ನಾನ್‌ ಒರ್‌ ಸ್ವಪ್ನ ಕಂಡ. ಅದ್‌ಂಡ ಅರ್ಥತ್‌ನ ದಾರ್‌ಕು ಎಣ್ಣ್‌ವಕ್‌ ಕಯಿಂಜಿತ್‌ಲ್ಲೆ. ಆಚೇಂಗಿ ನೀಕ್‌ ಸ್ವಪ್ನತ್‌ರ ಅರ್ಥತ್‌ನ ಎಣ್ಣ್‌ವಕ್‌ ಕಯ್ಯೂಂದ್‌ ನಾಕ್‍ ಗೊತ್ತಾಚಿಂದ್‌ ಎಣ್ಣ್‌ಚಿ. 16 ಅದ್‌ಂಗ್‌ ಯೋಸೇಫ: ಇದ್‌ ನಾಡಗೊಂಡ್‌ ಆಪುಲೆ, ಆಚೇಂಗಿ ದೇವನೇ ಫರೋಹನಂಗ್‌ ಒರ್‌ ನಲ್ಲ ಜವಾಬ್ ತಪ್ಪಾಂದ್‌ ಎಣ್ಣ್‌ಚಿ. 17 ಅಕ್ಕ ಫರೋಹನ ಯೋಸೇಫಂಗ್: ನಾಡ ಸ್ವಪ್ನತ್ಲ್ ನಾನ್‌ ನೈಲ್‌ ಪೊಳೆರ ಬರಿಲ್‌ ನಿಂದಿತ್‌ಂಜ. 18 ಒಮ್ಮಕೆ, ಚಾಯಿ ಪಿಂಞ ಕೊಬ್ಬಿತುಳ್ಳ ಏಳ್‌ ಪೈಯುವ ನೈಲ್‌ ಪೊಳೆಯಿಂಜ ಪೊರ್ಮೆ ಬಂದಿತ್‌ ಪಿಲ್ಲ್‌ನ ಮೇಯಿಂಜಂಡಿಂಜತ್. 19 ಅದ್‌ಂಡ ಬಯ್ಯತ್‌ ಇಂಞು ಏಳ್‌ ಪೈಯ್ಯುವ ಪೊಳೆಯಿಂಜ ಪೊರ್ಮೆ ಬಾತ್. ಇವು ದುಂಬ ಅಸಹ್ಯವಾಯಿತು ಚೆರ್‌ಂಗನೆ ಆಯಿತು ಇಂಜತ್. ಇನ್ನನೆ ಉಳ್ಳ ಪ್ರಾಣಿಯಳ ಐಗುಪ್ತ ದೇಶತ್‌ಲೆಲ್ಲಿಯೂ ನಾನ್‌ ಕಂಡಿತ್‌ಲ್ಲೆ. 20 ಅಸಹ್ಯವಾಯಿತ್‌ ಚೆರ್‌ಂಗನೆ ಇಂಜ ಪೈಯ್ಯುವ ಕೊಬ್ಬಿತುಳ್ಳ ಪೈಯ್ಯುವಳ ಮುಗ್ಗಿರ್‌ತ್. 21 ಅವು ಅದ್‌ನೆಲ್ಲ ತಿಂದತೇಂಗಿಯೂ ಮಿಂಞ ಇಂಜನೆಕೆ ಅಸಹ್ಯವಾಯಿತು ಚೆರ್‌ಂಗನೆದಾಯಿತು ಇಂಜತ್. ಅವು ಅದನೆಲ್ಲಾ ತಿಂದತೇಂಂದ್‌ ದಾರ್‌ ಎಣ್ಣುವಕಯಿಂಚಿತಿಲ್ಲೆ. ಅಕ್ಕ ನಾಕ್‍ ವರ್‌ಕ್‌ಯಿಂಜ ಎಚ್ಚರ ಆಚಿ. 22 ಚೆನ್ನ ನೇರ ಆನದು ನಾಕ್‍ ಇಂಞೊರ್‌ ಸ್ವಪ್ನ ಬುದ್ದತ್. ಈ ಕುರಿ ಏಳ್‌ ಕಾಳ್‌ರ ಮಂಡೆ, ದುಂಬಿತ್‌ ಚಾಯಿತೆ ಬೊಳ್‌ಂದಿತ್‌ ಒರೇ ಕದ್ದ್‌ಲ್‌ ಬಪ್ಪದ್‌ನ ಕಂಡ. 23 ಅಕ್ಕಣೆಕ್ ಚೆರ್‌ಂಗ್‌ನೆ ಪಿಂಞ ಕ್‍ೕಕ್‌ ದಿಕ್ಕ್‌ಲ್‌ ಬಂದ ಗಾಳಿಕ್‌ ಚುಟ್ಟ್‌ ಪೋನನೆಕೆ ಇಂಜ ಏಳ್‌ ಕಾಳ್‌ರ ಮಂಡೆ ಮೊಳೆಕೆ ಬುಟ್ಟತ್. 24 ಈ ಚೆರ್‌ಂಗ್‌ನೆ ಇಂಜ ಏಳ್‌ ಕಾಳ್‌ರ ಮಂಡೆ ನಲ್ಲ ಕಾಳ್‌ರ ಮಂಡೆನ ಮುಗ್ಗಿರ್‌ತ್. ಈ ಸ್ವಪ್ನತ್‌ನ ನಾನ್‌ ನಾಡ ಮಂತ್‌ರವಾದಿಯಕ್‌ ಎಣ್ಣ್‌ನ, ಆಚೇಂಗಿ ದಾರ್‌ಕು ಇದ್‌ಂಡ ಅರ್ಥತ್‌ನ ಎಣ್ಣ್‌ವಕ್‌ ಕಯಿಂಜಿತ್‌ಲ್ಲೆ. 25 ಅಕ್ಕ ಯೋಸೇಫ ಫರೋಹನನ ನೋಟಿತ್: ದಂಡ್‌ ಸ್ವಪ್ನತ್‌ರ ಅರ್ಥವು ಒಂದೇ. ದೇವ ಮಾಡ್‌ವಕುಳ್ಳ ಕಾರ್ಯತ್‌ನ ಫರೋಹನಂಗ್‌ ಕಾಂಬ್‌ಚಿಟ್ಟಿತುಂಡ್. 26 ಆ ಏಳ್‌ ನಲ್ಲ ಪೈಯ್ಯುವ ಏಳ್‌ ಕಾಲತ್‌ರ ವಿಷಯ; ಆ ಏಳ್‌ ನಲ್ಲ ಕಾಳ್‌ರ ಮಂಡೆಯು ಏಳ್‌ ಕಾಲತ್‌ರ ವಿಷಯ. ದಂಡ್‌ ಸ್ವಪ್ನವು ಒಂದೇ. 27 ಬಯ್ಯ ಬಂದ ಅಸಹ್ಯವಾನ ಚೆರ್‌ಂಗನೆ ಇಂಜ ಏಳ್‌ ಪೈಯ್ಯುವಳು ಏಳ್‌ ಕಾಲತ್‌ರ ವಿಷಯ. ಚೆರ್‌ಂಗ್‌ನೆ ಪಿಂಞ ಕ್‍ೕಕ್‌ ದಿಕ್ಕ್‌ಲ್‌ ಬಂದ ಗಾಳಿಕ್‌ ಚುಟ್ಟ್‌ ಪೋನನೆಕೆ ಇಂಜ ಏಳ್‌ ಕಾಳ್‌ರ ಮಂಡೆಯು ಏಳ್‌ ಕಾಲತ್‌ರ ವಿಷಯ. ಈ ಏಳ್‌ ಕಾಲವು ಬರಗಾಲ ಉಳ್ಳ ಕಾಲ ಆಪ. 28 ಇದೇ ನಾನ್‌ ಫರೋಹನಂಗ್‌ ಎಣ್ಣ್‌ವಕಿಂಜ ವಿಷಯ. ದೇವ ತಾನ್‌ ಮಾಡ್‌ವಕುಳ್ಳದ್‌ನ ಫರೋಹನಂಗ್‌ ಕಾಟಿಕೊಡ್‌ತಿತುಂಡ್. 29 ಇಡೀ ಐಗುಪ್ತ ದೇಶತ್‌ಲ್‌ ಪೂರ್ತಿ ಬೊಳೆ ಉಳ್ಳ ವಿಶೇಷವಾನ ಏಳ್‌ ಕಾಲ ಬಪ್ಪ. 30 ಅದ್‌ ಆನದು ಬರಗಾಲ ಉಳ್ಳ ಏಳ್‌ ಕಾಲ ಬಪ್ಪ. ಅಕ್ಕ ಐಗುಪ್ತ ದೇಶತ್‌ರ ಜನ ಆ ವಿಶೇಷವಾನ ಪೂರ್ತಿ ಬೊಳೆ ಇಂಜ ಕಾಲತ್‌ನ ಮರ್‌ಂದ್‌ರ್‌ವ. ಬರಗಾಲ ಇಡೀ ದೇಶತ್‌ನ ನಾಶ ಮಾಡಿರುವ. 31 ಬಪ್ಪಕುಳ್ಳ ಬರಗಾಲ ಎಚ್ಚಕ್‌ ಗೋರವಾಯಿತ್‌ ಇಪ್ಪಾಂದ್‌ ಎಣ್ಣ್‌ಚೇಂಗಿ, ಅದ್‌ ನಲ್ಲ ಕಾಲತ್‌ರ ಗೇನನ ಪಾಳ್‌ ಮಾಡಿರುವ. 32 ಫರೋಹನಂಗ್‌ ದಂಡ್‌ ಕುರಿ ಈ ಸ್ವಪ್ನ ಬುದ್ದಗುಂಡ್, ಈ ಕಾರ್ಯತ್‌ನ ದೇವ ಕಂಡಿತವಾಯಿತ್‌ ಮಾಡ್‌ವಾಂದು, ಬೆರಿಯ ಮಾಡ್‌ವಾಂದು ನಿಂಗಕ್‌ ಗೊತ್ತಿರಡ್. 33 ಆನಗುಂಡ್‌ ಇಕ್ಕ ಫರೋಹನ ನಲ್ಲೋಣೆ ಬಯಂದ್ವ ಪಿಂಞ ಬುದ್ದಿವಂತಂವೊನಾನ ಒರ್‌ ಮನುಷ್ಯನ ಆರಿಚಿಟ್ಟಿತ್, ಅಂವೊನ ಇಡೀ ಐಗುಪ್ತ ದೇಶಕ್‌ ಅದಿಕಾರಿಯಾಯಿತ್‌ ನೇಮಿಚಿಡಂಡು. 34 ಇನ್ನನೆ ಫರೋಹನ ಅದಿಕಾರಿಯಳ ನೇಮಿಚಿಟ್ಟಿತ್, ಪೂರ್ತಿ ಬೊಳೆ ಉಳ್ಳ ಆ ಏಳ್‌ ಕಾಲತ್ಲ್ ಅಂಜಿಲ್‌ ಒರ್‌ ಬಾಗತ್‌ರ ಬೊಳೆನ ಅಯಿಂಗ ಕೂಟಿ ಬೆಕ್ಕಡ್. 35 ಈ ನಲ್ಲ ಕಾಲತ್ಲ್ ಕೂಟಿ ಬೆಚ್ಚ ಆಹಾರ ದಾನ್ಯ ಪಿಂಞ ಕಾಳ್‌ಕಡ್ಡಿನೆಲ್ಲ ಫರೋಹನಂಡ ಅದಿಕಾರತ್‌ರ ಅಡಿಲ್‌ ಕೂಟಿಬೆಕ್ಕಂಡು ಅಕ್ಕ ಪಟ್ಟಣತ್‌ಲೆಲ್ಲಾ ಆಹಾರ ಇಪ್ಪ. 36 ಅನ್ನನೆ ಮಾಡ್‌ಚೇಂಗಿ, ಬರಗಾಲತ್‌ಲು ಜನಕ್‌ ಬೋಂಡಿಯಚ್ಚಕ್‌ ತಿಂಬಕ್‌ ಇಪ್ಪ. ಇಲ್ಲತೆ ಪೋಚೇಂಗಿ ಬರಗಾಲ ಬಪ್ಪಕ ದೇಶತ್‌ಲ್‌ ಉಳ್ಳ ಜನಯೆಲ್ಲಾ ಚತ್ತ್‌ ಪೋಪಾಂದ್‌ ಎಣ್ಣ್‌ಚಿ. 37 ಯೋಸೇಫ ಎಣ್ಣ್‌ನದ್‌ ಫರೋಹನಂಗು ಅಂವೊಂಡ ಅದಿಕಾರಿಯಂಗಕು ನಲ್ಲದಾಯಿತ್‌ ಕಂಡತ್. 38 ಅಕ್ಕ, ಫರೋಹನ ಅಂವೊಂಡ ಅದಿಕಾರಿಯಳ ನೋಟಿತ್: ದೇವಡ ಆತ್ಮ ದುಂಬಿತುಳ್ಳ ಈ ಮನುಷ್ಯಂಡನೆಕೆ ಬೋರೆ ಒರ್‌ ಮನುಷ್ಯ ನಂಗಕ್‌ ಉಂಡಾಂದ್‌ ಎಣ್ಣ್‌ಚಿ. 39 ಫರೋಹನ ಯೋಸೇಫಂಡ ಕಡೆಕ್‌ ತಿರಿತ್: ದೇವ ನೀಕ್‌ ಇದ್‌ನೆಲ್ಲ ಅರ್ಥಮಾಡುವಕ್‌ ಎಣ್ಣಿ ಕೊಡ್‌ತಾಂಗ್, ನೀಕಿಂಜ ಬಲ್ಯ ನಲ್ಲೋಣೆ ಬಯಂದಂವೊನು, ಬುದ್ದಿವಂತನು ಉಳ್ಳ ಬೋರೆ ಒಬ್ಬ ಈ ದೇಶತ್‌ಲ್‌ ಇಲ್ಲೆ. 40 ನೀನ್‌ ನಾಡ ಅರಮೆನೆಕ್‌ ಅದಿಕಾರಿಯಾತ್‌ಪ್ಪಿಯ. ನೀಡ ತಕ್ಕ್‌ಕ್‌ ನಾಡ ಜನಯೆಲ್ಲಾ ತಗ್ಗಿತ್‌ ನಡ್‌ಪ. ಆಚೇಂಗಿ ಸಿಂಹಾಸನತ್‌ರ ವಿಷಯತ್‌ಲ್‌ ಮಾತ್‌ರ ನಾನ್‌ ನೀಕಿಂಜಿ ಬಲ್ಯಂವೊನಾಯಿತ್‌ಪ್ಪಿ. 41 ನೋಟ್, ನಾನ್‌ ನಿನ್ನ ಇಡೀ ಐಗುಪ್ತ ದೇಶಕು ಅದಿಕಾರಿಯಾಯಿತ್‌ ನೇಮಿಚಿಟ್ಟಿತುಳ್ಳಂದ್‌ ಎಣ್ಣಿತ್, 42 ಫರೋಹನ ತಾಂಡ ಕೈಯಿಲ್‌ ಇಟ್ಟಂಡಿಂಜ ಮುದ್ರೆ ಮೋಯಿರತ್‌ನ ಎಡ್‌ತಿತ್‌ ಯೋಸೇಫಂಡ ಕೈ ಬೆರಕ್‌ ಇಟ್ಟಿತ್, ಅಂವೊಂಗ್‌ ನಾರ್‌ ಬಟ್ಟೆನ ಇಟ್ಟಿತ್, ಅಂವೊಂಡ ಬೋಳೆಕ್‌ ಪೊನ್ನ್‌ರ ಮಾಲೆನ ಇಟ್ಟತ್. 43 ಅಂವೊನ ತಾಂಡ ದಂಡನೆ ತೇರ್‌ರ ಮೇಲೆ ಪತ್ತ್‌ಚಿಟ್ಟಿತ್, ಪಿಂಞ ತಾಂಡ ಅದಿಕಾರಿಯಂಗಕ್‌ ಹುಕುಮ್‌ ಅಂವೊನ ಮರ್ಯಾತೆ ಮಾಡಂಡುಂದ್‌ ಜೋರಾಯಿತ್‌ ಎಣ್ಣುವಕ್‌ ಕೊಡ್‌ತ್ತತ್. ಅನ್ನನೆ ಇಗುಪ್ತ ರಾಜ್ಯಕ್‌ ಅಲ್ಲಾ ಪ್ರದಾನಿಯಾಯಿತ್‌ ಮಾಡ್‌ಚಿ. 44 ಇಂಞು ಫರೋಹನ ಯೋಸೇಫನ ನೋಟಿತ್: ನಾನ್‌ ಫರೋಹನ (ರಾಜ), ಆಚೇಂಗಿಯು ನೀಡ ಅಪ್ಪಣೆ ಇಲ್ಲತೆ ದಾರು ಕೈಯಿನ ಆಡ್‌ ಕಾಲ್‌ನ ಆಡ್‌ ಅನ್‌ಕೊಕ್ಕಾಗಾಂದ್‌ ಎಣ್ಣ್‌ಚಿ. 45 ಅದಲ್ಲತೆ, ಫರೋಹನ ಯೋಸೇಫಂಗ್ ಸಾಪ್ನತ್ಪನ್ನೇಹ ಎಣ್ಣುವ ಐಗುಪ್ತ ಪೆದತ್‌ನ ಬೆಚ್ಚತ್. ಪಿಂಞ ಓನ್‌ ಎಣ್ಣುವ ಪಟ್ಟಣಕ್‌ ಯಾಜಕನಾನ ಪೋಟೀಫೆರಂಡ ಮೋವಳಾನ ಆಸನತ್‌ ಎಣ್ಣುವವಳ ಯೋಸೇಫಂಗ್ ಪೊಣ್ಣಾಯಿತ್‌ ಕೊಡ್‌ತತ್. ಯೋಸೇಫ ಐಗುಪ್ತ ದೇಶತ್‌ರ ಮೇಲೆ ಅದಿಕಾರ ಎಡ್‌ತಂಡ್, ಐಗುಪ್ತ ದೇಶತ್‌ನ ನೋಟ್ಟುವಕ್‌ ಪೊರಟಿತ್‌ ಪೋಚಿ. ಏಳ್‌ ಕಾಲ ಬರಗಾಲ 46 ಯೋಸೇಫ ಐಗುಪ್ತ ದೇಶತ್‌ರ ರಾಜನಾನ ಫರೋಹನಂಡ ಸೇವೇನ ಸುರು ಮಾಡ್‌ವಕ ಅಂವೊಂಗ್‌ ನುಪ್ಪದ್‌ ವಯಸ್ಸ್‌ ಆಯಿತ್‌ಂಜತ್. ಯೋಸೇಫ ಫರೋಹನಂಡ ಸನ್ನಿದಿಯಿಂಜ ಪೋಯಿತ್‌ ಇಡೀ ಐಗುಪ್ತ ದೇಶತ್‌ನ ಪ್ರಯಾಣ ಮಾಡ್‌ಚಿ. 47 ಎಣ್ಣ್‌ನನೆಕೆ ಪೂರ್ತಿ ಬೊಳೆ ಇಂಜ ಆ ಏಳ್‌ ಕಾಲತ್ಲ್ ಬೂಮಿ ಬಲ್ಯ ಫಲ ಕೊಡ್‌ತತ್. 48 ಆ ಕಾಲತ್ಲ್, ಯೋಸೇಫ ಐಗುಪ್ತ ದೇಶತ್‌ಲ್‌ ಬೊಳ್‌ಂದ ಬೊಳೆನ ಕೂಟಿತ್, ಆ ಬೊಳೆನೆಲ್ಲಾ ಪಟ್ಟಣತ್‌ಲ್‌ ಕೂಟಿ ಬೆಚ್ಚತ್. ಓರೋರ್‌ ಪಟ್ಟಣತ್‌ರ ಸುತ್ತ್‌ಮುತ್ತ್‌ಲ್‌ ಇಂಜ ಬೂಮಿರ ಬೊಳೆನ ಕೂಟಿಬೆಚ್ಚತ್. 49 ಇನ್ನನೆ ಯೋಸೇಫ ಆಹಾರ ದಾನ್ಯತ್‌ನ ಕಡಕರೆ ಮಣತ್‌ರನೆಕೆ ಲೆಕ್ಕ ಬೆಪ್ಪಕ್‌ ಕಯ್ಯತಚ್ಚಕ್‌ ಕೂಟಿ ಬೆಚ್ಚತ್. 50 ಈ ಕಾಲತ್‌ ಬರಗಾಲ ಸುರು ಆಪಕ್‌ ಮಿಂಞಲೆ ಯೋಸೇಫಂಗ್ ದಂಡ್‌ ಕ್‌ಣ್ಣ ಮಕ್ಕ ಪುಟ್ಟ್‌ಚಿ. ಅಯಿಂಗಳ ಓನ್‌ ಪಟ್ಟಣತ್‌ರ ಯಾಜಕನಾನ ಪೋಟೀಫರಂಡ ಮೋವಳಾನ ಆಸನತ್‌ ಅಂವೊಂಗ್‌ ಪೆತ್ತತ್. 51 ಯೋಸೇಫ: ದೇವ ನಾಡ ಎಲ್ಲಾ ಕಷ್ಟತ್‌ನ ಪಿಂಞ ನಾಡ ಅಪ್ಪಂಡ ಕುಟುಂಬತ್‌ನ ಮರ್ಪನೆಕೆ ಮಾಡ್‌ಚೀಂದ್‌ ಎಣ್ಣಿತ್ ಅಂವೊಂಗ್‌ ಮನಸ್ಸೆ ಎಣ್ಣಿಯಂಡ್‌ ಪೆದ ಬೆಚ್ಚತ್. 52 ನಾನ್‌ ಕಷ್ಟ ಪಟ್ಟ ದೇಶತ್‌ಲ್‌ ದೇವ ನನ್ನ ಅಬಿವೃದ್ದಿ ಮಾಡಿತ್‌ಂದ್‌ ಎಣ್ಣಿತ್ ಎಳೆಯ ಮೋಂವೊಂಗ್‌ ಎಫ್ರಾಯಿಮ್‌ ಎಣ್ಣಿಯಂಡ್‌ ಪೆದಬೆಚ್ಚತ್. 53 ಐಗುಪ್ತ ದೇಶತ್‍ಕ್ ಬಂದ ಏಳ್‌ ಪೂರ್ತಿ ಬೊಳೆರ ಕಾಲ ತ್‍ೕಂದತ್. 54 ಅಲ್ಲಿಂಜ ಯೋಸೇಫ ಎಣ್ಣ್‌ನನೆಕೆ ಏಳ್‌ ಕಾಲತ್‌ರ ಬರಗಾಲ ಸುರು ಆಚಿ. ಬರಕಾಲ ಸುತ್ತ್‌ಮುತ್ತ್‌ ಉಳ್ಳ ಎಲ್ಲಾ ದೇಶತ್‌ಲ್‌ ಸುರು ಆಚಿ. ಆಚೇಂಗಿ ಐಗುಪ್ತ ದೇಶತ್‌ಲ್‌ ಮಾತ್‌ರ ಆಹಾರ ಇಂಜತ್. 55 ಐಗುಪ್ತ ದೇಶತ್‌ರ ಜನಕ್‌ ಬರಗಾಲತ್‌ರ ಬಿಸಿ ಪಡ್‌ವಕ, ಜನ ಫರೋಹನಂಗ್‌ ಮೊರೆ ಇಟ್ಟತ್. ಅಂವೊ ಅಯಿಂಗಕ್: ಯೋಸೇಫಂಡ ಪಕ್ಕ ಪೋಯಿತ್‌ ಅಂವೊ ಎಂತ ಎಣ್ಣ್‌ವ ಅನ್ನನೆ ಮಾಡೀಂದ್‌ ಎಣ್ಣ್‌ಚಿ. 56 ದೇಶತ್‌ರ ಎಲ್ಲಾ ಕಡೆಯು ಬರಗಾಲ ಬಪ್ಪಕ, ಯೋಸೇಫ ಪತ್ತಾಯ ಕೋಂಬರೆನ ತೊರ್‌ಂದಿತ್‌ ಐಗುಪ್ತ ದೇಶತ್‌ರ ಜನಕ್‌ ಆಹಾರ ದಾನ್ಯತ್‌ನ ಮಾರ್ಚಿ. ಬರಕಾಲ ಐಗುಪ್ತ ದೇಶತ್‌ಲ್‌ ದುಂಬ ಕಠಿಣವಾಯಿತ್‌ ಆಯಂಡಿಂಜತ್. 57 ಇಡೀ ಲೋಕತ್‌ ಬರಕಾಲ ದುಂಬ ಕಠಿಣವಾಯಿತ್‌ ಇಂಜಂಗ್‌ ಸುತ್ತ್‌ಮುತ್ತ್‌ ದೇಶತ್‌ಂಜೆಲ್ಲಾ ಜನ ಐಗುಪ್ತ ದೇಶಕ್‌ ಬಂದಿತ್‌ ಯೋಸೇಫಂಡ ಪಕ್ಕ ಆಹಾರ ದಾನ್ಯತ್‌ನ ಕ್ರಯಕ್‌ ಎಡ್‍ತತ್. |
© 2017, New Life Literature (NLL)