ಆದ್ಯತ್‌ರ ಪುಸ್ತಕ 40 - ಕೊಡವ ಬೈಬಲ್ರಸ ಕುಡಿಪ್ಪಕ್‌ ಕೊಡ್‌ಪ್ಪವಂವೊನು ಅಡಿಗೆ ಮಾಡ್‌ವಂವೊನು 1 ಈ ಸಂಗತಿಯೆಲ್ಲ ಆನ ಪಿಂಞ ಐಗುಪ್ತ ದೇಶತ್‌ರ ರಾಜನಾನ ಫರೋಹನಂಗ್‌ ದ್ರಾಕ್ಷಿರಸತ್‌ರ ಕಳ್ಳ್ ಮಾಡಿ ಕೊಡ್‌ಪಂವೊನು, ಒಟ್ಟಿ ಅಡಿಗೆ ಮಾಡ್‌ವಂವೊನು ರಾಜಂಗ್‌ ವಿರುದ್ದವಾಯಿತ್‌ ತಪ್ಪ್‌ ಮಾಡ್‌ಚಿ. 2 ಫರೋಹನಂಗ್‌ ಈ ದಂಡಾಳ್‌ರ ಮೇಲೆ ದುಂಬ ಚೆಡಿ ಬಾತ್. 3 ಅಯಿಂಗಳ ಕೈದಿಯಂಗಳ ಕಾಪಂವೊನಾನ ಜೈಲ್‌ರ ಮುಖ್ಯಸ್ತಂಡ ಮನೇಲ್‌ ಉಳ್ಳ ಜೈಲ್‌ಕ್‌ ಇಟ್ಟತ್. ಅದೇ ಜೈಲ್‌ಲ್‌ ಯೋಸೇಫ ಸಹ ಇಂಜತ್. 4 ಜೈಲ್‌ರ ಮುಖ್ಯಸ್ತ ಅಯಿಂಗಳ ಉಪಚಾರ ಮಾಡ್‌ವಕ್‌ ಯೋಸೇಫನ ನೇಮಿಚಿಟ್ಟತ್. ಅಂವೊ ಅಯಿಂಗಕ್‌ ಸೇವೆ ಮಾಡ್‌ಚಿ. ಅಯಿಂಗ ದಂಡಾಳು ದುಂಬ ದಿವಸ ಅಲ್ಲಿ ಕೈದಿಯಳಾಯಿತ್‌ ಇಂಜತ್. 5 ಐಗುಪ್ತ ರಾಜಂಗ್‌ ದ್ರಾಕ್ಷಿರಸ ಮಾಡಿ ಕೊಡ್‌ಪಂವೊನು ಅಡಿಗೆ ಮಾಡ್‌ವಂವೊನು ಜೈಲ್‌ಲ್‌ ಇಪ್ಪಕ, ಅಯಿಂಗ ದಂಡಾಲು ಒರೇ ಬಯಿಟ್ ಬೋರೆ ಬೋರೆ ಅರ್ಥ ತಪ್ಪ ಸ್ವಪ್ನ ಕಂಡತ್. ಯೋಸೇಫ ದಂಡ್‌ ಕೈತಿಯಂಗಡ ಸ್ವಪ್ನತ್‌ನ ವಿವರಿಚಿಡುವದ್‌ 6 ಪೊಲಾಕ ಯೋಸೇಫ ಅಯಿಂಗಡ ಪಕ್ಕ ಬಪ್ಪಕ, ಅಯಿಂಗ ದುಂಬ ಬೇಜಾರತ್‌ಲ್‌ ಇಂಜಾನ ಕಂಡತ್. 7 ಅಕ್ಕ ಯೋಸೇಫ ತಾಂಡ ಎಜಮಾನಂಡ ಮನೆಲ್ ತಾಂಡ ಕೂಡೆ ಜೈಲ್‌ಲ್‌ ಬೆಚ್ಚಿತ್‌ಂಜ ಫರಹೋನಂಡ ಅದಿಕಾರಿಯಳ ನೋಟಿತ್: ಎನ್ನಂಗ್‌ ನಿಂಗಡ ಮೂಡ್‌ ಇಂದ್‌ ಇಚ್ಚಕ್‌ ಚಪ್ಪೆ ಆಯಿತ್‌ ಉಂಡ್‍ೕಂದ್‌ ಕ್‍ೕಟತ್. 8 ಅದ್‌ಂಗ್‌ ಅಯಿಂಗ: ಕಯಿಂಜ ಬಯಿಟ್ ನಂಗ ದಂಡಾಳು ಸ್ವಪ್ನ ಕಂಡತ್. ಅದ್‌ಂಡ ಅರ್ಥ ಎಣ್ಣಿ ತಪ್ಪಯಿಂಗ ಇಲ್ಲಿ ದಾರು ಇಲ್ಲೆಂದ್‌ ಎಣ್ಣ್‌ಚಿ. ಅಕ್ಕ ಯೋಸೇಫ: ಸ್ವಪ್ನತ್‌ರ ಅರ್ಥ ಎಣ್ಣ್‌ವದ್‌ ದೇವಕ್‌ ಕೂಡ್‌ನದ್‌ಂದ್‌ ನಿಂಗಕ್‌ ಗೊತ್ತಿಲ್ಲಯಾ? ನಿಂಗ ಎಂತ ಕಂಡಿರಾಂದ್‌ ನಾಕ್‍ ಎಣ್ಣೀಂದ್‌ ಎಣ್ಣ್‌ಚಿ. 9 ಅಕ್ಕ ದ್ರಾಕ್ಷಿರಸ ಮಾಡಿ ಕೊಡ್‌ಪಯಿಂಗಡ ಮುಖ್ಯಸ್ತ: ನಾಡ ಸ್ವಪ್ನತ್‌ಲ್‌ ನಾಡ ಮಿಂಞತ್‌ ದ್ರಾಕ್ಷಿಬಳ್ಳಿನ ಕಂಡ. 10 ಅದ್‌ಲ್‌ ಮೂಂದ್‌ ಕೊಂಬ್ ಇಂಜತ್. ಅದ್‌ ಚಿಗ್‌ರ್ ಬುಟ್ಟಿತ್, ಪೂ ಆಚಿ. ಆ ಪೂ ಗುಡ್ಡೆ ಬೊಳ್‌ಂದಿತ್‌ ಪಣ್ಣ್‌ ಆಚಿ. 11 ಫರೋಹನ ಕುಡಿಪ ಪಾತ್‌ರ ನಾಡ ಕೈಲ್‌ ಇಂಜತ್. ನಾನ್‌ ದ್ರಾಕ್ಷಿಪಣ್ಣ್‌ನ ನಾಡ ಕೈಲ್‌ ಪುಂಡಿತ್‌ ಆ ಪಾತ್‌ರಕ್‌ ಬೂಕಿತ್‌ ಫರೋಹನಂಗ್‌ ಕೊಡ್‌ತಂದ್‌ ಎಣ್ಣ್‌ಚಿ. 12 ಅದ್‌ಂಗ್‌ ಯೋಸೇಫ: ಆ ಸ್ವಪ್ನತ್‌ರ ಅರ್ಥ ಎಂತ ಎಣ್ಣ್‌ಚೇಂಗಿ, ಆ ಮೂಂದ್‌ ಕೊಂಬು ಮೂಂದ್‌ ದಿವಸ. 13 ಇಂಞು ಮೂಂದ್‌ ದಿವಸತ್‌ಲ್‌ ಫರೋಹನ ನಿನ್ನ ಜೈಲ್‌ಂಜ ಬುಡ್‌ತಿತ್, ನಿನ್ನ ಪುನಃ ಆ ಕೆಲಸಕ್‌ ನೇಮಿಚಿಡ್‌ವ. ಪುಃನ ನೀನ್‌ ಫರಹೋನಂಡ ಪಾತ್‌ರತ್‌ನ ಪುಡಿಚ್ಚಂಡ್‌ ಮಿಂಞತ್‌ರನೆಕೆ ಮಾಡುವಿಯ. 14 ಇದೇ ನೀಡ ಸ್ವಪ್ನತ್‌ರ ಅರ್ಥಾಂದ್‌ ಎಣ್ಣ್‌ಚಿ. ಆಚೇಂಗಿ, ಅಲ್ಲಿ ನೀನ್‌ ಕುಶೀಲ್‌ ಇಪ್ಪಕ, ನನ್ನ ಗೇನ ಮಾಡಿತ್, ನಾಡ ಮೇಲೆ ಕರುಣೆ ಕಾಟಿತ್, ನಾಡ ವಿಷಯತ್‌ ಫರೋಹನಂಗ್‌ ಎಣ್ಣಿತ್‌ ನನ್ನ ಈ ಜಾಗತ್‌ಂಜ ಬುಡ್‌ತ್. 15 ಎನ್ನಂಗೆಣ್ಣ್‌ಚೇಂಗಿ ನಾನ್‌ ಇಬ್ರಿಯ ದೇಶಕ್‌ ಕೂಡ್‌ನಂವೊ. ಚೆನ್ನ ಜನ ನನ್ನ ಅಲ್ಲಿಂಜ ಕಟ್ಟಂಡ್‌ ಬಂದಿಯೆ. ಇಲ್ಲಿ ಸೆಹ ಜೈಲ್‌ಲ್‌ ಇಪ್ಪಂತ ತಪ್ಪ್‌ನ ನಾನ್‌ ಮಾಡಿತ್‌ಲ್ಲೆ. ಆಚೇಂಗಿಯು ಇಕ್ಕ ನಾನ್‌ ಜೈಲ್‌ಲ್‌ ಉಳ್ಳ್ಂದ್‌ ಎಣ್ಣ್‌ಚಿ. 16 ಇಂವೊ ಎಣ್ಣ್‌ನ ಅರ್ಥ ಚಾಯಿ ಉಂಡ್‍ೕಂದ್‌ ಗೊತ್ತಾಯಿತ್, ಅಡಿಗೆ ಮಾಡ್‌ವಂವೊ ಸಹ ಯೋಸೇಫನ ನೋಟಿತ್: ನಾನ್‌ ಸಹ ನಾಡ ಸ್ವಪ್ನತ್‌ಲ್‌ ನಾಡ ಮಂಡೆರ ಮೇಲೆ ಮೂಂದ್‌ ಕುಕ್ಕೆಲ್‌ ಒಟ್ಟಿ ದುಂಬಿತ್‌ಂಜನ ಕಂಡ. 17 ಕೊಡಿಯತ್‌ರ ಕುಕ್ಕೆಲ್‌ ಫರೋಹನಂಗ್‌ ತಿಂಬಕ್‌ ಬೋಂಡಿಯಾನ ತಿಂಡಿಯಿಂಜತ್. ಆಚೇಂಗಿ ಪಕ್ಷಿಯ ಬಂದಿತ್ ಅದನೆಲ್ಲ ತಿಂದ್‌ರ್‌ತ್‍ೕಂದ್‌ ಎಣ್ಣ್‌ಚಿ. 18 ಅದ್‌ಂಗ್‌ ಯೋಸೇಫ: ನೀಡ ಸ್ವಪ್ನತ್‌ರ ಅರ್ಥ ಎಂತ ಎಣ್ಣ್‌ಚೇಂಗಿ, ಆ ಮೂಂದ್‌ ಕುಕ್ಕೆ ಮೂಂದ್‌ ದಿವಸತ್‌ರನೆಕೆ. 19 ಇಂಞು ಮೂಂದ್‌ ದಿವಸತ್‌ರ ಒಳ್‌ಲ್, ಫರೋಹನ ನಿನ್ನ ಪೊರ್ಮೆ ಕಾಕಿಯಂಡ್‌ ಬಂದಿತ್, ನಿನ್ನ ಮರತ್‌ಲ್‌ ತೂಕಿರುವ. ಅಕ್ಕ ಪಕ್ಷಿಯ ಬಂದಿತ್ ನೀಡ ಯರ್ಚಿನ ತಿಂಬಾಂದ್‌ ಎಣ್ಣ್‌ಚಿ. 20 ಮೂಂದನೆ ದಿವಸ ಫರೋಹನ ಪುಟ್ಟ್‌ನ ದಿವಸವಾಯಿತ್‌ಂಜತ್. ಆನಗೊಂಡ್‌ ಅಂವೊ ತಾಂಡ ಅದಿಕಾರಿಯಂಗಕ್‌ ಗದ್ದಾಳ ಮಾಡ್‌ಚಿ. ಜೈಲ್‌ಕ್‌ ಇಟ್ಟ ತಾಂಗ್‌ ದ್ರಾಕ್ಷಿರಸ ಮಾಡಿ ಕೊಡ್‌ಪಯಿಂಗಡ ಮುಖ್ಯಸ್ತನು ಅಡಿಗೆ ಮಾಡ್‌ವಯಿಂಗಡ ಮುಖ್ಯಸ್ತನು ಆಯಿತಿಂಜ ಆ ದಂಡ್‌ ಅದಿಕಾರಿಯಳ ಸಹ ಫರೋಹನ ಪೊರಮೆ ಕಾಕ್‌ಚಿಟ್ಟಿತ್‌ ಗೌರವ ಮಾಡ್‌ಚಿ. 21 ಅಕ್ಕ ಫರೋಹನ ತಾಂಗ್‌ ದ್ರಾಕ್ಷಿರಸ ಮಾಡಿ ಕೊಡ್‌ಪಯಿಂಗಡ ಮುಖ್ಯಸ್ತನ ಕೆಲಸಕ್‌ ಪುಃನ ನೇಮಿಚಿಟ್ಟತ್. 22 ಆಚೇಂಗಿ ಅಡಿಗೆ ಮಾಡ್‌ವಯಿಂಗಡ ಮುಖ್ಯಸ್ತನ ಮರತ್‌ಲ್‌ ತೂಕ್‌ಚಿ. ಯೋಸೇಫ ಅಯಿಂಗಕ್‌ ಎಣ್ಣ್‌ನ ಅರ್ಥತ್‌ರನೆಕೆ ನಡ್ಂದತ್. 23 ಆಚೇಂಗಿ ರಸ ಕುಡಿಪ್ಪಕ್‌ ಕೊಡ್‌ಪ್ಪ ಮುಖ್ಯಸ್ತ ಯೋಸೇಫನ ಗೇನ ಮಾಡತೆ ಮರ್‌ಂದ್‌ ಪೋಚಿ. |
© 2017, New Life Literature (NLL)