ಆದ್ಯತ್‌ರ ಪುಸ್ತಕ 4 - ಕೊಡವ ಬೈಬಲ್ಕಾಯಿನ ಪಿಂಞ ಹೇಬೆಲ 1 ಇಕ್ಕ ಆದಾಮ ತಾಂಡ ಪೊಣ್ಣ್‌ ಹವ್ವಂಡ ಕೂಡೆ ಕೂಡ್‌ವಕ ಅವ ಕುಳುಮೆಕಾರ್ತಿಯಾಯಿತ್‌ ಕಾಯಿನ ಎಣ್ಣುವಂವೊನ ಪೆತ್ತತ್. ಯೆಹೋವಂಡ ಸಹಾಯತ್‌ಂಜ ಒರ್‌ ಕ್‌ಣ್ಣ ಕುಂಞಿನ ಪಡ್‌ಂದಿಯೇಂದ್‌ ಅವ ಎಣ್ಣ್‌ಚಿ. 2 ಅಲ್ಲಿಂಜ ಅವ ಅಂವೊಂಡ ತಮ್ಮಣನಾನ ಹೇಬೆಲನ ಪೆತ್ತತ್. ಹೇಬೆಲ ಕೊರಿಕಾಪಂವೊನಾಚಿ. ಕಾಯಿನ ವ್ಯವಸಾಯ ಮಾಡ್‌ವಂವೊನಾಚಿ. 3 ಚೆನ್ನ ಕಾಲ ಆನ ಪಿಂಞ, ಕಾಯಿನ ಚೆನ್ನ ಬೊಳೆನ ಯೆಹೋವಂಗ್‌ ಕಾಣಿಕೆಯಾಯಿತ್‌ ಕೊಂಡಬಾತ್. 4 ಹೇಬೆಲ ತಾಂಡ ಕೊರಿರ ಮದ್ಯತ್‌ಲ್‌ ಇಂಜ ಚಾಯಿಯಾನ ಆದ್ಯ ಕೊರಿಕುಟ್ಟಿಯಳನ ಕಾಣಿಕೆಯಾಯಿತ್‌ ಕೊಂಡಬಂದಿತ್, ಕೊಂದಿತ್‌ ಅದಂಡ ಗೊಬ್ಬಯಾನ ಬಾಗತ್‌ನ ಅರ್ಪಿಚ್ಚಿಟ್ಟತ್. ಯೆಹೋವ ಹೇಬೆಲಂಡ ಕಾಣಿಕೆನ ಸ್ವೀಕಾರ ಮಾಡ್‌ಚಿ, 5 ಆಚೇಂಗಿ ಅಂವೊ ಕಾಯಿನನ ಪಿಂಞ ಅಂವೊಂಡ ಕಾಣಿಕೆನ ಸ್ವೀಕಾರ ಮಾಡಿತ್‌ಲೆ. ಇದ್‌ಂಗಾಯಿತ್‌ ಕಾಯಿನಂಗ್ ದುಂಬ ಚೆಡಿ ಬಂತ್‌ ಅಂವೊಂಡ ಮೂಡ್‌ ಚಪ್ಪೆ ಪುಡ್‌ಚಿತ್. 6 ಅಕ್ಕ ಯೆಹೋವ: ನೀಕ್‌ ಎನ್ನಂಗ್‌ ಚೆಡಿ ಬಾತ್, ನೀಡ ಮೂಡ್‌ ಎನ್ನಂಗ್‌ ಇಚ್ಚಕ್‌ ಚಪ್ಪೆ ಪುಡ್‌ಚಿತ್‍ೕಂದ್‌ ಕಾಯಿನನ ಕ್‍ೕಟತ್. 7 ನೀನ್‌ ಸರಿಯಾನದ್‌ನ ಮಾಡಿತ್‌ಂಜಕ, ನಿನ್ನ ಸ್ವೀಕಾರ ಮಾಡ್‌ವಕಿಂಜಿತ್‌ಲ್ಲೆಯ? ಆಚೇಂಗಿ ನೀನ್‌ ನಲ್ಲದ್‌ ಮಾಡ್‌ವಕ್‌ ತ್‌ಕ್ಕಾರ ಮಾಡಿಚೇಂಗಿ, ಪಾಪ ನಿನ್ನ ಆಳ್‌ವಿಕೆ ಮಾಡ್‌ವಕ್‌ ಪಿಂಞ ನಾಶ ಮಾಡ್‌ವಕ್‌ ಪಡಿರ ಪಕ್ಕ ಪಾರಕಾತಂಡಿಪ್ಪ, ಆಚೇಂಗಿ ನೀನ್‌ ಅದನ ಆಳಂಡು. 8 ಇಕ್ಕ ಕಾಯಿನ ತಾಂಡ ತಮ್ಮಣನಾನ ಹೇಬೆಲಂಗ್, ಬೇಲ್‌ಕ್‌ ಪೋಕನ ಬಾಂದ್‌ ಕಾಕ್‌ಚಿ. ಬೇಲ್‌ಕ್‌ ಪೋನ ಪಿಂಞ ಕಾಯಿನ ತಾಂಡ ತಮ್ಮಣಂಡ ಮೇಲೆ ಚೆಡಿಲ್‌ ಜಗಳ ಮಾಡಿತ್‌ ಹೇಬೆಲನ ಕೊಂದತ್. 9 ಅದಾನ ಪಿಂಞ ಯೆಹೋವ ಕಾಯಿನಂಗ್: ನೀಡ ತಮ್ಮಣ ಹೇಬೆಲ ಎಲ್ಲಿಯಾಂದ್‌ ಕ್‍ೕಟತ್. ಅದ್‌ಂಗ್‌ ಕಾಯಿನ: ನಾಕ್‍ ಗೊತ್ತ್‌ಲೆ, ನಾನೆಂತ ನಾಡ ತಮ್ಮಣನ ಕಾಪಂವೊನಾಂದ್‌ ಜವಾಬ್ ಕೊಡ್‌ತತ್. 10 ಅದಂಗ್‌ ಯೆಹೋವ: ನೀನ್‌ ಎಂತ ಮಾಡಿಯ? ಕ್‍ೕಳ್‌! ನೀಡ ತಮ್ಮಣಂಡ ಚೋರೆ ಬೂಮಿಯಿಂಜ ನನ್ನ ಕಾಕಿಯಂಡುಂಡ್. 11 ನೀನ್‌ ಬೂಕ್‌ಚಿಟ್ಟ ನೀಡ ತಮ್ಮಣಂಡ ಚೋರೆನ ಕುಡಿಚ ಈ ಬೂಮಿಲ್‌ ನೀನ್‌ ಶಾಪ ಪಡ್‌ಂದಂವೊನಾಯಿತ್‌ಪ್ಪಿಯ. 12 ನೀನ್‌ ಬೂಮಿನ ಎಚ್ಚಕ್‌ ಕಷ್ಟಪಟ್ಟಿತ್‌ ವ್ಯವಸಾಯ ಮಾಡ್‌ಚೇಂಗಿಯು ಅದ್‌ ಇಂಞು ಮಿಂಞಕ್‌ ಬೊಳೆ ತಪ್ಪ್‌ಲೆ, ಇಕ್ಕಯಿಂಞ ನೀನ್‌ ಈ ಬೂಮಿಲ್‌ ಮನೆ ಇಲ್ಲತೆ ತಿರ್‌ಗಾಡ್‌ವಂವೊನಾಯಿತ್‌ಪ್ಪಿಯಾಂದ್‌ ಎಣ್ಣ್‌ಚಿ. 13 ಅದಂಗ್‌ ಕಾಯಿನ ಯೆಹೋವನ ನೋಟಿತ್: ಈ ದಂಡನೆ ನಾಕ್‍ ಸಹಿಸ್ವಕಯ್ಯತಚ್ಚಕ್‌ ಉಂಡ್. 14 ಇಕ್ಕ ನೀನ್‌ ನನ್ನ ಈ ಜಾಗತಿಂಜ, ನೀಡ ಪ್ರಸನ್ನತ್‌ಂಜ ಓಟಿಚಿಟ್ಟಂಡುಳ್ಳಿಯ; ನನ್ನ ಒರ್‌ ಅಲೆಮಾರಿಯಾಯಿತ್‌ ಮಾಡಿತುಳ್ಳಿಯ. ನನ್ನ ದರಾಚೇಂಗಿ ಕಂಡತೇಂಗಿ ನನ್ನ ಕೊಂದ್ರುವಾಂದ್‌ ಎಣ್ಣ್‌ಚಿ. 15 ಅದಂಗ್‌ ಯೆಹೋವ: ನೋಟ್, ಅನ್ನನೆ ಆಪುಲೆ. ಎನ್ನಂಗೆಣ್ಣ್‌ಚೇಂಗಿ ನಿನ್ನ ಕೊಲ್ಲ್‌ವಯಿಂಗಕ್‌ ಏಳ್‌ ಕುರಿ ದಂಡನೆ ಕ್‌ಟ್ಟ್‌ವಾಂದ್‌ ಎಣ್ಣಿತ್, ಯೆಹೋವ ಕಾಯಿನನ ದಾರೂ ಕೊಲ್ಲ್‌ವಕ್ಕಾಗಾಂದ್‌ ಎಚ್ಚರವಾಯಿತಿಪ್ಪಕ್‌ ಅಂವೊಂಡ ಮೇಲೆ ಒರ್‌ ಗುರ್‌ತ್‌ನ ಇಟ್ಟತ್. 16 ಅಕ್ಕ ಕಾಯೀನ ಯೆಹೋವಂಡ ಸನ್ನಿದಾನತಿಂಗ ಪೊರಟಿತ್‌ ಪೋಯಿತ್, ಏದೇನ್‌ರ ಕೇಕ್‌ ತಿಕ್‌ಲ್ ಉಳ್ಳ ನೋಡ್‌ ಎನ್ನುವ ಜಾಗತ್‌ಲ್‌ ವಾಸಮಾಡ್‌ಚಿ. ಕಾಯಿನಂಡ ಸಂತಾನ 17 ಕಾಯಿನ ತಾಂಡ ಪೊಣ್ಣ್‌ರ ಕೂಡೆ ಕೂಡ್‌ವಕ ಅವ ಕುಳ್ಮೆಕಾರ್ತಿಯಾಯಿತ್‌ ಹನೋಕನ ಪೆತ್ತತ್. ಇದಲ್ಲತೆ ಕಾಯಿನ ಒರ್‌ ಊರ್‌ನ ಕೆಟ್ಟಿತ್‌ ಅದ್‌ಂಗ್‌ ಹನೋಕಾಂದ್‌ ತಾಂಡ ಮೊಂವೊಂಡ ಪೆದತ್‌ನ ಬೆಚ್ಚತ್. 18 ಹನೋಕಂಗ್‌ ಈರಾದ ಪುಟ್ಟ್‌ಚಿ. ಈರಾದ ಮೆಹಾಯಾಯೇಲನ ಪೆತ್ತತ್. ಮೆಹಾಯಾಯೇಲ ಮೆತೂಷಾಯೇಲನ ಪೆತ್ತತ್. ಮೆತೂಷಾಯೇಲನ ಲೆಮೆಕನ ಪೆತ್ತತ್. 19 ಲೆಮೆಕ, ಆದಾ ಪಿಂಞ ಚಿಲ್ಲಾ ಎಣ್ಣುವ ದಂಡ್‌ ಪೊಣ್ಣಾಳ್‌ನ ಮಂಗಲ ಕಯಿಚತ್. 20 ಆದಾ ಯಾಬಾಲನ ಪೆತ್ತತ್. ಎತ್ತ್‌ ಕಡ್‌ಚಿಯಳ ಚಾಕಿಯಂಡ್‌ ಗುಡಾರತ್‌ಲ್‌ ಇಪ್ಪಯಿಂಗಕ್‌ ಅಂವೊನೇ ಮೂಲ ವಾಸಿಯಾಚಿ. 21 ಅಂವೊಂಡ ತಮ್ಮಣಂಡ ಪೆದ ಯೂಬಾಲ. ಇಂವೊ ಕಿನ್ನರಿ ಪಿಂಞ ಪಾಂಗೊಳ ಊದುವಯಿಂಗಕ್‌ ಮೂಲ ವಾಸಿಯಾಚಿ. 22 ಲೆಮೆಕಂಡ ಇಂಞೊರ್‌ ಪೊಣ್ಣ್‌ ಚಿಲ್ಲಾ ತೂಬಲ್ಕಾಯಿನನ ಪೆತ್ತತ್. ಅಂವೊ ಪಿಚ್ಚೋಳೆ ಪಿಂಞ ಇರ್‌ಂಬ್ ಸಾಮಾನ್‌ ಮಾಡುವಯಿಂಗಕ್‌ ಮೂಲ ವಾಸಿಯಾಚಿ. ತೂಬಲ್ಕಾಯಿನಂಡ ತಂಗೆ ನಯಮಾ ಆಯಿತ್ತಿಂಜತ್‌ 23 ಒರ್‌ ದಿವಸ ಲೆಮೆಕ ತಾಂಡ ದಂಡ್‌ ಪೊಂಗಳ ಕಾಕ್‌ವಂಜಿ: ನಾಡ ತಕ್ಕ್‌ಕ್‌ ಕೆಮಿ ಕೊಡಿ; ಲೆಮೆಕಂಡ ಪೊಂಗಳೇ ನಾನ್‌ ಎಣ್ಣ್‌ವಾನ ಕ್‍ೕಳಿ: ನನ್ನ ಗಾಯ ಮಾಡಿತ್‌ ಗಾಯಮಾಡ್‌ನ ಮನುಷ್ಯನ ನಾನ್‌ ಕೊಂದಿಯೆ. 24 ಕಾಯಿನನ ಕೊಂದಂವೊಂಗ್‌ ಏಳ್‌ ಕುರಿ ದಂಡನೆ ಬಪ್ಪದಾಚೇಂಗಿ, ಲೆಮೆಕನ ಕೊಂದಂವೊಂಗ್‌ ಏಳ್‌ವತ್‌ ಏಳ್‌ ಕುರಿ ದಂಡನೆ ಕ್‌ಟ್ಟ್‌ವಾಂದ್‌ ಎಣ್ಣ್‌ಚಿ. ಸೇತ ಪಿಟ್ಟ್‌ನದ್‌ 25 ಆದಾಮ ಪುನಃ ತಾಂಡ ಪೊಣ್ಣ್‌ರ ಕೂಡೆ ಕೂಡ್‌ಚಿ. ಅವ ಇಂಞೊರ್‌ ಕ್‌ಣ್ಣ ಕುಂಞಿನ ಪೆತ್ತಿತ್: ಕಾಯಿನ ಕೊಂದ ಹೇಬೆಲಂಗ್ ಬದಲಾಯಿತ್‌ ದೇವ ನಾಕ್‍ ಬೋರೆ ಮೋಂವೊನ ತಂದಿತ್‌ಂದ್‌ ಆ ಕುಂಞಿಕ್‌ ಸೇತಾಂದ್‌ ಪೆದ ಬೆಚ್ಚತ್. 26 ಅಲ್ಲಿಂಜ ಸೇತಂಗ್‌ ಸಹ ಒರ್‌ ಕ್‌ಣ್ಣ ಕುಂಞಿ ಪುಟ್ಟ್‌ಚಿ. ಅಂವೊಂಗ್‌ ಎನೋಷಾಂದ್‌ ಪೆದ ಬೆಚ್ಚತ್. ಆ ಕಾಲತ್‌ಲ್‌ ಯೆಹೋವಂಡ ಪೆದ ಎಣ್ಣಿತ್ ಆರಾದನೆ ಮಾಡ್‌ವಕ್‌ ಜನ ಸುರ್ ಮಾಡ್‌ಚಿ. |
© 2017, New Life Literature (NLL)