ಆದ್ಯತ್‌ರ ಪುಸ್ತಕ 39 - ಕೊಡವ ಬೈಬಲ್ಯೋಸೇಫ ಪಿಂಞ ಪೋಟಿಫರಂಡ ಪೊಣ್ಣ್‌ 1 ಇಕ್ಕ ಇಷ್ಮಾಯೇಲ್ಯರಯಿಂಗ ಯೋಸೇಫನ ಐಗುಪ್ತ ದೇಶಕ್‌ ಕಾಕಿಯಂಡ್‌ ಪೋಚಿ. ಅಲ್ಲಿ ಐಗುಪ್ತ ದೇಶಕ್‌ ಕೂಡ್‌ನಂವೊನಾನ ಫರೋಹನಂಡ ಒರ್‌ ಅದಿಕಾರಿಯು, ಅಂವೊಂಡ ಅರಮನೆಕ್‌ ನಾಯಕನು ಅಯಿತ್‌ಂಜ ಪೋಟೀಫರ ಎಣ್ಣುವ ಒಬ್ಬ ಯೋಸೇಫನ ಅಯಿಂಗಡ ಕೈಯಿಂಜ ಕ್ರಯಕ್‌ ಎಡ್‌ತ್ತಂಡತ್. 2 ಯೆಹೋವ ಯೋಸೇಫಂಡ ಕೂಡೆ ಇಂಜತ್. ಅಂವೊ ಕೈ ಬೆಪ್ಪ ಎಲ್ಲಾ ಕಾರ್ಯತ್‌ಲು ಅಬಿವೃದ್ದಿ ಪೊಂದ್‌ಚಿ. ಅಂವೊ ತಾಂಡ ಎಜಮಾನಂಡ ಮನೇಲ್‌ ವಾಸಮಾಡ್‌ಚಿ. 3 ಯೆಹೋವ ಯೋಸೇಫಂಡ ಕೂಡೆ ಉಂಡ್‍ೕಂದು, ಅಂವೊ ಮಾಡುವ ಕೆಲಸತ್‌ನೆಲ್ಲ ಯೆಹೋವ ಅಬಿವೃದ್ದಿ ಮಾಡಿಯಂಡುಂಡೂಂದು ಪೋಟಿಫರ ಕಂಡತ್. 4 ಅನ್ನನಾಯಿತ್‌ ಯೋಸೇಫಂಗ್‌ ಪೋಟಿಫರಂಡ ದಯೆ ಕ್‌ಟ್ಟ್‌ಚಿ. ಪೋಟಿಫರ ತಾಂಡ ಮನೆನ ಎಚ್ಚರತ್‌ಲ್‌ ನೋಟ್‌ವಕಾಯಿತ್, ಅಂವೊಂಗ್‌ ಉಳ್ಳ ಎಲ್ಲಾನ ಅಂವೊಂಡ ಕೈಕ್‌ ಒಪ್ಪ್‌ಚಿಟ್ಟತ್. 5 ಯೋಸೇಫಂಡ ಕೈಕ್‌ ಎಲ್ಲಾನ ಒಪ್ಪ್‌ಚಿಟ್ಟಪಿಂಞ ಯೆಹೋವ ಯೇಸೇಫಂಡ ಮೂಲಕ ಪೋಟಿಫರಂಡ ಮನೆನ ಆಶೀರ್ವಾದ ಮಾಡ್‌ಚಿ. ಮನೇಲ್‌ ಪಿಂಞ ಪೊರ್ಮೆ ಉಳ್ಳದ್‌ಲ್‌ ಪೋಟಿಫರಂಗ್‌ ಕೂಡ್‌ನ ಎಲ್ಲಾಂಡ ಮೇಲೆ ಯೆಹೋವಂಡ ಆಶೀರ್ವಾದ ಇಂಜತ್. 6 ಆನಗುಂಡ್, ಪೋಟಿಫರ ಯೋಸೇಫಂಗ್‌ ಎಲ್ಲಾ ಅದಿಕಾರತ್‌ನ ಕೊಡ್‌ತತ್. ಅಂವೊ ಉಂಬ ಆಹಾರತ್‌ನ ಬುಟ್ಟತೇಂಗಿ ಇಂಞು ಏದ್‌ ವಿಷಯತ್‌ನ ಅಂವೊ ಗೇನ ಮಾಡ್‌ವಕಿಂಜಿಲೆ. ಇಕ್ಕ ಯೋಸೇಫ ತಡಿ ಬೆಚ್ಚಿತ್‌ ನಲ್ಲ ಚಾಯಿಕಾರನಾಯಿತ್‌ಂಜತ್. 7 ಇನ್ನನೆ ಇಪ್ಪಕ ಅಂವೊಂಡ ಎಜಮಾನಂಡ ಪೊಣ್ಣ್‌ ಅಂವೊಂಡ ಮೇಲೆ ಕಣ್ಣ್‌ ಬೆಚ್ಚಿತ್‌ ಅವಡ ಕೂಡೆ ಬುದ್ದೋಕ್‌ ಬಾಂದ್‌ ಅಂವೊನ ಕಾಕ್‌ಚಿ. 8 ಆಚೇಂಗಿ ಅಂವೊ ಅದ್‌ಂಗ್‌ ಒತ್ತೊತೆ: ನೋಟ್, ನಾಡ ಯಜಮಾನ ನಾಡ ಮೇಲೆ ನಂಬಿಕೆ ಬೆಚ್ಚಿತ್‌ ಈ ಮೆನೇಲ್‌ ಉಳ್ಳದ್‌ನ ಒಂದ್‌ನ ಸಹ ವಿಚಾರ ಮಾಡತೆ, ತಾಂಡ ಇಡೀ ಆಸ್ತಿನ ಎಚ್ಚರತ್‌ಲ್‌ ನೋಟ್‌ವಕ್‌ ನಾಡ ಪಕ್ಕ ಒಪ್ಪಿಚಿಟ್ಟಿತುಂಡ್. 9 ಈ ಮನೆಲ್ ನಾಕ್ಯಿಂಜ ಬಲ್ಯಂವೊ ದಾರು ಇಲ್ಲೆ. ನೀನ್‌ ಅಂವೊಂಡ ಪೊಣ್ಣಾಯಿತ್‌ ಉಳ್ಳಾಂಗ್‌ ನಿನ್ನ ಬುಟ್ಟಿತ್‌ ಬೋರೆ ಎಲ್ಲಾಂಡ ಮೇಲೆ ನಾಕ್‍ ಅದಿಕಾರ ತಂದಿತ್. ಇನ್ನನೆ ಇಪ್ಪಕ ಇಂತ ಮೋಸವಾನ ಕಾರ್ಯತ್‌ನ ಮಾಡಿತ್, ಯೆಹೋವಂಗ್‌ ವಿರುದ್ದವಾಯಿತ್‌ ನಾನ್‌ ಎನ್ನನೆ ಪಾಪ ಮಾಡಡ್‍ೕಂದ್‌ ಎಣ್ಣ್‌ಚಿ. 10 ಅವ ಯೋಸೇಫಂಡ ಕೂಡೆ ದಿನಾಲು ಇನ್ನನೆ ತಕ್ಕ್‌ ಪರ್‌ಂದಂಡಿಂಜತ್. ಆಚೇಂಗಿಯು ಯೋಸೇಫ ಅವಕ್‌ ಕೆಮಿ ಕೊಡ್‌ಕತೆ, ಅವಡ ಕೂಡೆ ಬುದ್ದ್‌ವಕು, ಅವಡ ಕೂಡೆ ಇಪ್ಪಕು ಒತ್ತಂಡ್‌ತ್‌ಲ್ಲೆ. 11 ಇನ್ನನೆ ಇಪ್ಪಕ ಒರ್‌ ದಿವಸ ಅಂವೊ ತಾಂಡ ಕೆಲಸ ಮಾಡ್‌ವಕ್‌ ಮನೇರ ಒಳ್‌ಕ್‌ ಪೋಚಿ. ಮನೇಲ್‌ ಬೋರೆ ಪಣಿಕಾರಂಗ ದಾರು ಇಂಜಿತ್‌ಲ್ಲೆ. 12 ಅಕ್ಕ ಅವ ಬಂದಿತ್‌ ಅಂವೊಂಡ ಬಟ್ಟೆನ ಪುಡ್‌ಚಿತ್‌ ನಾಡ ಕೂಡೆ ಬುದ್ದುವಕ್‌ ಬಾಂದ್‌ ಎಣ್ಣ್‌ಚಿ. ಆಚೇಂಗಿ, ಅಂವೊ ತಾಂಡ ಬಟ್ಟೆನ ಅವಡ ಕೈಲ್‌ ಬುಟ್ಟಿತ್‌ ಪೊರ್ಮೆ ಓಡಿ ಪೋಚಿ. 13 ಅಂವೊ ತಾಂಡ ಬಟ್ಟೆನ ಅವಡ ಕೈಲ್‌ ಬುಟ್ಟಿತ್‌ ಪೋರ್ಮೆ ಓಡಿಪೋನದ್‌ನ ಕಂಡಿತ್, 14 ತಾಂಡ ಮನೆರ ಪಣಿಕಾರಂಗಳ ಕಾಕಿತ್, ಅವ ಅಯಿಂಗಕ್: ನೋಟಿ, ಈ ಇಬ್ರಿಯ ಆಳ್‌ ನಂಗಳ ಅವಮಾನ ಮಾಡ್‌ವಕ್‌ ನಾಡ ವಡಿಯ ಕಾಕಿಯಂಡ್‌ ಬಂದಿಯೆ. ಇಂವೊ ನಾಡ ಕೂಡೆ ಬುದ್ದವಕ್‌ ಬಾತ್. ಆಚೇಂಗಿ ನಾನ್‌ ಕೂತ್‌ ಕೊಡ್‌ತಿಯೆ. 15 ನಾನ್‌ ಜೋರಾಯಿತ್‌ ಕೂತ್‌ ಕೊಡ್‌ಪ್ಪಾನ ಕ್ೕಟಿತ್, ಅಂವೊ ತಾಂಡ ಬಟ್ಟೆನ ನಾಡ ಪಕ್ಕ ಬುಟ್ಟಿತ್‌ ಓಡಿಪೋಚೀಂದ್‌ ಎಣ್ಣ್‌ಚಿ. 16 ಅವ ಅವಡ ವಡಿಯ ಮನೆಕ್‌ ಬಕ್ಕಣೆಕೆ ಯೋಸೇಫಂಡ ಬಟ್ಟೆನ ತಾಂಡ ಪಕ್ಕ ಬೆಚ್ಚಂಡತ್. 17 ವಡಿಯ ಮನೆಕ್‌ ಬಂದದು: ನೀನ್‌ ನಂಗಡ ಪಕ್ಕ ಕಾಕಿಯಂಡ್‌ ಬಂದ ಆ ಇಬ್ರಿಯ ಆಳ್‌ ನನ್ನ ಅವಮಾನ ಮಾಡುತುವಕ್‌ ಬಾತ್. 18 ನಾನ್‌ ಕೂತ್‌ ಕೊಡ್‌ತ್ತಾಂಗ್‌ ಅಂವೊಂಡ ಬಟ್ಟೆನ ನಾಡ ಪಕ್ಕ ಬುಟ್ಟಿತ್‌ ಓಡಿಪೋಚೀಂದ್‌ ಎಣ್ಣ್‌ಚಿ. 19 ನೀಡ ಆಳ್‌ ನಾಕ್‍ ಇನ್ನನೆ ಮಾಡ್‌ಚೀಂದ್‌ ತಾಂಡ ಪೊಣ್ಣ್‌ ಅಂವೊಂಡ ಪಕ್ಕ ಎಣ್ಣ್‌ನದ್‌ನ ಕ್ೕಟಿತ್ ಪೋಟಿಫರಂಗ್‌ ದುಂಬ ಚೆಡಿಬಾತ್. 20 ಯೋಸೇಫಂಡ ಎಜಮಾನ ಯೋಸೇಫನ ಪುಡಿಚಿತ್‌ ರಾಜಂಡ ಕೈದಿಯಳ ಇಡ್‌ವ ಜೈಲ್‌ಲ್‌ ಇಂವೊನ ಸಹ ಇಟ್ಟತ್. ಅಂವೊ ಆ ಜೈಲ್‌ಲ್‌ ಇಂಜತ್. 21 ಆಚೇಂಗಿ ಯೆಹೋವ ಯೋಸೇಫಂಡ ಕೂಡೆ ಇಂಜಂಡ್‌ ಪ್ರೋತಿಚ್ಚಿಟ್ಟಗುಂಡ್, ಅಂವೊಂಗ್‌ ಜೈಲ್‌ರ ಮುಖ್ಯಸ್ತಂಡ ಕಣ್ಣ್‌ಲ್‌ ದಯೆ ಕ್‌ಟ್ಟ್‌ವನೆಕೆ ಮಾಡ್‌ಚಿ. 22 ಜೈಲ್‌ರ ಮುಖ್ಯಸ್ತ ಜೈಲ್‌ಲ್‌ ಬೆಚ್ಚಿತುಳ್ಳ ಎಲ್ಲಾ ಕೈದಿಯಡ ಮೇಲೆ ಯೋಸೇಫಂಗ್‌ ಅದಿಕಾರ ಕೊಡ್‌ತತ್. ಅಲ್ಲಿ ಅಯಿಂಗ ಮಾಡಿಯಡಿಂಜ ಎಲ್ಲಾ ಕಾರ್ಯಕು ಯೋಸೇಫ ಜವಾಬ್ದಾರನಾಯಿತ್‌ಂಜತ್. 23 ಯೆಹೋವ ಅಂವೊಂಡಕೂಡೆ ಇಂಜಾಂಗು, ಅಂವೊ ಎಂತೆಲ್ಲಾ ಮಾಡ್‌ಚೋ ಅದ್‌ನ ಯೆಹೋವ ಆಶೀರ್ವಾದ ಮಾಡ್‌ನಾಂಗು, ಜೈಲ್‌ರ ಮುಖ್ಯಸ್ತ ಯೋಸೇಫ ಮಾಡುವ ಏದ್‌ ವಿಷಯಕು ಬೇಜಾರ್‌ ಮಾಡಿತ್‌ಲ್ಲೆ. |
© 2017, New Life Literature (NLL)