ಆದ್ಯತ್‌ರ ಪುಸ್ತಕ 38 - ಕೊಡವ ಬೈಬಲ್ಯೆಹೂದಂಡ ಕುಟುಂಬತ್‌ಲ್‌ ನಡ್‌ಂದ ಚೆನ್ನ ಸಂಗತಿ 1 ಆ ಕಾಲತ್‌ಲ್‌ ಯೆಹೂದ ತಾಂಡ ಅಣ್ಣತಮ್ಮಣಂಗಳ ಬುಟ್ಟಿತ್, ಅದುಲ್ಲಾಮ್‌ ಎಣ್ಣುವ ಊರ್‌ಕ್‌ ಕೂಡ್‌ನಂವೊನಾನ ಹೀರಾ ಎಣ್ಣುವಂವೊಂಡ ಪಕ್ಕ ಇಪ್ಪಕ್‌ ಪೋಚಿ. 2 ಅಲ್ಲಿ ಅಂವೊ ಒರ್‌ ಕಾನಾನ್ಯನಾನ ಶೂಗ ಎಣ್ಣುವಂವೊಂಡ ಮೋವಳ ಕಂಡಿತ್, ಅವಳ ಮಂಗಲ ಕಯಿಚಿತ್, ಅವಡ ಕೂಡೆ ಕೂಡ್‌ಚಿ. 3 ಅವ ಕುಳುಮೆಕಾರ್ತಿಯಾಯಿತ್‌ ಒರ್‌ ಕ್‌ಣ್ಣ ಕುಂಞಿನ ಪೆತ್ತತ್. ಅಂವೊಂಗ್‌ ಅಂವೊ ಏರ್‌ ಎಣ್ಣಿಯಂಡ್‌ ಪೆದ ಬೆಚ್ಚತ್. 4 ಅವ ದಂಡನೆ ಕುರಿ ಕುಳುಮೆಕಾರ್ತಿಯಾಯಿತ್‌ ಇಂಞೊರ್‌ ಕ್‌ಣ್ಣ ಕುಂಞಿನ ಪೆತ್ತತ್. ಅವ ಅಂವೊಂಗ್‌ ಓನಾನ್‌ ಎಣ್ಣಿಯಂಡ್‌ ಪೆದ ಬೆಚ್ಚತ್. 5 ಅವ ಇಂಞೊರ್‌ ಕುರಿ ಕುಳುಮೆಕಾರ್ತಿಯಾಯಿತ್‌ ಮೂಂದನೆ ಕ್‌ಣ್ಣ ಕುಂಞಿನ ಪೆತ್ತತ್. ಅವ ಆ ಕುಂಞಿಕ್‌ ಶೇಲಹ ಎಣ್ಣಿಯಂಡ್‌ ಪೆದ ಬೆಚ್ಚತ್. ಅವ ಆ ಕುಂಞಿನ ಪೆರುವಕ ಅಂವೊ ಕಜೀಬೂರ್‌ ಎಣ್ಣುವ ಜಾಗತ್‌ ವಾಸಮಾಡಿಯಂಡಿಂಜತ್. 6 ಯೆಹೂದ ತಾಂಡ ಪೆರಿಯ ಮೊಂವೊನಾನ ಏರ್‌ಂಗ್, ತಾಮಾರ ಎಣ್ಣುವ ಮೂಡಿರ ಕೂಡೆ ಮಂಗಲ ಕಯಿಚತ್. 7 ಆಚೇಂಗಿ ಯೆಹೂದಂಡ ಪೆರಿಯ ಮೊಂವೊನಾನ ಏರ್‌ ಯೆಹೋವಂಡ ದೃಷ್ಟಿಲ್‌ ಕೆಟ್ಟಂವೊನಾಯಿತ್‌ಂಜಂಗ್‌ ಯೆಹೋವ ಅಂವೊನ ಚಾವನೆಕೆ ಮಾಡ್‌ಚಿ. 8 ಅಲ್ಲಿಂಜ ಯೆಹೂದ ಏರಂಡ ತಮ್ಮಣ ಓನಾನಂಡ ಪಕ್ಕ ಬಂದಿತ್: ನೀನ್‌ ನೀಡ ಅಣ್ಣಂಡ ಪೊಣ್ಣ್‌ನ ಮಂಗಲ ಕಯಿಚಿತ್, ನಂಗಡ ಪದ್ದತಿಕ್‌ ಸೆರಿಯಾಯಿತ್‌ ನೀಡ ಅಣ್ಣಂಡ ಸಂತಾನ ಬೊಳಿಯುವನೆಕೆ ಮಾಡ್‍ೕಂದ್‌ ಎಣ್ಣ್‌ಚಿ. 9 ಆಚೇಂಗಿ ಓನಾನ್‌ ಈ ರೀತಿಲ್‌ ಆಪ ಸಂತಾನ ತಾಂಡದ್‌ ಆಪ್‌ಲೇಂದ್‌ ಅರಿಂಜಿತ್, ತಾಂಡ ಅಣ್ಣಂಡ ಪೊಣ್ಣ್‌ರ ಕೂಡೆ ಕೂಡ್‌ವಕ ತಾಂಡ ಅಣ್ಣಂಗ್‌ ಸಂತಾನ ಆಕತನೆಕೆ ಇಪ್ಪಕ್‌ ಅಂವೊ ಎಚ್ಚರತ್‌ಲ್‌ ಇಂಜತ್. 10 ಅಂವೊ ಇನ್ನನೆ ಮಾಡ್‌ವದ್‌ ಯೆಹೋವಂಡ ದೃಷ್ಟಿಲ್‌ ಕೆಟ್ಟದಾಯಿತಿಂಜಂಗ್, ಅಂವೊನ ಸಹ ಅಂವೊ ಚಾವನೆಕೆ ಮಾಡಚಿ. 11 ಅಲ್ಲಿಂಜ ಯೆಹೂದ, ತಾಂಡ ಮೋಂವೊನಾನ ಶೇಲಹ ಸಹ ತಾಂಡ ಅಣ್ಣಂಗಡನೆಕೆ ಚತ್ತ್‌ ಪೋಕೂಂದ್‌ ಗೇನ ಮಾಡಿತ್ ತಾಂಡ ಮೈಮಳಾನ ತಾಮಾರಳ ನೋಟಿತ್: ನಾಡ ಮೊಂವೊ ಶೇಲಹ ಬಲ್ಯದಾಕಣೆಕೆ ನೀನ್‌ ನೀಡ ಅಪ್ಪಂಡ ಮನೇಲ್‌ ವಡಿಯ ಚತ್ತ ಪೊಣ್ಣಾಯಿತ್‌ ಇರ್‌ಂದ್‌ ಎಣ್ಣ್‌ಚಿ. ಅನ್ನನೆ ತಾಮಾರ ಅವಡ ಅಪ್ಪಂಡ ಮನೆಕ್‌ ಪೋಯಿತ್‌ ವಾಸ ಮಾಡ್‌ಚಿ. 12 ದುಂಬ ದಿವಸ ಆನಪಿಂಞ ಯೆಹೂದಂಡ ಪೊಣ್ಣ್‌ ಆನ ಶೂಗಂಡ ಮೋವ ಚತ್ತ್‌ ಪೋಚಿ. ಯೆಹೂದ ತಾಂಡ ದುಃಖ ಕಮ್ಮಿಯಾನಪಿಂಞ, ಅಂವೊ ಅದುಲ್ಲಾಮ್‌ ಊರ್‌ಕ್‌ ಕೂಡ್‌ನಂವೊನಾನ ತಾಂಡ ಸ್ನೇಹಿತ ಹೀರಾಂಡ ಕೂಡೆ ತಿಮ್‌ನಾ ಊರ್‌ಲ್‌ ತಾಂಡ ಕೊರಿಯಡ ರೋಮತ್‌ನ ಕತ್ತರಿಚಿಡುವಯಿಂಗಡ ಪಕ್ಕ ಪೋಚಿ. 13 ದಾರೋ ಒಬ್ಬ ಯೆಹೂದಂಡ ಮೈಮಳಾನ ತಾಮರಂಗ್: ನೋಟ್, ನೀಡ ಮಾಂವ, ತಾಂಡ ಕೊರಿಯಡ ರೋಮತ್‌ನ ಕತ್ತರಿಚಿಡುವಯಿಂಗಡ ಪಕ್ಕ ಪೋಪಕ್‌ ತಿಮ್‌ನಾ ಊರ್‌ಕ್‌ ಪೋಯಂಡುಂಡ್‍ೕಂದ್‌ ಎಣ್ಣ್‌ಚಿ. 14 ಅಕ್ಕ ಅವ ಶೇಲಹ ಬಲ್ಯದಾಚೇಂಗಿಯು ಯೆಹೂದ ಶೇಲಹನ ನಾಕ್‍ ಮಂಗಲ ಕಯಿಚಿತ್ ತಂದಿತ್‌ಲ್ಲೇಂದ್‌ ಗೇನ ಮಾಡಿತ್, ಅವ ತಾಂಡ ವಿದವೆರ ಬಟ್ಟೆನ ಬದಲಾಯಿಚಿಟ್ಟಿತ್, ಅವಳ ಕಂಡ್‌ಪುಡಿಪಕ್ಕಾಗ ಎಣ್ಣಿಯಂಡ್‌ ಒರ್‌ ಬಟ್ಟೆನೆ ತಾಂಡ ಮೂಡ್‌ಕ್‌ ಸುತ್ತಿಯಂಡತ್. ಅಲ್ಲಿಂಜ ಅವ ತಿಮ್‌ನಾ ಊರ್‌ಕ್‌ ಪೋಪ ಬಟ್ಟೆಲ್‌ ಉಳ್ಳ ಏನಯಿಮ್‌ ಊರ್‌ರ ಪಡಿರ ಪಕ್ಕ ಪೋಯಿತ್‌ ಅಳ್‌ತಂಡತ್. 15 ಯೆಹೂದ ಅವಳ ಕಂಡಿತ್, ಅವ ಮೂಡ್‌ನ ಮುಚ್ಚಿತ್‌ಂಜನಗುಂಡ್‌ ಅವ ಒರ್‌ ಚೂಳೇಂದ್‌ ಗೇನಮಾಡಿತ್, 16 ಯೆಹೂದ ಅವಡ ಪಕ್ಕ ಬಂದಿತ್, ಅವ ತಾಂಡ ಮೈಮಾಂದ್‌ ಗೊತ್ತಿಲ್ಲತೆ: ನಾನ್‌ ನೀಡ ಕೂಡೆ ಕೂಡ್‌ವಕ್‌ ಬಪ್ಪಿಯಾಂದ್‌ ಕ್‍ೕಟತ್. ಅದ್‌ಂಗ್‌ ತಾಮರ: ನಾನ್‌ ನೀಡ ಕೂಡೆ ಕೂಡ್‌ವಕ್‌ ನೀನ್‌ ನಾಕ್‍ ಎಂತ ತಪ್ಪಿಯಾಂದ್‌ ಕ್‍ೕಟತ್. 17 ಅದ್‌ಂಗ್‌ ಅಂವೊ: ನಾಡ ಕೊರಿಗುಡ್ಡೆಯಿಂಜ ಒರ್‌ ಆಡ್‌ನ ಅಯಿಪೀಂದ್‌ ಎಣ್ಣ್‌ಚಿ. ಅಕ್ಕ ಅವ: ನೀನ್‌ ಆಡ್‌ನ ಅಯಿಪಕತ್ತನೆ, ನೀನ್‌ ಎಂತ ಅಡೆ ಬೆಪ್ಪಿಯಾಂದ್‌ ಕ್‍ೕಟತ್. 18 ಅದ್‌ಂಗ್‌ ಅಂವೊ: ನಾನ್‌ ಎಂತನ ಅಡೆ ಬೆಕ್ಕಂಡೂಂದ್‌ ಕ್‍ೕಟತ್. ಅದ್‌ಂಗ್‌ ಅವ: ನೀಡ ಮುದ್ರೆರ ಮೋಯಿರ, ನೀಡ ಮಾಲೆ ಪಿಂಞ ನೀಡ ಕೈಯಿಲ್‌ ಉಳ್ಳ ಕೋಲ್‌ನ ತಾಂದ್‌ ಎಣ್ಣ್‌ಚಿ. ಯೆಹೂದ ಇದನೆಲ್ಲ ಅವಕ್‌ ಕೊಡ್‌ತಿತ್, ಅವಡ ಕೂಡೆ ಕೂಡ್‌ಚಿ. ಆನಗುಂಡ್‌ ಅವ ಕೆಲಕಾರ್ತಿಯಾಚಿ. 19 ಅವ ಎದ್ದಿತ್‌ ಪೋಯಿತ್‌ ತಾನ್‌ ಮೂಡ್‌ಕ್‌ ಸುತ್ತಿಯಂಡಿಂಜ ಬಟ್ಟೆನ ಎಡ್‌ತಿತ್, ಪುನಃ ವಿದವೆರ ಬಟ್ಟೆನ ಇಟ್ಟಂಡತ್. 20 ಯೆಹೂದ ತಾನ್‌ ಅಡೆಬೆಚ್ಚಿತ್‌ಂಜ ವಸ್ತುನ ಆ ಪೊಣ್ಣಾಳ್‌ಂಜ ಬುಡ್‌ತುವಕಾಯಿತ್‌ ತಾಂಡ ಸ್ನೇಹಿತನಾನ ಅದುಲ್ಲಾಮ್‌ ಊರ್‌ಕಾನಾನ ಹೀರಂಡ ಕೈಲ್‌ ಆಡ್‌ರ ಕುಟ್ಟಿನ ಕೊಡ್‌ತ್‌ ಅಯಿಚತ್. ಆಚೇಂಗಿ ಹೀರ ಅವಳ ಕಂಡಿತ್‌ಲ್ಲೆ. 21 ಅಂವೊ ಅವಡ ಊರ್‌ಕಾರಳ ನೋಟಿತ್: ಏನಯಿಮ್‌ ಊರ್‌ರ ಪಡಿರ ಪಕ್ಕ ಅಳ್‌ತಂಡಿಂಜ ಚೂಳೆ ಎಲ್ಲಿ ಉಳ್ಳಂದ್‌ ಕ್‍ೕಟತ್. ಅದ್‌ಂಗ್‌ ಅಯಿಂಗ: ಇಲ್ಲಿ ಏದ್‌ ಚೂಳೆಯು ಇಲ್ಲೇಂದ್‌ ಎಣ್ಣ್‌ಚಿ. 22 ಹೀರ ಯೆಹೂದಂಡ ಪಕ್ಕ ಪುನಃ ತಿರಿತ್‌ ಬಂದಿತ್: ನಾನ್‌ ಅವಳ ಎಲ್ಲಿಯೂ ಕಂಡಿತ್‌ಲ್ಲೆ. ಅದಲ್ಲಾತೆ ಅಲ್ಲಿ ಏದ್‌ ಚೂಳೆಯು ಇಂಜಿತ್‌ಲ್ಲೇಂದ್‌ ಅಲ್ಲಿಯತ್‌ರ ಊರ್‌ಕಾರಂಗ ಎಣ್ಣಿಯುಂಡುಂಡ್‍ೕಂದ್‌ ಎಣ್ಣ್‌ಚಿ. 23 ಅದ್‌ಂಗ್‌ ಯೆಹೂದ: ನಾನ್‌ ಕೊಡ್‌ತ ವಸ್ತುನ ಅವಳೇ ಬೆಚ್ಚೊಡ್. ನಾನ್‌ ಒತ್ತಂಡನೆಕೆ ಆಡ್‌ರ ಕುಟ್ಟಿನ ಅಯಿಚಿ ಕೊಡ್‌ತ. ನೀನ್‌ ಅವಳ ಕಂಡ್‌ಲ್ಲೆ. ನಂಗ ತಿರಿತ್‌ ಅವಳ ತ್‍ೕಡಿಯಂಡ್‌ ಪೋಚೇಂಗಿ ಆ ಊರ್‌ಕಾರಂಗ ನಂಗಳ ತಮಾಷಿ ಮಾಡ್‌ವಾಂದ್‌ ಎಣ್ಣ್‌ಚಿ. 24 ಸುಮಾರ್‌ ಮೂಂದ್‌ ತಿಂಗ ಆನ ಪಿಂಞ ಯೆಹೂದಂಗ್: ನೀಡ ಮೈಮ ತಾಮಾರ ಚೂಳೆತನ ಮಾಡ್‌ಚಿ. ಆ ಚೂಳೆತನತ್‌ಂಜ ಅವ ಕೆಲಕಾರ್ತಿಯು ಆಚೀಂದ್‌ ದಾರೋ ಎಣ್ಣ್‌ಚಿ. ಅಕ್ಕ ಯೆಹೂದ: ಅವಳ ಪೊರ್ಮೆ ಬಲಚಿತ್‌ ಬಾರಿ, ಅವಳ ತಿತ್ತ್‌ಕ್ ಇಟ್ಟಿತ್‌ ಚುಡಂಡೂಂದ್‌ ಎಣ್ಣ್‌ಚಿ. 25 ಅವಳ ಕೊಲ್ಲ್‌ವಕ್‌ ಅಯಿಂಗ ಪೊರ್ಮೆ ಕಾಕಿಯಂಡ್‌ ಬಪ್ಪಕ, ಅವ ತಾಂಡ ಮಾಂವಂಗ್, ಅಡೆ ಬೆಚ್ಚ ವಸ್ತುನೆಲ್ಲ ಅಯಿಚಿತ್: ಈ ವಸ್ತುಯೆಲ್ಲ ದಾಡದೋ, ಅಂವೊಂಡಗುಂಡ್‌ ನಾನ್‌ ಕುಳುಮೆಕಾರ್ತಿಯಾನ. ಈ ಮುದ್ರೆರ ಮೋಯಿರ, ದಾರ ಪಿಂಞ ಈ ಕೋಲ್‌ ದಾಡದ್‍ೕಂದ್‌ ನೋಟ್ೕಂದ್‌ ಎಣ್ಣಿತ್‌ ಅಯಿಚತ್. 26 ಯೆಹೂದ ಅದೆಲ್ಲಾ ಅಂವೊಂಡದೇಂದ್‌ ಗೊತ್ತಾನ ಪಿಂಞ: ಅವ ನಾಕಿಂಜಿ ನೀತಿವಂತವಳಾಯಿತುಂಡ್. ಅವಳ ನಾಡ ಮೋಂವೊ ಶೇಲಹಂಗ್‌ ಮಂಗಲ ಕಯಿಚಿತ್ ಕೊಡ್‌ಕತೆ ಪೋಯಿಟಲ್ಲಾಂದ್‌ ಎಣ್ಣ್‌ಚಿ. ಬಯ್ಯಂಜಿ, ಯೆಹೂದ ತಾಮಾರಂಡ ಕೂಡೆ ಪುನಃ ಕೂಡಿತ್‌ಲ್ಲೆ. 27 ತಾಮಾರಂಗ್‌ ಪೆರುವ ಕಾಲ ಬಪ್ಪಕ ಅವಡ ಕೆಲತ್‌ಲ್‌ ಎಣೆಮಕ್ಕ ಉಳ್ಳದ್‌ ಕಂಡ್‍ಬಾತ್. 28 ಅವ ಪೆರುವಕ ಒರ್‌ ಕುಂಞಿ ಕೈನ ಪೊರಮೆ ನ್‍ೕಟ್‌ಚಿ. ಅಕ್ಕ ಆರೈಕೆಕಾರ್ತಿ ಆ ಕುಂಞಿರ ಕೈನ ಪುಡ್‌ಚಿತ್‌ ಚೋಂದನೂಲ್‌ನ ಕೆಟ್ಟಿತ್: ಈ ಕುಂಞಿ ಆದ್ಯ ಪುಟ್ಟ್‌ಚೀಂದ್‌ ಎಣ್ಣ್‌ಚಿ. 29 ಆಚೇಂಗಿ ಕುಂಞಿ ಕೈನ ಬಯ್ಯಕ್‌ ಒಳಕ್‌ ಎಡ್‍ತಂಡತ್. ಇಂಞೊರ್‌ ಕುಂಞಿ ಮಿಂಞ ಪುಟ್ಟ್‌ಚಿ. ಅಕ್ಕ ಆ ಆರೈಕೆಕಾರ್ತಿ: ನೀನ್‌ ಎನ್ನನೆ ಮೀರಿಯಂಡ್‌ ಮಿಂಞ ಬಂದಿಯೇಂದ್‌ ಎಣ್ಣಿತ್‌ ಅಂವೊಂಗ್‌ ಪೆರೆಚ್‍ ಎಣ್ಣಿಯಂಡ್‌ ಪೆದ ಬೆಚ್ಚತ್. 30 ಅಲ್ಲಿಂಜ ಕೈಕ್‌ ಚೋಂದ ನೂಲ್‌ನ ಕೆಟ್ಟಿತ್‌ಂಜ ಕುಂಞಿ ಪುಟ್ಟ್‌ಚಿ. ಅದ್‌ಂಗ್‌ ಜೆರಹ ಎಣ್ಣಿಯಂಡ್‌ ಪೆದ ಕ್‌ಟ್ಟ್‌ಚಿ. |
© 2017, New Life Literature (NLL)