ಆದ್ಯತ್‌ರ ಪುಸ್ತಕ 37 - ಕೊಡವ ಬೈಬಲ್ಯೋಸೇಫಂಡ ಸ್ವಪ್ನ 1 ಯಾಕೋಬ ತಾಂಡ ಅಪ್ಪ ವಾಸಮಾಡಿಯಂಡಿಂಜ ಕಾನಾನ್‌ ದೇಶತ್‌ಲ್‌ ವಾಸಮಾಡಿಯಂಡಿಂಜತ್. 2 ಯಾಕೋಬಂಡ ವಂಶಾವಳಿ. ಯೋಸೇಫ ತಾಂಡ ಪದಿನ್‍ೕಳನೆ ವಯಸ್ಸ್‌ಲ್‌ ತಾಂಡ ಅಣ್ಣತಮ್ಮಣಂಗಡ ಕೂಡೆ ಆಡ್‌ಕೊರಿಯಳ ಮೇಯಿಚಿಟ್ಟಂಡ್‌ ಇಂಜತ್. ಅಂವೊ ತಾಂಡ ಅಪ್ಪಂಡ ಪಣಿಕಾರ್ತಿಯ ಪೊಣ್ಣಾಳಾನ ಬಿಲ್ಹಾ ಪಿಂಞ ಜಿಲ್ಪಾಳಂಡ ಮಕ್ಕಡ ಕೂಡೆ ಇಂಜಂಡ್, ಅಯಿಂಗ ಮಾಡಿಯಂಡಿಂಜ ಕೆಟ್ಟ ಕೆಲಸತ್‌ರ ವಿಷಯತ್‌ನ ಅಪ್ಪಂಗ್‌ ದನ ಎಣ್ಣ್‌ಚಿ. 3 ಇಸ್ರಾಯೇಲ್‌ಂಗ್‌ ವಯಸ್ಸಾನ ಕಾಲತ್‌ ಯೋಸೇಫ ಪುಟ್ಟ್‌ನಂಗ್‌ ತಾಂಡ ಬೋರೆ ಕ್‌ಣ್ಣ ಮಕ್ಕಕಿಂಜ ಇಂವೊನ ದಂಬ ಪ್ರೀತಿ ಮಾಡಿತ್, ಅಂವೊಂಗ್ ದುಂಬ ಚಾಯಿವುಳ್ಳ ರಂಗ್‌ರಂಗ್‌ರ ಅಂಗಿನ ಮಾಡಿ ಕೊಡ್‌ತತ್. 4 ಆಚೇಂಗಿ ಅಂವೊಂಡ ಅಣ್ಣತಮ್ಮಣಂಗಕ್ ಅಯಿಂಗಡ ಅಪ್ಪ ಅಯಿಂಗಕಿಂಜ ಅಂವೊನ ದುಂಬ ಪ್ರೀತಿಮಾಡಿಯಂಡುಂಡ್‍ೕಂದ್‌ ಗೊತ್ತಾಯಿತ್, ಯೋಸೇಫನ ದ್ವೇಶ ಮಾಡಿತ್, ಅಯಿಂಗಕ್ ಅಂವೊಂಡ ಕೂಡೆ ಸಮಾದಾನತ್‌ಲ್‌ ತಕ್ಕ್‌ ಪರಿಯುವಕ್‌ ಕಯಿಂಜ್‌ತ್‌ಲ್ಲೆ. 5 ಒರ್‌ ಬಯಿಟ್ ಯೋಸೇಫ ಒರ್‌ ಸ್ವಪ್ನ ಕಂಡಿತ್, ಅದ್‌ನ ತಾಂಡ ಅಣ್ಣತಮ್ಮಣಂಗಕ್ ಎಣ್ಣ್‌ಚಿ. ಅಯಿಂಗ ಅದ್‌ನ ಕ್‍ೕಟಿತ್‌ ಅಂವೊನ ಇಂಞು ದುಂಬ ದ್ವೇಶ ಮಾಡ್‌ಚಿ. 6 ಯೋಸೇಫ ಅಯಿಂಗಕ್: ನಾನ್‌ ಕಂಡ ಸ್ವಪ್ನತ್‌ನ ಕ್‍ೕಳಿ. 7 ನಂಗೆಲ್ಲಾರು ಬೇಲ್‌ಲ್‌ ಕದ್‌ನ ಕೆಟ್ಟಿಯಂಡಿಂಜತ್. ಅಕ್ಕ ನಾಡ ಕೆಟ್ಟ್‌ ಎದ್ದ್ ನಿಂದತ್. ಅದಾ, ನಿಂಗಡ ಕೆಟ್ಟ್‌ಯೆಲ್ಲ ಸುತ್ತ್‌ ಕೂಡಿತ್‌ ನಾಡ ಕೆಟ್ಟ್‌ರ ಮಿಂಞತ್‌ ಅಡ್ಡ ಬುದ್ದತ್‍ೕಂದ್‌ ಎಣ್ಣ್‌ಚಿ. 8 ಅದ್‌ಂಗ್‌ ಅಂವೊಂಡ ಅಣ್ಣಂಗ ಅಂವೊನ ನೋಟಿತ್: ನೀನ್‌ ನಂಗಳ ಆಳ್‌ವಿಕೆ ಮಾಡ್‌ವಿಯಾ? ನೀನ್‌ ನಂಗಳ ಅಡಕ್‌ವಿಯಾಂದ್‌ ಎಣ್ಣಿತ್, ಅಂವೊ ಕಂಡ ಸ್ವಪ್ನಕಾಯಿತು ಅಂವೊ ಅನ್ನನೆ ಎಣ್ಣ್‌ನಂಗಾಯಿತು ಅಯಿಂಗ ಅಂವೊನ ಇಂಞು ದ್ವೇಶ ಮಾಡ್‌ಚಿ. 9 ಯೋಸೇಫ ಇಂಞೊರ್‌ ಸ್ವಪ್ನ ಕಂಡಿತ್, ತಾಂಡ ಅಣ್ಣಂಗಡ ಪಕ್ಕ ಬಂದಿತ್: ನಾನ್‌ ಇಂಞು ಒರ್‌ ಸ್ವಪ್ನತ್‌ನ ಕಂಡ; ಸೂರ್ಯ ಚಂದ್ರ ಪಿಂಞ ಪನ್ನಂದ್‌ ಬಾನತ್ಮೀನ್‌ ನಾಡ ಮಿಂಞ ಅಡ್ಡ ಬುದ್ದತ್‍ೕಂದ್‌ ಎಣ್ಣ್‌ಚಿ. 10 ಈ ಸ್ವಪ್ನತ್‌ನ ತಾಂಡ ಅಪ್ಪಂಗು ಅಣ್ಣಂಗಕು ಎಣ್ಣ್‌ವಕ, ಅಂವೊಂಡ ಅಪ್ಪ ಅಂವೊನ ನೋಟಿತ್: ನೀನ್‌ ಎಂತಾ ಸ್ವಪ್ನ ಕಂಡಿಯಾ? ನಾನು, ನೀಡ ಅವ್ವಳು, ನೀಡ ಅಣ್ಣತಮ್ಮಣಂಗಳು ನೀಡ ಮಿಂಞತ್‌ ಅಡ್ಡ ಬೂವಾಂದ್‌ ಎಣ್ಣಿಯಂಡುಳ್ಳಿಯಾಂದ್‌ ಕ್‍ೕಟಿತ್‌ ಅಂವೊನ ಬಜ್ಜತ್. 11 ಯೋಸೇಫಂಡ ಅಣ್ಣಂಗ ಅಂವೊಂಡ ಮೇಲೆ ಹೊಟ್ಟೆಕಿಚ್ಚ್‌ಪಟ್ಟತ್. ಆಚೇಂಗಿ ಅಂವೊಂಡ ಅಪ್ಪ ಅಂವೊ ಕಂಡ ಸ್ವಪ್ನ ಎಂತ ಆಯಿತಿಕ್ಕೂಂದ್‌ ಗೇನ ಮಾಡಿಯಂಡಿಂಜತ್. ಯೋಸಫಂಡ ಅಣ್ಣಂಗ ಅಂವೊನ ಕ್ರಯಕ್‌ ಮಾರ್‌ನದ್‌ 12 ಪಿಂಞ, ಯೋಸೇಫಂಡ ಅಣ್ಣಂಗ ಅಯಿಂಗಡ ಅಪ್ಪಂಡ ಆಡ್‌ಕೊರಿಯಳ ಮೇಯಿಚಿಡುವಕ್‌ ಶೆಕೆಮ್‌ಕ್‌ ಎಣ್ಣುವ ಜಾಗಕ್‌ ಪೋಚಿ. 13 ಅಕ್ಕ ಇಸ್ರಾಯೇಲ್‌ ಯೋಸೇಫನ ನೋಟಿತ್: ನೀಡ ಅಣ್ಣಂಗ ಶೆಕೆಮ್‌ಲ್‌ ಆಡ್‌ಕೊರಿಯಳ ಮೇಯಿಚಿಡುವಕ್‌ ಪೋಚಲ್ಲ? ನಾನ್‌ ನಿನ್ನ ಅಯಿಂಗಡ ಪಕ್ಕ ಅಯಿಪಿ, ಬಾ ಎಣ್ಣಿಯಂಡ್‌ ಅಂವೊಂಗ್ ಎಣ್ಣ್‌ಚಿ. ಅದ್‌ಂಗ್‌ ಯೋಸೇಫ: ಇದಾ, ನಾನ್‌ ಪೋಪೀಂದ್‌ ಎಣ್ಣ್‌ಚಿ. 14 ಅಕ್ಕ ಇಸ್ರಾಯೇಲ್‌ ಅಂವೊಂಗ್: ನೀನ್‌ ಪೋಯಿತ್ ನೀಡ ಅಣ್ಣಂಗ ಪಿಂಞ ಆಡ್‌ಕೊರಿಯ ಎನ್ನನೆ ಉಂಡ್‍ೕಂದ್‌ ಅರ್‌ಜಂಡ್, ತಿರಿತ್‌ ಬಂದಿತ್ ನಾಕ್‍ ಎಣ್ಣ್‍ೕಂದ್‌ ಎಣ್ಣಿತ್, ಅಂವೊನ ಹೆಬ್ರೋನ್‌ ಕಣಿವೆಯಿಂಜ ಅಯಿಚಿ ಕೊಡ್‌ತತ್. ಅನ್ನನೆ ಯೋಸೇಫ ಶೆಕೆಮ್‌ಕ್‌ ಪೊರ್‌ಟತ್. 15 ಅಕ್ಕ ಒರ್‌ ಮನುಷ್ಯ ಇಂವೊ ಬೇಲ್‌ಲ್‌ ಆಲೆಈಲೆ ತಿರ್‌ಗಿಯಂಡ್‌ ಉಳ್ಳದ್‌ನ ಕಂಡಿತ್: ನೀನ್‌ ದಾರ್‌ನ ತ್‍ೕಡಿಯಂಡುಳ್ಳಿಯಾಂದ್‌ ಕ್‍ೕಟತ್. 16 ಅದ್‌ಂಗ್‌ ಯೋಸೇಫ: ನಾನ್‌ ನಾಡ ಅಣ್ಣಂಗಳ ತ್‍ೕಡಿಯಂಡುಳ್ಳ್ಂದ್‌ ಎಣ್ಣ್‌ಚಿ. ಅಯಿಂಗ ಆಡ್‌ಕೊರಿಯಳ ಎಲ್ಲಿ ಮೇಯಿಚಿಟ್ಟಂಡುಂಡ್‍ೕಂದ್‌ ದಯಬೆಚ್ಚಿತ್‌ ಎಣ್ಣ್‍ೕಂದ್‌ ಕ್‍ೕಟತ್. 17 ಅದ್‌ಂಗ್‌ ಆ ಮನುಷ್ಯ: ಅಯಿಂಗ ಇಲ್ಲಿಂಜ ಪೊರಟ್ ಪೋಚಿ. ಅಯಿಂಗ ನಂಗ ದೋತಾನ್‌ಂಗ್‌ ಪೋಕನಾಂದ್‌ ಎಣ್ಣ್‌ನದ್‌ ನಾಕ್‍ ಕ್‍ೕಟತ್‍ೕಂದ್‌ ಎಣ್ಣ್‌ಚಿ. ಅಕ್ಕ ಯೋಸೇಫ ತಾಂಡ ಅಣ್ಣಂಗ ಪೋನ ಬಟ್ಟೆಲ್‌ ಪೋಯಿತ್ ಅಯಿಂಗಳ ದೋತಾನ್‌ಲ್‌ ಕಂಡತ್. 18 ಅಯಿಂಗ ಯೋಸೇಫ ದೂರತ್‌ಲ್‌ ಬಪ್ಪನ ಕಂಡಿತ್, ಅಯಿಂಗಡ ಪಕ್ಕ ಬಪ್ಪಕ್‌ ಮಿಂಞಲೇ ಅಂವೊನ ಕೊಲ್ಲ್‌ವಕ್‌ ಬಟ್ಟೆ ನೋಟಿಯಂಡಿಂಜತ್. 19 ಅಯಿಂಗ ಒಬ್ಬಂಗೊಬ್ಬನ ನೋಟಿತ್: ಇದಾ, ಸ್ವಪ್ನ ಕಾಂಬಂವೊ ಬಂದಂಡುಂಡ್, 20 ನಂಗ ಅಂವೊನ ಕೊಂದಿತ್ ಒರ್‌ ಕುಂಡ್‌ರ ಒಳ್‌ಕ್‌ ಚಾಡನ. ದುಷ್ಟ ಮೃಗ ಅಂವೊನ ತಿಂದ್‌ರ್‌ತ್‍ೕಂದ್‌ ನಂಗಡ ಅಪ್ಪಂಗ್‌ ಎಣ್ಣನ. ಅಲ್ಲಿಂಜ ಅಂವೊ ಕಂಡ ಸ್ವಪ್ನ ಎಲ್ಲ ಎಂತ ಆಪಾಂದ್‌ ನೋಟನಾಂದ್‌ ತಕ್ಕ್‌ ಪರ್ಂದತ್. 21-22 ಆಚೇಂಗಿ ರೂಬೇನ ಅದ್‌ನ ಕ್‍ೕಟಿತ್‌ ಯೋಸೆಫನ ಅಯಿಂಗಡ ಕೈಯಿಂಜ ಕಾಪಾಡಿತ್‌ ಅಂವೊನ ತಿರಿತ್‌ ತಾಂಡ ಅಪ್ಪಂಡ ಪಕ್ಕ ಕಾಕಿಯಂಡ ಪೋಕಾಂದ್‌ ಗೇನಮಾಡಿತ್, ಅಯಿಂಗಳ ನೋಟಿತ್: ಅಂವೊನ ಕೊಲ್ಲೊದ್‌ ಬೋಂಡ, ನಿಂಗ ಚೋರೆ ಚೆಲ್ಲೊದ್‌ ಬೋಂಡ. ನಿಂಗ ಅಂವೊಂಡ ಮೇಲೆ ಕೈ ಬೆಕ್ಕತನೆಕೆ, ಅಂವೊನ ಮಣಬೂಮಿಲ್‌ ಉಳ್ಳ ಈ ಕುಂಡ್‌ಲ್‌ ಚಾಡೀಂದ್‌ ಎಣ್ಣಿತ್ ಅಂವೊನ ಅಯಿಂಗಡಿಂಜ ಕಾಪಾಡ್‌ಚಿ. 23 ಯೋಸೇಫ ತಾಂಡ ಅಣ್ಣಂಗಡ ಪಕ್ಕ ಬಪ್ಪಕ ಅಯಿಂಗ ಅಂವೊ ಇಟ್ಟಂಡಿಂಜ ರಂಗ್‌ರಂಗ್‌ರ ಅಂಗಿನ ಬಲ್ಚಿತ್, 24 ಅಂವೊನ ಪುಡ್ಚಿತ್ ನೀರಿಲ್ಲತ ಕುಂಡ್‌ರ ಒಳ್‌ಕ್‌ ಕನ್‌ಚಿರ್‌ತ್. 25 ಅಲ್ಲಿಂಜ ಅಯಿಂಗ ಉಂಬಕ್‌ ಅಳ್‌ತಿತ್‌ ಕಣ್ಣೆಡ್‌ತಿತ್‌ ನೋಟ್‌ವಕ ಇದಾ, ಗಿಲ್ಯಾದಿಂಜ ಬಪ್ಪ ಇಷ್ಮಾಯೇಲರ ಗುಂಪ್ನ ಕಂಡತ್. ಅಯಿಂಗ ಒಂಟೆರ ಮೇಲೆ ಸುಗಂದ ದ್ರವ್ಯ, ಪರಿಮಳ ತೈಲ, ರಕ್ತಬೋಳ ವಸ್ತುನೆಲ್ಲ ಎಡ್‌ತಂಡ್‌ ಐಗುಪ್ತ ದೇಶಕ್‌ ಪ್ರಯಣಮಾಡಿಯಂಡಿಂಜ ವ್ಯಾಪಾರಿಯಾಯಿತ್‌ಂಜತ್. 26 ಅಕ್ಕ ಯೆಹೂದ ತಾಂಡ ಅಣ್ಣತಮ್ಮಣಂಗಕ್: ನಂಗ ನಂಗಡ ತಮ್ಮಣನ ಕೊಂದಿತ್, ಅಂವೊಂಡ ಚೋರೆನ ಮುಚ್ಚ್‌ತೇಂಗಿ ನಂಗಕ್‌ ಲಾಬ ಎಂತ? 27 ಅಂವೊನ ಈ ಇಷ್ಮಾಯೇಲರಯಿಂಗಕ್‌ ಮಾರನ ಬಾರಿ. ನಂಗ ಅಂವೊಂಡ ಮೇಲೆ ಕೈ ಬೆಕ್ಕತೆ ಇಕ್ಕನ. ಎಚ್ಚಕಾಚೇಂಗಿಯು ಅಂವೊ ನಂಗಡ ತಮ್ಮಣನು ನಂಗಡ ಸ್ವಂತ ಚೋರೆಯು ಯರ್ಚಿಯು ಆಯಿತುಂಡಲ್ಲಾಂದ್‌ ಎಣ್ಣ್‌ಚಿ. ಈ ತಕ್ಕ್‌ಕ್‌ ಅಯಿಂಗ ಒತ್ತಂಡತ್. 28 ಮಿದ್ಯಾನ್ಯರ ವ್ಯಾಪಾರಿಯ ಅಯಿಂಗ ಇಂಜಲ್ಲಿಕ್‌ ಬಪ್ಪಕ, ಯೋಸೇಫನ ಕುಂಡ್‌ಯಿಂಜ ಪೊರ್ಮೆ ಬಲ್ಚಿತ್ ಇಷ್ಮಾಯೇಲರಂಡ ವ್ಯಾಪಾರಿಯಂಗಕ್‌ ಇರ್ವದ್‌ ಬೊಳ್ಳಿರ ನಾಣ್ಯಕ್‌ ಮಾರಿರ್‌ತ್. ಅಯಿಂಗ ಯೋಸೇಫನ ಐಗುಪ್ತ ದೇಶಕ್‌ ಕಾಕಿಯಂಡ್‌ ಪೋಚಿ. 29 ಚೆನ್ನ ನೇರ ಆನದು ರೂಬೇನ ಪುನಃ ಕುಂಡ್‌ರ ಪಕ್ಕ ಬಂದಿತ್ ನೋಟ್‌ವಕ ಅಲ್ಲಿ ಯೋಸೇಫನ ಕಂಡಿತ್‌ಲೆ. ಅಂವೊ ಬೇಜಾರತ್‌ಲ್‌ ತಾಂಡ ಬಟ್ಟೆನ ಕೀತಿಯಂಡ್ 30 ತಾಂಡ ತಮ್ಮಣಂಗಡ ಪಕ್ಕ ಬಂದಿತ್: ಅಯ್ಯೋ! ಕ್‌ಣ್ಣ ಇಲ್ಲೆಲ್ಲಾ ನಾನ್‌ ಎಲ್ಲಿಕ್‌ ಪೋಡ್‍ೕಂದ್‌ ಎಣ್ಣಿಯಂಡ್‌ ಗೋಳಾಡ್‌ಚಿ. 31 ಅಲ್ಲಿಂಜ ಅಯಿಂಗ ಒರ್‌ ಕೋಬಾಡ್‌ನ ಕೊಂದಿತ್ ಅದ್‌ಂಡ ಚೋರೆಲ್‌ ಯೋಸೇಫಂಡ ಬಟ್ಟೆನ ಮುಕ್ಕ್‌ಚಿ. 32 ಆ ಚಾಯಿ ರಂಗ್‌ರಂಗ್‌ರ ಅಂಗಿನ ಅಪ್ಪಂಡ ಪಕ್ಕ ಎಡ್‌ತಂಡ್‌ ಪೋಯಿತ್: ಇದ್‌ ನಂಗಕ್‌ ಬೇಲ್‌ಲ್‌ ಕ್‌ಟ್ಟ್‌ಚಿ. ಇದ್‌ ನೀಡ ಮೋಂವೊ ಯೋಸೇಫಂಡ ಬಟ್ಟೆಯಾಂದ್‌ ನೋಟ್ೕಂದ್‌ ಎಣ್ಣ್‌ಚಿ. 33 ಯಾಕೋಬ ಅದ್‌ನ ಒಮ್ಮಕೆ ಕಂಡ್‌ ಪುಡ್ಚಿತ್: ಅಕ್ಕು, ಇದ್‌ ನಾಡ ಮೋಂವೊಂಡ ಬಟ್ಟೆ. ಕಾಡ್‌ಪ್ರಾಣಿ ಬಂದಿತ್ ತಿಂದ್‌ರ್‌ತಿಕ್ಕು. ನೇರಾಯಿತು ಯೋಸೇಫನ ತುಂಡ್‌ ತುಂಡ್‌ ಮಾಡಿತ್ ತಿಂದ್‌ರ್‌ತಿಕ್ಕೂಂದ್‌ ಎಣ್ಣ್‌ಚಿ. 34 ಅಲ್ಲಿಂಜ ಯಾಕೋಬ ತಾಂಡ ಬಟ್ಟೆನೆಲ್ಲ ಕೀತಿಯಂಡ್, ಅಂವೊಂಡ ನಡುಕ್‌ ಗೋಣಿಚೀಲತ್‌ನ ಸುತ್ತಿಯಂಡ್, ದುಂಬ ದಿವಸ ತಾಂಡ ಮೋಂವೊಂಗಾಯಿತ್‌ ದುಃಖಪಟ್ಟಂಡಿಂಜತ್. 35 ಅಂವೊಂಡ ಕ್‌ಣ್ಣ ಮಕ್ಕ ಪಿಂಞ ಮೂಡಿ ಮಕ್ಕಯೆಲ್ಲ ಅಂವೊನ ಸಮಾದಾನ ಪಡ್‌ತ್‌ವಕ್‌ ನೋಟ್‌ಚಿ. ಆಚೇಂಗಿ ಸಮಾದಾನ ಆಪಕ್‌ ಅಂವೊ ಬುಟ್ಟಿತ್‌ಲ್ಲೆ. ಅಂವೊ: ನಾನ್‌ ಇನ್ನನೆ ದುಃಖ ಪಟ್ಟಂಡ್‌ ನಾಡ ಮೋಂವೊಂಡ ಪಕ್ಕ ಪೋಯಿತ್ ಎತ್ತುವೀಂದ್‌ ಎಣ್ಣ್‌ಚಿ. ಇನ್ನನೆ ಅಪ್ಪ ತಾಂಡ ಮೋಂವೊಂಗಾಯಿತ್‌ ಮೊರ್‌ಟಂಡಿಂಜತ್. 36 ಮಿದ್ಯಾನ್ಯರಯಿಂಗ ಯೋಸೇಫನ ಐಗುಪ್ತ ದೇಶಕ್‌ ಕೊಂಡಪೋಯಿತ್‌ ಫರೋಹನಂಡ ಒರ್‌ ಅದಿಕಾರಿಯು, ಅರಮನೆರ ನಾಯಕನು ಅಯಿತ್‌ಂಜ ಪೋಟೀಫರಂಗ್‌ ಮಾರ್ಚಿ. |
© 2017, New Life Literature (NLL)