ಆದ್ಯತ್‌ರ ಪುಸ್ತಕ 29 - ಕೊಡವ ಬೈಬಲ್1 ಅಲ್ಲಿಂಜ ಯಾಕೋಬ ಅಂವೊಂಡ ಬಟ್ಟೆಲ್‌ ಪೊರ್‌ಟತ್. ಅಂವೊ ಕ್‍ೕಕ್‌ ದಿಕ್ಕ್‌ಲ್‌ ಉಳ್ಳ ಒರ್‌ ಊರ್‌ಕ್‌ ಎತ್ತ್‌ಚಿ. 2 ಅಂವೊ ಅಲ್ಲಿಂಜ ದೂರತ್‌ಲ್‌ ನೋಟ್‌ವಕ, ಬೇಲ್‌ಲ್‌ ಒರ್‌ ಕಣತರೆ ಪಿಂಞ ಅದ್‌ಂಡ ಪಕ್ಕ ಮೂಂದ್‌ ಮಂದೆ ಕೊರಿಯ ಬುದ್ದಂಡಿಂಪ್ಪದ್‌ನ ಕಂಡತ್. ಆ ಕಣತರೆಯಿಂಜ ಕೊರಿಯ ನೀರ್‌ ಕುಡಿಪಯಿಂಜತ್. ಒರ್‌ ಬಲ್ಯ ಕಲ್‌ಲ್‌ ಬೆಚ್ಚಿತ್‌ ಆ ಕಣತರೆನ ಮುಚ್ಚಿತ್‌ಂಜತ್. 3 ಕೊರಿಕಾಪಯಿಂಗ ಆ ಕಣತರೆರ ಬಾಯಿಂಜ ಕಲ್ಲ್‌ನ ಎಡ್‌ತಿತ್‌ ಕೊರಿಯಕ್‌ ನೀರ್‌ ಕುಡಿಪ್‌ಚಿಟ್ಟಿತಾನದು, ಪುನಃ ಕಲ್ಲ್‌ನ ತಿರಿತ್‌ ಮುಚ್ಚಿರ್ವಯಿಂಜತ್. 4 ಯಾಕೋಬ ಅಯಿಂಗಡ ಪಕ್ಕ ಪೋಯಿತ್: ಅಣ್ಣತಮ್ಮಣಂಗಳೇ, ನಿಂಗ ಏದ್‌ ಊರ್‌ಕಾರಂದ್‌ ಕ್‍ೕಟತ್. ಅದ್‌ಂಗ್‌ ಅಯಿಂಗ: ನಂಗ ಹಾರಾನ್‌ ಊರ್‌ಕಾರಂಗಾಂದ್‌ ಎಣ್ಣ್‌ಚಿ. 5 ಅಕ್ಕ ಅಂವೊ: ನಿಂಗಕ್‌ ನಾಹೋರಂಡ ಕ್‌ರ್‌ಮೋಂವೊನಾನ ಲಬಾನನ ಗೊತ್ತುಂಡಾಂದ್‌ ಕ್‍ೕಟತ್. ಅದ್‌ಂಗ್‌ ಅಯಿಂಗ: ನಂಗಕ್‌ ಗೊತ್ತುಂಡ್‍ೕಂದ್‌ ಎಣ್ಣ್‌ಚಿ. 6 ಅಕ್ಕ ಯಾಕೋಬ: ಅಂವೊ ಚಾಯಿತೆ ಉಂಡಾಂದ್‌ ಕ್‍ೕಟತ್. ಅಯಿಂಗ: ಅಂವೊ ಚಾಯಿತೆ ಉಂಡ್. ಇಲ್ಲಿ ನೋಟ್ ಅಂವೊಂಡ ಮೋವ ರಾಹೇಲ ಕೊರಿಯಳ ಅಟ್ಟಿಯಂಡ್‌ ಬಂದಂಡುಂಡೂಂದ್‌ ಎಣ್ಣ್‌ಚಿ. 7 ಅಕ್ಕ ಯಾಕೋಬ: ನೋಟಿ, ಇಂಞು ದುಂಬ ನೇರ ಉಂಡಲ್ಲ; ಇದ್‌ ಕೊರಿಯಳ ಕೂಟ್‌ವ ನೇರ ಅಲ್ಲಲ್ಲಾ. ನೀರ್‌ ಕುಡಿಪ್‌ಚಿಟ್ಟಪಿಂಞ ಕೊರಿಯಳ ಇಂಞು ಮೇಯಿಚಿಡಲು ಅಲ್ಲಾಂದ್‌ ಎಣ್ಣ್‌ಚಿ. 8 ಅದ್‌ಂಗ್‌ ಅಯಿಂಗ: ನಂಗ ಅನ್ನನೆ ಮಾಡ್‌ವ ಕಯ್ಯುಲೆ. ಎಲ್ಲಾ ಕೊರಿಯ ಬಂದಿತಾನದು ಕೊರಿಕಾಪಂಯಿಂಗ ಕಣತರೆರ ಬಾಯಿಂಜ ಕಲ್ಲ್‌ನ ಉರ್‌ಟ್‌ವ, ಅಕ್ಕ ನಂಗ ಕೊರಿಯಕ್‌ ಕುಡಿಪಕ್‌ ನೀರ್‌ ಕೊಡ್‌ಪಾಂದ್‌ ಎಣ್ಣ್‌ಚಿ. 9 ಯಾಕೋಬ ಅಯಿಂಗಡ ಕೂಡೆ ಇಂಞು ತಕ್ಕ್‌ ಪರ್ದಂಡ್‌ ಇಪ್ಪಕಲೇ ರಾಹೇಲ ತಾಂಡ ಅಪ್ಪಂಡ ಕೊರಿಯಳ ಅಟ್ಟಿಯಂಡ್‌ ಬಾತ್. ಅವ ಕೊರಿ ಕಾಪವಳಾಯಿತ್‌ಂಜತ್. 10 ಯಾಕೋಬ ತಾಂಡ ಅವ್ವಂಡ ಅಣ್ಣ ಲಾಬಾನಂಡ ಮೋವಳಾನ ರಾಹೇಲಳ ಪಿಂಞ ಲಾಬಾನಂಡ ಕೊರಿಯಳ ಕಾಂಬಕ, ಯಾಕೋಬ ಕಣತರೆರ ಪಕ್ಕ ಪೋಯಿತ್ ಅದ್‌ಂಡ ಮೇಲೆ ಮುಚ್ಚಿತ್‌ಂಜ ಕಲ್ಲ್‌ನ ಎಡ್‌ ಉರ್‌ಟಿತ್‌ ಲಾಬನಂಡ ಕೊರಿಯಕ್‌ ನೀರ್‌ ಕಾಟ್ಟ್‌ಚಿ. 11 ಅಂವೊ ರಾಹೇಲಂಗ್‌ ಮುತ್ತ್‌ ಕೊಡ್‌ತಿತ್, ಜೋರಾಯಿತ್‌ ಮೊರ್‌ಟತ್. 12 ಅಂವೊ ಅವಡ ಅಪ್ಪಂಡ ಕಡೆಯಿಂಜ ಬೆಂದ್‌ಕನಾಯಿತು, ರೆಬೆಕ್ಕಳಂಡ ಮೋಂವೋಂದು ರಾಹೇಲಂಗ್‌ ಎಣ್ಣ್‌ವಕ, ಅವ ಓಡಿಪೋಯಿತ್‌ ತಾಂಡ ಅಪ್ಪನಾನ ಲಾಬಾನಂಗ್ ಎಣ್ಣ್‌ಚಿ. 13 ಲಾಬಾನ ತಾಂಡ ತಂಗೆರ ಮೋಂವೊನಾನ ಯಾಕೋಬಂಡ ಸುದ್ದಿನ ಕ್‍ೕಟದು, ಅಂವೊನ ಕಾಂಬಕ್‌ ಓಡಿ ಪೋಚಿ. ಲಾಬಾನ ಅಂವೊನ ತಬ್ಬಿಯಂಡ್‌ ಮುತ್ತ್‌ ಕೊಡ್‌ತಿತ್, ಮನೆಕ್‌ ಕಾಕಿಯಂಡ್‌ ಬಾತ್. ಯಾಕೋಬ ಅಂವೊಂಡ ವಿಷಯತ್‌ನ ಚಾಯಿತೆ ವಿವರಿಚಿಟ್ಟತ್. 14 ಲಾಬಾನ ಅಂವೊಂಗ್: ನೇರಾಯಿತು ನೀನ್‌ ನಾಡ ಸ್ವಂತ ಚೋರೆ ಪಿಂಞ ಯರ್ಚಿ ಆಯಿತುಳ್ಳಿಯಾಂದ್‌ ಎಣ್ಣ್‌ಚಿ. ಯಾಕೋಬ ಒರ್‌ ತಿಂಗಕತ್ತನೆ ಲಾಬಾನಂಡ ಕೂಡೆ ಒಳಿಂಜತ್. 15 ಅಲ್ಲಿಂಜ ಲಾಬಾನ ಅಂವೊಂಗ್: ನೀನ್‌ ನಾಡ ಬೆಂದ್‌ಕನಾಯಿತುಳ್ಳಾಂಗ್‌ ಮುಂಡತೆ ನಾಕ್‍ ಕೆಲಸ ಮಾಡೊಂಡುವಾ? ಅನ್ನನೆ ಬೋಂಡ, ನೀನ್‌ ಮಾಡ್‌ವ ಕೆಲಸಕ್‌ ನೀಡ ಕೂಲಿ ಎಚ್ಚಕ್‍ೕಂದ್‌ ಕ್‍ೕಟತ್. 16 ಲಾಬಾನಂಗ್ ದಂಡ್‌ ಮೂಡಿ ಮಕ್ಕ ಇಂಜತ್: ಪೆರಿಯವಡ ಪೆದ ಲೇಯಾ, ಎಳೆಯವಡ ಪೆದ ರಾಹೇಲ. 17 ಲೇಯಾಂಡ ಕಣ್ಣ್‌ ಚೆನ್ನ ಬೊಳಿ ಕಮ್ಮಿಯಾಯಿತ್‌ ಕಾಂಬನೆಕೆ ಇಂಜತ್. ಆಚೇಂಗಿ ರಾಹೇಲ ಸುಂದರಿಯು ಕಾಂಬಕ್‌ ಚಾಯಿಕಾರ್ತಿಯು ಆಯಿತ್‌ಂಜತ್. 18 ಯಾಕೋಬ ರಾಹೇಲಳ ಇಷ್ಟಪಟ್ಟಿತ್. ಅಂವೊ ಲಾಬಾನಂಗ್: ನೀಡ ಎಳೆಯ ಮೋವ ರಾಹೇಲನ ನಾಕ್‍ ಮಂಗಲ ಮಾಡಿತ್‌ ತಪ್ಪದಾಚೇಂಗಿ, ನೀಕ್‌ ಏಳ್‌ ಕಾಲ ನಾನ್‌ ಸೇವೆ ಮಾಡುವೀಂದ್‌ ಎಣ್ಣ್‌ಚಿ. 19 ಅದ್‌ಂಗ್‌ ಲಾಬಾನ: ಅವಳ ಬೋರೆ ಒಬ್ಬಂಗ್‌ ಕೊಡ್‌ಪಕ್ಕಿಂಜ ನೀಕ್‌ ತಪ್ಪದೇ ನಲ್ಲದ್. ಆನಗುಂಡ್, ನಾಡ ಕೂಡೆ ಇಂಜಿತ್‌ ನಾಡ ಕೆಲಸ ಮಾಡ್‍ೕಂದ್‌ ಎಣ್ಣ್‌ಚಿ. 20 ಅಂದಿಂಜ ಯಾಕೋಬ ರಾಹೇಲಳ ಪಡೆಯೊಕಾಯಿತ್‌ ಏಳ್‌ ಕಾಲ ಸೇವೆ ಮಾಡ್‌ಚಿ. ಆಚೇಂಗಿಯು ರಾಹೇಲಂಡ ಮೇಲೆ ಅಂವೊಂಗ್ ದುಂಬ ಪ್ರೀತಿ ಇಂಜನಗುಂಡ್‌ ಆ ಏಳ್‌ ಕಾಲ ಅಂವೊಂಗ್ ಚೆನ್ನ ದಿವಸತ್‌ರನೆಕೆ ತೋಂದ್‌ಚಿ. 21 ಅಲ್ಲಿಂಜ ಯಾಕೋಬ ಲಾಬಾನಂಗ್: ನಾಕ್‍ ಕೊಡತ ಸಮಯ ತ್‍ೕಂದ್‍ಪೋಚಿ. ರಾಹೇಲಳ ನಾಕ್‍ ಮಂಗಲ ಮಾಡಿ ತಾಂದ್‌ ಕ್‍ೕಟತ್. 22 ಅಕ್ಕ ಲಾಬಾನ ಆ ಜಾಗತ್‌ರ ಜನಳೆಲ್ಲ ಕಾಕಿತ್‌ ಗದ್ದಾಳ ತಯಾರ್‌ ಮಾಡ್‌ಚಿ. 23 ಬಯಿಟ್ ಆಪಕ ತಾಂಡ ಪೆರಿಯ ಮೋವಳಾನ ಲೇಯಾ ಯಾಕೋಬಂಡ ಪಕ್ಕ ಕಾಕಿಯಂಡ್‌ ಬಾತ್. ಯಾಕೋಬ ಅವಡ ಕೂಡೆ ಕೂಡ್‌ಚಿ. 24 ಲಾಬಾನ ತಾಂಡ ಮೋವಳಾನ ಲೇಯಾಳ್‌ಕ್‌ ಜಿಲ್ಪಾ ಎಣ್ಣುವ ಒರ್‌ ಪಣಿಕಾರ್ತಿನ ಕೊಡ್‌ತತ್. 25 ಪೊಲಾಕ ಅವ ಲೇಯಾಳ್‌ಂದ್‌ ಯಾಕೋಬಂಗ್‌ ಗೊತ್ತಾಯಿತ್, ಅಂವೊ ಲಾಬಾನಂಗ್: ಎನ್ನಂಗ್‌ ನಾಕ್‍ ಇನ್ನನೆ ಮಾಡಿಯಾ? ರಾಹೇಲಂಗಾಯಿತ್‌ ತಾನೆ ನಾನ್‌ ಏಳ್‌ ಕಾಲ ನೀಡ ಪಕ್ಕ ಸೇವೆ ಮಾಡ್‌ನ; ಪಿಂಞ ಎನ್ನಂಗ್‌ ನಾಕ್‍ ಮೋಸ ಮಾಡಿಯಾಂದ್‌ ಕ್‍ೕಟತ್. 26 ಅದ್‌ಂಗ್‌ ಲಾಬಾನ: ಪೆರಿಯ ಮೋವ ಮನೆಲ್ ಇಪ್ಪಕ, ಎಳೆಯ ಮೋವಕ್‌ ಮಿಂಞ ಮಂಗಲ ಕಯಿಚಿತ್‌ ಕೊಡ್‌ಪದ್‌ ಈ ಜಾಗತ್‌ರ ಪದ್ದತಿ ಅಲ್ಲಾಂದ್‌ ಎಣ್ಣ್‌ಚಿ. 27 ಅವಡ ಮಂಗಲತ್‍ರ ವಾರತ್‌ನ ನೆರೆವೇರಿಚಿಡ್; ಚೆರಿಯವಳ ಸಹ ನೀಕ್‌ ತಪ್ಪಿ. ನೀನ್‌ ಅವಕಾಯಿತ್‌ ಸಹ ಇಂಞು ಏಳ್‌ ಕಾಲ ನಾಡ ಕೂಡೆ ಸೇವೆ ಮಾಡ್‍ೕಂದ್‌ ಎಣ್ಣ್‌ಚಿ. 28 ಅನ್ನನೆ ಯಾಕೋಬ ಪೆರಿಯ ಮೋವಡ ಮಂಗಲತ್‍ರ ವಾರತ್‌ನ ನೆರೆವೇರಿಚಿಟ್ಟತ್. ಅಕ್ಕ ಲಾಬಾನ ಅಂವೊಂಗ್ ತಾಂಡ ಎಳೆಯ ಮೋವಳಾನ ರಾಹೇಲಳ ಮಂಗಲ ಕಯಿಚಿ ಕೊಡ್‌ತತ್. 29 ಇಂಞು ಲಾಬಾನ ತಾಂಡ ಮೋವಳಾನ ರಾಹೇಲಂಗ್‌ ಬಿಲ್ಹಾ ಎಣ್ಣುವ ಒರ್‌ ಪಣಿಕಾರ್ತಿನ ಕೊಡ್‌ತತ್. 30 ಯಾಕೋಬ ರಾಹೇಲಳ ಸಹ ಕೂಡ್‌ಚಿ; ಲೇಯಾಕಿಂಜ ರಾಹೇಲನ ಅಂವೊ ದುಂಬ ಪ್ರೀತಿಮಾಡಿತ್, ಇಂಞು ಏಳ್‌ ಕಾಲ ಲಾಬಾನಂಡ ಪಕ್ಕ ಸೇವೆ ಮಾಡ್‌ಚಿ. 31 ಲೇಯಾಳ್‌ಕ್‌ ಯಾಕೋಬಂಡ ಪ್ರೀತಿ ಕ್‌ಟ್ಟತದ್‌ನ ಯೆಹೋವ ಕಂಡಿತ್, ಅವ ಕೆಲಕಾರ್ತಿ ಆಪನೆಕೆ ಮಾಡ್‌ಚಿ. ಆಚೇಂಗಿ ರಾಹೇಲ ಗೊಡ್ಡಿಯಾಯಿತ್‌ ಇಂಜತ್. 32 ಲೇಯಾ ಕೆಲಕಾರ್ತಿಯಾಯಿತ್‌ ಒರ್‌ ಕ್‌ಣ್ಣ ಕುಂಞಿನ ಪೆತ್ತತ್. ಅಕ್ಕ ಅವ: ನಾಡ ಯೆಹೋವ ನಾಡ ಕಷ್ಟತ್‌ನ ನೋಟ್‌ಚೀಂದ್‌ ಎಣ್ಣಿತ್ ಆ ಕುಂಞಿಕ್‌ ರೂಬೇನ ಎಣ್ಣಿಯಂಡ್‌ ಪೆದ ಬೆಚ್ಚತ್. ಪಿಂಞ ಇಕ್ಕ ನಾಡ ವಡಿಯ ನನ್ನ ಪ್ರೀತಿ ಮಾಡ್‌ವಾಂದ್‌ ಎಣ್ಣ್‌ಚಿ. 33 ಅವ ಪುನಃ ಕೆಲಕಾರ್ತಿಯಾಯಿತ್‌ ಇಂಞೊರ್‌ ಕ್‌ಣ್ಣ ಕುಂಞಿನ ಪೆತ್ತತ್. ಅವ: ಯೆಹೋವ ನಾಕ್‍ ಪ್ರೀತಿ ಕ್‌ಟ್ಟಿತ್‌ಲ್ಲೇಂದ್‌ ಗೊತ್ತಾಯಿತ್ ನಾಕ್‍ ಈ ಕುಂಞಿನ ತಾತ್‌ಂದ್‌ ಎಣ್ಣಿತ್, ಅಂವೊಂಗ್ ಸಿಮೆಯೋನಾಂದ್‌ ಪೆದ ಬೆಚ್ಚತ್. 34 ಪುನಃ ಅವ ಕೆಲಕಾರ್ತಿಯಾಯಿತ್‌ ಇಂಞೊರ್‌ ಕ್‌ಣ್ಣ ಕುಂಞಿನ ಪೆತ್ತತ್. ಅವ: ನಾನ್‌ ನಾಡ ವಡಿಯಂಗ್‌ ಮೂಂದ್‌ ಮಕ್ಕಳ ಪೆತ್ತಗುಂಡ್, ಇಕ್ಕ ನೇರಾಯಿತು ಅಂವೊ ನಾಡ ಕೂಡ ಕೂಡುವಾಂದ್‌ ಎಣ್ಣಿತ್ ಅಂವೊಂಗ್ ಲೇವಿ ಎಣ್ಣಿಯಂಡ್‌ ಪೆದ ಬೆಚ್ಚತ್. 35 ಪುನಃ ಅವ ಕೆಲಕಾರ್ತಿಯಾಯಿತ್‌ ಇಂಞೊರ್‌ ಕ್‌ಣ್ಣ ಕುಂಞಿನ ಪೆತ್ತತ್. ಅವ: ಇಕ್ಕ ನಾನ್‌ ನಾಡ ಯೆಹೋವನ ಆರಾದನೆ ಮಾಡುವೀಂದ್‌ ಎಣ್ಣಿತ್, ಅಂವೊಂಗ್ ಯೆಹೂದಾಂದ್‌ ಪೆದ ಬೆಚ್ಚತ್. ಅಲ್ಲಿಂಜ ಅವಕ್‌ ಮಕ್ಕ ಆಪದ್‌ ಚೆನ್ನ ಕಾಲ ನಿಂದತ್. |
© 2017, New Life Literature (NLL)