ಆದ್ಯತ್‌ರ ಪುಸ್ತಕ 24 - ಕೊಡವ ಬೈಬಲ್1 ಅಬ್ರಹಾಮಂಗ್‌ ದುಂಬ ವಯಸ್ಸಾಯಿತ್‌ಂಜತ್. ಯೆಹೋವ ಅಂವೊನ ಎಲ್ಲಾ ವಿಷಯತ್‌ಲ್‌ ಆಶೀರ್ವಾದ ಮಾಡಿತ್‌ಂಜತ್. 2 ಇನ್ನನೆ ಇಪ್ಪಕ ಅಬ್ರಹಾಮ ತಾಂಡ ಮನೆಲ್ ಉಳ್ಳಯಿಂಗಡಡೆಲ್‌ ಮುಕ್ಯಂವೊನು, ಅಬ್ರಹಾಮಂಗ್‌ ಉಳ್ಳದ್‌ಲ್‌ ಎಲ್ಲಾಂಗು ಅದಿಕಾರಿಯು ಆಯಿತುಳ್ಳ ತಾಂಡ ಸೇವಕನ ಕಾಕಿತ್: ನೀಡ ಕೈಯಿನ ನಾಡ ತೊಡೆರ ಅಡಿಕ್‌ ಬೆಚ್ಚಿತ್, 3 ನೀನ್, ನಾಡ ಮೋಂವೊಂಗ್‌ ನಾನ್‌ ವಾಸಮಾಡಿಯಂಡುಳ್ಳ ಕಾನಾನ್‌ ದೇಶತ್‌ಂಜ ಮೂಡಿನ ಕೊಂಡ ಬಪ್ಪ್‌ಲೇಂದ್, ಬಾನಕು ಬೂಮಿಕು ದೇವನಾಯಿತುಳ್ಳ ಯೆಹೋವಂಡ ಮೇಲೆ ಆಣೆ ಮಾಡ್‍ೕಂದ್‌ ಎಣ್ಣ್‌ಚಿ. 4 ಆಚೇಂಗಿ ನೀನ್ ನಾನ್‌ ಪುಟ್ಟ್‌ನ ದೇಶಕ್‌ ಪೋಯಿತ್, ನಾಡ ಬೆಂದ್‌ಕಡಲ್ಲಿಕ್‌ ಪೋಯಿತ್, ನಾಡ ಮೋಂವೊನಾನ ಇಸಾಕಂಗ್‌ ಮಂಗಲ ಕಯಿಪಕ್‌ ಒರ್‌ ಮೂಡಿನ ಕಾಕಿಯಂಡ್‌ ಬಾಂದ್‌ ಎಣ್ಣ್‌ಚಿ. 5 ಅದ್‌ಂಗ್‌ ಆ ಸೇವಕ: ಒರ್‌ ಸಮಯ ಆ ಮೂಡಿಕ್ ನಾಡ ಕೂಡೆ ಈ ದೇಶಕ್‌ ಬಪ್ಪಕ್‌ ಕುಶಿ ಇಲ್ಲತೆಪೋಚೇಂಗಿ, ನೀನ್ ಬುಟ್ಟಿತ್‌ ಬಂದ ಆ ದೇಶಕ್‌ ನೀಡ ಮೊಂವೊನ ಪುನಃ ಕಾಕಿಯಂಡ್‌ ಪೋಪದಾಂದ್‌ ಕ್‍ೕಟತ್. 6 ಅದ್‌ಂಗ್‌ ಅಬ್ರಹಾಮ: ಇಲ್ಲೆ! ನೀನ್ ನಾಡ ಮೋಂವೊನ ಅಲ್ಲಿಕ್‌ ತಿರಿತ್‌ ಕಾಕಿಯಂಡ್‌ ಪೋಕತನೆಕೆ ಎಚ್ಚರ ಎಡ್‌ತ. 7 ನಾಡ ಅಪ್ಪಂಡ ಮನೆಯಿಂಜಲು, ನಾನ್‌ ಪುಟ್ಟ್‌ನ ದೇಶತ್‌ಂಜಲು ನನ್ನ ಕಾಕಿಯಂಡ್‌ ಬಂದಿತ್, ನೀಡ ಸಂತಾನಕ್‌ ಈ ದೇಶತ್‌ನ ತಪ್ಪೀಂದ್‌ ಎಣ್ಣಿತ್ ಆಣೆ ಮಾಡ್‌ನಂವೊನಾನ ಪರಲೋಕತ್‌ರ ದೇವನಾನ ಯೆಹೋವ, ನೀನ್ ಅಲ್ಲಿಂಜ ನಾಡ ಮೋಂವೊಂಗ್‌ ಒರ್‌ ಮೂಡಿನ ಕೂಟಿಯಂಡ್‌ ಬಪ್ಪಕಾಯಿತ್, ತಾಂಡ ದೂತನ ನೀಡ ಮಿಂಞತ್‌ ಅಯಿಪ. 8 ಆ ಮೂಡಿಕ್ ನೀಡ ಕೂಡೆ ಬಪ್ಪಕ್‌ ಕುಶಿಯಿಲ್ಲತೆ ಪೋಚೇಂಗಿ, ನಾನ್‌ ನೀಕ್‌ ಮಾಡ್‌ನ ಆಣೆಯಿಂಜ ನೀನ್ ಬುಡ್‍ಗಡೆ ಆಪಿಯ. ಆಚೇಂಗಿ ನೀನ್ ಮಾತ್‌ರ ನಾಡ ಮೋಂವೊನ ಅಲ್ಲಿಕ್‌ ತಿರಿತ್‌ ಕಾಕಿಯಂಡ್‌ ಪೋಪಕ್ಕಾಗಾಂದ್‌ ಎಣ್ಣ್‌ಚಿ. 9 ಅಕ್ಕ ಆ ಸೇವಕ ತಾಂಡ ಎಜಮಾನನಾನ ಅಬ್ರಹಾಮಂಡ ತೊಡೆರ ಅಡಿಲ್‌ ಕೈ ಬೆಚ್ಚಿತ್ ಈ ವಿಷಯತ್‌ ಅಂವೊ ಎಣ್ಣ್‌ನನೆಕೆ ಆಣೆ ಮಾಡ್‌ಚಿ. 10 ಅಲ್ಲಿಂಜ ಆ ಸೇವಕ ತಾಂಡ ಎಜಮಾನಂಡ ಪತ್ತ್‌ ಒಂಟೆನ ತಯಾರ್‌ ಮಾಡಿತ್ ಪೊರ್‌ಟತ್. ತಾಂಡ ಎಜಮಾನಂಡ ಎಲ್ಲಾ ತರತ್‌ರ ನಲ್ಲ ಬೆಲೆಯುಳ್ಳ ವಸ್ತು ಅಂವೊಂಡ ಪಕ್ಕ ಇಂಜತ್. ಅಂವೊ ಅಲ್ಲಿಂಜ ಮೆಸೊಪೊತೋಮಿಯತ್‌ಲ್‌ ಅಬ್ರಹಾಮಂಡ ತಮ್ಮಣ ನಾಹೋರ ವಾಸ ಮಾಡಿಯಂಡಿಂಜ ಊರ್‌ಕ್‌ ಎತ್ತ್‌ಚಿ. 11 ಬಯಿಟಾಪಕ ಅಂವೊ ಒರ್‌ ಬುಗ್ಗೆರ ಪಕ್ಕತ್‌ ತಾಂಡ ಒಂಟೆಯಳ ಮೊಣಕಾಲೂರಿತ್‌ ಅಳ್‍ಪ್‍ಚಿಟ್ಟತ್. ಅದ್‌ ಪೊಣ್ಣಾಳ್‌ವ ಬುಗ್ಗೆಕ್‌ ಬಂದಿತ್ ನೀರ್‌ ಬಲಿಪ ನೇರ ಆಯಿತ್‌ಂಜತ್. 12 ಅಂವೊ ಅಲ್ಲಿಂಜ: ನಾಡ ಎಜಮಾನಂಗ್‌ ದೇವನಾಯಿತುಳ್ಳ ಯೆಹೋವನೇ, ಇಂದ್‌ ನಾನ್‌ ಇಲ್ಲಿಕ್‌ ಬಂದ ವಿಷಯತ್‌ನ ನೆರವೀರಿಚಿಟ್ಟಿತ್‌ ನಾಡ ಎಜಮಾನಂಗ್‌ ಕರುಣೆ ಕಾಟ್. 13 ನೋಟ್, ನಾನ್‌ ಈ ಬುಗ್ಗೆರ ಪಕ್ಕತ್‌ ನಿಂದಿತುಳ್ಳ. ಈ ಊರ್‌ರ ಮೂಡಿ ಮಕ್ಕ ಇಲ್ಲಿ ನೀರ್‌ ಬಲಿಪಕ್‌ ಬಪ್ಪ. 14 ನಾನ್‌ ಒರ್‌ ಮೂಡಿಕ್: ನಾನ್‌ ನೀರ್‌ ಕುಡಿಪಕ್‌ ನೀಡ ಕುಡಿಕೆನ ಬಗ್ಗಿಚಿಡ್‍ೕಂದ್‌ ಕ್‍ೕಪಕ, ಏದ್‌ ಮೂಡಿ: ನೀನ್ ಕುಡಿ, ನೀಡ ಒಂಟೆಯಕ್‌ ಸಹ ನೀರ್‌ನ ತಪ್ಪೀಂದ್‌ ಎಣ್ಣ್‌ವ, ಅವಳೇ ನೀಡ ಸೇವಕ ಇಸಾಕಂಗ್‌ ನೀನ್ ಆಯ್ಕೆ ಮಾಡ್‌ನ ಮೂಡಿ ಆಯಿತಿರಡ್. ಇನ್ನನೆ ಆಚೇಂಗಿ, ನಾಡ ಎಜಮಾನಂಗ್‌ ಕರುಣೆ ಕಾಟಿತುಳ್ಳಿಯಾಂದ್‌ ನಾಕ್‍ ಗೊತ್ತಾಪಾಂದ್‌ ಬೋಡ್‌ಚಿ. 15 ಅಂವೊ ಇನ್ನನೆ ಬೋಡಿಯಂಡಿಪ್ಪಕಲೆ, ಅಬ್ರಹಾಮಂಡ ತಮ್ಮಣನಾನ ನಾಹೋರಂಡ ಪೊಣ್ಣ್‌ ಮಿಲ್ಕಂಡ ಮೋಂವೊನಾನ ಬೆತೂವೇಲಂಗ್‌ ಪುಟ್ಟ್‌ನ ರೆಬೆಕ್ಕ ತಾಂಡ ನಿಪ್ಪ್‌ರ ಮೇಲೆ ಕುಡಿಕೆನೆ ಪೊರ್ತಂಡ್‌ ಬಾತ್. 16 ಅವ ದುಂಬ ಚಾಯಿಕಾರ್ತಿಯು ಕನ್ನಿ ಮೂಡಿಯು ಆಯಿತ್‌ಂಜತ್. ಅವ ಬುಗ್ಗೆರ ಅಡಿಕ್‌ ಇಳ್‌ಂಜಿತ್‌ ಕುಡಿಕೆಲ್‌ ನೀರ್‌ನ ದುಂಬ್‌ಚಿಟ್ಟಂಡ್‌ ಕೊಡಿಕ್‌ ಬಾತ್. 17 ಅಕ್ಕ ಆ ಸೇವಕ ಅವಡ ಪಕ್ಕ ಓಡಿಪೋಯಿತ್: ದಯಬೆಚ್ಚಿತ್‌ ನೀಡ ಕುಡಿಕೆಯಿಂಜ ಚೆನ್ನ ನೀರ್‌ನ ನಾಕ್‍ ಕುಡಿಪಕ್‌ ತಾಂದ್‌ ಎಣ್ಣ್‌ಚಿ. 18 ಅದ್‌ಂಗ್‌ ಅವ: ಕುಡಿಯಿರಿ ಸ್ವಾಮೀಂದ್‌ ಎಣ್ಣಿತ್, ತಾಂಡ ಕುಡಿಕೆನ ಅಕ್ಕಲೆ ಬಗ್ಗಿಚಿಟ್ಟಿತ್‌ ಕುಡಿಪಕ್‌ ಕೊಡ್‌ತತ್. 19 ಅಂವೊ ಕುಡಿಚಿತ್‌ ಆನದು, ಅವ: ನೀಡ ಒಂಟೆಯಕ್‌ ಸಹ ಬೋಂಡಿಯಚ್ಚಕ್‌ ನೀರ್‌ ಬಲ್‌ಚಿತ್‌ ತಪ್ಪೀಂದ್‌ ಎಣ್ಣಿತ್, 20 ಬೆರಿಯ ತಾಂಡ ಕುಡಿಕೆ ನೀರ್‌ನ ತೊಟ್ಟಿಕ್‌ ಬೂಕಿತ್‌ ಕಾಲಿ ಮಾಡುವಂಜಿ, ಪುನಃ ನೀರ್‌ ಎಡ್‌ತಂಡ್‌ ಬಪ್ಪಕ್‌ ಓಡಿತ್, ಅಂವೊಂಡ ಒಂಟೆಯಕ್‌ ಮದಿ ಆಕಣೆಕ್‌ ನೀರ್‌ ಬಲ್‌ಚಿ ಕೊಡ್‌ತತ್. 21 ಅಂವೊ ಒರ್‌ ತಕ್ಕು ಪರಿಯತೆ, ಅವ ಮಾಡಿಯಡಿಂಜ ಕಾರ್ಯತ್‌ನ ನೋಟಿಯಂಡ್‌ ತಾಂಡ ಪ್ರಯಾಣಕ್‌ ದೇವ ಫಲ ತಂದಿತಾಂದ್‌ ಗೇನ ಮಾಡಿಯಂಡಿಂಜತ್. 22 ತಾಂಡ ಒಂಟೆಯ ನೀರ್‌ ಕುಡಿಚಿತಾನದು, ಅಂವೊ ಒರ್‌ ಬೆಕ್ಕ ಪೊನ್ನ್‌ರ ಮೂಕೊತ್ತಿ ಪಿಂಞ ಅವಡ ಕೈಕ್‌ ಪತ್ತ್‌ ಶೇಕ್ಕಲ್‌ರ ದಂಡ್‌ ಬಲ್ಯ ಪೊನ್ನ್‌ರ ಬಳೆನ ಅವಕ್ ಕೊಡ್‌ತತ್. 23 ಅಲ್ಲಿಂಜ ಅಂವೊ: ನೀನ್ ದಾಡ ಮೋವ? ನಂಗ ಒರ್‌ ಬಯಿಟ್ ನೀಡ ಅಪ್ಪಂಡ ಮನೆಲ್ ಒಳಿಯುವಕ್‌ ಜಾಗ ಇಕ್ಕುವಾಂದ್‌ ಅವಳ ಕ್‍ೕಟತ್. 24 ಅದ್‌ಂಗ್‌ ಅವ: ನಾನ್‌ ನಾಹೋರಂಗ್‌ ಮಿಲ್ಕ ಪೆತ್ತ ಮೋಂವೊನಾನ ಬೆತೂವೇಲಂಡ ಮೋವಾಂದ್‌ ಜವಾಬ್ ಕೊಡ್‌ತತ್. 25 ಇದ್‌ಲ್ಲತೆ ಅವ: ಒಂಟೆಯ ತಿಂಬಕ್‌ ಬೋಂಡಿಯಚ್ಚಕ್‌ ಪಿಲ್ಲು, ಮೇಚಿಯು ಉಂಡ್; ಬಯಿಟ್ ಒಳಿಯುವಕ್‌ ಜಾಗ ಸಹ ನಂಗಡಲ್ಲಿ ಉಂಡ್‍ೕಂದ್‌ ಎಣ್ಣ್‌ಚಿ. 26 ಅಕ್ಕ ಅಂವೊ ಮಂಡೆ ಬಗ್ಗಿತ್‌ ಯೆಹೋವನ ಆರಾದನೆ ಮಾಡಿತ್, 27 ನಾಡ ಎಜಮಾನನಾನ ಅಬ್ರಹಾಮಂಡ ದೇವನಾನ, ಯೆಹೋವಂಗ್‌ ಸ್ತೋತ್‌ರವಾಡ್; ಅಂವೊ ತಾಂಡ ದಯೇನ ಸತ್ಯತ್‌ನ ನಾಡ ಎಜಮಾನಡಿಂಜ ಎಡ್‌ತಿತ್‌ಲ್ಲೆ; ನಾನ್‌ ಪ್ರಯಾಣ ಮಾಡಿತ್ ಬಪ್ಪಕ, ಯೆಹೋವ ನನ್ನ ನಾಡ ಎಜಮಾನಂಡ ಮನೆಕಾರಡ ಮನೆಕ್‌ ಕಾಕಿಯಂಡ್‌ ಬಂದಿತ್ ಉಂಡ್‍ೕಂದ್‌ ಎಣ್ಣ್‌ಚಿ. 28 ಆ ಮೂಡಿ ಓಡಿ ಪೋಯಿತ್, ನಡ್‌ಂದ ವಿಷಯತ್‌ನ ತಾಂಡ ಅವ್ವಂಡ ಮನೆಲ್ ಉಳ್ಳಯಿಂಗಕ್‌ ಎಣ್ಣ್‌ಚಿ. 29 ರೆಬೆಕ್ಕಂಗ್ ಲಾಬಾನ ಎಣ್ಣುವ ಒರ್‌ ಅಣ್ಣ ಇಂಜತ್. ಅಂವೊ ಬುಗ್ಗೆರ ಪಕ್ಕ ಇಂಜ ಆ ಮನುಷ್ಯನ ಕಾಂಬಕ್‌ ಪೊರ್ಮೆ ಓಡಿ ಪೋಚಿ. 30 ಅಂವೊ ತಾಂಡ ತಂಗೆ ಇಟ್ಟಂಡಿಂಜ ಮೂಕೊತ್ತಿ ಪಿಂಞ ಬಳೆನ ನೋಟಿತ್, ಈ ವಿಷಯತ್‌ನೆಲ್ಲ ಆ ಮನುಷ್ಯ ನಾಡ ಕೂಡೆ ಪರ್‌ಂದತ್‍ೕಂದ್‌ ಕ್ೕಟಿತ್, ಆ ಮನುಷ್ಯಂಡ ಪಕ್ಕ ಬಾತ್. ಅಂವೊ ಬುಗ್ಗೆರ ಪಕ್ಕ ಒಂಟೆಯಡ ಪಕ್ತತ್‌ಲ್‌ ನಿಂದಂಡಿಂಜತ್. 31 ಅಕ್ಕ ಲಾಬಾನ ಅಂವೊಂಗ್: ಯೆಹೋವಯಿಂಜ ಆಶೀರ್ವಾದ ಪಡ್‌ಂದಂವೊನೇ, ಒಳ್‌ಕ್‌ ಬಾರಿ, ನಿಂಗ ಎನ್ನಂಗ್‌ ಪೊರ್ಮೆ ನಿಂದಿತುಳ್ಳಿರ? ನಿಂಗ ಇಪ್ಪಕ್‌ ನಂಗಡ ಮನೆಯು, ಒಂಟೆಯಕ್‌ ಬೋಂಡಿಯಾನ ಜಾಗವು ತಯಾರ್‌ ಮಾಡಿಯೇಂದ್‌ ಎಣ್ಣ್‌ಚಿ. 32 ಅಂವೊ ಲಾಬಾನಂಡ ಕೂಡೆ ಮನೆರ ಒಳ್‌ಕ್‌ ಪೋಚಿ. ಪಿಂಞ ಆ ಒಂಟೆಯಡ ಮೇಲೆ ಇಂಜದ್‌ನ ಉಳ್‌ಪಿತ್, ತಿಂಬಕ್‌ ಪಿಲ್‌ಲ್‌ ಪಿಂಞ ಮೇಚಿನ ಕೊಡ್‌ತಿತ್, ಅಂವೊಂಗು ಅಂವೊಂಡ ಕೂಡೆ ಬಂದಯಿಂಗಕು ಕಾಲ್‌ ಕತ್ತ್‌ವಕ್‌ ನೀರ್‌ ಕೊಡ್‌ತತ್. 33 ಅಯಿಂಗ ಉಂಬಕ್‌ ಅಳ್‌ತತ್. ಅಕ್ಕ ಅಬ್ರಹಾಮಂಡ ಸೇವಕ: ನಾನ್‌ ಇಲ್ಲಿಕ್‌ ಬಂದ ವಿಷಯತ್‌ನ ಎಣ್ಣತೆ ಉಂಬ್‌ಲೇಂದ್‌ ಎಣ್ಣ್‌ಚಿ. ಅಕ್ಕ ಲಾಬಾನ: ನೀನ್ ಬಂದ ವಿಷಯತ್‌ನ ಎಣ್ಣ್‍ೕಂದ್‌ ಎಣ್ಣ್‌ಚಿ. 34 ಅಕ್ಕ ಅಂವೊ: ನಾನ್‌ ಅಬ್ರಹಾಮಂಡ ಸೇವಕ. 35 ಯೆಹೋವ ನಾಡ ಎಜಮಾನನ ದುಂಬ ಆಶೀರ್ವಾದ ಮಾಡಿತ್ ಅಂವೊ ಬಲ್ಯ ಐಶ್ವರ್ಯವಂತಂವೊನಾಯಿತುಂಡ್. ಅಂವೊಂಗ್ ಕೊರಿ, ಎತ್ತ್‌ಕಡ್‌ಚಿ, ಬೊಳ್ಳಿ ಪೊನ್ನ್‌ ಪಣಿಕಾರಂಗಳ, ಪಣಿಕಾರ್ತಿಯಳ, ಒಂಟೆಯಳ ಪಿಂಞ ಕತ್ತೆಯಳ ಕೊಡ್‌ತಿತುಂಡ್. 36 ನಾಡ ಎಜಮಾನಂಡ ಪೊಣ್ಣ್‌ ಸಾರಳ ವಯಸ್ಸಾಯಿತ್‌ಪ್ಪಕ ನಾಡ ಎಜಮಾನಂಗ್‌ ಒರ್‌ ಮೋಂವೊನ ಪೆತ್ತತ್. ಆ ಮೋಂವೊಂಗ್‌ ನಾಡ ಎಜಮಾನ ತಾಂಗ್‌ ಸ್ವಂತವಾನದ್‌ನ ಎಲ್ಲಾ ಕೊಡ್‌ತಿತುಂಡ್. 37 ಇದ್‌ಲ್ಲತೆ ನಾಡ ಎಜಮಾನ ನನ್ನ ನೋಟಿತ್ ಇನ್ನನೆ ಆನೆ ಎಡ್‌ತ್ತಂಡತ್: ನಾನ್‌ ವಾಸ ಮಾಡಿಯಂಡುಳ್ಳ ಕಾನಾನ್‌ ದೇಶತ್‌ಂಜ ನಾಡ ಮೋಂವೊಂಗ್‌ ಮೂಡಿನ ಕೂಟಿಯಂಡ್‌ ಬಪ್ಪಕ್ಕಾಗ. 38 ಆಚೇಂಗಿ, ನಾಡ ಅಪ್ಪಂಡ ಮನೆಕ್‌ ಪೋಯಿತ್ ನಾಡ ಮನೆಕಾರಡ ಮನೆಯಿಂಜ ನಾಡ ಮೋಂವೊಂಗ್‌ ಒರ್‌ ಮೂಡಿನ ಕೂಟಿಯಂಡ್‌ ಬರಂಡೂಂದ್‌ ನಾಡ ಪಕ್ಕ ಆಣೆ ಮಾಡಿಚಿಟ್ಟಂಡತ್. 39 ಅಕ್ಕ ನಾನ್‌ ನಾಡ ಎಜಮಾನನ ನೋಟಿತ್: ಒರ್‌ ಸಮಯ ಆ ಮೂಡಿ ನಾಡ ಕೂಡೆ ಬಕ್ಕತೆ ಪೋಚೇಂಗೀಂದ್‌ ಕ್‍ೕಪಕ, 40 ನಾಡ ಎಜಮಾನ: ನಾನ್‌ ಆರಾದನೆ ಮಾಡುವ ನಾಡ ಯೆಹೋವ ತಾಂಡ ದೂತನ ನೀಡ ಕೂಡೆ ಅಯಿಚಿತ್, ನೀಡ ಪ್ರಯಾಣತ್‌ನ ಆಶೀರ್ವಾದ ಮಾಡುವ. ಅಕ್ಕ ನೀನ್ ನಾಡ ಅಪ್ಪಂಡ ಮನೆಕ್‌ ಕೂಡ್‌ನ ಬೆಂದ್‌ಕಡಲ್ಲಿಂಜ ನಾಡ ಮೋಂವೊಂಗ್‌ ಒರ್‌ ಮೂಡಿನ ಆಯ್ಕೆ ಮಾಡಿತ್ ಕಾಕಿಯಂಡ್‌ ಬರಂಡು. 41 ನಾಡ ಬೆಂದ್‌ಕ ಮೂಡಿನ ನೀಡ ಕೂಡೆ ಅಯಿಕತೆ ಪೋಚೇಂಗಿ, ಅಕ್ಕ ನೀನ್ ಮಾಡ್‌ನ ಆಣೆಯಿಂಜ ಬುಡುಗಡೆ ಆಪಿಯಾಂದ್‌ ಎಣ್ಣ್‌ಚಿ. 42 ಅನ್ನನೆ ನಾನ್‌ ಈ ದಿವಸ ಈ ಊರ್‌ರ ಬುಗ್ಗೆರ ಪಕ್ಕ ಬಂದಿತ್: ನಾಡ ಎಜಮಾನಾನ ಅಬ್ರಹಾಮಂಡ ದೇವನಾಯಿತುಳ್ಳ ಯೆಹೋವನೇ, ನೀಡ ಚಿತ್ತ ಉಂಡೇಂಗಿ, ನಾಡ ಪ್ರಯಾಣತ್‌ನ ನೀನ್ ಆಶೀರ್ವಾದ ಮಾಡ್. 43 ನೀರ್‌ ಬಲಿಪಕ್‌ ಬಪ್ಪ ಏದೇಂಗಿ ಒರ್‌ ಮೂಡಿನ ನೋಟಿತ್: ನೀಡ ಕುಡಿಕೆಲ್‌ ಉಳ್ಳ ನೀರ್‌ಲ್‌ ನಾಕ್‍ ಚೆನ್ನ ಕುಡಿಪಕ್‌ ತಾಂದ್‌ ಕ್‍ೕಪಕ: 44 ನೀನ್ ಕುಡಿ, ನೀಡ ಒಂಟೆಯಕು ನೀರ್‌ ತಪ್ಪೀಂದ್‌ ಎಣ್ಣ್‌ವವಳೇ, ನಾಡ ಎಜಮಾನಂಡ ಮೋಂವೊಂಗ್‌ ನೀನ್ ಆಯ್ಕೆ ಮಾಡ್‌ನ ಮೂಡಿಯಾಯಿತಿರಡ್‍ೕಂದ್‌ ಬೋಡ್‌ನ. 45 ನಾನ್‌ ಇನ್ನನೆ ಮನಸ್ಸ್‌ಲ್‌ ಗೇನ ಮಾಡಿಯಂಡಿಪ್ಪಕಲೇ, ರೆಬೆಕ್ಕ ನಿಪ್ಪ್‌ರ ಮೇಲೆ ಕುಡಿಕೆನ ಕೊಂಡಬಪ್ಪದ್‌ನ ನಾನ್‌ ಕಂಡ. ಅವ ನೀರ್‌ನ ಬಲ್‌ಚಿತ್‌ ಕೊಂಡ ಬಪ್ಪಕ ನಾನ್‌ ಅವಕ್: ನಾಕ್‍ ಕುಡಿಪಕ್‌ ನೀರ್‌ ತಾಂದ್‌ ಕ್‍ೕಟ. 46 ಅವ ಬೆರಿಯ ನಿಪ್ಪ್‌ಲ್‍ ಇಂಜ ಕುಡಿಕೆನ ಉಳ್‌ಪಿತ್: ಕುಡಿರಿ, ನಿಂಗಡ ಒಂಟೆಯಕ್‌ ಸಹ ನೀರ್‌ ಕೊಂಡ ಬಂತ್‌ ತಪ್ಪೀಂದ್‌ ಎಣ್ಣ್‌ಚಿ. ನಾನ್‌ ಕುಡಿಚಪಿಂಞ ಅವ ಒಂಟೆಯಕ್‌ ನೀರ್‌ ಕೊಂಡ ಬಂತ್‌ ಕೊಡ್‌ತತ್. 47 ನಾನ್‌ ಅವಳ ನೀನ್ ದಾಡ ಮೋವಾಂದ್‌ ಕ್‍ೕಟ; ಅದ್‌ಂಗ್‌ ಅವ: ನಾನ್‌ ಮಿಲ್ಕ ನಾಹೋರಂಗ್‌ ಪೆತ್ತ ಬೆತೂವೇಲಂಡ ಮೋವಾಂದ್‌ ಎಣ್ಣ್‌ಚಿ. ಅಕ್ಕ ನಾನ್‌ ಅವಕ್ ಮೂಕೊತ್ತಿನ ಪಿಂಞ ಬಳೆನ ಕೈಕ್‌ ಇಟ್ಟಿತ್, 48 ನಾಡ ಎಜಮಾನ ಅಬ್ರಹಾಮಂಡ ಯೆಹೋವಂಗ್‌ ಬಗ್ಗಿತ್‌ ನಮಸ್ಕಾರ ಮಾಡಿತ್, ತಾಂಡ ಎಜಮಾನಂಡ ಮೋಂವೊಂಗಾಯಿತ್‌ ಅಂವೊಂಡ ತಮ್ಮಣಂಡ ಮೋಂವೊಂಡ ಮೋವಳ ಕೊಂಡಬರಂಡೂಂದ್‌ ನನ್ನ ಸರಿಯಾನ ಬಟ್ಟೆಲ್‌ ಕಾಕಿಯಂಡ್‌ ಬಂದಂಗಾಯಿತ್‌ ಕೊಂಡಾಡ್‌ನ. 49 ಇಕ್ಕ ನಿಂಗ ನಾಡ ಎಜಮಾನಂಗ್‌ ಕರುಣೆನೆ ನಂಬಿಕೆನ ಕಾಟ್‌ವದಾಚೇಂಗಿ, ನಾಕ್‍ ಎಣ್ಣಿ. ಕುಶಿಯಿಲ್ಲತೆ ಪೋಚೇಂಗಿ ಅದ್‌ನ ಸಹ ಎಣ್ಣಿ. ಅಕ್ಕ ಮಿಂಞಕ್‌ ಎಂತ ಮಾಡಂಡೂಂದ್‌ ನಾಕ್‍ ಗೊತ್ತಾಪಾಂದ್‌ ಎಣ್ಣ್‌ಚಿ. 50 ಅದ್‌ಂಗ್‌ ಲಾಬಾನ ಪಿಂಞ ಬೆತೂವೇಲ, ಈ ಕಾರ್ಯ ಯೆಹೋವಯಿಂಜ ಬಂದದ್. ಆನಗುಂಡ್‌ ನಂಗಕ್‌ ನಲ್ಲದ್‌ ಕೆಟ್ಟದ್‌ ಒಂದು ಎಣ್ಣ್‌ವಕ್‌ ಆಪುಲೆ. 51 ಇದಾ, ರೆಬೆಕ್ಕ ನೀಡ ಮಿಂಞತ್‌ ಉಂಡ್. ಯೆಹೋವ ಎಣ್ಣ್‌ನನೆಕೆ ಅವಳ ನೀಡ ಎಜಮಾನಂಡ ಮೋಂವೊಂಗ್‌ ಪೊಣ್ಣಾಯಿತ್‌ ಮಾಡಿಚಿಡ್‌ವಕ್‌ ಅವಳ ಕಾಕಿಯಂಡ್‌ ಪೋಲೂಂದ್‌ ಎಣ್ಣ್‌ಚಿ. 52 ಅಬ್ರಹಾಮಂಡ ಸೇವಕ ಅಯಿಂಗಡ ತಕ್ಕ್‌ನ ಕ್ೕಟಿತ್ ಯೆಹೋವಂಗ್‌ ಅಟ್ಟಬುದ್ದಿತ್‌ ವಂದನೆ ಮಾಡ್‌ಚಿ. 53 ಅಲ್ಲಿಂಜ ತಾನ್‌ ಕೊಂಡ ಬಂದ ಬೊಳ್ಳಿರ ವಸ್ತುನ, ಪೊನ್ನ್‌ಲ್ ಮಾಡ್‌ನ ವಸ್ತುನ ಪಿಂಞ ಬಟ್ಟೆನೆಲ್ಲಾ ರೆಬೆಕ್ಕಂಗ್ ಕೊಡ್‌ತತ್. ಅವಡ ಅಣ್ಣಂಗ್‌ ಪಿಂಞ ಅವ್ವಂಗ್‌ ಸಹ ಬೆಲೆ ಉಳ್ಳ ಇನಾಮ್‌ನ ಕೊಡ್‌ತತ್. 54 ಅಲ್ಲಿಂಜ ಅಂವೊನು ಪಿಂಞ ಅಂವೊಂಡ ಕೂಡೆ ಬಂದ ಜನಳು ಉಂಡಿತ್‌ ಬಯಿಟ್ ಅಲ್ಲಿಯೇ ಒಳ್‌ಂಜತ್. ಪೊಲಾಕ ಎದ್ದಿತ್‌ ಅಂವೊ: ನಾಡ ಎಜಮಾನಂಡ ಪಕ್ಕ ಪೊರ್‌ಡ್‌ವಕ್‌ ನಂಗಳ ಬುಡೀಂದ್‌ ಎಣ್ಣ್‌ಚಿ. 55 ಆಚೇಂಗಿ ರೆಬೆಕ್ಕಂಡ ಅಣ್ಣ ಪಿಂಞ ಅವ್ವ ಅಂವೊಂಗ್: ಮೂಡಿ ಇಂಞು ಪತ್ತ್‌ ದಿವಸವಾಚೇಂಗಿಯು ನಂಗಡಲ್ಲಿ ಇರಡ್. ಅಲ್ಲಿಂಜ ಅವ ಪೊಲೂಂದ್‌ ಎಣ್ಣ್‌ಚಿ. 56 ಆಚೇಂಗಿ ಅಂವೊ: ಯೆಹೋವ ನಾಡ ಪ್ರಯಾಣತ್‌ನ ಆಶೀರ್ವಾದ ಮಾಡಿತುಳ್ಳಗುಂಡ್‌ ನಿಂಗ ನನ್ನ ತಡ್‌ಕತಿ. ನಾನ್‌ ನಾಡ ಎಜಮಾನಂಡ ಪಕ್ಕ ಪೋಪಕ್‌ ನಾಕ್‍ ಅಪ್ಪಣೆ ತಾರೀಂದ್‌ ಎಣ್ಣ್‌ಚಿ. 57 ಅಕ್ಕ ಅಯಿಂಗ: ನಂಗ ಮೂಡಿನ ಕಾಕಿತ್ ಅವಡ ಅಬಿಪ್ರಾಯತ್‌ನ ಕ್‍ೕಕನಾಂದ್‌ ಎಣ್ಣ್‌ಚಿ. 58 ಅದ್‌ಂಗ್‌ ಅಯಿಂಗ ರೆಬೆಕ್ಕಳ ಕಾಕಿತ್: ಈ ಮನುಷ್ಯಂಡ ಕೂಡೆ ನೀನ್ ಪೋಪಿಯಾಂದ್‌ ಕ್‍ೕಟತ್. ಅದ್‌ಂಗ್‌ ಅವ: ನಾನ್‌ ಪೋಪೀಂದ್‌ ಎಣ್ಣ್‌ಚಿ. 59 ಅಕ್ಕ ಅಯಿಂಗ ತಾಂಡ ತಂಗೆ ರೆಬೆಕ್ಕಳ, ಅವಡ ವಿಶತ್‌ನ ನೋಟಿಯಂಡಿಂಜ ಪಣಿಕಾರ್ತಿನ, ಅಬ್ರಹಾಮಂಡ ಸೇವಕಂಡ ಪಿಂಞ ಅಂವೊಂಡ ಕೂಡೆ ಬಂದ ಜನಳ ಕೂಡ ಅಯಿಚಿಕೊಡ್‌ತತ್. 60 ಪಿಂಞ ಅಯಿಂಗ ರೆಬೆಕ್ಕಂಗ್: ನಂಗಡ ತಂಗೆಯೇ, ನೀನ್ ಆಯಿರಾಯಿರ ಜನಕ್‌ ಅವ್ವಳಯಿತ್‌ ಆಂಡು. ನೀಡ ಸಂತಾನ ತಂಗಡ ಶತ್‌ರುವಡ ಪಟ್ಟಣತ್‌ನ ಸ್ವಂತವಾಯಿತ್‌ ಮಾಡಿಯೊಡ್‍ೕಂದ್‌ ಎಣ್ಣಿತ್ ಆಶೀರ್ವಾದ ಮಾಡ್‌ಚಿ. 61 ರೆಬೆಕ್ಕ ಪಿಂಞ ಅವಡ ಪಣಿಕಾರ್ತಿಯ ಒಂಟೆರ ಮೇಲೆ ಪತ್ತಿತ್, ಅಬ್ರಹಾಮಂಡ ಸೇವಕಂಡ ಕೂಡೆ ಪೋಚಿ. ಇನ್ನನೆ ಆ ಸೇವಕ ರೆಬೆಕ್ಕಳ ಕಾಕಿಯಂಡ್‌ ಪೊರ್‌ಟತ್. 62 ಇಸಾಕ ಲಹೈರೋಯಿ ಎಣ್ಣುವ ಬುಗ್ಗೆಯಿಂಜ ಬಂದಿತ್, ಕಾನಾನ್‌ ದೇಶತ್‌ರ ತೆಕ್ಕ್‌ ಸೀಮೆಲ್‌ ವಾಸ ಮಾಡಿಯಂಡಿಂಜತ್. 63 ಇಸಾಕ ಬಯಿಟಾಪಕ ನೇರತ್‌ ದ್ಯಾನ ಮಾಡುವಕಾಯಿತ್‌ ಪೊರಮೆ ಪೋಯಿತಿಂಜತ್. ಅಲ್ಲಿಂಜ ಅಂವೊ ಕಣ್ಣೆಡ್‌ತಿತ್‌ ನೋಟ್‌ವಕ, ಒಂಟೆಯ ಬಂದಂಡಿಪ್ಪಾನ ಕಂಡತ್. 64 ರೆಬೆಕ್ಕ ಸಹ ಕಣ್ಣೆಡ್‌ತಿತ್‌ ಇಸಾಕನ ಕಾಂಬಕ, ಅವ ಒಂಟೆಯಿಂಜ ಇಳ್‌ಂಜಿತ್‌ 65 ಸೇವಕನ ನೋಟಿತ್: ನಂಗಡ ಎದ್‌ರ್‌ಲ್ ಬೇಲ್ಯಿಂಜ ಬಂದಂಡುಳ್ಳ ಆ ಮನುಷ್ಯ ದಾರ್‌ಂದ್‌ ಕ್‍ೕಟತ್. ಅದ್‌ಂಗ್‌ ಅಂವೊ: ಅಂವೊನೇ ನಾಡ ಎಜಮಾನಾಂದ್‌ ಎಣ್ಣ್‌ವಕ, ಮೂಡ್‌ನ ಬಟೇರ ತುತಿಲ್‌ ಮುಚ್ಚಂಡತ್. 66 ಆ ಸೇವಕ ತಾನ್‌ ಮಾಡ್‌ನ ಕಾರ್ಯತ್‌ನೆಲ್ಲಾ ಇಸಾಕಂಗ್‌ ವಿವರವಾಯಿತ್‌ ಎಣ್ಣ್‌ಚಿ. 67 ಅಲ್ಲಿಂಜ ಇಸಾಕ ಅವಳ ತಾಂಡ ಅವ್ವ ಸಾರಳಂಡ ಗುಡಾರಕ್‌ ಕಾಕಿಯಂಡ್‌ ಪೋಯಿತ್, ರೆಬೆಕ್ಕಳ ಮಂಗಲ ಕಯಿಚತ್. ಅವ ಅಂವೊಂಡ ಪೊಣ್ಣ್‌ ಆಚಿ. ಅಂವೊ ಅವಳ ಪ್ರೀತಿ ಮಾಡಿತ್ ತಾಂಡ ಅವ್ವ ಚತ್ತ ದುಃಖತ್‌ನ ಮರ್‌ಂದತ್. |
© 2017, New Life Literature (NLL)