ಆದ್ಯತ್‌ರ ಪುಸ್ತಕ 22 - ಕೊಡವ ಬೈಬಲ್ದೇವ ಆಬ್ರಹಾಮನ ಪರಿಕ್ಷೆ ಮಾಡ್‌ನದ್‌ 1 ಈ ಕಾರ್ಯಯೆಲ್ಲ ಆನ ಪಿಂಞ, ದೇವ ಅಬ್ರಹಾಮಂಡ ನಂಬಿಕೆನ ಪರೀಕ್ಷೆ ಮಾಡ್‌ಚಿ; ಅದ್‌ ಎನ್ನನೆ ಎಣ್ಣ್‌ಚೇಂಗಿ, ದೇವ: ಅಬ್ರಹಾಮನೇಂದ್‌ ಕಾಕ್‌ಚಿ. ಅದ್‌ಂಗ್‌ ಅಬ್ರಹಾಮ: ಅಕ್ಕು, ನಾನ್‌ ಇಲ್ಲಿಯೇ ಉಳ್ಳಂದ್‌ ಎಣ್ಣ್‌ಚಿ. 2 ಅಕ್ಕ ದೇವ: ನೀಡ ಒರೇ ಮೋಂವೊನ, ಅಕ್ಕು, ನೀನ್‌ ದುಂಬ ಪ್ರೀತಿ ಮಾಡುವ ಇಸಾಕನ ಮೊರಿಯ ಎಣ್ಣುವ ದೇಶಕ್‌ ಕಾಕಿಯಂಡ್ ಪೋ. ಅಲ್ಲಿ ನಾನ್‌ ನೀಕ್‌ ಎಣ್ಣ್‌ವ ಒರ್‌ ಕುಂದ್ರ ಮೇಲೆ ಅಂವೊನ ದಹನ ಬಲಿಯಾಯಿತ್‌ ಅರ್ಪಿಚಿಡಂಡೂಂದ್‌ ಎಣ್ಣ್‌ಚಿ. 3 ಅಕ್ಕ ಅಬ್ರಹಾಮ ಪೊಲಾಕ ಬೆರಿಯ ಎದ್ದಿತ್, ತಾಂಡ ಕತ್ತೆರ ಮೇಲೆ ಸಾಮಾನತ್‌ನ ಕೆಟ್ಟಿತ್, ತಾಂಡ ಕೂಡೆ ದಂಡ್‌ ಆಳ್‌ವಳ ಪಿಂಞ ಇಸಾಕನ ಕಾಕಿಯಂಡ್, ಅಲ್ಲಿಂಜ ದಹನ ಬಲಿಕ್‌ ಪುಳ್ಳಿನ ತುಂಡ್‌ ಮಾಡಿಯಂಡ್‌ ದೇವ ಎಣ್ಣ್‌ನ ಜಾಗಕ್‌ ಪೊರ್‌ಟತ್. 4 ಅಯಿಂಗ ಪ್ರಯಾಣ ಮಾಡ್‌ನ ಮೂಂದ್‌ನೆ ದಿವಸತ್‌ಲ್‌ ಅಬ್ರಹಾಮ ಕಣ್ಣೆಡ್‌ತಿತ್‌ ನೋಟಿತ್ ದೂರತ್‌ಲ್‌ ಆ ಜಾಗತ್‌ನ ಕಂಡತ್. 5 ಅಕ್ಕ ಅಬ್ರಹಾಮ ತಾಂಡ ಆಳ್‌ವಳ ನೋಟಿತ್: ನಿಂಗ ಕತ್ತೆರ ಕೂಡೆ ಇಲ್ಲಿಯೇ ಇರಿ. ನಾನು, ನಾಡ ಮೋಂವೊನು ಆ ಜಾಗಕ್‌ ಪೋಯಿತ್ ಆರಾದನೆ ಮಾಡಿತ್ ತಿರಿತ್‌ ನಿಂಗಡ ಪಕ್ಕ ಬಪ್ಪಾಂದ್‌ ಎಣ್ಣ್‌ಚಿ. 6 ಅಕ್ಕ ಅಬ್ರಹಾಮ ದಹನ ಬಲಿಕ್‌ ಬೋಂಡಿಯಾನ ಪುಳ್ಳಿನ ತಾಂಡ ಮೋಂವೊ ಇಸಾಕಂಡ ಮೇಲೆ ಬೆಚ್ಚಿತ್, ತಾಂಡ ಕೈಯಿಲ್‌ ತಿತ್ತ್‌ನ ಪಿಂಞ ಕತ್ತಿನ ಪುಡಿಚ್ಚಂಡ್‌ ದಂಡಾಳು ಒಕ್ಕಚೆ ಪೊರ್‌ಟತ್. 7 ಅಕ್ಕ ಇಸಾಕ ತಾಂಡ ಅಪ್ಪನಾನ ಅಬ್ರಹಾಮನ ನೋಟಿತ್: ಅಪ್ಪನೇಂದ್‌ ಕಾಕ್‌ಚಿ. ಅದ್‌ಂಗ್‌ ಅಬ್ರಹಾಮ: ಎಂತ ಮೋಂವೊನೇಂದ್‌ ಕ್‍ೕಟತ್. ಅಕ್ಕ ಇಸಾಕ: ಇದಾ, ನಂಗಡ ಪಕ್ಕ ತಿತ್ತ್‌ ಪಿಂಞ ಪುಳ್ಳಿ ಉಂಡ್, ಆಚೇಂಗಿ ದಹನ ಬಲಿಕ್‌ ಕೊರಿ ಎಲ್ಲಿ ಉಂಡ್‍ೕಂದ್‌ ಕ್‍ೕಟತ್. 8 ಅದ್‌ಂಗ್‌ ಅಬ್ರಹಾಮ: ನಾಡ ಮೋನೇ, ದೇವ ತಾನೆ ದಹನ ಬಲಿಕ್‌ ಬೋಂಡಿಯಾನ ಕೊರಿನ ನಂಗಕ್‌ ತಪ್ಪಾಂದ್‌ ಎಣ್ಣ್‌ಚಿ; ಪಿಂಞ ದಂಡಾಳು ಒಕ್ಕಚೆ ಪೋಯಿತ್, 9 ದೇವ ಎಣ್ಣ್‌ನ ಜಾಗಕ್‌ ಎತ್ತ್‌ಚಿ. ಅಲ್ಲಿ ಅಬ್ರಹಾಮ ಒರ್‌ ಬಲಿಪೀಠತ್‌ನ ತಯಾರ್‌ ಮಾಡಿತ್, ಪುಳ್ಳಿನ ಅಡ್‌ಕಿತ್, ತಾಂಡ ಮೋಂವೊನಾನ ಇಸಾಕಂಡ ಕೈಕಾಲ್‌ನ ಕೆಟ್ಟಿತ್, ಅಂವೊನ ಬಲಿಪೀಠತ್‌ರ ಮೇಲೆ ಇಟ್ಟತ್. 10 ಪಿಂಞ ಅಬ್ರಹಾಮ ತಾಂಡ ಮೋಂವೊನ ಕೆತ್ತ್‌ವಕಾಯಿತ್‌ ತಾಂಡ ಕೈಯಿನ ನ್‍ೕಟಿತ್, ಕತ್ತಿನ ಎಡ್‍ತತ್. 11 ಅಕ್ಕ ಯೆಹೋವಂಡ ದೂತ ಪರಲೋಕತ್‌ಂಜ: ಅಬ್ರಹಾಮನೇ, ಅಬ್ರಹಾಮನೇಂದ್‌ ಕಾಕ್‌ಚಿ. ಅಕ್ಕ ಅಂವೊ: ನಾನ್‌ ಇಲ್ಲಿಯೇ ಉಳ್ಳಂದ್‌ ಜವಾಬ್ ಕೊಡ್‌ತತ್. 12 ಆ ದೂತ ಅಂವೊಂಗ್: ನೀಡ ಮೋಂವೊಂಡ ಮೇಲೆ ಕೈ ಇಡತೆ. ಅಂವೊನ ಒಂದು ಮಾಡತೆ; ನೀನ್‌ ಅಂವೊನ ನೀಡ ಮೋಂವೋಂದ್, ನೀಡ ಒರೇ ಮೋಂವೋಂದ್ ಸಹ ನೋಟತೆ, ನಾಕಾಯಿತ್‌ ಬಲಿಕೊಡ್‌ಪಕ್‌ ಒಪ್ಪಿಚಿಟ್ಟಗುಂಡ್, ನೀನ್‌ ಯೆಹೋವಂಗ್‌ ಬೊತ್ತ್‌ವಿಯಾಂದ್‌ ಇಕ್ಕ ನಾಕ್‍ ಗೊತ್ತಾಚಿ. 13 ಅಬ್ರಹಾಮ ಕಣ್ಣೆಡ್‌ತಿತ್‌ ನೋಟ್‌ವಕ ತಾಂಡ ಬೆಂಬರತ್‌ಲ್, ತಾಂಡ ಕೊಂಬ್ ಪೊದೆಲ್‌ ಚಿಕ್ಕಿತುಳ್ಳ ಒರ್‌ ಟಗರ್‌ನ ಕಂಡತ್. ಅಕ್ಕ ಅಬ್ರಹಾಮ ಪೋಯಿತ್, ಆ ಟಗರ್‌ನ ಪುಡ್‌ಚಿತ್‌ ತಾಂಡ ಮೋಂವೊಂಡ ಬದ್‌ಲ್‌ ಅದ್‌ನ ಬಲಿ ಕೊಡ್‌ತತ್. 14 ಅಬ್ರಹಾಮ ಆ ಜಾಗಕ್‌ ಯೆಹೋವಯೀರೆ ಎಣ್ಣಿಯಂಡ್‌ ಪೆದ ಬೆಚ್ಚತ್. ಯೆಹೋವಂಡ ಕುಂದ್‌ಲ್‌ ನಂಗಕ್‌ ಬೋಂಡಿಯಾನದ್‌ನ ತಪ್ಪ ಎಣ್ಣಿಯಂಡ್‌ ಇಕ್ಕಲು ಜನ ಎಣ್ಣುವ. 15 ಯೆಹೋವಂಡ ದೂತ ಪರಲೋಕತ್‌ಂಜ ದಂಡನೆ ಕುರಿ ಅಬ್ರಹಾಮನ ಕಾಕಿತ್: 16 ನೀನ್‌ ಅಂವೊನ ನೀಡ ಮೋಂವೋಂದ್ ನೋಟತೆ, ನೀಡ ಒರೇ ಮೋಂವೋಂದ್ ಸಹ ನೋಟತೆ, ಅಂವೊನ ಒಪ್ಪ್‌ಚಿಟ್ಟಿತ್‌ ಈ ಕಾರ್ಯತ್‌ನ ಮಾಡ್‍ನಗುಂಡ್, 17 ನಾನ್‌ ನಿನ್ನ ನೇರಾಯಿತು ಆಶೀರ್ವಾದ ಮಾಡಿತ್, ನೀಡ ಸಂತಾನತ್‌ನ ಬಾನತ್‌ ಮೀನ್‌ರನೆಕೆಯು, ಕಡಕರೆಲ್‌ ಉಳ್ಳ ಮಣತ್‌ರನೆಕೆಯು ಲೆಕ್ಕ ಮಾಡುವಕಯ್ಯತಚ್ಚಕ್‌ ಆಪನೆಕೆ ಮಾಡುವಿ. ನೀಡ ಸಂತಾನಕಾರಂಗ ಅಯಿಂಗಡ ಶತ್‌ರುವಳ ಚೋಪ್‌ಚಿಡುವಾಂದು, 18 ನೀನ್‌ ನಾಡ ತಕ್ಕ್‌ಕ್‌ ತಗ್ಗಿತ್‌ ನಡ್‌ಂದಗುಂಡ್‌ ನೀಡ ಸಂತಾನತ್‌ರ ಮೂಲಕ ಈ ಬೂಮಿಲ್‌ ಉಳ್ಳ ಎಲ್ಲಾ ಜನಾಂಗಳು ಆಶೀರ್ವಾದ ಪೊಂದುವಾಂದು ಯೆಹೋವ ಅಂವೊಂಡ ಮೇಲೆ ಆಣೆ ಮಾಡಿತ್ ಎಣ್ಣಿಚೀಂದ್‌ ಎಣ್ಣ್‌ಚಿ. 19 ಅಲ್ಲಿಂಜ ಅಬ್ರಹಾಮ ತಾಂಡ ಆಳ್‌ವಡ ಪಕ್ಕ ತಿರಿತ್‌ ಬಾತ್. ಅಯಿಂಗೆಲ್ಲಾರು ಬೇರ್ಷೆಬಕ್‌ ಪೊರ್‌ಟತ್; ಅಬ್ರಹಾಮ ಬೇರ್ಷೆಬಲ್‌ ವಾಸ ಮಾಡ್‌ಚಿ. ನಾಹೋರಂಡ ಕ್‌ಣ್ಣ ಮಕ್ಕ 20 ಈ ಕಾರ್ಯಯೆಲ್ಲ ಆನ ಪಿಂಞ, ತಾಂಡ ತಮ್ಮಣ ಆನ ನಾಹೋರಂಗ್‌ ಅಂವೊಂಡ ಪೋಣ್ಣ್‌ ಮಿಲ್ಕಂಡ ಮೂಲಕ ಕ್‌ಣ್ಣ ಮಕ್ಕ ಪುಟ್ಟ್‌ಚೀಂದ್‌ ಅಬ್ರಹಾಂಗ್‌ ಸುದ್ದಿ ಮುಟ್ಟ್‌ಚಿ. 21 ಅಯಿಂಗ ದಾರ್‌ ಎಣ್ಣ್‌ಚೇಂಗಿ, ಆದ್ಯ ಪುಟ್ಟ್‌ನಂವೊಂಡ ಪೆದ ಊಚ್, ಇಂವೊಂಡ ತಮ್ಮಣಂಡ ಪೆದ ಬೂಚ್, ಅರಾಮಂಡ ಅಪ್ಪನಾನ ಕೆಮೂವೇಲ, 22 ಕೆಸೆದ, ಹಜೋ, ಪಿಲ್ದಾಷ, ಇದ್‌ಲಾಫ, ಬೆತೂವೇಲ ಎಣ್ಣುವಯಿಂಗಳೇ. 23 ರೆಬೆಕ್ಕ ಬೆತೂವೇಲಂಗ್‌ ಪುಟ್ಟ್‌ನವ. ಈ ಎಟ್ಟ್‌ ಮಕ್ಕಳ ಅಬ್ರಹಾಮಂಡ ತಮ್ಮಣಾನ ನಾಹೋರಂಗ್‌ ಮಿಲ್ಕ ಪೆತ್ತತ್. 24 ಇದ್‌ಲ್ಲತೆ, ಅಂವೊಂಡ ಉಪ ಪೊಣ್ಣಾನ ರೂಮ ಸಹ ಟೆಬಹ, ಗಹಮ, ತಹಷ, ಮಾಕಾ ಎಣ್ಣುವ ನಾಲ್‌ ಮಕ್ಕಳ ಪೆತ್ತತ್. |
© 2017, New Life Literature (NLL)