ಆದ್ಯತ್‌ರ ಪುಸ್ತಕ 17 - ಕೊಡವ ಬೈಬಲ್ದೇವ ಆಬ್ರಹಾಮಣಡ ಮಾಡುಚ ಒಪ್ಪಂತತ್‌ರ ಅಡಯಾಳ 1 ಅಬ್ರಾಮ ತೊಂಬತೊಯಿಂಬದ್‌ ವಯಸ್ಸಾಯಿತ್‌ಪ್ಪಕ ಯೆಹೋವ, ಅಬ್ರಾಮಂಗ್‌ ಅಂವೊನ ಕಾಂಬ್‌ಚಿಟ್ಟಿತ್: ನಾನ್ ಸರ್ವಶಕ್ತನಾನ ದೇವ. ನೀನ್‌ ನಾಡ ಮಿಂಞತ್‌ಲ್‌ ಏದ್‌ ಕುತ್ತವು ಇಲ್ಲತೆ ನಾಡ ಸೇವೆ ಮಾಡ್. 2 ನಾನ್, ನೀಕು ನಾಕು ಮದ್ಯತ್ಲ್ ನಾಡ ಒಪ್ಪಂದತ್‌ನ ದ್ರಡಮಾಡಿತ್, ನಿನ್ನ ಬಲ್ಯ ಸಂತಾನವಾಯಿತ್‌ ಮಾಡುವೀಂದ್‌ ಎಣ್ಣ್‌ಚಿ. 3 ಅಕ್ಕ ಅಬ್ರಾಮ ಅಡ್ಡಬುದ್ದತ್. ದೇವ ಅಂವೊಂಡ ಕೂಡೆ ತಕ್ಕ್‌ ಪರ್‌ಂದಿತ್: 4 ನಾನ್ ನೀಡ ಕೂಡೆ ಮಾಡುವ ಒಪ್ಪಂದ ಎಂತ ಎಣ್ಣ್‌ಚೇಂಗಿ, ನೀನ್‌ ದುಂಬ ಜನಾಂಗಕ್‌ ಅಪ್ಪನಾಪಿಯ. 5 ಇಂಞು ಮಿಂಞಕ್‌ ನೀಡ ಪೆದತ್‌ನ ಅಬ್ರಾಮಾಂದ್‌ ಎಣ್ಣುಲೆ, ನಾನ್ ನಿನ್ನ ದುಂಬ ಜನಾಂಗಕ್‌ ಅಪ್ಪನಾಯಿತ್‌ ಮಾಡ್‍ನಗುಂಡ್, ನೀಡ ಪೆದತ್‌ನ ಅಬ್ರಹಾಮಾಂದ್‌ ಎಣ್ಣುವ. 6 ನೀಕ್‌ ದುಂಬ ಸಂತಾನತ್‌ನ ತಪ್ಪಿ. ನೀಡಗುಂಡ್‌ ದುಂಬ ಜನಾಂಗಳ ಪುಟ್ಟ್‌ಚಿಡುವಿ. ನೀಡಗುಂಡ್‌ ಅನೇಕ ರಾಜಂಗ ಪುಟ್ಟ್‌ವ. 7 ನೀಕು ನೀಡ ಬಯ್ಯ ಬಪ್ಪ ನೀಡ ಮಕ್ಕಡ ಸಂತಾನಕು ನಾನ್ ಯೆಹೋವನಾನ ದೇವನಾಯಿತ್‌ಪ್ಪಕಾಯಿತ್‌ ನಾಕು ನೀಕು, ನೀಡ ಬಯ್ಯ ಬಪ್ಪ ಮಕ್ಕಡ ಸಂತಾನತ್‌ರ ಮದ್ಯತ್ಲ್, ನಾಡ ಒಪ್ಪಂದತ್‌ನ ನಿತ್ಯ ಒಪ್ಪಂದವಾಯಿತ್‌ ಸ್ತಾಪನೆ ಮಾಡುವಿ. 8 ನೀನ್‌ ಪರದೇಶಿಯಾಯಿತ್‌ ವಾಸ ಮಾಡಿಯಂಡುಳ್ಳ ಕಾನಾನ್‌ ದೇಶತ್‌ನೆಲ್ಲಾ ನೀಕು ನೀಡ ಬಯ್ಯ ಬಪ್ಪ ನೀಡ ಮಕ್ಕಡ ಸಂತಾನಕು ಕಾಲಕಾಲಕ್‌ ಸ್ವಂತವಾಯಿತ್‌ ಕೊಡ್‌ತಿತ್‌ ನಾನ್ ಅಯಿಂಗಕ್‌ ಯೆಹೋವನಾನ ದೇವನಾಯಿತ್‌ ಇಪ್ಪೀಂದ್‌ ಎಣ್ಣ್‌ಚಿ. 9 ಇದ್‌ಲ್ಲತೆ ಯೆಹೋವನಾನ ದೇವ ಅಬ್ರಹಾಮಂಗ್: ಇಕ್ಕ ನೀನು, ನೀಡ ಬಯ್ಯ ಬಪ್ಪ ನೀಡ ಮಕ್ಕಡ ಸಂತಾನವು ನಾಡ ಒಪ್ಪದಂತ್‌ರ್‌ ಪ್ರಕಾರ ನಡ್‌ಕಂಡು. 10 ನಾಕು ನೀಕು, ನೀಡ ಬಯ್ಯ ಬಪ್ಪ ನೀಡ ಮಕ್ಕಡ ಸಂತಾನಕು ಮಾಡುವಕುಳ್ಳ ನಾಡ ಒಪ್ಪಂದ ಎಂತ ಎಣ್ಣ್‌ಚೇಂಗಿ, ನಿಂಗಡಲ್ಲಿ ಉಳ್ಳ ಪ್ರತಿಯೊರ್‌ ಕ್‌ಣ್ಣ ಮಕ್ಕಕು ಸುನ್ನತಿ ಮಾಡಿಚಿಡಂಡು. 11 ನೀನ್‌ ಸುನ್ನತಿ ಮಾಡಿಚಿಟ್ಟೊಂಡು. ಅದೇ ನೀಕು ನಾಕು ಉಳ್ಳ ಒಪ್ಪಂದತ್‌ರ ಗುರ್‌ತಾಯಿತ್‌ಪ್ಪ. 12 ನಿಂಗಡ ಬಯ್ಯ ಬಪ್ಪ ನೀಡ ಮಕ್ಕಡ ಸಂತಾನಕ್‌ ಪುಟ್ಟುವ ಪ್ರತಿಯೊರ್‌ ಆಣ್‍ ಕುಂಞಿಕು ಎಟ್ಟ್‌ನೆ ದಿವಸತ್‌ಲ್‌ ಸುನ್ನತಿ ಮಾಡ್‌ಚಿಡಂಡು. ನೀಡ ಮನೆತನತ್‌ಲ್‌ ಪುಟ್ಟ್‌ನ ಕುಂಞಿಯಿಂಜ ಪುಡ್‌ಚಿತ್‌ ನಿಂಗಡ ಸಂತಾನ ಅಲ್ಲತ ಕ್ರಯಕ್‌ ಕೊಂಡಬಂದ ಪರದೇಶಿ ಆಳ್‌ವಡ ಮಕ್ಕಳ ಸಹ ನಿಂಗ ಸುನ್ನತಿ ಮಾಡ್‌ಚಿಡಂಡು. 13 ನೀಡ ಮನೆಲ್ ಪುಟ್ಟ್‌ನ ಆಣ್‍ ಕುಂಞಿಯಕು ಕ್ರಯಕ್‌ ಕೊಂಡಬಂದ ಆಣ್‍ ಕುಂಞಿಯಕು ಸುನ್ನತಿ ಮಾಡಂಡು. ಇನ್ನನೆ ನಾಡ ಒಪ್ಪಂದ ನಿಂಗಡ ತಡೀರ ಮೇಲೆ ನಿತ್ಯ ಗುರ್‌ತಾಯಿತ್‌ಪ್ಪ. 14 ಸುನ್ನತಿ ಮಾಡತೆವುಳ್ಳ ಏದ್‌ ಆಣಾಚೇಂಗಿ ಉಂಡೇಂಗಿ, ಅಂವೊ ನಾಡ ಒಪ್ಪಂದತ್‌ನ ಪೊಳ್‌ಚಾಂಗ್, ಅಂವೊ ತಾಂಡ ಮಕ್ಕಡಕೂಡೆ ಇಕ್ಕತನೆಕೆ ಅಂವೊನ ಪೊರಮೆ ಇಡ್‌ವಾಂದ್‌ ಎಣ್ಣ್‌ಚಿ. 15 ಇದ್‌ಲ್ಲತೆ ಯೆಹೋವ ಅಬ್ರಹಾಮಂಗ್: ನೀನ್‌ ಇಂಞು ಮಿಂಞಕ್‌ ನೀಡ ಪೊಣ್ಣ್‌ನ ಸಾರಯಾಂದ್‌ ಕಾಕತೆ, ಸಾರಾಳಾಂದ್‌ ಕಾಕಂಡು. 16 ನಾನ್ ಅವಳ ಆಶೀರ್ವಾದ ಮಾಡಿತ್, ಅವಡ ಮೂಲಕ ನೀಕ್‌ ಒರ್‌ ಮೋಂವೊನ ತಪ್ಪಿ. ಅವ ದುಂಬ ಜನಾಂಗಕ್‌ ಅವ್ವಳಾಯಿತು, ಅವಡ ಮೂಲಕ ಅನೇಕ ಜನಾಂಗತ್‌ರ ರಾಜಂಗಳ ಪುಟ್ಟ್‌ಚಿಟ್ಟಿತು, ಅವಳ ಆಶೀರ್ವಾದ ಮಾಡುವೀಂದ್‌ ಎಣ್ಣ್‌ಚಿ. 17 ಅಕ್ಕ ಅಬ್ರಹಾಮ ಅಡ್ಡ ಬದ್ದಿತ್: ನೂರ್‌ ವಯಸ್ಸಾನಪಿಂಞ ನಾಕ್‍ ಮೊಂವೊ ಪುಟ್ಟ್‌ವೋ? ತೊಂಬದ್‌ ವಯಸ್ಸಾನ ಸಾರಾಳ್‌ಕ್‌ ಕುಂಞಿನ ಪೆರುವಕಯ್ಯುವಾಂದ್‌ ತಾಂಡ ಹೃದಯತ್‌ಲ್‌ ಗೇನ ಮಾಡಿತ್ ಮನಸ್ಸ್‌ಲೇ ತೆಳ್‌ಚತ್. 18 ಅಬ್ರಹಾಮ ದೇವಂಗ್: ಇಷ್ಮಾಯೇಲ್‌ ನೀಡ ಆಶೀರ್ವಾದತ್‌ನ ಅನುಬವಿಚಿಡಡ್‍ೕಂದ್‌ ಎಣ್ಣ್‌ಚಿ. 19 ಆಚೇಂಗಿ ದೇವ: ನೀಡ ಪೊಣ್ಣಾಯಿತುಳ್ಳ ಸಾರಳ ನೀಕ್‌ ಒರ್‌ ಮೋಂವೂನ ಪೆರುವ, ಅಂವೊಂಗ್‌ ನೀನ್‌ ಇಸಾಕಾಂದ್‌ ಪೆದ ಬೆಕ್ಕಂಡು. ನಾಡ ಒಪ್ಪಂದತ್‌ನ ಅಂವೊಂಡ ಕೂಡೆ ಪಿಂಞ ಅಂವೊಂಡ ಬಯ್ಯ ಬಪ್ಪ ಅಂವೊಂಡ ಮಕ್ಕಡ ಸಂತಾನತ್‌ರ ಕೂಡೆ ನಿತ್ಯ ಒಪ್ಪಂದವಾಯಿತ್‌ ಸ್ತಾಪನೆ ಮಾಡುವಿ. 20 ಇಷ್ಮಾಯೇಲಂಡ ವಿಷಯತ್‌ಲ್‌ ನೀನ್‌ ಬೋಡ್‌ನದ್‌ ನಾಕ್‍ ಕ್‍ೕಟತ್; ನಾನ್ ಅಂವೊನ ಆಶೀರ್ವಾದ ಮಾಡಿತ್, ಅಂವೊನ ಅಬಿವೃದ್ದಿ ಪೊಂದ್ವನೆಕೆ ಮಾಡಿತ್, ಅಂವೊಂಡ ಸಂತಾನ ಬಲ್ಯದಾಪಕ್‌ ಮಾಡುವಿ. ಅಂವೊ ಪನ್ನೆರಂಡ್‌ ಕುಲಕ್‌ ರಾಜಕುಮಾರನ ಪಡೆಯುವ. ಅಂವೊನ ಬಲ್ಯ ಜನಾಂಗಳಾಯಿತ್‌ ಮಾಡುವಿ. 21 ಆಚೇಂಗಿ ನಾಡ ಒಪ್ಪಂದತ್‌ನ, ಸಾರಾಳ ನೀಕ್‌ ಪೆರುವ ಇಸಾಕಂಡ ಕೂಡೆ ಸ್ತಾಪನೆ ಮಾಡುವಿ. ಬಪ್ಪ ಕಾಲ ಇದೇ ಸಮಯತ್‌ ನೀಕು ಸಾರಾಳಕು ಇಸಾಕ ಪುಟ್ಟ್‌ವಾಂದ್‌ ಎಣ್ಣ್‌ಚಿ. 22 ದೇವ ಅಬ್ರಹಾಮಂಡ ಕೂಡೆ ತಕ್ಕ್‌ ಪರ್‌ಂದಿತಾನ ಪಿಂಞ ಅಂವೊನ ಬುಟ್ಟಿತ್‌ ಕೊಡಿಕ್‌ ಪೋಚಿ. 23 ಅದೇ ದಿವಸತ್‌ಲ್‌ ಅಬ್ರಹಾಮ ತಾಂಡ ಮೋಂವೊ ಇಷ್ಮಾಯೇಲನ ಪಿಂಞ ಅಂವೊಂಡ ಮನೆಲ್ ಪುಟ್ಟ್‌ನ ಎಲ್ಲಾ ಆಣಾಳ್‌ವಳ ಪಿಂಞ ಕ್ರಯಕ್‌ ಎಡ್‌ತ ಬಂದ ಎಲ್ಲಾ ಆಣಾಳ್‌ವಳ ಯೆಹೋವ ಎಣ್ಣ್‌ನನೆಕೆ ಸುನ್ನತಿ ಮಾಡಿಚಿಟ್ಟತ್. 24 ಅಬ್ರಹಾಮಂಗ್ ಸುನ್ನತಿ ಮಾಡ್‌ವಕ ಅಂವೊಂಗ್‌ ತೊಂಬತೊಯಿಂಬದ್‌ ವಯಸ್ಸಾಯಿತ್‌ಂಜತ್. 25 ಅಂವೊಂಡ ಮೋಂವೊನಾನ ಇಷ್ಮಾಯೇಲಂಗ್‌ ಪದಿಮೂಂದ್‌ ವಯಸ್ಸಾಯಿತ್‌ಂಜತ್. 26 ಅಬ್ರಹಾಮಂಗ್ ಪಿಂಞ ಅಂವೊಂಡ ಮೊಂವೊನಾನ ಇಷ್ಮಾಯೇಲಂಗ್‌ ಒರೇ ದಿವಸತ್‌ಲ್‌ ಸುನ್ನತಿ ಮಾಡ್‌ಚಿ. 27 ಎಲ್ಲಾ ಆಣಾಳ್‌ವಳ ಎಣ್ಣ್‌ಚೇಂಗಿ, ಅಂವೊಂಡ ಮನೆಲ್ ಪುಟ್ಟ್‌ನ ಆಣಾಳ್‌ವಳ ಪಿಂಞ ಕ್ರಯಕ್‌ ಎಡ್‌ತ ಬಂದ ಎಲ್ಲಾ ಆಣಾಳ್‌ವಳ ಅಂವೊಂಡ ಕೂಡೆ ಸುನ್ನತಿ ಮಾಡ್‌ಚಿ. |
© 2017, New Life Literature (NLL)