ಆದ್ಯತ್‌ರ ಪುಸ್ತಕ 15 - ಕೊಡವ ಬೈಬಲ್ಆಬರಮಂಡ ಕೂಡ ದೇವ ಮಾಡ್‌ನ ಒಪ್ಪಂದ 1 ಈ ಘಟನೆಯೆಲ್ಲಾ ಆನ ಪಿಂಞ ಅಬ್ರಾಮಂಗ್ ಯೆಹೋವ ದರ್ಶನತ್‌ಲ್‌ ಬಂದಿತ್: ಅಬ್ರಾಮನೇ ನೀನ್‌ ಬೊತ್ತತೆ; ನಾನ್‌ ನೀಕ್‌ ಎದೆತಟ್ಟ್‌ ಆಯಿತ್‌ಪ್ಪಿ. ನೀಡ ಬಹುಮಾನ ಬಲ್ಯದಾಯಿತ್‌ಪ್ಪಾಂದ್‌ ಎಣ್ಣ್‌ಚಿ. 2 ಅದ್‌ಂಗ್‌ ಅಬ್ರಾಮ: ಓ ಯೆಹೋವನಾನ ದೇವನೇ, ನಾಕ್‍ ಎಂತ ತಪ್ಪಿಯಾ? ನಾಕ್‍ ಮಕ್ಕ ಇಲ್ಲತೆ ಉಂಡಲ್ಲಾ? ನಾಡ ಆಸ್ತಿಯೆಲ್ಲ ನಾಡ ಮನೆರ ಆಳಾನ ದಮಸ್ಕ ಊರ್‌ಕ್‌ ಕೂಡ್‌ನ ಎಲೀಯೆಜರಂಗ್‌ ಪಾಲ್‌ ಆಪಲ್ಲಾಂದ್‌ ಎಣ್ಣ್‌ಚಿ. 3 ಇಂಞು ಅಬ್ರಾಮ: ನೀನ್‌ ನಾಕ್‍ ಸಂತಾನತ್‌ನ ತಂದಿತ್‌ಲ್ಲೆ; ನಾಡ ಮೆನೆಲ್‌ ಪುಟ್ಟ್‌ನ ಒರ್‌ ಆಳ್‌ ನಾಡ ಆಸ್ತಿಕ್‌ ಬಾದ್ಯಸ್ತನಾಪ್ಪಾಂದ್‌ ಅಬ್ರಾಮ ಎಣ್ಣ್‌ಚಿ. 4 ಅಕ್ಕ ಯೆಹೋವಂಡ ತಕ್ಕ್‌ ಅಂವೊಂಗ್ ಬಂದಿತ್: ನೀಡ ಆಳ್‌ ನೀಕ್‌ ಬಾದ್ಯಸ್ತನಾಪುಲೆ, ನೀಡ ಪೊಟ್ಟೆಲ್‌ ಪುಟ್ಟ್‌ವಂವೊನೇ ನೀಕ್‌ ಬಾದ್ಯಸ್ತನಾಪ್ಪಾಂದ್‌ ಎಣ್ಣ್‌ಚಿ. 5 ದೇವ ಅಬ್ರಾಮನ ಪೊರಮೆ ಕಾಕಿಯಂಡ್‌ ಬಂದಿತ್: ಬಾನತ್‍ನ ನೋಟ್, ಅಲ್ಲಿ ಉಳ್ಳ ಬಾನತ್‌ ಮೀನ್ನ ಲೆಕ್ಕ ಮಾಡುವಕ್‌ ನೀಕ್‌ ಕಯ್ಯುವದಾಚೇಂಗಿ ನೀನ್‌ ಲೆಕ್ಕಮಾಡ್; ನೀಡ ಸಂತಾನವು ಇನ್ನನೆ ಇಪ್ಪಾಂದ್‌ ಎಣ್ಣ್‌ಚಿ. 6 ಅಬ್ರಾಮ ಯೆಹೋವನ ನಂಬ್‌ಚಿ; ಯೆಹೋವ ಅಂವೊಂಡ ನಂಬಿಕೆನ ನೋಟಿತ್‌ ಅಂವೊನ ನೀತಿವಂತಂವೋಂದ್‌ ಲೆಕ್ಕ ಮಾಡ್‌ಚಿ. 7 ಇಂಞು ಅಂವೊ ಅಬ್ರಾಮಂಗ್: ಈ ದೇಶತ್‌ನ ನೀಕ್‌ ತಪ್ಪಕಾಯಿತ್, ನಿನ್ನ ಊರ್‌ ಎಣ್ಣುವ ಕಲ್ದೀಯರ ಪಟ್ಟಣತ್‌ಂಜ ಕಾಕಿಯಂಡ್‌ ಬಂದ ಯೆಹೋವ ನಾನೇಂದ್‌ ಎಣ್ಣ್‌ಚಿ. 8 ಆಚೇಂಗಿ ಅಬ್ರಾಮ: ಓ ಯೆಹೋವಾನಾನ ಯೆಹೋವನೇ, ನಾನೇ ಇದ್‌ಂಗ್‌ ಬಾದ್ಯಸ್ತನಾಪೀಂದ್‌ ನಾಕ್‍ ಎನ್ನನೆ ಗೊತ್ತಾಪಾಂದ್‌ ಕ್‍ೕಟತ್. 9 ಅದ್‌ಂಗ್‌ ಯೆಹೋವ ಅಬ್ರಾಮಂಗ್: ನೀನ್‌ ಮೂಂದ್‌ ವಯಸ್ಸ್‌ರ ಕಡ್‌ಚಿ, ಮೂಂದ್‌ ವಯಸ್ಸ್‌ರ ಪೊಣ್ಣಾಡ್, ಮೂಂದ್‌ ವಯಸ್ಸ್‌ರ ಟಗರ್, ಮೂಂದ್‌ ವಯಸ್ಸ್‌ರ ಬೆಳವಕ್ಕಿನ ಪಿಂಞ ಮರಿ ಪಾರಿವಾಳತ್‌ನ ನಾಡ ಪಕ್ಕ ಎಡ್‌ತಂಡ್‌ ಬಾಂದ್‌ ಎಣ್ಣ್‌ಚಿ. 10 ಅಬ್ರಾಮ ಇದ್‌ನೆಲ್ಲ ಕೊಂಡ ಬಂದಿತ್ ಪ್ರತಿಯೊಂದನ ದಂಡ್‌ ತುಂಡ್‌ ಮಾಡಿತ್, ಒಂದಂಡ ವಿರುದ್ದ ಇಂಞೊಂದನ ಬೆಚ್ಚಿತ್‌ ಅಟ್ಟ್‌ಚಿ. ಆಚೇಂಗಿ ಪಕ್ಷಿಯಳ ತುಂಡ್‌ ಮಾಡಿತ್‌ಲ್ಲೆ. 11 ಅಲ್ಲಿ ಚಾವ್‌ ತಡಿನ ತಿಂಬಕ್‌ ಪದ್ದ್‌ವ ಪಾರಿಯಂಡ್‌ ಬಪ್ಪಕ ಅಬ್ರಾಮ ಅದನೆಲ್ಲಾ ಓಡಿಚಿಟ್ಟತ್. 12 ಬಯಿಟ್ ಆಯಂಡ್‌ ಬಪ್ಪಕ ಅಬ್ರಾಮಂಗ್ ನಲ್ಲ ವರ್‌ಕ್‌ ಪತ್ತ್‌ಚಿ. ಬಲ್ಯ ಇರ್‌ಟ್ ಅಂವೊನ ಮುಚ್ಚುವಕ ಅಂವೊಂಗ್ ದುಂಬ ಪೋಡಿಯಾಚಿ. 13 ಅಕ್ಕ ಯೆಹೋವ ಅಂವೊಂಗ್: ನೀಡ ಸಂತಾನ ಅನ್ಯ ದೇಶತ್‌ಲ್‌ ಪರದೇಶಿಯಾಯಿತ್‌ ಇಂಜಿತ್, ಆ ದೇಶತ್‌ರ ಜನಕ್‌ ಅಡಿಯಾಳಾಯಿತ್‌ ಇಪ್ಪಾಂದು, ಅಯಿಂಗಡಿಂಜ ನಾನ್ನೂರ್‌ ಕಾಲ ದುಂಬ ಕಷ್ಟಪಡುವಾಂದು ನೀನ್‌ ಚಾಯಿತೆ ಅರಿಯಂಡು. 14 ಈಂಗ ಅಡಿಯಾಳಾಯಿತ್‌ ಇಪ್ಪ ದೇಶತ್‌ನ ನಾನ್‌ ನ್ಯಾಯತೀರ್‌ಪ್‌ ಮಾಡುವಿ; ಪಿಂಞ ಅಯಿಂಗ ದುಂಬ ಆಸ್ತಿ ಉಳ್ಳಯಿಂಗಳಾಯಿತ್‌ ಅಲ್ಲಿಂಜ ಪೊರಮೆ ಬಪ್ಪ. 15 ಆಚೇಂಗಿ ನೀನ್‌ ಸಮಾದಾನತ್‌ಲ್‌ ನೀಡ ಮುತ್ತಜ್ಜಂಗಡ ಪಕ್ಕ ಪೋಪಿಯ. ಪಣ್ಣ್‌ ಮುದುಕ ಆನ ಪಿಂಞ ನಿನ್ನ ಪೂಪ. 16 ನೀಡ ಸಂತಾನತ್‌ರ ನಾಲನೆ ವಂಶತ್‌ರಯಿಂಗ ಈ ಜಾಗಕ್‌ ತಿರಿತ್‌ ಬಪ್ಪ; ಎನ್ನಂಗೆಣ್ಣ್‌ಚೇಂಗಿ ಅಮೋರಿಯಂಗಡ ದುಷ್ಟತನ ಇಂಞು ಪೂರ್ತಿ ಆಯಿತ್‌ಲ್ಲೇಂದ್‌ ಎಣ್ಣ್‌ಚಿ. 17 ಸೂರ್ಯ ಮುಳ್‌ಗಿತ್‌ ಇರ್‌ಟ್ ಆನಪಿಂಞ, ಪೊಗೆಯಾಡಿಯಂಡಿಂಜ ಒಲೆಯು, ತಿತ್ತ್‌ ಕತ್ತಿಯಂಡಿಂಜ ತೂಡು ಅಟ್ಟಿತ್‌ಂಜ ಯರ್ಚಿ ತುಂಡ್‌ರ ಮದ್ಯತ್‌ ಬಪ್ಪದ್‌ನ ಅಬ್ರಾಮ ಕಂಡತ್. 18 ಅನ್ನನೆ ಆ ದಿವಸತ್‌ಲ್‌ ಯೆಹೋವ ಅಮ್ರಾಮಂಡ ಕೂಡೆ ಒಪ್ಪಂದ ಮಾಡಿತ್: ಐಗ್ತುಪ ದೇಶತ್‌ರ ಪೊಳೆಯಿಂಜ ಪುಡ್‌ಚಿತ್‌ ಯೂಫ್ರೇಟೀಸ್ ಬಲ್ಯ ಪೊಳೆಕತ್ತನೆಕ್‌ ಉಳ್ಳ ಎಲ್ಲಾನ ಪಿಂಞ 19 ಕೇನಿಯಂಗ, ಕೆನಿಜೀಯಂಗ, ಕದ್ಮೋನಿಯಂಗ, 20 ಹಿತ್ತಿಯಂಗ, ಪೆರಿಜೀಯಂಗ, ರೆಫಾಯಂಗ, 21 ಅಮೋರಿಯಂಗ, ಕಾನಾನ್ಯಯಂಗ ಗಿರ್‌ಗಾಷಿಯಂಗ ಯೆಬೂಸಿಯಂಗೆಲ್ಲಾ ವಾಸಮಾಡಿಯಂಡುಳ್ಳ ದೇಶತ್‌ನ ಕೊಡ್‌ತಿತುಳ್‍ೕಂದ್‌ ಎಣ್ಣ್‌ಚಿ. |
© 2017, New Life Literature (NLL)