ಆದ್ಯತ್‌ರ ಪುಸ್ತಕ 14 - ಕೊಡವ ಬೈಬಲ್ಆಬ್ರಾಮ ಲೋಟನ ಕಾಪ್ಪಾಡ್‌ನದ್‌ 1 ಶಿನಾರ್‌ಕ್‌ ರಾಜನಾಯಿತ್‌ಂಜ ಅಮ್ರಾಫೆಲನು, ಎಲ್ಲಜಾರ್‌ಕ್‌ ರಾಜನಾಯಿತ್‌ಂಜ ಅರಿಯೋಕನು, ಎಲಾಮ್ರ ರಾಜನಾನ ಕೆದೊರ್ಲಗೋಮರನು, ಗೋಯಿಮ್ರ ರಾಜನಾನ ತಿದ್ಗಾಲನು ಇಂಜ ದಿವಸತ್‌ಲ್, 2-3 ಈ ನಾಲ್‌ ರಾಜಂಗಳು ಇಕ್ಕ ಉಪ್ಪ್‌ರ ಕಡಲ್‌ ಆಯಿತುಳ್ಳ ಸಿದ್ದೀಮ್‌ ತಗ್ಗ್‌ಲ್‌ ಕೂಡ್‌ನ ಸೊದೋಮ್ರ ರಾಜನಾನ ಬೆರಗ, ಗೊಮೋರ್‌ ರಾಜನಾನ ಬಿರ್ಶಗ, ಅದ್ಮಾಹದರ ರಾಜನಾನ ಶಿನಾಬ, ಚೆಬೋಯೀಮಿನ ರಾಜನಾನ ಶೆಮೇಬರ, ಬೇಲಗಿರ ಎಣ್ಣ್‌ಚೇಂಗಿ ಚೋಗರಂಡ ರಾಜ, ಈಂಗಡ ಕೂಡೆ ಯುದ್ದ ಮಾಡ್‌ಚಿ. 4 ಇದಂಡ ಮಿಂಞ ಈಂಗ ಪನ್ನೆರಂಡ್‌ ಕಾಲ ಕೆದೊರ್ಲಗೋಮರಂಗ್‌ ಸೇವೆ ಮಾಡಿತ್, ಪದಿಮೂಂದನೆ ಕಾಲತ್‌ಲ್‌ ತಿರುಗಿ ಬುದ್ದತ್. 5 ಪದಿನಾಲನೆ ಕಾಲತ್‌ಲ್‌ ಕೆದೊರ್ಲಗೊಮೋರ ಪಿಂಞ ಅಂವೊಂಡ ಕೂಡೆ ಕೂಡಿತ್‌ಂಜ ರಾಜಂಗ ಬಂದಿತ್‌ ಅಷ್ಟರೋತ್‌ ಕರ್‌ನಯಿಮಿಲ್‌ಲ್‌ ಇಂಜ ರೆಫಾಯರಂಗಳ, ಹಾಮಿಲ್‌ಲ್‌ ಇಂಜ ಜೂಜ್ಯರನ, ಶಾವೆಕಿರ್ಯಾತಯಿಮಿಲ್‌ಲ್‌ ಇಂಜ ಏಮಿಯರಳ ಚೋಪ್ಚಿಟ್ಟಿತ್. 6 ಇದಲ್ಲತೆ ಸೇಯಿ ಎಣ್ಣುವ ಕುಂದಲ್‌ ವಾಸ ಮಾಡಿಯಂಡಿಂಜ ಹೋರಿ ಎಣ್ಣುವ ಜನಳ, ಅಲ್ಲಿಯೇ ಚೋಪ್ಚಿಟ್ಟಿತ್ ಮಣಬೂಮಿರ ಪಕ್ಕತ್‌ಲುಳ್ಳ ಏಲ್ಪಾರಾಕತ್ತನೆ ಓಡಿಚಿಟ್ಟತ್. 7 ಅಲ್ಲಿಂಜ ಅಯಿಂಗ ತಿರಿತ್‌ ಬಪ್ಪಕ ಕಾದೇಶ್‍ ಎಣ್ಣುವ ಎನ್ಮಿಷ್ಪಾಟಿಕ್‌ ಬಂತ್‌ ಅಮಾಲೇಕ್ಯಂಗಡ ಎಲ್ಲಾ ದೇಶತ್‌ನ, ಹಚಚೋನ್‌ ತಾಮರ್‌ಲ್‌ ವಾಸ ಮಾಡಿಯಡಿಂಜ ಅಮೋರಿಯರ ಸಹ ಗೆದ್ದತ್. 8 ಅಕ್ಕ ಸೊದೋಮಂಡ ರಾಜನು, ಗೋಮರಂಡ ರಾಜನು, ಅದ್ಮಾಹಂಡ ರಾಜನು, ಚೆಬೋಯಿಮಂಡ ರಾಜನು, ಚೋಗರ್‌ ಎಣ್ಣುವ ಬೇಲಗ್‌ಂಡ ರಾಜನು ಪೊರ್ಟಿತ್ ಸಿದ್ದೀಮ್‌ ತಗ್ಗ್‌ಲ್‌ ಯದ್ದ ಮಾಡ್‌ಚಿ. 9 ಏಲಾಮಿರ ರಾಜನಾನ ಕೆದೊರ್ಲಗೋಮರ್‌ಂಡ ಕೂಡೆಯು, ಗೋಯಮ್ರ ರಾಜನಾನ ತಿದ್ಗಾಲಂಡ ಕೂಡೆಯು, ಶಿನಾರಿರ ರಾಜನಾನ ಅಮ್ರಾಫೆಲಂಡ ಕೂಡೆಯು, ಎಲ್ಲಸಾರಿರ ರಾಜನಾನ ಅರಿಯೋಕಂಡ ಕೂಡೆಯು ಯುದ್ದ ಮಾಡುವಕ್‌ ಪೊರ್ಟಿತ್, ಆ ಅಂಜ್ ರಾಜಂಗಡ ಕೂಡೆ ಈ ನಾಲ್‌ ರಾಜಂಗ ಯುದ್ದ ಮಾಡ್‌ಚಿ. 10 ಆಚೇಂಗಿ ಸಿದ್ದೀಮ್‌ ತಗ್ಗ್‌ಲ್‌ ತಾರ್‌ರ ಗುಂಡಿ ದುಂಬ್‌ನದಾಯಿತ್‌ಂಜತ್. ಸೊದೋಮ್‌ ಗೊಮೋರತ್‌ರ ರಾಜಂಗ ಓಡಿ ಪೋಪಕ ಚೆನ್ನ ಜನ ಆ ಗುಂಡಿರ ಒಳಕ್‌ ಬುದ್ದಿತ್‌ ಚತ್ತತ್. ಬಾಕಿವುಳ್ಳಯಿಂಗ ಕುಂದ್‌ಕ್‌ ಓಡಿ ಪೋಚಿ. 11 ಬಯ್ಯ ಗೆದ್ದಯಿಂಗ ಸೊದೋಮ್‌ ಪಿಂಞ ಗೊಮೋರ ಪಟ್ಟಣತ್‌ಲ್‌ ಇಂಜ ಎಲ್ಲಾ ಆಸ್ತಿನ ಪಿಂಞ ಬೊಳೆನೆಲ್ಲ ಎಡ್‌ತಂಡ್‌ ಪೋಚಿ. 12 ಅಮ್ರಾಮಂಡ ತಮ್ಮಣಂಡ ಮೋಂವೊನಾನ ಲೋಟ ಸೊದೋಮ್‌ಲ್‌ ವಾಸಮಾಡಿಯಂಡಿಂಜನಗುಂಡ್, ಅಂವೊಂನ, ಅಂವೊಂಡ ಆಸ್ತಿನ ಸಹ ಎಡ್‌ತಂಡ್‌ ಪೋಚಿ. 13 ಅಯಿಂಗಡಲ್ಲಿ ತಪ್ಪ್‌ಚಿಟ್ಟ ಒಬ್ಬ ಇಬ್ರಿಯನಾನ ಅಮ್ರಾಮಂಡ ಪಕ್ಕ ಬಂದಿತ್‌ ಇದ್‌ನ ಎಣ್ಣ್‌ಚಿ. ಅಕ್ಕ ಅಬ್ರಾಮ ಅಮೋರಿಯನಾನ ಮಮ್ರೆಯಂಡ ತೋಪ್ರ ಪಕ್ಕತ್‌ಲ್‌ ವಾಸಮಾಡಿಯಂಡಿಂಜತ್. ಮಮ್ರೆಯಂಗ್‌ ಎಷ್ಕೋಲ ಪಿಂಞ ಆನೇರ ಎಣ್ಣುವ ಬೆಂದ್‌ಕ ಇಂಜತ್. ಈ ದಂಡಾಳ್‌ಕು ಅಬ್ರಾಮಂಗು ಒಪ್ಪಂದ ಇಂಜತ್. 14 ಅಬ್ರಾಮಂಗ್ ತಾಂಡ ತಮ್ಮಣಂಡ ಮೋಂವೊನಾನ ಲೋಟನ ಪುಡಿಚಿತ್‍ೕಂದ್‌ ಗೊತ್ತಾನ ಪಿಂಞ ತಾಂಡ ಮನೆಲ್ಲೇ ಪುಟ್ಟಿ ಬೊಳ್‌ಂದ ಯುದ್ದ ಮಾಡುವಕ್ಕುಳ್ಳ ಮುನ್ನೂಟ್ಯ ಪದ್‌ನೆಟ್ಟ್‌ ಜನಡ ಪಡೆನ ತಯಾರ್‌ ಮಾಡಿತ್, ಅಯಿಂಗ ಪೊರ್ಟಿತ್ ಆ ರಾಜಂಗಳ ದಾನೂರ್‌ಕತ್ತನೆಕೆ ಓಡಿಚಿಟ್ಟಂಡ್‌ ಪೋಚಿ. 15 ಬಯಿಟ್ ನೇರತ್‌ಲ್‌ ಅಂವೊನ ಪಿಂಞ ಅಂವೊಂಡ ಸೇವಕಂಗಳ ಬೋರೆ ಬೋರೆ ಗುಂಪಾಯಿತ್‌ ಮಾಡಿತ್ ಎಲ್ಲಾ ದಿಕ್ಕ್‌ಯಿಂಜ ಆಕ್ರಮಣ ಮಾಡ್‌ಚಿ. ಅಯಿಂಗಳ ದಮಸ್ಕ ಪಟ್ಟಣತ್‌ರ ಬಡಕ್‌ ದಿಕ್ಕ್‌ಲ್‌ ಉಳ್ಳ ಹೋಬಾ ಊರ್‌ಕತ್ತನೆ ದೌತಿಯಂಡ್‌ ಪೋಚಿ. 16 ಅಬ್ರಾಮ ಎಲ್ಲಾ ಸಾಮಾನ್‌ತ್‌ನ ಪುನಃ ಎಡ್‌ತಂಡ್‌ ಬಾತ್. ತಾಂಡ ತಮ್ಮಣಂಡ ಮೋಂವೊನಾನ ಲೋಟನ, ಅಂವೊಂಡ ಆಸ್ತಿನ, ಪೊಣ್ಣಾಳ್‌ವಳ ಪಿಂಞ ಬೋರೆ ಜನಳ ಸಹ ಪುನಃ ಕೂಟಿಯಂಡ್‌ ಬಾತ್. ಮೆಲ್ಕೀಚೆದೆಕ ಅಬ್ರಾಮನ ಆಶೀರ್ವಾದ ಮಾಡ್‌ವದ್‌ 17 ಅಬ್ರಾಮ ಕೆದೊರ್ಲಗೋಮರನ, ಅಂವೊಂಡ ಕೂಡೆ ಇಂಜ ರಾಜಂಗಳ ಚೋಪ್ಚಿಟ್ಟಿತ್ ವಾಪಸ್ ಬಪ್ಪಕ, ಸೊದೋಮ್ರ ರಾಜ ಪೊರ್ಟಿತ್, ರಾಜಂಡ ಯಾರೆ ಎಣ್ಣುವ ಶಾವೆ ಯಾರೆರಕತ್ತನೆ ಅಬ್ರಾಮನ ಕಾಂಬಕಾಯಿತ್‌ ಪೋಚಿ. 18 ಉನ್ನತವಾನ ದೇವಡ ಯಾಜಕನಾಯಿತ್‌ಂಜ ಸಾಲೇಮಿರ ರಾಜನಾನ ಮೆಲ್ಕೀಚೆದೆಕ ಸಹ ಒಟ್ಟಿನ ಪಿಂಞ ದ್ರಾಕ್ಷಿರಸತ್‌ನ ಅಬ್ರಾಮಂಗ್ ಕೊಂಡಬಾತ್. 19 ಅಂವೊ ಅಬ್ರಾಮಂಗ್: ಬಾನ ಬೂಮಿ ಉಂಟ್‌ಮಾಡ್‌ನ ಉನ್ನತವಾನ ದೇವಡ ಆಶೀರ್ವಾದ ಅಬ್ರಾಮಂಗ್ ಇರಡ್‍ೕಂದ್‌ ಆಶೀರ್ವಾದ ಮಾಡ್‌ಚಿ. 20 ನೀಡ ಶತ್‌ರುವಳ ನೀಡ ಕೈಕ್‌ ಒಪ್ಪ್‌ಚಿಟ್ಟ ಉನ್ನತವಾನ ದೇವಂಗ್‌ ಸ್ತೋತ್‌ರಾಂದ್‌ ಎಣ್ಣ್‌ಚಿ. ಅಲ್ಲಿಂಜ ಅಬ್ರಾಮ ತಾನ್‌ ಗೆದ್ದಿತ್‌ ಕೊಂಡಬಂದ ಎಲ್ಲಾ ಸಾಮಾನತ್‌ಲ್‌ ಪತ್ತ್‌ಲ್‌ ಒರ್‌ ಬಾಗತ್‌ನ ಅಂವೊಂಗ್‌ ಕೊಡ್‌ತತ್. 21 ಸೊದೋಮ್ರ ರಾಜ ಅಬ್ರಾಮಂಗ್: ನೀನ್‌ ಸೆರೆಪುಡ್‌ಚ ಜನಳ ನಾಕ್‍ ಒಪ್ಪ್‌ಚಿಡ್. ನೀನ್‌ ಕೊಂಡಬಂದ ಆಸ್ತಿನ ನೀನೆ ಬೆಚ್ಚಾಂದ್‌ ಎಣ್ಣ್‌ಚಿ. 22-23 ಅದ್‌ಂಗ್‌ ಅಬ್ರಾಮ ಸೊದೋಮ್ರ ರಾಜಂಗ್: ಅಬ್ರಾಮನ ಐಶ್ವರ್ಯವಂತಂವೊನಾಯಿತ್‌ ಮಾಡಿಯೇಂದ್‌ ನೀನ್‌ ಎಣ್ಣತನೆಕೆ ನಾನ್‌ ಒರ್‌ ನೂಲ್‌ನ ಆಡ್, ಎಕ್ಕಡತ್‌ರ ಬಾರನ್ನಾಡ್‌ ನೀಕ್‌ ಉಳ್ಳ ಒಂದ್‌ನ ಸಹ ನಾನ್‌ ಎಡ್‌ಪುಲೇಂದು, ಬಾನ ಬೂಮಿನ ಉಂಟ್ ಮಾಡ್‌ನ ಉನ್ನತವಾನ ದೇವನಾನ ಯೆಹೋವಂಡ ಕಡೆಕ್‌ ನಾಡ ಕೈಯಿನ ಎಡ್‌ತಿತ್‌ ಪ್ರಮಾಣ ಮಾಡಿಯೆ. 24 ಈ ಆಳ್‌ವ ತಿಂದಾನ ಬುಟ್ಟಿತ್‌ ನಾಕ್‍ ಒಂದು ಬೋಂಡ. ಆಚೇಂಗಿ, ನಾಡ ಕೂಡೆ ಬಂದ ಆನೇರ, ಎಷ್ಕೋಲ ಮಮ್ರೆಯಂಗಕ್‌ ಬಂದ ಪಾಲ್‌ನ ಅಯಿಂಗಕ್‌ ಕೊಡ್‌ತ್‌ರ್‌ಂದ್‌ ಎಣ್ಣ್‌ಚಿ. |
© 2017, New Life Literature (NLL)