ಆದ್ಯತ್‌ರ ಪುಸ್ತಕ 13 - ಕೊಡವ ಬೈಬಲ್ಆಬ್ರಾಮಾ ಪಿಂಞ ಲೋಟ ಬೋರೆ ಬೋರೆ ಜಾಗತ್‌ನ ಗೊತ್ಮಾಡ್‌ನದ್‌ 1 ಅಲ್ಲಿಂಜ ಅಬ್ರಾಮ ತಾಂಡ ಪೊಣ್ಣ್‌ನ, ಅಂವೊಂಗ್‌ ಇಂಜ ಎಲ್ಲಾನ ಪಿಂಞ ಅಂವೊಂಡ ಕೂಡೆ ಲೋಟನ ಕಾಕಿಯಂಡ್‌ ಐಗುಪ್ತ ದೇಶತ್‌ನ ಬುಟ್ಟಿತ್‌ ನೆಗೆವ್‌ ಪ್ರಾಂತ್ಯಕ್‌ ಪೋಚಿ. 2 ಇಕ್ಕ ಅಬ್ರಾಮ ದುಂಬ ಐಶ್ವರ್ಯವಂತಂವೊನಾಯಿತ್‌ಂಜಿತ್, ಅಂವೊಂಗ್‌ ಎತ್ತ್‌ಕಡ್‌ಚಿಯ, ಬೊಳ್ಳಿ ಪಿಂಞ ಪೊನ್ನ್‌ ಇಂಜತ್. 3 ಅಂವೊ ನೆಗೆವ್‌ ಊರ್‌ನ ಬುಟ್ಟಿತ್‌ ಒರ್‌ ಜಾಗತ್‌ಂಜ ಇಂಞೊರ್‌ ಜಾಗಕ್‌ ಪೋಯಂಡ್‌ ಬೇತೇಲ್ಕತ್ತನೆ, ಮಿಂಞ ಬೇತೇಲ್ಕು ಆಯಿಕ್‌ ಮದ್ಯತ್‌ಲ್‌ ಇಂಜ ಗುಡಾರಕ್‌ ಬಾತ್. 4 ಮಿಂಞ ಅಲ್ಲಿಯೇ ಅಬ್ರಾಮ ಯೆಹೋವಂಗ್‌ ಬಲಿಪೀಠ ಕೆಟ್ಟಿತ್‌ಂಜತ್. ಇಕ್ಕ ಅಬ್ರಾಮ ಪುನಃ ದೇವಡ ಪೆದ ಎಣ್ಣಿತ್‌ ಆರಾದನೆ ಮಾಡ್‌ಚಿ. 5 ಅಮ್ರಾಮಂಡ ಕೂಡೆ ಪ್ರಯಾಣ ಮಾಡಿಯಂಡಿಂಜ ಲೋಟಂಗ್ ಸಹ, ಬೋಂಡ್‌ಯಚ್ಚಕ್‌ ಕೊರಿ ಎತ್ತ್‌ಕಡ್‌ಚಿಯ ಪಿಂಞ ಗುಡಾರ ಇಂಜತ್. 6 ಆಚೇಂಗಿ ಅಯಿಂಗ ದಂಡಾಳ್‌ರ ಆಸ್ತಿ ದುಂಬ ಇಂಜನಗುಂಡ್‌ ಅಯಿಂಗ ದಂಡಾಳು ಒಕ್ಕಚೆ ವಾಸ ಮಾಡ್‌ವಕ್‌ ಜಾಗ ಪೋರತೆ ಆಚಿ. 7 ಇದ್‌ನಗುಂಡ್‌ ಅಮ್ರಾಮಂಡ ಎತ್ತ್‌ ಕಾಪಯಿಂಗಕು ಲೋಟಂಡ ಎತ್ತ್‌ ಕಾಪಾಯಿಂಗಕು ತಕರಾರ್‌ ಸುರು ಆಚಿ. ಇದ್‌ಲ್ಲತೆ ಆ ಕಾಲತ್‌ಲ್‌ ಕಾನಾನ್ಯರ ಜನ ಪಿಂಞ ಪರಿಜೀಯರಯಿಂಗ ಆ ದೇಶತ್‌ಲ್‌ ವಾಸಮಾಡಿಯಂಡಿಂಜತ್. 8 ಆನಗುಂಡ್‌ ಅಬ್ರಾಮ ಲೋಟಂಗ್: ನಾಕು ನೀಕು, ನಾಡ ಎತ್ತ್‌ ಕಾಪಯಿಂಗಕು ನೀಡ ಎತ್ತ್‌ ಕಾಪಯಿಂಗಕು ತಕರಾರ್‌ ಬೋಂಡ. ಎಚ್ಚಕಾಚೇಂಗಿಯು ನಂಗ ಬೆಂದ್‌ಕ ಅಲ್ಲ! 9 ಈ ಊರ್‌ ಎಲ್ಲಾ ನೀಡ ಮಿಂಞತ್‌ಲ್‌ ಉಂಡಲ್ಲ? ನಂಗ ಬೋರೆ ಬೋರೆ ಪೋಕನ. ನೀನ್‌ ಎಡ್‌ತ್‌ ಬರಿ ಪೋಚೇಂಗಿ ನಾನ್‌ ಬಲ್‌ತ್‌ ಬರಿಕ್‌ ಪೋಪಿ. ನೀನ್‌ ಬಲ್‌ತ್‌ ಬರಿ ಪೋಚೇಂಗಿ ನಾನ್‌ ಎಡ್‌ತ್‌ ಬರಿಕ್‌ ಪೋಪೀಂದ್‌ ಎಣ್ಣ್‌ಚಿ. 10 ಲೋಟ ಕಣ್ಣೆಡ್‌ತಿತ್‌ ನೋಟ್‌ವಕ ಯೋರ್ದನ್‌ ಯಾರೆಯಿಂಜ ಚೋಗರ್‌ ಎಣ್ಣುವ ಊರ್‌ಕ್‌ ಪೋಪ ಬಟ್ಟೆಕತ್ತನೆ ಫಲವತ್ತಾನ ಜಾಗಾಂದ್‌ ಕಂಡತ್. ಇದ್‌ ಯೆಹೋವ ಸೊದೋಮ್‌ ಪಿಂಞ ಗೊಮೋರ ಪಟ್ಟಣತ್‌ನ ನಾಶಮಾಡುವಕ್‌ ಮಿಂಞ ಯೆಹೋವಂಡ ತೋಟತ್‌ರನಕೆಯು, ಐಗುಪ್ತ ದೇಶತ್‌ರನೆಕೆಯು ಇಂಜತ್. 11 ಆನಗುಂಡ್‌ ಲೋಟ ಯೊರ್ದನ್‌ ಯಾರೆನ ತ್‍ೕರ ಆರಿಚಿಟ್ಟಂಡ್‌ ಕ್‍ೕಕ್‌ ದಿಕ್ಕ್‌ಲ್‌ ಪೊರ್‌ಟಿತ್‌ ಪೋಚಿ. ಇನ್ನನೆ ಅಯಿಂಗ ಬೋರೆ ಬೋರೆಯಾಯಿತ್‌ ಪೋಚಿ. 12 ಅಬ್ರಾಮ ಕಾನಾನ್‌ ದೇಶತ್‌ಲ್‌ ಒಳ್‌ಂಜತ್; ಲೋಟ ಯೊರ್ದನ್‌ ಪಕ್ಕತ್‌ಲುಳ್ಳ ಯಾರೆನ್‌ಲ್‌ ಉಳ್ಳ ಚೆನ್ನ ಪಟ್ಟಣತ್‌ಲ್‌ ವಾಸ ಮಾಡಿತ್‌ ಸೋದೋಮ್‌ ಪಟ್ಟಣಕ್‌ ಪೋಪ ಬಟ್ಟೆಲ್‌ ಗುಡಾರ ಇಟ್ಟತ್. 13 ಆಚೇಂಗಿ ಸೊದೋಮ್‌ ಪಟ್ಟಣತ್‌ರ ಜನ ಯೆಹೋವಂಡ ಮಿಂಞತ್‌ ಬಾರಿ ದುಷ್ಟಂಗಳು ಪಿಂಞ ಪಾಪ ಮಾಡುವಯಿಂಗಳಾಯಿತ್‌ಂಜತ್. 14 ಲೋಟ ಅಬ್ರಾಮನ ಬುಟ್ಟಿತ್‌ ಪೋನ ಪಿಂಞ, ಯೆಹೋವ ಅಬ್ರಾಮಂಗ್: ನೀನ್‌ ಉಳ್ಳ ಜಾಗತ್‌ಂಜ ನೀಕ್‌ ಕಣ್ಣೆಟ್ಟುವ ಜಾಗಕತ್ತನೆ ಬಡಕ್, ತೆಕ್ಕ್, ಕ್‍ೕಕ್‌ ಪಿಂಞ ಪಡ್‌ಞಾರ್‌ ದಿಕ್ಕ್‌ಲ್‌ ಕಣ್ಣೆಡ್‌ತಿತ್‌ ನೋಟ್. 15 ನೀನ್‌ ನೋಟ್‌ವ ಈ ಬೂಮಿನೆಲ್ಲಾ ನಾನ್‌ ನೀಕು ನೀಡ ಸಂತಾನಕ್‌ ಕಾಲಕಾಲಕ್‌ ಇಪ್ಪನೆಕೆ ತಪ್ಪಿ. 16 ನೀಡ ಸಂತಾನತ್‌ನ ಬೂಮಿರ ದೂಳ್‌ರಚ್ಚಕ್‌ ಬಲ್ಯದ್‌ ಮಾಡುವಿ. ಒಬ್ಬಂಗ್‌ ಬೂಮಿರ ದೂಳ್‌ನ ಲೆಕ್ಕ ಮಾಡುವಕ್‌ ಕಯ್ಯುವದಾಚೇಂಗಿ, ನೀಡ ಸಂತಾನತ್‌ನ ಸಹ ಲೆಕ್ಕ ಮಾಡುವಕ್‌ ಕಯ್ಯು. 17 ನೀನ್‌ ಎದ್ದಿತ್, ಈ ದೇಶತ್‌ರ ಉದ್ದಕು ಅಗಲಕು ನಡಪಿಯ; ನಾನ್‌ ಅದ್‌ನ ನೀಕ್‌ ತಪ್ಪೀಂದ್‌ ಎಣ್ಣ್‌ಚಿ. 18 ಪಿಂಞ ಅಬ್ರಾಮ ತಾಂಡ ಗುಡಾರತ್‌ನ ಹೆಬ್ರೋನ್‌ಲ್‌ ಉಳ್ಳ ಮಮ್ರೆಯಂಡ ತೋಪ್ರ ಪಕ್ಕತ್‌ಲ್‌ ಇಟ್ಟಿತ್, ಯೆಹೋವಂಗ್‌ ಅಲ್ಲಿ ಓರ್‌ ಬಲಿಪೀಠತ್‌ನ ಕೆಟ್ಟ್‌ಚಿ. |
© 2017, New Life Literature (NLL)