ಆದ್ಯತ್‌ರ ಪುಸ್ತಕ 11 - ಕೊಡವ ಬೈಬಲ್ಬಾಬೇಲ ಗೋಪುರ 1 ಒರ್‌ ಕಾಲತ್‌ಲ್‌ ಈ ಲೋಕತ್‌ಲ್‌ ಇಂಜ ಜನ ಎಲ್ಲಾರು ಒರೇ ಬಾಷೆನ ಪಿಂಞ ತಕ್ಕ್‌ನ ಪರಿಯುವಯಿಂಜತ್. 2 ಜನ ಕ್‍ೕಕ್‌ ದಿಕ್ಕ್‌ಯಿಂಜ ಪ್ರಯಾಣ ಮಾಡ್‌ವಕ ಶಿನಾರ್‌ ದೇಶತ್‌ರ ಯಾರೆನ ಕಂಡಿತ್‌ ಅಲ್ಲಿಯೇ ವಾಸ ಮಾಡ್‌ವಕ್‌ ಸುರು ಮಾಡ್‌ಚಿ. 3 ಅಕ್ಕ ಅಯಿಂಗ: ಬಾರಿ, ನಂಗ ಚಾಯಿತೆ ಚುಟ್ಟಿತ್‌ ಇಟ್ಟಿಗೆ ಮಾಡನಾಂದ್‌ ಅಯಿಂಗಡಡೆಲ್‌ ತಕ್ಕ್‌ ಪರ್ಂದತ್. (ಈ ಸೀಮೆಲ್‌ ಜನ ಕಲ್ಲ್‌ಕ್‌ ಬದ್‌ಲ್‌ ಇಟ್ಟಿಗೆಯು, ಒಕ್ಕಚೆ ಕೂಟಿ ಬೆಪ್ಪಕ್‌ ತಾರು ಉಪಯೋಗಿಚಿಡುವಯಿಂಜತ್.) 4 ಇಂಞು ಅಯಿಂಗ: ನಂಗ ಬೂಮಿರ ಮೇಲೆ ಚದುರಿ ಪೋಕತನೆಕೆ ಒರ್‌ ಪಟ್ಟಣತ್‌ನ ಕೆಟ್ಟನ, ಬಾನತ್‍ನ ಮುಟ್ಟ್‌ವಚ್ಚಕ್‌ ಒರ್‌ ಗೋಪುರತ್‌ನ ಕೆಟ್ಟಿತ್‌ ಬಲ್ಯ ಪೆದ ಎಡ್‌ಕನಾಂದ್‌ ತಕ್ಕ್‌ ಪರ್ಂದತ್. 5 ಆಚೇಂಗಿ ಯೆಹೋವ, ಮನುಷ್ಯಂಗ ಕೆಟ್ಟಿಯಂಡ್‌ ಇಂಜ ಆ ಪಟ್ಟಣ ಪಿಂಞ ಗೋಪುರತ್‌ನ ಕಾಂಬಕ್‌ ಇಳ್‌ಂಜಿ ಬಾತ್. 6 ಪಿಂಞ ಯೆಹೋವ: ನೋಟ್! ಈಂಗೆಲ್ಲಾ ಒರೇ ಜನವಾಯಿತ್‌ ಒರೇ ತಕ್ಕ್‌ ಪರ್‌ಂದಂಡ್‌ ಇದ್‌ನ ಮಾಡ್‌ವಕ್‌ ಸುರು ಮಾಡಿತುಂಡ್. ಇಂಞು, ಅಯಿಂಗ ಗೇನ ಮಾಡ್‌ನದ್‌ನ ಮಾಡವಕ್‌ ಅಯಿಂಗಕ್‌ ಅಸಾದ್ಯವಾನದ್‌ ಒಂದೂ ಇಪ್ಪುಲೆಂದ್‌ ಗೇನಮಾಡಿಯಂಡುಂಡ್. 7 ಬಾರಿ, ನಂಗ ಪೋಯಿತ್‌ ಅಯಿಂಗಡಲ್ಲಿ ಒಬ್ಬಂಡ ತಕ್ಕ್‌ ಇಂಞೊಬ್ಬಂಗ್‌ ಅರ್ತ ಆಕತನೆಕೆ ಅಯಿಂಗಡ ಬಾಷೆನ ತಾರಮಾರ ಮಾಡನಾಂದ್‌ ಎಣ್ಣ್‌ಚಿ. 8 ಅನ್ನನೆ ಮಾಡಿತ್, ಯೆಹೋವ ಅಯಿಂಗಳೆಲ್ಲ ಈ ಲೋಕತ್‌ರ ಎಲ್ಲಾ ಜಾಗತ್‌ಲ್‌ ಚದ್‍ರ್‍ಚಿಟ್ಟತ್. ಅಯಿಂಗ ಆ ಪಟ್ಟಣ ಕೆಟ್ಟ್‌ವದ್‌ನ ನಿಪ್ಪ್‌ಚಿಟ್ಟತ್. 9 ಈ ಲೋಕತ್‌ಲ್‌ ಇಂಜ ಬಾಷೆನ ಯೆಹೋವ ಅಲ್ಲಿ ತಾರಮಾರ ಮಾಡ್‍ನಗುಂಡ್, ಆ ಪಟ್ಟಣಕ್‌ ಬಾಬೆಲ್‍ೕಂದ್‌ ಪೆದ ಬಾತ್. ಯೆಹೋವ ಅಯಿಂಗಳೆಲ್ಲ ಈ ಲೋಕತ್‌ರ ಎಲ್ಲಾ ಜಾಗತ್‌ಲ್‌ ಚದ್‍ರ್‍ಚಿಟ್ಟತ್. ಶೇಮಂಡ ವಂಶಾವಳಿ 10 ಇದ್‌ ಶೇಮ್‌ಂಡ ವಂಶಾವಳಿ. ಜಲಪ್ರಳಯ ಉಂಟಾಯಿತ್‌ ದಂಡ್‌ ಕಾಲ ಆನ ಪಿಂಞ ಶೇಮ್‌ಕ್‌ ನೂರ್‌ ವಯಸ್ಸ್‌ ಇಪ್ಪಕ ಅರ್ಪಕ್ಷದ ಪುಟ್ಟ್‌ಚಿ. 11 ಅರ್ಪಕ್ಷದ ಪುಟ್ಟ್‌ನ ಪಿಂಞ ಶೇಮ್‌ ಇಂಞು ಅಂಞೂರ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್. 12 ಅರ್ಪಕ್ಷದಕ್‌ ನುಪ್ಪತಂಜಿ ವಯಸ್ಸ್‌ ಇಪ್ಪಕ ಶೆಲಹ ಪುಟ್ಟ್‌ಚಿ. 13 ಶೆಲಹ ಪುಟ್ಟ್‌ನ ಪಿಂಞ ಅರ್ಪಕ್ಷದ ಇಂಞು ನಾನೂಟ್ಯ ಮೂಂದ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್. 14 ಶೆಲಹಂಗ್‌ ನುಪ್ಪದ್‌ ವಯಸ್ಸ್‌ ಇಪ್ಪಕ ಎಬರ ಪುಟ್ಟ್‌ಚಿ. 15 ಎಬರ ಪುಟ್ಟ್‌ನ ಪಿಂಞ ಶೆಲಹ ಇಂಞು ನಾನೂಟ್ಯ ಮೂಂದ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್. 16 ಎಬರಂಗ್‌ ನುಪ್ಪದ್‌ ನಾಲ್‌ ವಯಸ್ಸ್‌ ಇಪ್ಪಕ ಪೆಲೆಗ ಪುಟ್ಟ್‌ಚಿ. 17 ಪೆಲೆಗ ಪುಟ್ಟ್‌ನ ಪಿಂಞ ಎಬರ ಇಂಞು ನಾನೂಟ್ಯ ನುಪ್ಪದ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್. 18 ಪೆಲೆಗಂಗ್‌ ನುಪ್ಪದ್‌ ವಯಸ್ಸ್‌ ಇಪ್ಪಕ ರೆಗೂವ ಪುಟ್ಟ್‌ಚಿ. 19 ರೆಗೂವ ಪುಟ್ಟ್‌ನ ಪಿಂಞ ಪೆಲೆಗ ಇಂಞು ಇರ್‌ನೂಟ್ಯ ಒಯಿಂಬದ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್. 20 ರೆಗೂವಂಗ್‌ ನುಪ್ಪದಂಡ್‌ ವಯಸ್ಸ್‌ ಇಪ್ಪಕ ಸೆರೂಗ ಪುಟ್ಟ್‌ಚಿ. 21 ಸೆರೂಗ ಪುಟ್ಟ್‌ನ ಪಿಂಞ ರೆಗೂವ ಇಂಞು ಇರ್‌ನೂಟ್ಯ ಏಳ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್. 22 ಸೆರೂಗಂಗ್‌ ನುಪ್ಪದ್‌ ವಯಸ್ಸ್‌ ಇಪ್ಪಕ ನಾಹೋರ ಪುಟ್ಟ್‌ಚಿ. 23 ನಾಹೋರ ಪುಟ್ಟ್‌ನ ಪಿಂಞ ಸೆರೂಗ ಇಂಞು ಇರ್‌ನೂರ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್. 24 ನಾಹೋರಂಗ್‌ ಇರವತೊಯಿಂಬದ್‌ ವಯಸ್ಸ್‌ ಇಪ್ಪಕ ತೆರಹ ಪುಟ್ಟ್‌ಚಿ. 25 ತೆರಹ ಪುಟ್ಟ್‌ನ ಪಿಂಞ ನಾಹೋರ ಇಂಞು ನೂಟ್ಯ ಪತ್ತೊಯಿಂಬದ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್. ತೆರಹಂಡ ವಂಶಾವಳಿ 26 ತೆರಹಂಗ್‌ ಎಳ್‌ವದ್‌ ವಯಸ್ಸ್‌ ಇಪ್ಪಕ ಅಬ್ರಾಮ, ನಾಹೋರ, ಹಾರಾನ ಎಣ್ಣುವ ಮಕ್ಕ ಪುಟ್ಟ್‌ಚಿ. 27 ಇದ್‌ ತೆರಹಂಡ ವಂಶಾವಳಿ. ತೆರಹಂಗ್‌ ಅಬ್ರಾಮ, ನಾಹೋರ, ಹಾರಾನ ಎಣ್ಣುವ ಮಕ್ಕ ಪುಟ್ಟ್‌ಚಿ. ಹಾರಾನಂಗ್‌ ಲೋಟ ಎಣ್ಣುವಂವೊ ಪುಟ್ಟ್‌ಚಿ. 28 ಹಾರಾನ ತಾನ್‌ ಪುಟ್ಟ್‌ನ ಊರ್‌ ಎಣ್ಣುವ ಕಲ್ದೀಯರಡ ದೇಶತ್‌ರ ಪಟ್ಟಣತ್‌ಲ್‌ ತಾಂಡ ಅಪ್ಪನಾನ ತೆರಹ ಇಂಞು ಬದಿಕಿತ್‌ಪ್ಪಕಲೇ ಚತ್ತತ್. 29 ಅಬ್ರಾಮ ಪಿಂಞ ನಾಹೋರ ಮಂಗಲ ಕಯಿಚಂಡತ್. ಅಮ್ರಾಮಂಡ ಪೊಣ್ಣ್‌ರ ಪೆದ ಸಾರಾಯ್, ನಾಹೋರಂಡ ಪೊಣ್ಣ್‌ರ ಪೆದ ಮಿಲ್ಕ. ಇವ ಹಾರಾನಂಡ ಮೋವ. ಹಾರಾನ ಮಿಲ್ಕ ಪಿಂಞ ಇಸ್ಕ ಎಣ್ಣುವ ಮೂಡಿ ಮಕ್ಕಕ್‌ ಅಪ್ಪನಾಯಿತ್‌ಂಜತ್. 30 ಸಾರಯ್‌ ಗೊಡ್ಡಿಯಾಯಿತ್‌ಂಜನಗುಂಡ್‌ ಅವಕ್‌ ಮಕ್ಕ ಇಂಜಿತ್‌ಲೆ. 31 ತೆರಹ ತಾಂಡ ಮೊಂವೊ ಅಬ್ರಾಮನ, ತಾಂಡ ಕ್‌ರ್‌ಮೊಂವೊನಾನ ಹಾರಾನಂಡ ಮೊಂವೊನಾಯಿತ್‌ಂಜ ಲೋಟನ ಪಿಂಞ ಅಮ್ರಾಮಂಡ ಪೊಣ್ಣ್‌ ಸಾರಯಳ ಕೂಟಿಯಂಡ್‌ ಕಾನಾನ್‌ ದೇಶಕ್‌ ಪೋಂಡೂಂದ್‌ ಕಲ್ದೀಯರ್‌ಡ ಊರ್‌ ಎಣ್ಣುವ ಪಟ್ಟಣತ್‌ಂಜ ಪೊರ್‌ಟತ್. ಆಚೇಂಗಿ, ಅಯಿಂಗ ಹಾರಾನ್‌ ಪಟ್ಟಣಕ್‌ ಬಂದಿತ್‌ ಅಲ್ಲಿಯೇ ವಾಸಮಾಡ್‌ಚಿ. 32 ತೆರಹಂಗ್‌ ಇರ್‌ನೂಟ್ಯ ಅಂಜ್ ವಯಸ್ಸ್‌ ಇಪ್ಪಕ ಹಾರಾನ್‌ ಪಟ್ಟಣತ್‌ಲ್‌ ಚತ್ತತ್. |
© 2017, New Life Literature (NLL)