ಗಲಾತ್ಯ 5 - ಕೊಡವ ಬೈಬಲ್ಕ್ರಿಸ್ತಂಡಲ್ಲಿ ನಂಗಕುಳ್ಳ ಸ್ವಾತಂತ್ರ 1 ಆನಗುಂಡ್, ನಂಗ ಪುನಃ ನ್ಯಾಯಪ್ರಮಾಣಕ್ ಅಡಿಯಾಳಾಕತೆ, ಕ್ರಿಸ್ತ ನಂಗಕ್ ಸ್ವಾತಂತ್ರವಾಯಿತ್ ಇರಂಡೂಂದ್ ಕೊಡ್‍ತ ಬದ್‍ಕ್‍ಲ್ ದೃಡವಾಯಿತ್ ನಿಕ್ಕಂಡು. 2 ಕ್‍ೕಳಿ, ನಿಂಗ ಸುನ್ನತಿ ಮಾಡ್‍ಚೇಂಗಿ, ಯೇಸು ಕ್ರಿಸ್ತನಗುಂಡ್ ನಿಂಗಕ್ ಒರ್ ಪ್ರಯೋಜನವು ಇಲ್ಲೇಂದ್ ಪೌಲನಾನ ನಾನ್ ನಿಂಗಕ್ ಎಣ್ಣ್‌ವಿ. 3 ಸುನ್ನತಿ ಮಾಡ್‌ವಂವೊ ಒಬ್ಬೊಬ್ಬನು ನ್ಯಾಯಪ್ರಮಾಣತ್‍ಲ್ ಉಳ್ಳದ್‍ನೆಲ್ಲ ಕಂಡಿತವಾಯಿತ್ ಮಾಡ್‌ವಕ್ ಒಳಪಟ್ಟಂವೊನಾಯಿತುಂಡ್‍ೕಂದ್ ಇಂಞೊಮ್ಮ ನಾನ್ ನಿಂಗಕ್ ಎಚ್ಚರ ಮಾಡ್‌ವಿ. 4 ಯೆಹೂದ್ಯಂಗಡ ನ್ಯಾಯಪ್ರಮಾಣತ್‍ರಗುಂಡ್ ನೀತಿವಂತಯಿಂಗಳಾಯಿತ್ ಆಪಕ್ ಕುಶಿಯುಳ್ಳ ನಿಂಗೆಲ್ಲಾರು ಯೇಸು ಕ್ರಿಸ್ತಂಡಿಂಜ ದೂರ ಆಯಿತುಳ್ಳಿರ ಪಿಂಞ ದೇವಡ ಕೃಪೆಯಿಂಜ ಬುದ್ದ್‌ಪೋಯಿತುಳ್ಲಿರ. 5 ಆಚೇಂಗಿ ಪವಿತ್ರಾತ್ಮಂಡ ಸಹಾಯತ್‍ಲ್ ನಂಬಿಕೇರಗುಂಡ್, ಬದ್‍ಕಿಯಂಡುಳ್ಳ ನಂಗ, ನಂಬಿಕೇರಗುಂಡ್ ದೇವಡ ನೀತಿ ಎಕ್ಕ ಕ್‌ಟ್ಟುವಾಂದ್ ಕುಶೀಲ್ ಪಾರಕಾತಂಡ್ ಉಂಡ್. 6 ನಂಗಡ ನಂಬಿಕೆ ಯೇಸು ಕ್ರಿಸ್ತಂಡ ಮೇಲೆ ಇಂಜತೇಂಗಿ, ಸುನ್ನತಿ ಮಾಡಿತ್ಂಜತೇಂಗಿಯು, ಮಾಡತ ಇಂಜತೇಂಗಿಯು, ಅದ್ ಒಂದು ಲೆಕ್ಕ ಆಪುಲೆ. ಅದ್ಂಡ ಬದ್‍ಲಾಯಿತ್ ನಂಬಿಕೇಲ್, ಪ್ರೀತಿರಗುಂಡ್ ನಂಗ ಮಾಡ್‌ವ ಕಾರ್ಯವೇ ಮುಕ್ಯವಾನದ್. 7 ನಿಂಗ ಚಾಯಿತೆ ಓಡಿಯಂಡಿಂಜೀರಲ್ಲಾ? ಪಿಂಞ ದಾರ್ ನಿಂಗಳ ಸತ್ಯತ್‍ರ ಬಟ್ಟೇಲ್ ಪೋಕತನೆಕೆ ನಿಪ್ಪ್‌ಚಿಟ್ಟದ್? 8 ಇನ್ನನೆ ಪ್ರಯತ್ನ ಮಾಡ್‍ನಂವೊ ಕಂಡಿತವಾಯಿತ್ ನಿಂಗಳ ಕಾಕ್‍ನ ದೇವಡಯಿಂಜ ಬಂದಂವೊ ಅಲ್ಲ. 9 ನಿಂಗಕ್ ಗೊತ್ತುಳ್ಳನೆಕೆ, ಚೆನ್ನ ಈಸ್ಟ್, ಬಾಕಿಯುಳ್ಳ ಎಲ್ಲಾ ಮುದ್ದೆನ ಉಬ್ಬ್‌ಚಿಡುವ. 10 ನಿಂಗ ಬೋರೆ ರೀತಿಲ್ ಒಂದು ಗೇನ ಮಾಡುಲೇಂದ್ ನಿಂಗಡ ಮೇಲೆ ನಾಕ್ ದುಂಬ ನಂಬಿಕೆ ಉಂಡ್. ನಿಂಗಳ ಕಲವಳ ಮಾಡ್‍ನಂವೊ ದಾರಾಯಿತ್ಂಜತೇಂಗಿಯು ಅಂವೊಂಗ್ ದೇವಡ ಶಿಕ್ಷೆ ಕ್‍ಟ್ಟ್‌ವ. 11 ನಾಡ ಅಣ್ಣತಮ್ಮಣಂಗಳೇ, ಸುನ್ನತಿ ಮಾಡಂಡೂಂದ್ ನಾನ್ ಇಂಞು ಬೋದನೆ ಮಾಡಿಯಂಡಿಂಜತೇಂಗಿ ಎನ್ನಂಗಾಯಿತ್ ನಾಕ್ ಇಕ್ಕಲು ತೊಂದರೆ ಬಂದಂಡುಂಡ್? ಅನ್ನನೆ ಆಚೇಂಗಿ, ಕ್ರಿಸ್ತಂಡ ಶಿಲುಬೇರ ವಿಷಯತ್ಂಜ ಬಪ್ಪ ನಿಂದನೆ ಇಲ್ಲತೆ ಪೋಯಿತ್‌ಪ್ಪ್‌ಲೆಯಾ? 12 ನಿಂಗಳ ಕಲವಳ ಮಾಡಿಯಂಡ್ ಉಳ್ಳಯಿಂಗಡದ್‌ನ ಇಲ್ಲತನೆಕೆ ಮುರಿಚ್‍ತೇಂಗಿಯು ಚಾಯಾಪ. 13 ನಾಡ ಅಣ್ಣತಮ್ಮಣಂಗಳೇ, ನಿಂಗ ಇಕ್ಕ ಸ್ವಾತಂತ್ರವಾಯಿತ್ ಬದ್‍ಕ್‍ವಕ್ ದೇವ ನಿಂಗಳ ಕಾಕ್‍ಚಿ, ನಿಂಗಕ್ ಕ್‍ಟ್ಟ್‌ನ ಈ ಸ್ವಾತಂತ್ರತ್‍ನ ನಿಂಗಡ ಇಚ್ಛೆರನೆಕೆ ಪಾಪತ್‍ರ ಗುಣತ್‍ಲ್ ನಡ್‍ಪಕ್ ಉಪಯೋಗಿಚಿಡತಿ. ಆಂಡ ಬದ್‍ಲ್ ನಿಂಗ ಪ್ರೀತಿಲ್ ಒಬ್ಬಂಗ್ ಒಬ್ಬ ಸೇವೆ ಮಾಡಿ. 14 ನಿಂಗ ನಿಂಗಳ ಎನ್ನನೆ ಪ್ರೀತಿ ಮಾಡ್‍ವಿರೋ ಅನ್ನನೆ ನಿಂಗಡ ನೆರೆಮನೆಕಾರಳ ಪ್ರೀತಿ ಮಾಡಿ ಎಣ್ಣುವ ಈ ಒರೇ ವಾಕ್ಯ, ನ್ಯಾಯಪ್ರಮಾಣತ್‍ಲ್ ಉಳ್ಳಾನೆಲ್ಲಾ ಪೂರ್ತಿ ಮಾಡ್‌ವ. 15 ಆಚೇಂಗಿ, ನಿಂಗ ಕಾಡ್ ಪ್ರಾಣಿಯರನೆಕೆ ಒಬ್ಬೊಬ್ಬನ ಕಡಿಚಂಡ್ ತಿಂದಂಡೇ ಉಂಡೇಂಗಿ, ನೋಟಿಯಂಡಿರಿ, ಎಚ್ಚರತ್‍ಲ್ ಇರಿ, ಇಲ್ಲತಪೋನಕ ನಿಂಗ ಒಬ್ಬೊಬ್ಬಂಡಗುಂಡ್ ಪಾಳಾಯಿ ಪೋಪಿರ. ದೇವಡ ಆತ್ಮ ಪಿಂಞ ಪಾಪತ್‍ರ ಗುಣ 16 ಆನಗುಂಡ್, ನಾನ್ ನಿಂಗಕ್ ಎಣ್ಣ್‌ವದ್ ಎಂತ ಎಣ್ಣ್‌ಚೇಂಗಿ, ಪವಿತ್ರಾತ್ಮ ಕಾಟುವ ಬಟ್ಟೇಲ್ ನಿಂಗ ನಡ್ಂದೋಳಿ, ಅಕ್ಕ ನಿಂಗಡ ಶರೀರತ್‍ಲ್ ಉಳ್ಳ ಪಾಪತ್‍ರ ಗುಣ ನಿಂಗಳ ನಡ್‍ತುವಕ್ ಬುಡುಲೆ. 17 ಮನುಷ್ಯಂಡ ಪಾಪತ್‍ರ ಗುಣ ಪವಿತ್ರಾತ್ಮಕ್ ವಿರೋದವಾಯಿತು, ದೇವಡ ಆತ್ಮ ಮನುಷ್ಯಂಡ ಪಾಪತ್‍ರ ಗುಣಕ್ ವಿರೋದವಾಯಿತು ಪೋರಾಡಿಯಂಡುಂಡ್. ನಿಂಗ ಮಾಡಂಡೂಂದ್ ಉಳ್ಳದ್‍ನ ಮಾಡ್‌ವಕ್ ಕಯ್ಯತನೆಕೆ ಈ ದಂಡು ಶತ್ರುವಳಾಯಿತುಂಡ್. 18 ನಿಂಗಳ ದೇವಡ ಆತ್ಮ ನಡ್‍ತಿಯಂಡ್ ಉಂಡೇಂಗಿ ನಿಂಗ ನ್ಯಾಯಪ್ರಮಾಣಕ್ ಒಳಪಟ್ಟಯಿಂಗ ಅಲ್ಲ. 19 ಮನುಷ್ಯಂಡ ಪಾಪತ್‍ರ ಗುಣ ಮಾಡ್‌ವ ಕಾರ್ಯವೆಲ್ಲಾ ಪೊರಮೆ ಕಾಂಬಕ್ ಕಯ್ಯು. ಅದೆಲ್ಲ ಎಂತ ಎಣ್ಣ್‌ಚೇಂಗಿ: ಲೈಂಗಿಕ ಪಾಪ, ನೀತಿಯಿಲ್ಲತ ಕಾರ್ಯ, ತಡೀರ ಮೋಹ, 20 ವಿಗ್ರಹ ಆರಾದನೆ, ಮಾಟ, ವಿರೋದ, ಪಗೆ, ವೈರಾಗ್ಯ, ಚೆಡಿ, ಬಡಾಯಿ, ವಿಂಗಡ, ಗುಂಪ್ ಮಾಡ್‍ವದ್, ಬೋರೆ ಬೋರೆ ಮಾಡ್‍ವದ್, 21 ಪೊರಾಮೆ, ಕುಡಿ, ಕೂಟ್‌ಕಳಿ ಪಿಂಞ ಬೋರೆ ಬೋರೆ ಕೆಟ್ಟ ಕಾರ್ಯ. ನಾನ್ ನಿಂಗಕ್ ಮಿಂಞಲೇ ಎಣ್ಣ್‌ನನೆಕೆ ಪುನಃ ಎಣ್ಣ್‌ವಿ. ಈ ತರ ಮಾಡ್‌ವಯಿಂಗಕ್, ದೇವ ಅಂವೊಂಡ ಮಕ್ಕಕ್ ಕೊಡ್‍ಪಾಂದ್ ಎಣ್ಣ್‌ನ ದೇವಡ ರಾಜ್ಯತ್‍ನ ಕೊಡ್‍ಪ್‍ಲೆ. 22 ಪವಿತ್ರಾತ್ಮತ್‍ರ ಫಲ ಎಂತ ಎಣ್ಣ್‌ಚೇಂಗಿ, ಪ್ರೀತಿ, ಸಂತೋಷ, ಸಮಾದಾನ, ಸಹಿಸುವ ಶಕ್ತಿ, ಕರುಣೆ, ನಲ್ಲರಿಕೆ, ನಂಬಿಕೆ, 23 ತಾಳ್ಮೆ ಪಿಂಞ ತನ್ನಡಕವೇ. ಇದ್ಂಗ್ ವಿರೋದವಾಯಿತ್ ಏದ್ ಪ್ರಮಾಣವು ಇಲ್ಲೆ. 24 ಯೇಸು ಕ್ರಿಸ್ತಂಡ ಕೂಡೆ ಐಕ್ಯತ್‍ಲ್ ಉಂಡ್‍ೕಂದ್ ಎಣ್ಣ್‌ವಯಿಂಗೆಲ್ಲಾ, ಅಯಿಂಗಡ ಪಾಪತ್‍ರ ಗುಣತ್‍ನ, ಅದ್ಂಡ ಆಸೆ ಪಿಂಞ ಇಚ್ಛೆನೆಲ್ಲಾ ಶಿಲುಬೇಲ್ ಇಟ್ಟಿತ್‌ಪ್ಪ. 25 ನಂಗ ಪವಿತ್ರಾತ್ಮತ್ಂಜ ಬದ್‍ಕಿಯಂಡುಳ್ಳಗುಂಡ್, ನಂಗಡ ಬದ್‍ಕ್‍ರ ಓರೋರ್ ವಿಷಯತ್‍ಲು ದೇವಡ ಆತ್ಮ ಕಾಟಿತಪ್ಪ ಬಟ್ಟೇಲ್ ನಡ್‌ಕಂಡು. 26 ಆನಗುಂಡ್ ನಂಗ ಆಂಗಾರತ್‍ಲ್ ಇಪ್ಪಕ್ಕಾಗ, ಒಬ್ಬಂಗ್ ಒಬ್ಬ ಕಷ್ಟಕೊಡ್‌ಪಕ್ಕಾಗ, ದಾಡಮೇಲು ಒಟ್ಟೆಕಿಚ್ಚ್‌ಲ್ ಇಪ್ಪಕ್ಕಾಗ. |
© 2017, New Life Literature (NLL)