ಎಸ್ತೆರ್‌ 9 - ಕೊಡವ ಬೈಬಲ್1 ಆದಾರ್‌ ತಿಂಗವಾನ ಪನ್ನರಂಡನೆ ತಿಂಗತ್‌ ಪದಿಮೂಂದನೆ ದಿವಸತ್ಲ್, ರಾಜಂಡ ತೀರ್ಮಾನತ್‌ರನೆಕೆಯು ಅಂವೊಂಡ ಆಜ್ಞೆರನೆಕೆಯು ಮಾಡ್‌ವಕಿಂಜತ್. ಆ ದಿವಸತ್‌ ಯೆಹೂದ್ಯಂಗಡ ವಿರೋದಿಯ ಕೈ ಕೂಡಿತ್ ಯೆಹೂದ್ಯ ಜನತ್‌ನ ಪಾಳ್‌ ಮಾಡನಾಂದ್‌ ಗೇನ ಮಾಡ್‌ಚಿ. ಆಚೇಂಗಿ ಅದ್‌ಂಗ್‌ ಬದ್‌ಲ್‌ ಯೆಹೂದ್ಯ ಜನ ಅಯಿಂಗಡ ಪಗೆನ ತ್‍ೕತಂಡತ್. 2 ರಾಜನಾನ ಅಹಷ್ವೇರೋಷಂಡ ಎಲ್ಲಾ ಪ್ರಾಂತ್ಯತ್‌ ಪಟ್ಟಣತ್‌ಲ್‌ ಇಂಜ ಯೆಹೂದ್ಯಂಗ ಅಯಿಂಗಕ್‌ ಕ್‍ೕಡ್‌ ಮಾಡುವಕ್‌ ಕೈಯಿ ಎಡ್‌ತಯಿಂಗಕ್‌ ವಿರುದ್ದವಾಯಿತ್‌ ಕೂಡಿತ್ ಬಪ್ಪಕ, ದಾರ್‌ಕು ಅಯಿಂಗಡ ಮಿಂಞತ್‌ ನಿಪ್ಪಕ್‌ ಕಯಿಂಜಿತ್‌ಲ್ಲೆ. ಎನ್ನಂಗೆಣ್ಣ್‌ಚೇಂಗಿ, ಯೆಹೂದ್ಯಂಗಡ ವಿಷಯತ್‌ ಎಲ್ಲಾ ದೇಶತ್‌ರ ಜನಳು ಪೋಡಿಚಿಟ್ಟಂಡಿಂಜತ್. 3 ಎಲ್ಲಾ ಪ್ರಾಂತ್ಯತ್‌ರ ಅದಿಪತಿಯಳು, ಉಪರಾಜಂಗಳು, ದೇಶಾದಿಪತಿಯಳು, ಪಿಂಞ ರಾಜಂಡ ವ್ಯವಹಾರತ್‌ನ ನೋಟುವಯಿಂಗಳು ಮೊರ್ದೆಕೈಕ್‌ ಪೋಡ್‌ಚಿಟ್ಟಂಡ್‌ ಯೆಹೂದ್ಯಂಗಕ್‌ ಸಹಾಯ ಮಾಡ್‌ಚಿ. 4 ಎನ್ನಂಗೆಣ್ಣ್‌ಚೇಂಗಿ ಮೊರ್ದೆಕೈ ರಾಜಂಡ ಅರಮನೆಲ್‌ ಮುಕ್ಯಸ್ತನಾಯಿತ್‌ಂಜತ್. ಅಂವೊಂಡ ಕೀರ್ತಿ ಎಲ್ಲಾ ಪ್ರಾಂತ್ಯಕು ಪಬ್ಬ್‌ಚಿ. ಮೊರ್ದೆಕೈ ಇಂಞು ಬಲ್ಯಂವೊಡಿಂಜ. 5 ಆನಗುಂಡ ಯೆಹೂದ್ಯಂಗ ಅಯಿಂಗಡ ಎಲ್ಲಾ ವಿರೋದಿಯಳ ಕತ್ತಿಯಿಂಜ ಬಡ್‌ಚಿ ಕೊಂದಿತ್, ನಾಶ ಮಾಡಿತ್, ಅಯಿಂಗಕ್‌ ಇಷ್ಟ ಬಂದನೆಕೆ ವಿರೋದಿಯಕ್‌ ಮಾಡ್‌ಚಿ. 6 ಯೆಹೂದ್ಯಂಗ ಶೂಷನ್‌ ಪಟ್ಟಣತ್‌ರ ಅರಮನೆಲ್‌ ಸಹ ಅಂಞ್ಞೂರ್‌ ಜನಳ ಕೊಂದಿತ್ ನಾಶ ಮಾಡ್‌ಚಿ. 7 ಹಮ್ಮೆದಾತಂಡ ಮೋಂವೊನಾನ ಹಾಮಾನ ಎಣ್ಣುವ ಯೆಹೂದ್ಯಂಗಡ ವಿರೋದಿಯಡ ಕ್‌ಣ್ಣ ಮಕ್ಕಳಾನ ಪರ್ಷಂದಾತ, ದಲ್ಫೋನ, ಅಸ್ಪಾತ, 8 ಪೋರಾತ, ಅದಲ್ಯ, ಅರೀದಾತ, 9 ಪರ್ಮಷ್ಟ, ಅರೀಸೈ, ಅರಿದೈ, ವೈಜಾತ ಎಣ್ಣುವಯಿಂಗಳ ಕೊಂದತ್. 10 ಆಚೇಂಗಿಯು ಯೆಹೂದ್ಯಂಗ ಸೂರೆ ಮಾಡುವಕ್‌ ಕೈ ಇಟ್ಟಿತ್‌ಲ್ಲೆ. 11 ಆ ದಿವಸ ಶೂಷನ್‌ ಅರಮನೆಲ್‌ ಕೊಂದಯಿಂಗಡ ಲೆಕ್ಕತ್‌ನ ರಾಜಂಗ್ ಅರಿಚಿಟ್ಟತ್. 12 ಅಕ್ಕ ರಾಜ ಎಸ್ತೇರ್ ರಾಣಿನ ನೋಟಿತ್: ಯೆಹೂದ್ಯಂಗ ಶೂಷನ್‌ ಅರಮನೆಲ್‌ ಅಂಞ್ಞೂರ್‌ ಜನಳ ಪಿಂಞ ಹಾಮಾನಂಡ ಪತ್ತ್‌ ಕ್‌ಣ್ಣ ಮಕ್ಕಳ ಕೊಂದಿತ್ ನಾಶ ಮಾಡಿರ್‌ತ್. ರಾಜಂಡ ಬೋರೆ ಪ್ರಾಂತ್ಯತ್‌ಲ್‌ ಎಂತ ಮಾಡೀತಿಕ್ಕೋ? ಇಕ್ಕ ನೀಡ ಬೋಡಿಕೆ ಎಂತ? ಅದ್‌ ನೀಕ್‌ ಕ್‌ಟ್ಟುವ. ನೀಡ ಮೊರೆ ಎಂತ? ಅನ್ನನೆ ನೀಕ್‌ ಆಪ ಎಣ್ಣಿಯಂಡ್‌ ಎಣ್ಣ್‌ಚಿ. 13 ಅಕ್ಕ ಎಸ್ತೇರ್, ರಾಜಂಗ್: ರಾಜಂಗ್ ಕುಶಿ ಉಂಡೇಂಗಿ ಈ ದಿವಸತ್‌ ಆಜ್ಞೆರನೆಕೆ ಶೂಷನ್‌ ಪಟ್ಟಣತ್‌ಲ್‌ ಉಳ್ಳ ಯೆಹೂದ್ಯಂಗ ನಾಳೆಯೂ ಮಾಡುವಕು, ಹಾಮಾನಂಡ ಪತ್ತ್‌ ಕ್‌ಣ್ಣ ಮಕ್ಕಡ ಚಾವ್‌ ತಡಿನ ತೂಕ್‌ ಮರತ್‌ಲ್‌ ಇಡ್‌ವಕ ಅಪ್ಪಣೆ ಕೊಡ್‌ಕಂಡೂಂದ್‌ ಬೋಡಿಯಂಡತ್. 14 ಅನ್ನನೆ ಮಾಡ್‌ವಕ್‌ ರಾಜ ಆಜ್ಞೆ ಕೊಡ್‌ತತ್. ಅಕ್ಕಲೆ ಇದ್‌ಂಡ ವಿಷಯತ್‌ ರಾಜಂಡ ಆಜ್ಞೆ ಶೂಷನ್‌ ಪಟ್ಟಣತ್‌ಲ್‌ ಪ್ರಕಟ ಆಚಿ. ಹಾಮಾನಂಡ ಪತ್ತ್‌ ಕ್‌ಣ್ಣ ಮಕ್ಕಡ ಚಾವ್‌ ತಡಿನ ಮರತ್‌ಲ್‌ ತೂಕಿಚಿಟ್ಟತ್. 15 ಶೂಷನ್‌ ಪಟ್ಟಣತ್‌ಲ್‌ ಇಂಜ ಯೆಹೂದ್ಯಂಗ ಆದಾರ್‌ ತಿಂಗತ್‌ರ ಪದಿನಾಲನೇ ದಿವಸತ್‌ ಕೂಡಿತ್, ಅಲ್ಲಿ ಮುನ್ನೂರ್‌ ಜನಳ ಕೊಂದತ್. ಆಚೇಂಗಿ ಸೂರೆ ಮಾಡುವಕ್‌ ಕೈ ಇಟ್ಟಿತ್‌ಲ್ಲೆ. 16 ಆದಾರ್‌ ತಿಂಗತ್‌ರ ಪದಿಮೂಂದನೆ ದಿವಸತ್‌ ರಾಜಂಡ ಬೋರೆ ಪ್ರಾಂತ್ಯತ್‌ಲ್‌ ಇಂಜ ಯೆಹೂದ್ಯಂಗ ಅಯಿಂಗಡ ಜೀವತ್‌ನ ಕಾಪಾಡುವಕಾಯಿತು, ಅಯಿಂಗಡ ವಿರೋದಿಯಡ ಕ್‍ೕಡ್‌ಂಜ ತಪ್ಪ್‌ಚಿಡುವಕಾಯಿತು ಒಕ್ಕಚೆ ಕೂಡಿತ್, ಎಳ್‌ವತಂಜಿ ಆಯಿರ ವಿರೋದಿಯಳ ಕೊಂದತ್. ಆಚೇಂಗಿಯು ಸೂರೆ ಮಾಡುವಕ್‌ ಮಾತ್‌ರ ಕೈ ಇಟ್ಟಿತ್‌ಲ್ಲೆ. 17 ಅಯಿಂಗ ಪದಿನಾಲನೆ ದಿವಸತ್‌ ಆರಾಮ ಮಾಡಿತ್, ಆ ದಿವಸತ್‌ ಗದ್ದಾಳ ಮಾಡಿತ್ ಕುಶೀಲ್‌ ನಮ್ಮೆ ಮಾಡ್‌ಚಿ. 18 ಆಚೇಂಗಿ ಶೂಷನ್‌ ಪಟ್ಟಣತ್‌ರ ಯೆಹೂದ್ಯಂಗ ಪದಿಮೂಂದನೆ ಪಿಂಞ ಪದಿನಾಲನೆ ದಿವಸತ್ಲ್ ವೈರಿಯಳ ಕೊಲ್ಲುವಕ್‌ ಗೊತ್ತ್‌ಮಾಡ್‌ನಂಗ್, ಪದಿನಂಜನೇ ದಿವಸತ್‌ ಆರಾಮ ಮಾಡಿತ್ ಆ ದಿವಸತ್‌ ಗದ್ದಾಳ ಮಾಡಿತ್ ಕುಶೀಲ್‌ ನಮ್ಮೆ ಮಾಡ್‌ಚಿ. 19 ಆನಗುಂಡ್‌ ಗೋಡೆಯಿಲ್ಲತ ಊರ್‌ಲ್‌ ವಾಸಮಾಡಿಯಂಡಿಂಜ ಊರ್‌ಕಾರಂಗಳಾನ ಯೆಹೂದ್ಯಂಗ, ಆದಾರ್‌ ತಿಂಗತ್‌ರ ಪದಿನಾಲನೇ ದಿವಸತ್‌ನ, ಕುಶೀಲ್‌ ಗದ್ದಾಳ ಮಾಡಿತ್ ಕಳಿಪ ನಮ್ಮೆರ ದಿವಸವು, ಒಬ್ಬಂಗೊಬ್ಬಂಗ್‌ ಗದ್ದಾಳ ಆಹಾರತ್‌ನ ಅಯಿಚಿ ತಪ್ಪ ದಿವಸವು ಆಯಿತ್‌ ಮಾಡಿರ್‌ತ್. ಮೊರ್‌ಎಕೈ ಪುರಿಮ್‌ ನಮ್ಮೆನ ಸ್ತಾಪನೆ ಮಾಡ್‌ನದ್‌ 20 ಮೊರ್ದೆಕೈ ಈ ಸಂಗತಿನ ಒಳ್‌ದಿ ಬೆಪ್ಪ ಪುಸ್ತಕತ್‌ಲ್‌ ಒಳ್‌ದಿಚಿಟ್ಟಿತ್‌ ಅಹಷ್ವೇರೋಷ ರಾಜಂಡ ಎಲ್ಲಾ ಪ್ರಾಂತ್ಯತ್‌ಲ್‌ ಪಕ್ಕ ಪಿಂಞ ದೂರತ್‌ಲ್‌ ಉಳ್ಳ ಯೆಹೂದ್ಯಂಗಕ್‌ ಕಾಗದತ್‌ನ ಅಯಿಚತ್. ಆ ಕಾಗದತ್ಲ್: 21 ಪ್ರತಿಕಾಲವೂ ಆದಾರ್‌ ತಿಂಗತ್‌ರ ಪದಿನಾಲನೇ ಪಿಂಞ ಪದಿನಂಜನೇ ದಿವಸತ್‌ನ, ಯೆಹೂದ್ಯಂಗ ಅಯಿಂಗಡ ವಿರೋದಿಯಡ ಕ್‍ೕಡ್‌ಂಜ ತಪ್ಪಿಚಿಟ್ಟಿತ್‌ ಅರಾಮ್‌ ಮಾಡ್‌ನ ದಿವಸವಾಯಿತು, ಅಯಿಂಗಡ ನೊಂಬಲ ಸಂತೋಶವಾಯಿತು, ಅಯಿಂಗಡ ದುಃಖ ಸುಕವಾನ ದಿವಸವಾಯಿತು ಬದ್‌ಲಾನ ತಿಂಗಳಾಯಿತ್‌ ಕೊಂಡಾಡಿತ್, 22 ಆ ದಿವಸತ್ಲ್ ಗದ್ದಾಳ ಮಾಡಿತ್ ಕುಶೀಲ್‌ ಕಳಿಚಿತ್‌ ಒಬ್ಬಂಗೊಬ್ಬಂಗ್‌ ಗದ್ದಾಳ ಆಹಾರತ್‌ನ ಅಯಿಚಿತ್, ಗರೀಬಂಗಕ್‌ ದಾನದರ್ಮ ಮಾಡಂಡೂಂದ್‌ ನೇಮಿಚಿಟ್ಟತ್‌ಂಜತ್. 23 ಅಕ್ಕ ಯೆಹೂದ್ಯಂಗ ಮೊರ್ದೆಕೈ ಅಯಿಂಗಕ್‌ ಕಾಗದತ್‌ ಒಳ್‌ದ್‌ನಾನ ಒತ್ತಂಡ್‌ ಆ ಕಾಲತ್‌ ನಡ್‌ಂದ ನಮ್ಮೆನ, ಕಾಲೋದಿ ನಡ್‌ಪ ನಮ್ಮೆಯಾಯಿತ್‌ ಸ್ವೀಕಾರ ಮಾಡಿಯಂಡತ್. 24 ಅಗಾಗ್‌ ಕುಲಕ್‌ ಕೂಡ್‌ನ ಹಮ್ಮೆದಾತಂಡ ಮೋಂವೊನಾನ ಹಾಮಾನ ಎಲ್ಲಾ ಯೆಹೂದ್ಯಂಗಳ ವಿರೋದಿಚಿಟ್ಟಿತ್, ಯೆಹೂದ್ಯ ಜನತ್‌ನ ಕೊಲ್ಲ್‌ವಕ್‌ ಗೇನ ಮಾಡಿತ್, ಅಯಿಂಗಳ ನಾಶ ಮಾಡ್‌ವಕ್‌ ಪೂರ್‌ ಎಣ್ಣುವ ಚೀಟಿನ ಇಡ್‌ವಕ್‌ ಮಾಡ್‌ಚಿ. 25 ಆಚೇಂಗಿಯು ಎಸ್ತೇರ್, ರಾಜಂಡ ಮಿಂಞತ್‌ ಪೋಯಿತ್, ಒಳ್‌ದಿತುಳ್ಳ ಆಜ್ಙೇನೆ ಕೊಡ್‌ತ್ತತ್. ಹಾಮಾನ ಯೆಹೂದ್ಯಂಗಕ್‌ ವಿರುದ್ದವಾಯಿತ್‌ ಗೇನ ಮಾಡ್‌ನ ಚದಿನ ಅಂವೊಂಡ ಮಂಡೆರ ಮೇಲೆಯೇ ಬಪ್ಪನೆಕೆ ಬೋರೆ ಆಜ್ಞೆನ ಮಾಡ್‍ನಗುಂಡ್, ಅಂವೊನ ಪಿಂಞ ಅಂವೊಂಡ ಕ್‌ಣ್ಣ ಮಕ್ಕಳ ಸಹ ತೂಕ್‌ಮರತ್‌ಲ್‌ ಇಟ್ಟತ್. 26 ಆನಗುಂಡ್‌ ಆ ದಂಡ್‌ ದಿವಸಕ್‌ ಪೂರ್‌ ಎಣ್ಣುವ ಶಬ್ದತ್‌ಂಜ ಪೂರಿಮ್‌ ಎಣ್ಣಿಯಂಡ್‌ ಪೆದ ಬಾತ್. ಮೊರ್ದೆಕೈ ಆ ಕಾಗದತ್ಲ್ ಎಲ್ಲಾ ಕಾರ್ಯತ್‌ನ ಒಳ್‌ದಿತಿಂಜಾಂಗು, ಅಯಿಂಗಳೇ ಈ ವಿಷಯತ್‌ನ ಅನುಬವಿಚಿಟ್ಟಾಂಗು, ಅಯಿಂಗಕ್‌ ಈ ಘಟನೆಯೆಲ್ಲಾ ನಡ್‌ಂದಗುಂಡು, 27 ಯೆಹೂದ್ಯಂಗ ಅದ್‌ನ ಮನಸ್ಸ್‌ಕ್ ಎಡ್‌ತಂಡ್, ಈ ದಂಡ್‌ ದಿವಸತ್‌ರ ವಿಷಯತ್‌ ಒಳ್‌ದಿತುಳ್ಳನೆಕೆ ಅಯಿಂಗಳು, ಅಯಿಂಗಡ ಸಂತಾನವು ಪಿಂಞ ಯೆಹೂದ್ಯ ಮಾರ್‌ಗಕ್‌ ಕೂಡ್‌ನಯಿಂಗಳು ಕಾಲೋದಿ, ನೀಮಿಚಿಟ್ಟ ನೇರತ್‌ಲ್‌ ಅದ್‌ನ ತಪ್ಪತೆ ಆಚರಿಚುಡುವಾಂದ್‌ ಅದ್‌ನ ಒರ್‌ ಪದ್ದತಿಯಾಯಿತ್‌ ಸ್ತಾಪನೆ ಮಾಡಿಚಿಟ್ಟಂಡತ್. 28 ಈ ದಂಡ್‌ ದಿವಸತ್‌ನ ಗೇನ ಬೆಚ್ಚಂಡ್‌ ಮಿಂಞಕ್‌ ಬಪ್ಪ ಪ್ರತಿ ಸಂತಾನವು, ಪ್ರತಿ ಕುಟುಂಬವೂ, ಪ್ರತಿ ಪ್ರಾಂತ್ಯವು, ಪ್ರತಿ ಪಟ್ಟಣವು ಆಚರಿಚಿಡಂಡು. ಈ ಪೂರೀಮ್‌ ಎಣ್ಣುವ ನಮ್ಮೆರ ದಂಡ್‌ ದಿವಸವು ಯೆಹೂದ್ಯಂಗಡ ಮದ್ಯತ್‌ ಆಚರೆಣೆ ಮಾಡತೆ ಬುಡುವಕಾಗಾಂದು, ಈ ಗೊತ್ತ್‌ ಮಾಡ್‌ನ ದಿವಸತ್‌ನ ಆಚರಣೆ ಮಾಡುವದ್‌ ಮಿಂಞಕ್‌ ಬಪ್ಪ ಎಲ್ಲಾ ಸಂತಾನ ಮರಂದ್‌ ಪೋಪಕಾಗಾಂದೂ ಗೊತ್ತ್‌ ಮಾಡ್‌ಚಿ. 29 ಪೂರೀಮ್‌ ನಮ್ಮೆರ ವಿಷಯತ್‌ ಒಳ್‌ದಿತುಳ್ಳ ಈ ದಂಡನೆ ಕಾಗದತ್‌ನ ಸ್ತಿರಪಡ್‌ತ್‌ವನೆಕೆ, ಅಬೀಹೈಲಂಡ ಮೋವಳಾನ ಎಸ್ತೇರ್ ರಾಣಿಯು ಯೆಹೂದ್ಯನಾನ ಮೊರ್ದೆಕೈಯು ತಂಗಡ ಅದಿಕಾರತ್‌ಲ್‌ ಇಂಞು ದೃಡವಾಯಿತ್‌ ಒಳ್‌ದ್‌ಚಿ. 30 ಮೊರ್ದೆಕೈ ಅಹಷ್ವೇರೋಷಂಡ ರಾಜ್ಯತ್‌ ಉಳ್ಳ ನೂಟ್ಯ ಇರ್ವತ್‍ೕಳ್‌ ಪ್ರಾಂತ್ಯತ್‌ಲ್‌ ಇಂಜ ಎಲ್ಲಾ ಯೆಹೂದ್ಯಂಗಕ್‌ ಕಾಗದತ್‌ನ ಸಮಾದಾನತ್‌ರ ಪಿಂಞ ಸತ್ಯತ್‌ರ ತಕ್ಕಾಯಿತ್‌ ಅಯಿಚತ್. 31 ಅದ್‌ ಎಂತ ಎಣ್ಣ್‌ಚೇಂಗಿ: ಯೆಹೂದ್ಯಂಗ, ಅಯಿಂಗಡಲ್ಲಿಯೂ ಪಿಂಞ ಅಯಿಂಗಡ ಸಂತಾನತ್‌ಲೂ ಪಟ್ಟಣಿ ನಿಂದಪಿಂಞ ಗೋಳಾಡುವ ದಿವಸತ್‌ನ ಗೇನ ಮಾಡುವಕ್‌ ಅಯಿಂಗಳೇ ಗೊತ್ತ್‌ಮಾಡ್‌ನ ಪ್ರಕಾರ ಈ ಪೂರೀಮ್‌ ದಿವಸತ್‌ನ ನಾನ್‌ ಪಿಂಞ ಯೆಹೂದ್ಯನಾನ ಮೊರ್ದೆಕೈ ಎಣ್ಣ್‌ನನೆಕೆ ಪ್ರತಿಕಾಲವು ತಪ್ಪದೇ ಗೊತ್ತ್‌ಮಾಡ್‌ನ ನೇರಲ್‌ ಆಚರಿಚಿಡಂಡೂಂದ್‌ ಒಳ್‌ದ್‌ಚಿ. 32 ಇನ್ನನೆ ಎಸ್ತೇರಂಡ ಆಜ್ಞೆ ಪೂರೀಮ್‌ ನಮ್ಮೆನ ದೃಡಪಡ್‌ತ್‌ಚಿ. ಇದ್‌ನ ಪುಸ್ತಕತ್‌ಲ್‌ ಒಳ್‌ದಿಬೆಚ್ಚತ್. |
© 2017, New Life Literature (NLL)