ಎಸ್ತೆರ್‌ 4 - ಕೊಡವ ಬೈಬಲ್1 ನಡ್‌ಂದ ಎಲ್ಲಾನ ಕ್‍ೕಟಿತ್‌ ಮೊರ್ದೆಕೈ ತಾಂಡ ಬಟ್ಟೆನ ಕೀತಿತ್, ಗೋಣಿಚೀಲತ್‌ರ ಬಟ್ಟೆನ ಸುತ್ತಿಯಂಡ್, ಬೂದಿನ ಮಂಡೆರ ಮೇಲೆ ಇಟ್ಟಂಡ್, ಪಟ್ಟಣತ್‌ರ ಮದ್ಯತ್‌ ಪೋಯಿತ್ ದುಃಖತ್‌ಲ್‌ ದುಂಬ ಗೋಳಾಡ್‌ಚಿ. 2 ರಾಜಂಡ ಅರಮನೆರ ಕೋಟೆರ ಬಾಯಿಕಂಡಿರಕತ್ತನೆ ಬಾತ್. ಗೋಣಿಚೀಲತ್‌ರ ಬಟ್ಟೆನ ಇಟ್ಟಂಡ್ ದಾರ್‌ಕು ಅರಮನೆರ ಒಳ್‌ಕ್‌ ಪೋಪಕ್‌ ಅನುಮತಿ ಇಂಜಿತ್‌ಲ್ಲೆ. 3 ರಾಜಂಡ ಆಜ್ಞೆಯು ತೀರ್ಮಾನವು ಏದೆಲ್ಲಾ ಪ್ರಾಂತ್ಯಕ್‌ ಪೋಯಿ ಎತ್ತಚೋ ಅಲ್ಲಿಯೆಲ್ಲಾ ಯೆಹೂದ್ಯ ಜನಡ ಮದ್ಯತ್‌ ಬಲ್ಯ ದುಃಖ, ಪಟ್ಟಣಿ ನಿಪ್ಪದ್, ಮೊರ್‌ಡುವದ್‌ ಪಿಂಞ ಗೋಳಾಟ ಸುರು ಆಚಿ. ಸುಮಾರ್‌ ಜನ ಗೋಣಿಚೀಲತ್‌ರ ಬಟ್ಟೆನ ಪಿಂಞ ಬೂದಿನ ನೆಲತ್‌ ಇಟ್ಟಿತ್‌ ಅದ್‌ಂಡ ಮೇಲೆ ಬುದ್ದಂಡತ್. ಎಸ್ತೇರಂಡ ಸಹಾಯ ಕ್‍ೕಟ ಮೊರ್ದೆಕೈ 4 ಅಕ್ಕ ಎಸ್ತೇರಂಡ ಪಣಿಕಾರ್ತಿಯ ಪಿಂಞ ಶಿಕಂಡಿಯ ಅವಡ ಪಕ್ಕ ಪೋಯಿತ್ ಮೊರ್ದೆಕೈ ಮಾಡ್‌ನ ವಿಚಾರತ್‌ನ ಅರಿಚಿಟ್ಟತ್. ಅದ್‌ನ ಕ್‍ೕಟಿತ್‌ ಎಸ್ತೆರ್‌ ರಾಣಿಕ್‌ ದುಂಬ ಬೇಜಾರಾಯಿತ್, ಮೊರ್ದೆಕೈ ಇಟ್ಟಂಡಿಂಜ ಗೋಣಿಚೀಲತ್‌ರ ಬಟ್ಟೆನ ಉತ್ತಿತ್, ಬೋರೆ ಬಟ್ಟೆನ ಇಡ್‌ವಕ್‌ ಬಟ್ಟೆನ ಅಯಿಚಿ ಕೊಡ್‌ತತ್. ಆಚೇಂಗಿ ಅಂವೊ ಅದ್‌ನ ಸ್ವೀಕಾರ ಮಾಡಿತ್‌ಲ್ಲೆ. 5 ಅಕ್ಕ ಎಸ್ತೇರ್‌ ಅವಕ್‌ ಸೇವೆ ಮಾಡ್‌ವಾಕಾಯಿತ್‌ ರಾಜ ನೇಮಿಚಿಟ್ಟ ಶಿಕಂಡಿಯಡಡೆಲ್‌ ಒಬ್ಬನಾನ ಹತಾಕನ ಕಾಕ್‌ಚಿಟ್ಟಿತ್: ನೀನ್‌ ಮೊರ್ದೆಕೈಯಂಡ ಪಕ್ಕ ಪೋಯಿತ್, ಅಂವೊ ಮಾಡಿಯಂಡುಳ್ಳ ಈ ಕಾರ್ಯಕ್‌ ಎಂತ ಕಾರಣಾಂದ್‌ ವಿಚಾರಿಚಿಟ್ಟಂಡ್‌ ಬಾಂದ್‌ ಎಣ್ಣಿತ್ ಅಯಿಚತ್. 6 ಅನ್ನನೆ ಹತಾಕ ಅರಮನೆರ ಕೋಟೆ ಬಾಯಿಕಂಡಿರ ಮಿಂಞತ್‌ಲ್‌ ಇಂಜ ಪಟ್ಟಣತ್‌ರ ಬಯಲ್‌ಲ್‌ ಇಂಜ ಮೊರ್ದೆಕೈಯಂಡ ಪಕ್ಕ ಪೋಚಿ. 7 ಅಕ್ಕ ಮೊರ್ದೆಕೈ ತಾಂಗ್‌ ನಡ್‌ಂದ ಎಲ್ಲಾ ವಿಷಯತ್‌ನ ಪಿಂಞ ಹಾಮಾನ ಯೆಹೂದ್ಯ ಜನತ್‌ನ ನಾಶಮಾಡ್‌ವಕ್‌ ರಾಜಬಂಡಾರಕ್‌ ಕೊಡ್‌ಪ್ಪಾಂದ್‌ ಎಣ್ಣ್‌ನ ಬೊಳ್ಳಿನ ವಿಷಯತ್‌ನೆಲ್ಲಾ ಅಂವೊಂಗ್‌ ಅರಿಚಿಟ್ಟತ್. 8 ಇಂಞು, ಯೆಹೂದ್ಯ ಜನಳ ಕೊಲ್ಲಂಡೂಂದ್‌ ಶೂಷನ್‌ ಪಟ್ಟಣತ್‌ಲ್‌ ಪ್ರಕಟ ಆನ ರಾಜಂಡ ತೀರ್ಮಾನತ್‌ರ ಒರ್‌ ಪ್ರತಿರ ಕಾಗದತ್‌ನ ಅಂವೊಂಡ ಪಕ್ಕ ಕೊಡ್‌ತಿತ್: ಇದ್‌ನ ಎಸ್ತೇರಂಗ್‌ ಕಾಟಿತ್, ಅವಕ್‌ ಎಣ್ಣಿ ಕೊಡ್. ದಯ ಬೆಚ್ಚಿತ್‌ ಅವಳ ರಾಜಂಡ ಪಕ್ಕ ಪೋಪಕ್‌ ಎಣ್ಣಿತ್, ಅಂವೊಂಡ ಪಕ್ಕ ತಾಂಡ ಜನಕ್‌ ಕರುಣೆ ಕಾಟಂಡೂಂದ್‌ ಬೋಡ್‌ವಕ್‌ ಅವಕ್‌ ಎಣ್ಣ್‍ೕಂದ್‌ ಎಣ್ಣಿತ್ ಅಯಿಚತ್. 9 ಹತಾಕ ತಿರಿತ್‌ ಬಂದಿತ್, ಮೊರ್ದೆಕೈ ಎಣ್ಣ್‌ನ ತಕ್ಕ್‌ನ ಎಸ್ತೇರಂಗ್‌ ಅರಿಚಿಟ್ಟತ್. 10 ಎಸ್ತೇರ್‌ ಸಹ ಹಾತಕನ ಪುನಃ ಮೊರ್ದೆಕೈಯಂಡ ಪಕ್ಕ ತಿರಿತ್‌ ಅಯಿಚಿತ್: 11 ರಾಜ ಕಾಕತೆ, ಒರ್‌ ಆಣಾಳ್‌ ಆಚೇಂಗಿಯು, ಪೊಣ್ಣಾಳ್‌ ಆಚೇಂಗಿಯು ರಾಜಂಡ ಅರಮನೆರ ಒಳ್‌ಕ್‌ ಅಂವೊನ ಕಾಂಬಕ್‌ ಪೋಚೇಂಗಿ, ಅಂವೊ ಚಾವಂಡೂಂದ್‌ ಒರ್‌ ಕಾನೂನ್‌ ಉಂಡ್. ಈ ಕಾನೂನ್‌ ರಾಜಂಡ ಎಲ್ಲಾ ಅದಿಕಾರಿಯಕು, ಎಲ್ಲಾ ಪ್ರಾಂತ್ಯತ್‌ ಜನಕು ಗೊತ್ತುಂಡ್. ದಾಡ ಬರಿಕ್‌ ರಾಜ ಆ ಪೊನ್ನ್‌ರ ಕೋಲ್‌ನಕಾಟುವ ಅಂವೊ ಮಾತ್‌ರ ಉಳಿಯುವಾಂದ್‌ ರಾಜಂಡ ಎಲ್ಲಾ ಸೇವಕಂಗಕು ಪಿಂಞ ರಾಜ್ಯತ್‌ರ ಎಲ್ಲಾ ಜನಕು ಗೊತ್ತುಂಡ್. ಕಯಿಂಜ ನುಪ್ಪದ್‌ ದಿವಸತ್‌ಂಜ ನನ್ನ ಸಹ ರಾಜಂಡ ಪಕ್ಕ ಪೋಪಕ್‌ ಅಯಿಚಿತ್‌ಲ್ಲೇಂದ್‌ ಎಣ್ಣ್‌ಚಿ. 12 ಎಸ್ತೇರಂಡ ತಕ್ಕ್‌ನ ಹಾತಕ ಮೊರ್ದೆಕೈಕ್ ಅರಿಚಿಟ್ಟತ್. 13 ಅಕ್ಕ ಮೊರ್ದೆಕೈ: ನೀನ್‌ ಅರಮನೆಲ್‌ ಉಳ್ಳಂಗ್‌ ಬೋರೆ ಯೆಹೂದ್ಯ ಜನಯೆಲ್ಲಾ ನಾಶ ಆಪಕ, ನೀನ್‌ ಮಾತ್‌ರ ಬಚಾವ್‌ ಆಪಿಯಾಂದ್‌ ಗೇನ ಮಾಡತೆ. 14 ನೀನ್‌ ಇಂತಾ ಸಮಯತ್‌ಲ್‌ ಮುಂಡೆತೆ ಇಂಜತೇಂಗಿ, ಯೆಹೂದ್ಯ ಜನಕ್‌ ಸಹಾಯವು ಬುಡುಗಡೆಯು ಬೋರೆ ಬರಿಯಿಂಜ ಬಪ್ಪ; ಅಕ್ಕ ನೀನ್‌ ಪಿಂಞ ನೀಡ ಅಪ್ಪಂಡ ಮನೆಕಾರಳು ನಾಶ ಆಯಿಪೋಪಿರ. ದಾರ್‌ಕ್‌ ಗೊತ್ತ್, ಈ ಸಂದರ್ಪತ್‌ ಸಹಾಯ ಮಾಡ್‌ವಕಾಯಿತೇ ನೀನ್‌ ಈ ರಾಣಿ ಸ್ತಾನಕ್‌ ಬಂದಿತಿಕ್ಕೂಂದ್‌ ಎಣ್ಣ್‌ವಕ್‌ ಎಣ್ಣ್‌ಚಿ. ರಾಜಂಡ ಸನ್ನಿದಿಲ್‌ ಅರಿಕೆ ಮಾಡ್‌ವಕ್‌ ಗೇನ ಮಾಡ್‌ನ ಎಸ್ತೇರ್‌ ರಾಣಿ 15 ಅಕ್ಕ ಎಸ್ತೇರ್‌ ಮೊರ್ದೆಕೈಕ್: 16 ನೀನ್‌ ಪೋಯಿತ್ ಶೂಷನ್‌ ಪಟ್ಟಣತ್‌ಲ್‌ ಕ್‌ಟ್ಟುವ ಎಲ್ಲಾ ಯೆಹೂದ್ಯಂಗಳ ಕೂಟಿತ್, ನಾಕಾಯಿತ್‌ ಬಯಿಟ್ ಪಿಂಞ ಪೊಲಾಕ ಎಣ್ಣ್‌ಚೇಂಗಿ ಮೂಂದ್‌ ದಿವಸ ಕೂಳ್‌ ನೀರ್‌ ಬುಟ್ಟಿತ್‌ ಪಟ್ಟಣಿ ನಿಕ್ಕಂಡು. ಅನ್ನನೆ ನಾನ್‌ ಪಿಂಞ ನಾಡ ಪಣಿಕಾರ್ತಿಯ ಪಟ್ಟಣಿ ನಿಪ್ಪ. ಇದಾನಪಿಂಞ ಕಾನೂನ್‌ಕ್‌ ವಿರುದ್ದವಾಯಿತ್‌ ಇಂಜತೇಂಗಿಯು ನಾನ್‌ ರಾಜಂಡ ಪಕ್ಕ ಪೋಪಿ. ಚಾವದಾವೇಂಗಿ ಚಾವೀಂದ್‌ ಎಣ್ಣಿತ್ ಅಯಿಚತ್. 17 ಅಕ್ಕ ಮೊರ್ದೆಕೈ ತಿರಿತ್‌ ಪೋಯಿತ್ ಎಸ್ತೇರ್‌ ತಾಂಗ್‌ ಎಣ್ಣ್‌ನನೆಕೆ ಮಾಡ್‌ಚಿ. |
© 2017, New Life Literature (NLL)