ಎಫೆಸ 5 - ಕೊಡವ ಬೈಬಲ್ಬೊಳಿಲ್ ಬದ್‍ಕ್‍ವದ್ 1 ಆನಗುಂಡ್, ನಿಂಗ ಇಕ್ಕ ದೇವಡ ಪ್ರೀತಿರ ಮಕ್ಕಳಾಯಿತ್ ಉಳ್ಳಾಂಗ್, ನಿಂಗ ಮಾಡ್‌ವ ಎಲ್ಲಾ ವಿಷಯತ್‍ಲು, ದೇವನ ಉದಾರಣೆಯಾಯಿತ್ ಬೆಚ್ಚೊಳಿ. 2 ಕ್ರಿಸ್ತ ನಂಗಳ ಪ್ರೀತಿ ಮಾಡಿತ್, ನಂಗಕಾಯಿತ್, ದೇವಕ್ ಎನ್ನನೆ ಅಂವೊನನೇ ಒರ್ ಸುಗಂದ ವಾಸನೆರ ಕಾಣಿಕೆಯಾಯಿತು, ಬಲಿಯಾಯಿತು ಒಪ್ಪ್‌ಚಿಟ್ಟತೋ ಅನ್ನನೆ ನಿಂಗಳು ಸಹ ಪ್ರೀತಿಲ್ ನಡ್‌ಕಂಡು. 3 ದೇವಡ ಮಕ್ಕಕ್ ಯೋಗ್ಯವಲ್ಲತ ಏದ್ ಲೈಂಗಿಕ ಪಾಪವು, ಅಶುದ್ದ ಕಾರ್ಯವು, ಏದ್ ಬೋಂಡತ ಆಸೆಯು, ಇದ್ಂಡ ಪೆದ ಸಹ ನಿಂಗಡ ಮದ್ಯತ್‍ಲ್ ಇಪ್ಪಕ್ಕಾಗ. 4 ಅನ್ನನೆ ಕೆಟ್ಟ ತಕ್ಕ್, ಬುದ್ದಿಯಿಲ್ಲತ ತಕ್ಕ್ ಪಿಂಞ ಪ್ರಯೋಜನ ಇಲ್ಲತ ತಕ್ಕ್ ನಿಂಗಕ್ ಆಪುಲೆ, ಆಂಡ ಬದ್‍ಲ್ ದೇವಕ್ ವಂದನೆ ಎಣ್ಣಂಡು. 5 ವ್ಯಬಿಚಾರ ಮಾಡ್‌ವಯಿಂಗ, ಅಶುದ್ದ ಕಾರ್ಯ ಮಾಡ್‌ವಯಿಂಗ, ಅತಿ ಆಸೆಯಾನ ವಿಗ್ರಹ ಆರಾದನೆ ಮಾಡ್‌ವಯಿಂಗಳಾನ ಈಂಗ ದಾರ್‌ಕು ದೇವಡ ರಾಜ್ಯವಾಯಿತುಳ್ಳ ಕ್ರಿಸ್ತಂಡ ರಾಜ್ಯತ್‍ಲ್ ಬಾದ್ಯತೆ ಇಲ್ಲೇಂದ್ ನಿಂಗಕ್ ಗೊತ್ತುಂಡಲ್ಲ? 6 ದಾರೂ ನಿಂಗಳ ಪ್ರಯೋಜನ ಇಲ್ಲತ ತಕ್ಕ್‌ರ ಮೂಲಕ ವಂಚನೆ ಮಾಡ್‌ವಕ್ ಬುಡತಿ. ಇಂತ ಪಾಪಕಾಯಿತೇ ದೇವಡ ಬಲ್ಯ ಚೆಡಿ, ಅಂವೊಂಗ್ ತಗ್ಗಿತ್ ನಡ್‌ಕತಯಿಂಗಡ ಮೇಲೆ ಬಪ್ಪ. 7 ಆನಗುಂಡ್, ಅನ್ನನೆ ಮಾಡ್‌ವಯಿಂಗಡ ಕೂಡೆ ನಿಂಗ ಐಕ್ಯತ್‍ಲ್ ಇರತಿ. 8 ಪಂಡ್ ನಿಂಗ ಇರ್‌ಟ್‌ಲ್ ಇಂಜಿರ, ಆಚೇಂಗಿ ಇಕ್ಕ ನಿಂಗ ಒಡೆಯಂಡಲ್ಲಿ ಉಳ್ಳಗುಂಡ್ ಬೊಳಿಲ್ ಉಳ್ಳಿರ; ಆನಗುಂಡ್ ಬೊಳಿರ ಮಕ್ಕಡನೆಕೆ ನಡ್‌ಕಂಡು. 9 ಬೊಳಿರ ಫಲ, ಎಲ್ಲಾ ನಲ್ಲ ಗುಣತ್‍ಲ್, ನೀತಿಲ್ ಪಿಂಞ ಸತ್ಯತ್‍ಲ್ ಇಪ್ಪ. 10 ಒಡೆಯಂಗ್ ಕುಶಿ ಉಳ್ಳದ್ ಎಂತದ್‍ೕಂದ್ ತ್‍ೕಡಿ. 11 ಫಲ ತಪ್ಪಕ್ ಕಯ್ಯತ ಇರ್‌ಟ್‌ರ ಕ್ರಿಯೇಲ್ ಪಾಲ್‍ದಾರಂಗಳಾಯಿತ್ ಆಕತೆ, ಅದ್‍ನ ಎಲ್ಲಾರ್‌ಕು ಗೊತ್ತಾಪನೆಕೆ ಪೊರಮೆ ಕಾಂಬ್‌ಚಿಡಂಡು. 12 ಅಯಿಂಗ ಗುಟ್ಟ್‌ಲ್ ಮಾಡ್‌ವ ಕ್ರಿಯೇನ ಎಣ್ಣುವಕ್ ಸಹ ಞಾಣವಾಯಿತುಂಡಲ್ಲ? 13 ಆಚೇಂಗಿ, ಬೊಳಿರಗುಂಡ್ ಗೊತ್ತಾಪ ಏದ್ ಕ್ರಿಯೇಯು, ಚಾಯಿತೆ ಎಲ್ಲಾರು ಕಾಂಬನೆಕೆ ಆಪ. ಬೊಳಿ ಎಲ್ಲಾನ ಕಾಂಬನೆಕೆ ಮಾಡ್‌ವ. 14 ಆನಗುಂಡ್, ವರಿಯಂಡ್ ಉಳ್ಳ ನೀ, ಎಚ್ಚರ ಎಡ್‌ತ, ಚತ್ತಯಿಂಗಡ ಮದ್ಯತ್ಂಜ ಏಳ್, ಅಕ್ಕ, ನೀಡ ಮೇಲೆ ಕ್ರಿಸ್ತಂಡ ಬೊಳಿ ಮಿನ್ನುವಾಂದ್ ಎಣ್ಣಿತುಂಡ್. 15 ಆನಗುಂಡ್, ನಿಂಗ ಜ್ಞಾನ ಇಲ್ಲತಯಿಂಗಡನೆಕೆ ನಡ್‍ಕತೆ, ಜ್ಞಾನ ಉಳ್ಳಯಿಂಗಡನೆಕೆ ಎಚ್ಚರತ್‍ಲ್ ನಡ್‍ಪಕ್ ನೋಟಂಡು. 16 ಕಾಲ ಮೋಸವಾಯಿತ್ ಉಳ್ಳಾಂಗ್, ಸಮಯತ್‍ನ ಪ್ರಯೋಜನ ಮಾಡಿಯೊಳಿ. 17 ಬುದ್ದಿಯಿಲ್ಲತಯಿಂಗಡನೆಕೆ ಇಪ್ಪಕ್ಕಾಗ, ದೇವಡ ಚಿತ್ತ ಎಂತ್‍ೕಂದ್ ಅರ್ಥ ಮಾಡಿಯೊಳಿ. 18 ನಿಂಗಳ ಪಾಳ್ ಮಾಡ್‌ವ ಕಳ್ಳ್‌ನ ಕುಡಿಚಿತ್ ಕುಡ್‍ಕಂಗಳಾಯಿತ್ ಇರತಿ. ಅದ್ಂಡ ಬದ್‍ಲ್ ಪವಿತ್ರಾತ್ಮತ್‍ಲ್ ದುಂಬಿತ್, 19 ದೇವಡ ಪಾಟ್ ಪಾಡಿಯಂಡ್, ಕೀರ್ತನೆ ಪಾಡಿಯಂಡ್, ಆತ್ಮೀಯ ಪಾಟ್ ಪಾಡಿಯಂಡ್, ಇನ್ನನೆ ಒಬ್ಬಂಗ್ ಒಬ್ಬ ಬುದ್ದಿ ಎಣ್ಣಿಯಂಡ್, ನಿಂಗಡ ಹೃದಯತ್‍ಲ್ ಒಡೆಯನ ಪಾಡಿತ್ ಕೀರ್ತನೆ ಪಾಡಿಯಂಡ್ ಇರಿ. 20 ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಪೆದತ್‍ಲ್ ಎಕ್ಕಾಲು ಎಲ್ಲಾಕಾಯಿತ್ ಅಪ್ಪನಾನ ದೇವಕ್ ವಂದನೆ ಎಣ್ಣಿಯಂಡಿರಿ. ಪೊಣ್ಣ್ ಪಿಂಞ ವಡಿಯ 21 ಕ್ರಿಸ್ತಂಡ ಮೇಲೆ ಉಳ್ಳ ಬಕ್ತಿರಗುಂಡ್ ಒಬ್ಬೊಂಗೊಬ್ಬ ತಗ್ಗಿತ್ ನಡ್‌ಕಂಡು. 22 ಪೊಣ್ಣಾಳುವಳೇ, ಒಡೆಯಂಗ್ ತಗ್ಗಿತ್ ನಡ್‍ಪನೆಕೆ ನಿಂಗ ನಿಂಗಡ ವಡಿಯಂಗಕ್ ತಗ್ಗಿತ್ ನಡ್‌ಕಂಡು. 23 ಕ್ರಿಸ್ತ ಅಂವೊಂಡ ತಡಿಯಾನ ಸಬೇಕ್ ಮಂಡೆಯಾಯಿತ್ ಉಳ್ಳನೆಕೆ, ವಡಿಯ ಅಂವೊಂಡ ಪೊಣ್ಣ್‌ಕ್ ಮಂಡೆಯಾಯಿತ್ ಉಂಡ್; ಕ್ರಿಸ್ತನೇ ತಡಿಕ್ ರಕ್ಷಕನಾಯಿತ್ ಉಂಡ್. 24 ಆನಗುಂಡ್, ಸಬೆ ಕ್ರಿಸ್ತಂಗ್ ತಗ್ಗಿತ್ ನಡ್‍ಪನೆಕೆ, ಪೊಣ್ಣಾಳುವಳೇ ನಿಂಗಡ ಸ್ವಂತ ವಡಿಯಂಗಕ್ ಎಲ್ಲಾ ವಿಷಯತ್‍ಲು ತಗ್ಗಿತ್ ನಡ್‌ಕಂಡು. 25 ವಡಿಯಂಗಳೇ, ನಿಂಗ ನಿಂಗಡ ಪೊಣ್ಣಾಳುವಳ ಪ್ರೀತಿ ಮಾಡಂಡು, ಕ್ರಿಸ್ತ ಸಹ ಅನ್ನನೆ ಸಬೇನ ಪ್ರೀತಿ ಮಾಡಿತ್, ಅಂವೊನೇ ಅವಕಾಯಿತ್ ತಾಂಡ ಜೀವತ್‍ನ ಕೊಡ್‍ತತ್. 26 ಅಂವೊ ಅಂವೊಂಡ ಸಬೇನ ದೇವಡ ವಾಕ್ಯ ಎಣ್ಣುವ ನೀರ್‌ಲ್ ಮುಕ್ಕಿತ್ ಕತ್ತಿತ್, ಪವಿತ್ರವಾಯಿತ್ ಮಾಡ್‌ವಕು, 27 ಕಲೆ, ಚುಕ್ಕ್, ಚುಳ್ಳ್ ಇಲ್ಲತೆ ಪವಿತ್ರವಾಯಿತ್ ಏದ್ ಕುತ್ತ ಇಲ್ಲತೆ ಮಹಿಮೆ ದುಂಬ್‍ನ ಸಬೇಯಾಯಿತ್ ತಾಂಡ ಮಿಂಞತ್ ನಿಪ್ಪ್‌ಚಿಡುವಕಾಯಿತೂ ತಾಂಗ್ ತಾನೆ ಅದ್ಂಗಾಯಿತ್ ಒಪ್ಪ್‌ಚಿಟ್ಟತ್. 28 ಅನ್ನನೆ ವಡಿಯಂಗಳು, ನಿಂಗಡ ಸ್ವಂತ ತಡೀನ ಪ್ರೀತಿ ಮಾಡ್‌ವನೆಕೆ, ನಿಂಗಡ ಪೊಣ್ಣಾಳುವಳ ಪ್ರೀತಿ ಮಾಡಂಡು; ತಾಂಡ ಪೊಣ್ಣ್‌ನ ಪ್ರೀತಿ ಮಾಡ್‌ವಂವೊ ಅಂವೊನ ಅಂವೊನೇ ಪ್ರೀತಿ ಮಾಡಿಯಂಡುಂಡ್. 29 ತಾಂಡ ಸ್ವಂತ ತಡೀನ ದ್ವೇಶ ಮಾಡ್‌ವಂವೊ ಒಬ್ಬನು ಇಲ್ಲೆ; ಆಂಡ ಬದ್‍ಲ್, ಕ್ರಿಸ್ತ ತಾಂಡ ಸಬೆ ಎಣ್ಣುವ ತಡೀನ ಎನ್ನನೆ ಚಾಕಿತ್ ಕಾಪಾಡಿಯಂಡ್ ಉಂಡೋ ಅನ್ನನೆ ವಡಿಯನು ತಾಂಡ ತಡೀನ ಚಾಕಿತ್ ಕಾಪಾಡಿಯಂಡುಂಡ್. 30 ನಂಗ ಅಂವೊಂಡ ತಡೀರ ಬಾಗವಾಯಿತ್ ಉಂಡ್. 31 ಇದ್ಂಗಾಯಿತ್ ವಡಿಯ ಅಂವೊಂಡ ಅಪ್ಪವ್ವನ ಬುಟ್ಟಿತ್ ತಾಂಡ ಪೊಣ್ಣ್‌ರ ಕೂಡೆ ಒಂದಾಯಿತ್ ಕೂಡಿತ್, ಅಯಿಂಗ ದಂಡಾಳು ಒರೇ ತಡಿಯಾಯಿತ್‌ಪ್ಪ. 32 ಈ ಮರ್ಮ ಬಲ್ಯದ್. ಇಕ್ಕ ನಾನ್ ಕ್ರಿಸ್ತ ಪಿಂಞ ಸಬೆರ ವಿಷಯತ್‍ನ ಎಣ್ಣಿಯಂಡುಂಡ್. 33 ಎನ್ನನೆ ಆಚೇಂಗಿಯು, ಪ್ರತಿ ಒಬ್ಬನು ಅಂವೊನ ತಾನೆ ಪ್ರೀತಿ ಮಾಡ್‌ವನೆಕೆ ತಾಂಡ ಪೊಣ್ಣ್‌ನ ಪ್ರೀತಿ ಮಾಡಂಡು; ಪ್ರತಿ ಪೊಣ್ಣಾಳು ಅವಡ ವಡಿಯಂಗ್ ಮರ್ಯಾದೆ ಕೊಡ್‍ಕಂಡು. |
© 2017, New Life Literature (NLL)