ಅಪೊಸ್ತಲ 4 - ಕೊಡವ ಬೈಬಲ್ಪೇತ್ರ ಪಿಂಞ ಯೋಹಾನ ಯೆಹೂದ್ಯ ಸಮಾಜತ್‍ರ ಪೆರಿಯಯಿಂಗಡ ಮಿಂಞತ್ ನಿಪ್ಪದ್ 1 ಪೇತ್ರ ಪಿಂಞ ಯೋಹಾನ, ಜನಡ ಪಕ್ಕ ಇಂಞು ತಕ್ಕ್ ಪರ್‌ದಂಡ್ ಇಪ್ಪಕ, ಯಾಜಕಂಗ ಪಿಂಞ ದೇವಾಲಯತ್‍ರ ಸೇನೆ ಅದಿಕಾರಿಯ ಪಿಂಞ ಸದ್ದುಕಾಯಂಗ ಅಲ್ಲಿಕ್ ಬಾತ್. 2 ಪೇತ್ರ ಪಿಂಞ ಯೋಹಾನ ಜನಕ್, ಯೇಸು ಚಾವ್‍ಯಿಂಜ ಜೀವವಾಯಿತ್ ಬಂದಗುಂಡ್, ಚತ್ತಯಿಂಗ ಪುನಃ ಜೀವವಾಯಿತ್ ಎದ್ದಿತ್ ಬಪ್ಪಾಂದ್ ಬೋದನೆ ಮಾಡ್‌ವಾನ ನೋಟಿತ್, ಅಯಿಂಗಕ್ ಬಾರಿ ಚೆಡಿ ಬಾತ್. 3 ಅಯಿಂಗ ಪೇತ್ರ ಪಿಂಞ ಯೋಹಾನನ ಪುಡ್‌ಚಿತ್, ಬಯಿಟಾಯಿತ್ಂಜಗುಂಡ್ ಅಯಿಂಗಳ ಪಿತ್ಯಾಂದ್ ಪೊಲಾಕಕತ್ತನೆ ಜೈಲ್‌ಕ್ ಇಟ್ಟತ್. 4 ಆಚೇಂಗಿ, ಪೇತ್ರ ಪಿಂಞ ಯೋಹಾನಂಡ ವಾಕ್ಯತ್‍ನ ಕ್‍ೕಟ ದುಂಬ ಜನ ಅದ್‍ನ ನಂಬ್‍ಚಿ. ಆಣಾಳ್‍ವ ಮಾತ್ರ ಸುಮಾರ್ ಅಂಜಾಯಿರಚ್ಚಕ್ ಇಲ್ಲಿಕತ್ತನೆ ಆಚಿ. 5 ಪಿತ್ಯಾಂದ್ ಯೆಹೂದ್ಯಂಗಡ ಅದಿಕಾರಿಯ, ಪೆರಿಯಯಿಂಗ, ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಎಲ್ಲಾರು ಯೆರೂಸಲೇಮ್‍ಲ್ ಒಟ್ಟ್ ಕೂಡ್‍ಚಿ. 6 ಅಲ್ಲಿ ಮುಕ್ಯ ಯಾಜಕನಾನ ಅನ್ನಾ, ಕಾಯಫ, ಯೋಹಾನ, ಅಲೆಕ್ಸಾಂದ್ರ ಪಿಂಞ ಮಹಾ ಯಾಜಕಂಡ ಮನೆಕಾರಳು ಇಂಜತ್. 7 ಈಂಗ, ಪೇತ್ರ ಪಿಂಞ ಯೋಹಾನನ ಅಯಿಂಗಡ ಮದ್ಯತ್‍ಲ್ ನಿಪ್ಪ್‌ಚಿಟ್ಟಿತ್: ನಿಂಗ ಏದ್ ಶಕ್ತಿಲ್, ಅಥವ ದಾಡ ಪೆದತ್‍ಲ್ ಇನ್ನನೆ ಮಾಡಿರಾಂದ್ ಕ್‍ೕಟತ್. 8 ಅಕ್ಕ ಪೇತ್ರ ಪವಿತ್ರಾತ್ಮತ್‍ಲ್ ದುಂಬಿತ್, ಅಯಿಂಗಳ ನೋಟಿತ್: ಜನಡ ಅದಿಕಾರಿಯಳೇ, ಇಸ್ರಾಯೇಲ್‍ರ ಪೆರಿಯಯಿಂಗಳೇ, 9 ಇಲ್ಲಿ ಕುಂಟನಾಯಿತ್ಂಜ ಈ ಮನುಷ್ಯಂಗ್ ವಾಸಿಯಾನ ನಲ್ಲ ಕಾರ್ಯತ್‍ರ ವಿಷಯಕಾಯಿತ್ ನಿಂಗ ನಂಗಳ ವಿಚಾರಣೆ ಮಾಡ್‌ವದಾಚೇಂಗಿ, 10 ನಿಂಗಕ್ ಪಿಂಞ ಇಸ್ರಾಯೇಲ್ ಜನ ಎಲ್ಲಾರ್‌ಕು ಅರಿಚಿಡುವದ್ ಎಂತ ಎಣ್ಣ್‌ಚೇಂಗಿ: ನಿಂಗಡಗುಂಡ್ ಶಿಲುಬೇಕ್ ಇಟ್ಟಿತ್ ಪಿಂಞ ದೇವ ಚತ್ತಯಿಂಗಡ ಮದ್ಯತ್ಂಜ ಎಪ್ಪ್‌ನ ನಜರೇತ್‍ರ ಯೇಸು ಕ್ರಿಸ್ತಂಡ ಪೆದತ್ಂಜಲೇ ಈ ಮನುಷ್ಯ ವಾಸಿಯಾಯಿತ್ ನಿಂಗಡ ಮಿಂಞತ್ ನಿಂದಿತುಂಡ್‍ೕಂದ್ ಎಣ್ಣುವೀಂದ್ ಎಣ್ಣ್‌ಚಿ. 11 ಮನೆ ಕೆಟ್ಟ್‌ವಯಿಂಗಳಾನ ನಿಂಗ, ಬೋಂಡಾಂದ್ ಚಾಡ್‌ನ ಕಲ್ಲೇ ಮನೆರ ಮೂಲೆ ಕಲ್ಲಾಚಿ. 12 ಅಂವೊನ ಬುಟ್ಟಿತ್ ಬೋರೆ ದಾರ್‌ಕು ನಂಗಳ ರಕ್ಷಣೆ ಮಾಡ್‌ವಕ್ ಕಯ್ಯುಲೆ. ಬಾನತ್‍ರ ಅಡಿಲ್, ಮನುಷ್ಯಂಗಡ ಮದ್ಯತ್‍ಲ್ ಯೇಸುರ ಪೆದತ್‍ನ ಬುಟ್ಟಿತ್ ಬೋರೆ ಒರ್ ಪೆದವು ನಂಗಡ ರಕ್ಷಣೆಕ್ ಕೊಡ್‍ತಿತ್‌ಲ್ಲೆ. 13 ಪೇತ್ರ ಪಿಂಞ ಯೋಹಾನ ದೈರ್ಯತ್‍ಲ್ ತಕ್ಕ್ ಪರಿವಾನ ಅಯಿಂಗ ನೋಟಿತ್, ಈಂಗ ವಿದ್ಯ ಇಲ್ಲತಯಿಂಗಳು, ಸಾದಾರಣ ಮನುಷ್ಯಂಗಾಂದು ಗೊತ್ತಾಯಿತ್ ಆಶ್ಚರ್ಯಪಟ್ಟಿತ್, ಈಂಗ ಯೇಸುರ ಕೂಡೆ ಇಂಜಯಿಂಗಾಂದ್ ಅಯಿಂಗಕ್ ಗೊತ್ತಾಚಿ. 14 ವಾಸಿಯಾನ ಆ ಮನುಷ್ಯ, ಪೇತ್ರ ಪಿಂಞ ಯೋಹಾನಂಡ ಪಕ್ಕ ನಿಂದಂಡಿಂಜಗುಂಡ್, ಅಯಿಂಗಕ್ ವಿರೋದವಾಯಿತ್ ಒಂದು ಎಣ್ಣ್‌ವಕ್ ಕಯ್ಯತೆ ಆಚಿ. 15 ಅಕ್ಕ ಅಯಿಂಗಳ ಆ ಸಬೇಯಿಂಜ ಪೊರಮೆ ಪೋಪಕ್ ಅಪ್ಪಣೆ ಕೊಡ್‌ತಿತ್, ಅಯಿಂಗಯಿಂಗಳೇ ಆಲೋಚನೆ ಮಾಡ್‍ಚಿ. 16 ಈ ಮನುಷ್ಯಂಗಳ ನಂಗ ಎಂತ ಮಾಡನ? ಯೆರೂಸಲೇಮ್‍ಲ್ ವಾಸ ಉಳ್ಳ ಎಲ್ಲಾ ಜನಕು ಗೊತ್ತಾಪನೆಕೆ ಒರ್ ಬಲ್ಯ ಅದ್ಬುತ ಕಾರ್ಯತ್‍ನ ಮಾಡಿರ್‌ತ್, ಅದ್‍ನ ಇಲ್ಲೇಂದ್ ನಂಗ ಎಣ್ಣುವಕ್ ಕಯ್ಯುಲೆ. 17 ಆನಗುಂಡ್, ಅಯಿಂಗಡ ಬೋದನೆ ಇಂಞು ಪಬ್ಬತನೆಕೆ, ಯೇಸುರ ವಿಷಯತ್‍ನ ಅಯಿಂಗ ಬೋದನೆ ಮಾಡ್‌ವಕ್ಕಾಗಾಂದ್ ಎಚ್ಚರ ಮಾಡಂಡೂಂದ್ ತೀರ್ಮಾನ ಮಾಡ್‍ಚಿ. 18 ಅಯಿಂಗ ಪೇತ್ರ ಪಿಂಞ ಯೋಹಾನನ ಕಾಕುವಂಜಿ: ಯೇಸುರ ಪೆದತ್‍ಲ್ ಒರ್ ತಕ್ಕು ಪರಿಯುವಕ್ಕಾಗಾಂದ್ ಆಜ್ಞೆ ಕೊಡ್‍ತತ್. 19 ಆಚೇಂಗಿ ಪೇತ್ರ ಪಿಂಞ ಯೋಹಾನ ಅಯಿಂಗಕ್: ದೇವಡ ತಕ್ಕ್‌ಕ್ ಬಗ್ಗಿತ್ ನಡ್‍ಕತೆ ನಿಂಗಡ ತಕ್ಕ್‌ಕ್ ಬಗ್ಗಿತ್ ನಡ್‍ಪದ್ ದೇವಡ ಮಿಂಞತ್ ನ್ಯಾಯವಾಂದ್ ನಿಂಗಳೇ ಗೇನ ಮಾಡಿ. 20 ನಂಗ ಕಂಡಾನ, ಕ್‍ೕಟಾನ, ಎಣ್ಣತೆ ಇಪ್ಪಕ್ಕಾಗಾಂದ್ ಉತ್ತರ ಕೊಡ್‍ತತ್. 21 ಅಲ್ಲಿ ಆನ ಅದ್ಬುತ ಕಾರ್ಯಕಾಯಿತ್ ಜನ ದೇವನ ತುದಿಚಂಡ್ ಇಂಜಗುಂಡ್, ಎನ್ನನೆ ಶಿಕ್ಷೆ ಕೊಡ್‍ಕಂಡೂಂದ್ ಗೊತ್ತಿಲ್ಲತೆ, ಅಯಿಂಗಳ ಇಂಞು ಬೊತ್ತಿಚಿಟ್ಟ್‌ರ್‍ವಂಜಿ ಬುಟ್ಟ್‌ರ್‌ತ್. 22 ಅದ್ಬುತವಾಯಿತ್ ವಾಸಿ ಆನ ಆ ಮನುಷ್ಯಂಗ್ ಸುಮಾರ್ ನಾಪದ್ ವಯಸ್‍ಕ್ ಮೇಲೆ ಆಯಿತ್ಂಜತ್. ದೈರ್ಯತ್‍ಲ್ ಇಪ್ಪಕ್ ಶಿಷ್ಯಂಗಡ ಬೋದನೆ 23 ಈಂಗ ಬುಡ್‍ಗಡೆ ಆನ ಪಿಂಞ, ಅಯಿಂಗಡ ಸ್ವಂತ ಜನಡ ಪಕ್ಕ ಪೋಯಿತ್, ಮುಕ್ಯ ಯಾಜಕಂಗ ಪಿಂಞ ಪೆರಿಯಯಿಂಗ ಈಂಗಕ್ ಎಣ್ಣ್‌ನದೆಲ್ಲ ಅಯಿಂಗಕ್ ಎಣ್ಣ್‌ಚಿ. 24 ಅಯಿಂಗ ಅದ್‍ನ ಕ್‍ೕಟಿತ್, ಒರೇ ಮನಸ್ಸ್‌ಲ್ ದೇವನ ನೋಟಿತ್ ಜೋರಾಯಿತ್ ಪ್ರಾರ್ಥನೆ ಮಾಡ್‍ಚಿ. ಅಕ್ಕ ಅಯಿಂಗ: ಒಡೆಯನೇ, ಬೂಮಿ, ಬಾನ, ಸಮುದ್ರ ಪಿಂಞ ಅದ್‍ಲ್ ಉಳ್ಳ ಎಲ್ಲಾನ ಸೃಷ್ಟಿ ಮಾಡ್‍ನ ದೇವ ನೀನ್. 25 ನಂಗಡ ಅಜ್ಜನಾನ ದಾವೀದ ರಾಜನು ನೀಡ ಸೇವಕನುವಾನ ಅಂವೊನಗುಂಡ್ ಪವಿತ್ರಾತ್ಮತ್‍ರ ಮೂಲಕ ನೀನ್: ಯೆಹೂದ್ಯರಲ್ಲತ ಜನ ಎನ್ನಂಗ್ ಚೆಡಿಲ್ ಕಳಿಪ, ಜನ ಎನ್ನಂಗ್ ಕೆಟ್ಟದ್ ಮಾಡ್‌ವಕ್ ಮುಂಡತೆ ಆಲೋಚನೆ ಮಾಡ್‌ವ? 26 ಒಡೆಯಂಗ್ ವಿರೋದವಾಯಿತು, ಅಂವೊ ಅಬಿಷೇಕ ಮಾಡ್‍ನಂವೊಂಗ್ ವಿರೋದವಾಯಿತು, ಈ ಲೋಕತ್‍ರ ರಾಜಂಗ ಎದ್ದ್ ನಿಂದಿತ್, ಅದಿಕಾರಿಯಂಗಡ ಕೂಟ ಕೂಡ್‍ಚೀಂದ್ ಎಣ್ಣಿತುಳ್ಳಿಯಲ್ಲ. 27 ನೇರಾಯಿತು, ಹೆರೋದ, ಪೊಂತ್ಯ ಪಿಲಾತ, ಯೆಹೂದ್ಯಂಗ ಅಲ್ಲತ ಜನ ಪಿಂಞ ಇಸ್ರಾಯೇಲ್‍ರ ಜನ ಎಲ್ಲಾರು ಈ ಪಟ್ಟಣತ್‍ಲ್ ಕೂಡಿತ್, ನೀನ್ ಅಬಿಷೇಕ ಮಾಡ್‍ನ ನೀಡ ಪವಿತ್ರವಾನ ಸೇವಕನಾನ ಯೇಸುಕ್ ವಿರೋದವಾಯಿತ್ ಕೆಟ್ಟ ಆಲೋಚನೆ ಮಾಡಿತ್ ಬಾತ್. 28 ನೀಡ ಅದಿಕಾರತ್ಂಜ, ನೀಡ ಚಿತ್ತತ್‍ರನೆಕೆ ನೀನ್ ತೀರ್ಮಾನ ಮಾಡ್‍ನನೆಕೆ ಅಯಿಂಗ ಇದ್‍ನೆಲ್ಲ ಮಾಡ್‍ಚಿ. 29 ಆಚೇಂಗಿ ಇಕ್ಕ ಒಡೆಯನೇ, ಅಯಿಂಗ ನಂಗಳ ಬೊತ್ತ್‌ಚಿಟ್ಟದ್‍ನ ನೀನ್ ನೋಟಿತ್, ನೀಡ ಸೇವಕಂಗಳಾನ ನಂಗಕ್ ನೀಡ ವಾಕ್ಯತ್‍ನ ಬೋದನೆ ಮಾಡ್‌ವಕ್ ದೈರ್ಯ ಕೊಡ್. 30 ನೀಡ ಪವಿತ್ರ ಸೇವಕನಾನ ಯೇಸುರ ಪೆದತ್‍ಲ್ ಗುರ್‍ತ್‍ನ ಮಾಡಿತ್, ಆಶ್ಚರ್ಯ ಕಾರ್ಯ ಆಪನೆಕೆ ಮಾಡಿತ್, ಪಿಂಞ ವಾಸಿ ಮಾಡ್‌ವಕಾಯಿತ್ ನೀನ್ ಶಕ್ತಿನ ಕೊಡ್‌ತಿತ್ ಅನುಗ್ರಹ ಮಾಡಂಡೂಂದ್ ಪ್ರಾರ್ಥನೆ ಮಾಡ್‍ಚಿ. 31 ಇನ್ನನೆ ಅಯಿಂಗ ಪ್ರಾರ್ಥನೆ ಮಾಡ್‌ವಕ, ಅಯಿಂಗ ಕೂಡಿತ್ಂಜ ಜಾಗ ಅಲ್ಲಾಡ್‌ಚಿ. ಅಯಿಂಗ ಎಲ್ಲಾರು ಪವಿತ್ರಾತ್ಮತ್‍ಲ್ ದುಂಬಿತ್ ದೇವಡ ವಾಕ್ಯತ್‍ನ ದೈರ್ಯತ್‍ಲ್ ಎಣ್ಣ್‌ಚಿ. ಯೇಸುನ ನಂಬ್‍ನಯಿಂಗ ಅಯಿಂಗಡ ಸೊತ್ತ್‌ನ ಪಾಲ್ ಮಾಡ್‍ನದ್ 32 ಯೇಸುನ ನಂಬ್‍ನಯಿಂಗ ಎಲ್ಲಾರು ಒರೇ ಮನಸ್ಸ್‌ಲ್ ಒರೇ ಹೃದಯತ್‍ಲ್ ಬದ್‍ಕಿಯಂಡಿಂಜತ್. ಒಬ್ಬ ಸಹ ತಾಂಡ ವಸ್ತುನ ಅಂವೊಂಗ್ ಮಾತ್ರಾಂದ್ ಎಣ್ಣಿಯಂಡಿಂಜಿಲೆ; ಅಲ್ಲಿ ಉಳ್ಳ ಎಲ್ಲಾನ ಎಲ್ಲಾರ್‌ಕು ಕೂಡನದಾಯಿತ್ಂಜತ್. 33 ಅಪೊಸ್ತಲಂಗ ಒಡೆಯನಾನ ಯೇಸು ಕ್ರಿಸ್ತ ಚಾವ್‍ಯಿಂಜ ಜೀವವಾಯಿತ್ ಬಂದ ವಿಷಯತ್‍ನ ಬಲ್ಯ ಶಕ್ತಿಲ್ ಸಾಕ್ಷಿ ಕೊಡ್‍ತಂಡಿಂಜತ್. ಅಯಿಂಗ ಎಲ್ಲಾಡ ಮೇಲೆ ದೇವಡ ಕೃಪೆ ಪೂರ್ತಿಯಾಯಿತ್ಂಜತ್. 34 ಅಯಿಂಗಡ ಮದ್ಯತ್ ಒಬ್ಬಂಗ್ ಸಹ ಏದು ಕಮ್ಮಿಯಾಯಿತ್ಂಜಿಲೆ. ಎನ್ನಂಗೆಣ್ಣ್‌ಚೇಂಗಿ, ಬೇಲ್ ಪಿಂಞ ಮನೆ ಇಂಜಯಿಂಗ ಬೋಂಡುವಕತ್ತನೆ ಮಾರ್‌ವಂಜಿ ಅದ್ಂಡ ಪಣತ್‍ನ ಅಕ್ಕಕ್ಕ ಕೊಂಡ್‌ಬಂತ್, 35 ಅದ್‍ನ ಅಪೊಸ್ತಲಂಗಡ ಕಾಲ್‍ರ ಅಡಿಕ್ ಬೆಚ್ಚತ್. ಪಿಂಞ ಅಪೊಸ್ತಲಂಗ ಅದ್‍ನ ಪ್ರತಿ ಒಬ್ಬಂಗ್ ಎಚ್ಚಕ್ ಅವಸ್ಯ ಇಂಜತೋ ಅಚ್ಚಕ್ ಪಾಲ್ ಮಾಡಿ ಕೊಡ್‍ತಂಡಿಂಜತ್. 36 ಇನ್ನನೆ ಮಾಡಿಯಂಡ್ ಉಳ್ಳಯಿಂಗಡಡೆ‍ಲ್ ಕುಪ್ರ ದೇಶತ್ಂಜ ಬಂದ ಲೇವಿಯ ಕುಲಕ್ ಕೂಡ್‍ನ ಒಬ್ಬನು, ಒತ್ತಾಸೆ ಮಾಡ್‌ವಂವೋಂದ್ ಅಪೊಸ್ತಲಂಗ ಕಾಕ್‍ನ ಬಾರ್ನಬ ಎಣ್ಣುವ ಪೆದ ಉಳ್ಳ ಯೋಸೇಫ, 37 ಅಂವೊಂಗ್ ಇಂಜ ಜಾಗತ್‍ಲ್ ಚೆನ್ನ ಮಾರಿತ್ ಅದ್ಂಡ ಪಣತ್‍ನ ಅಪೊಸ್ತಲಂಗಡ ಕಾಲ್‍ರ ಅಡಿಕ್ ಬೆಚ್ಚತ್. |
© 2017, New Life Literature (NLL)