ಅಪೊಸ್ತಲ 27 - ಕೊಡವ ಬೈಬಲ್ಪೌಲಂಡ ರೋಮ್ ಪಟ್ಟಣತ್‍ರ ಪ್ರಯಾಣ 1 ನಂಗ ಸಮುದ್ರ ಮಾರ್ಗವಾಯಿತ್ ಇತಾಲ್ಯ ದೇಶಕ್ ಪೋಕಂಡೂಂದ್ ತೀರ್ಮಾನ ಮಾಡ್‍ನ ಪಿಂಞ ಔಗುಸ್ತ ಎಣ್ಣುವ ಚಕ್ರವರ್ತಿರ ಪೆದ ಉಳ್ಳ ಪಟಾಲತ್‍ರ ನೂರ್ ಸಿಪಾಯಿಯಂಗಡ ಅದಿಕಾರಿಯಾನ ಯೂಲ್ಯ ಎಣ್ಣ್‌ವಂವೊಂಡ ಪಕ್ಕ ಪೌಲ ಪಿಂಞ ಅಂವೊಂಡ ಕೂಡೆ ಇಂಜ ಚೆನ್ನ ಕೈದಿಯಳ ಒಪ್ಪ್‌ಚಿಟ್ಟತ್. 2 ಅಕ್ಕ ನಂಗ ಆಸ್ಯ ಸೀಮೆರ ಅದ್ರಮಿತ್ತಿಯ ಎಣ್ಣುವ ಪಟ್ಟಣತ್ಂಜ ಬಂದ ಹಡಗ್‍ಲ್ ಪತ್ತ್‌ಚಿ. ಆ ಹಡಗ್ ಆಸ್ಯ ಸೀಮೆರ ಕರಾವಳಿರ ಬೋರೆ ಬೋರೆ ಜಾಗಕ್ ಪೋಪಕ್ ಇಂಜತ್. ಅಯಿಂಗ ಅದ್‍ಲ್ ನಂಗಳ ಅಯಿಚತ್. ಮಕೆದೋನ್ಯ ಸೀಮೆಕ್ ಕೂಡ್‍ನ ಥೆಸಲೊನೀಕ ಪಟ್ಟಣತ್‍ರ ಅರಿಸ್ತಾರ್ಕ ಎಣ್ಣ್‌ವಂವೊ ನಂಗಡ ಕೂಡೆ ಇಂಜತ್. 3 ಪಿತ್ಯಾಂದ್ ನಂಗ ಸೀದೋನ್ ಎಣ್ಣುವ ಹಡಗ್ ನಿಪ್ಪಲ್ಲಿಕ್ ಎತ್ತಿತ್ ಹಡಗ್‍ನ ನಿಪ್ಪ್‌ಚಿಟ್ಟತ್. ಯೂಲ್ಯ ಪೌಲಂಗ್ ದಯೆ ಕಾಟಿತ್, ಪೌಲ ತಾಂಡ ಸ್ನೇಹಿತಂಗಡ ಪಕ್ಕ ಪೋಯಿತ್ ಅಂವೊಂಗ್ ಬೋಂಡಿಯಾನ ಸಹಾಯತ್‍ನ ಪಡೆಯುವನೆಕೆ ಅಪ್ಪಣೆ ಕೊಡ್‍ತತ್. 4 ನಂಗ ಅಲ್ಲಿಂಜ ಪೊರಟಿತ್, ಎದಿಕೆ ಗಾಳಿ ಬೀಜಿಯಂಡಿಂಜಗುಂಡ್ ಗಾಳಿ ಬಂದಂಡುಳ್ಳ ದಿಕ್ಕ್‌ಂಜ ಕುಪ್ರ ದ್ವೀಪತ್‍ರ ಆಬರಿಲ್ ಪ್ರಯಾಣ ಮಾಡ್‍ಚಿ. 5 ಪಿಂಞ ಕಿಲಿಕ್ಯ ಪಂಫುಲ್ಯ ಸೀಮೆರ ಸಮುದ್ರತ್‍ರ ಮಾರ್ಗವಾಯಿತ್ ಪ್ರಯಾಣ ಮಾಡಿತ್, ಲುಕೀಯ ಸೀಮೆಲ್ ಉಳ್ಳ ಮುರ ಎಣ್ಣುವ ಪಟ್ಟಣಕ್ ಬಾತ್. 6 ಅಲ್ಲಿ ಅಲೆಕ್ಸಾಂದ್ರಿಯ ಪಟ್ಟಣತ್ಂಜ ಇತಾಲ್ಯ ದೇಶಕ್ ಪೋಪ ಒರ್ ಹಡಗ್‍ನ ನೂರ್ ಸಿಪಾಯಿಯಡ ಅದಿಕಾರಿ ಕಂಡಿತ್, ನಂಗಳ ಆ ಹಡಗ್‍ಲ್ ಪತ್ತ್‌ಚಿಟ್ಟತ್. 7 ಬಿರ್‌ಗಾಳಿ ನಂಗಳ ಮಿಂಞಕ್ ಪೋಪಕ್ ಬುಡತಗುಂಡ್, ದುಂಬ ದಿವಸ ನಿದಾನವಾಯಿತ್ ಕಷ್ಟತ್‍ಲ್ ಕ್ನೀದ ಪಟ್ಟಣಕ್ ಎದ್‍ರಾಯಿತ್ ಬಂದಿತ್, ಗಾಳಿ ಬಂದಂಡುಳ್ಳ ದಿಕ್ಕ್‌ಂಜ ಕ್ರೇತ ದ್ವೀಪತ್‍ರ ಆಬರಿಕ್ ಪೋಯಿತ್ ಸಲ್ಮೋನೆ ಊರ್‌ಕ್ ಮಿಂಞ ಬಾತ್. 8 ಆ ದ್ವೀಪತ್‍ರ ಕರಾವಳಿನ ದುಂಬ ಕಷ್ಟತ್‍ಲ್ ದಾಟಿತ್, ನಲ್ಲ ಸ್ತಾನಾಂದ್ ಜನ ಕಾಕುವ ಜಾಗಕ್ ಕೂಡ್‍ಚಿ. ಅದ್ಂಡ ಪಕ್ಕ ಲಸಾಯ ಎಣ್ಣುವ ಪಟ್ಟಣ ಇಂಜತ್. 9 ಇನ್ನನೆ ನಂಗ ದುಂಬ ದಿವಸತ್‍ನ ಕಯಿಚಿತ್, ಯೆಹೂದ್ಯಂಗಡ ಆ ಪಟ್ಟಣಿ ನಮ್ಮೆ ದಿನ ಕಯಿಂಜತ್. ಇಂಞು ಮಿಂಞಕ್ ಸಮುದ್ರ ಮಾರ್ಗವಾಯಿತ್ ಪ್ರಯಾಣ ಮಾಡ್‌ವಕ್ ಅನುಕೂಲವಾನ ಕಾಲ ಅಲ್ಲ. ಆನಗುಂಡ್, ಪೌಲ ಹಡಗ್‍ಲ್ ಉಳ್ಳಯಿಂಗಳ ನೋಟಿತ್: 10 ಈ ಪ್ರಯಾಣತ್‍ಂಜ ಹಡಗ್‍ಕೂ, ಅದ್‍ಲ್ ಉಳ್ಳ ಸಾಮಾನಕು ಮಾತ್ರ ಅಲ್ಲತೆ ನಂಗಡ ಪ್ರಾಣಕ್ ಕಷ್ಟವು, ದುಂಬ ನಷ್ಟವು ಆಪದ್ ನಾಕ್ ಗೊತ್ತಾಯಂಡುಂಡ್‍ೕಂದ್ ಅಯಿಂಗಳ ಎಚ್ಚರ ಮಾಡ್‍ಚಿ. 11 ಆಚೇಂಗಿ ನೂರ್ ಸಿಪಾಯಿಯಡ ಅದಿಪತಿ, ಪೌಲ ಎಣ್ಣುವ ತಕ್ಕ್‌ಕಿಂಜ ಹಡಗ್‍ರ ನಾಯಕ ಪಿಂಞ ಹಡಗ್‍ರ ಎಜಮಾನ ಎಣ್ಣುವ ತಕ್ಕ್‌ಕ್ ದುಂಬ ಕೆಮಿ ಕೊಡ್‍ತತ್. 12 ಆ ಹಡಗ್ ನಿಪ್ಪ್‌ಚಿಡುವ ಸ್ತಾನ, ಕುಳ್‌ರ್ ಕಾಲತ್‍ಲ್ ಒಳಿಯುವಕ್ ಅನುಕೂಲವಾಯಿತ್ ಇಲ್ಲತೆಗುಂಡ್, ಆ ಜಾಗತ್‍ನ ಬುಟ್ಟಿತ್, ಅಲ್ಲಿಂಜ ಫೊಯಿನಿಕೆ ಎಣ್ಣುವ ಜಾಗಕ್ ಪೋಪಕ್ ಕಯ್ಯುವೇಂಗಿ ಅಲ್ಲಿಕ್ ಎತ್ತಿತ್ ಅಲ್ಲಿ ಒಳಿಯಂಡೂಂದ್ ದುಂಬ ಜನ ಎಣ್ಣ್‌ನಗುಂಡ್ ಅನ್ನನೆ ತೀರ್ಮಾನ ಮಾಡ್‍ಚಿ. ಆ ಜಾಗ ತೆಕ್ಕ್-ಪಡ್‍ಞಾರ್ ದಿಕ್ಕ್ ಪಿಂಞ ಬಡಕ್-ಪಡ್‍ಞಾರ್ ದಿಕ್ಕ್‌ನ ನೋಟಿತ್ ಇಂಜ ಕ್ರೇತ ದ್ವೀಪತ್‍ರ ಒರ್ ಹಡಗ್ ಸ್ತಾನವಾಯಿತ್ಂಜತ್. ಬಿರ್‌ಗಾಳಿಲ್ ಚಿಕ್ಕ್‌ನದ್ 13 ತೆಕ್ಕ್ ದಿಕ್ಕ್‌ಂಜ ಗಾಳಿ ಮೆಲ್ಲೆ ಬೀಜಿಯಂಡ್ ಇಂಜಗುಂಡ್, ಅಯಿಂಗ ಗೇನಮಾಡ್‍ನನೆಕೆ ಎಲ್ಲಾ ಚಾಯಿ ಆಯಂಡುಂಡ್‍ೕಂದ್ ಗೇನ ಮಾಡಿತ್, ನಂಗೂರತ್‍ನ ಮೆಲ್ಲೆ ಕೊಡಿಕ್ ಬಲ್‍ಚಿತ್, ಅಲ್ಲಿಂಜ ಕ್ರೇತ ದ್ವೀಪತ್‍ರ ಕರಾವಳಿರ ಪಕ್ಕ ಪೋಚಿ. 14 ಆಚೇಂಗಿ ಚೆನ್ನ ನೇರ ಆಪಕ್ ಮಿಂಞಲೇ, ಊರಕಲೋನ್ ಎಣ್ಣುವ ಬಲ್ಯ ಬಿರ್‌ಗಾಳಿ ಆ ದ್ವೀಪತ್ಂಜ ಹಡಗ್‍ನ ಮುಟ್ಟ್‌ಚಿ. 15 ಆ ಗಾಳಿಲ್ ಹಡಗ್ ಚಿಕ್ಕಿತ್, ಎದ್‍ರಾಯಿತ್ ಮಿಂಞಕ್ ಪೋಪಕ್ ಕಯ್ಯತಗುಂಡ್, ಗಾಳಿ ಬಲ್‍ಚಂಡ್ ಪೋಪ ಮಾರ್ಗತ್‍ಲ್ ಹಡಗ್ ಪೋಯಂಡಿಂಜತ್. 16 ಅನ್ನನೆ ಗಾಳಿ ಬಂದಂಡುಳ್ಳ ದಿಕ್ಕ್‌ಂಜ ಕ್ಲೌಡ ಎಣ್ಣ್‌ವ ಒರ್ ಚೆರಿಯ ದ್ವೀಪತ್‍ರ ಪಕ್ಕತ್ ಬಪ್ಪಕ, ನಂಗ ತಪ್ಪಿಚಿಡ್‌ವಕುಳ್ಳ ಚೆರಿಯ ಹಡಗ್‍ನ ದುಂಬ ಕಷ್ಟತ್‍ಲ್ ಬಲ್‍ಚಿತ್ ಬದ್ರಪಡ್‍ತ್‍ಚಿ. 17 ಅನ್ನನೆ ಜನ ಅದ್‍ನ ಕೊಡಿಕ್ ಎಡ್‌ತ ಪಿಂಞ, ಹಡಗ್‍ನ ಕಾಪಾಡ್‌ವಕಾಯಿತ್, ಕೇರ್ ಇಟ್ಟಿತ್ ಪೊಟ್ಟಿಪೋಕತನೆಕೆ ಸುತ್ತ್‌ಲ್ ಕೆಟ್ಟ್‌ಚಿ. ಅಲ್ಲಿಂಜ ಸುರ್ತಿಸ್ ಎಣ್ಣ್‌ವ ಗಟ್ಟಿ ಇಲ್ಲತೆ ಮಣ ಜಾಗತ್‍ಲ್ ಚಿಕ್ಕಿತ್ ಬುದ್ದ್‌ರುವಾಂದ್ ಪೋಡಿಯಾಯಿತ್, ಹಡಗ್‍ರ ಬಟ್ಟೇರ ಪಲಂಬ್‍ನೆಲ್ಲ ಅಡಿಕಿಟ್ಟಿತ್, ಗಾಳಿ ಪೋಪನೆಕೆ ಹಡಗ್‍ನ ನೂಕಿಯಂಡ್ ಪೋಪನೆಕೆ ಬುಟ್ಟತ್. 18 ಅದಲ್ಲತೆ, ಬಲ್ಯ ಬಿರ್‌ಗಾಳಿಮಳೆಲ್ ನಂಗ ಚಿಕ್ಕಿಪೋನಗುಂಡ್, ಪಿತ್ಯಾಂದ್ ಹಡಗ್‍ಲ್ ಇಂಜ ಚೆನ್ನ ಸಾಮಾನೆಲ್ಲ ಕಡಲ್‍ಲ್ ಕನ್‍ಚತ್. 19 ಮೂಂದನೆ ದಿವಸತ್‍ಲ್ ಹಡಗ್‍ರ ಅಡ್ಡ ಮರತ್‍ನ ನಂಗಡ ಕೈಯಿಂಜಲೇ ಪೊರಮೆ ಚಾಡ್‍ಚಿ. 20 ದುಂಬ ದಿವಸಕತ್ತನೆ ಸೂರ್ಯ ಆಡ್, ನಕ್ಷತ್ರ ಆಡ್ ನಂಗ ಕಾಂಗತೆ, ಬಲ್ಯ ಬಿರ್‌ಗಾಳಿಮಳೆ ಪೊಜ್ಜಂಡ್ ಇಂಜಗುಂಡ್, ನಂಗ ಇಂಞು ಮಿಂಞಕ್ ಬಚಾವಾಯಿತ್ ಬದ್‍ಕಾವಾಂದ್ ಉಳ್ಳ ಎಲ್ಲಾ ನಂಬಿಕೆಯು ಪೋಚಿ. 21 ಅಯಿಂಗ ದುಂಬ ದಿವಸ ಕೂಳ್ ಒಂದು ತಿಂಗತೆ ಇಪ್ಪಕ, ಪೌಲ ಅಯಿಂಗಡ ಮದ್ಯತ್‍ಲ್ ಎದ್ದ್ ನಿಂದಿತ್: ಜನಳೇ, ಕ್ರೇತ ದ್ವೀಪತ್ಂಜ ಪೊರಡತೆ ಈ ಕಷ್ಟ ನಷ್ಟನೆಲ್ಲ ಆಕತನೆಕೆ ನಿಂಗ ನಾಡ ತಕ್ಕ್‌ನ ಕ್‍ೕಪಕಿಂಜತ್. 22 ಆಚೇಂಗಿಯು ನಿಂಗ ದೈರ್ಯತ್‍ಲ್ ಇರೀಂದ್ ಇಕ್ಕ ಬುದ್ದಿ ಎಣ್ಣ್‌ವಿ. ಇಂಞು ಮಿಂಞಕ್, ಹಡಗ್ ಮಾತ್ರ ನಾಶ ಆಯಿಪೋಪ, ಆಚೇಂಗಿ, ನಂಗಡ ಜೀವಕ್ ತೊಂದರೆ ಆಪುಲೇಂದ್ ಎಣ್ಣ್‌ಚಿ. 23 ನಾಡ ಬದ್‍ಕ್‍ರ ಒಡೆಯನು, ನಾನ್ ಸೇವೆ ಮಾಡ್‍ವಂವೊನಾಯಿತುಳ್ಳ ದೇವದೂತ ನಿನ್ನಾಂದ್ ಬಯಿಟ್ ನಾಡ ಪಕ್ಕ ಬಂದಿತ್: 24 ನೀನ್ ಬೊತ್ತತೆ, ನೀನ್ ಕೈಸರಂಡ ಮಿಂಞ ನಿಪ್ಪಿಯ. ನೋಟ್, ನೀಡ ಕೂಡೆ ಈ ಹಡಗ್‍ಲ್ ಪ್ರಯಾಣ ಮಾಡ್‌ವಯಿಂಗಡ ಪ್ರಾಣತ್‍ನ, ದೇವ ನೀಡ ಮೇಲೆ ಉಳ್ಳ ಕೃಪೆಯಿಂಜ ಕಾಪಾಡ್‌ವಾಂದ್ ನಾಡ ಪಕ್ಕ ಎಣ್ಣ್‌ಚಿ. 25 ಆನಗುಂಡ್ ಜನಳೇ, ದೈರ್ಯವಾಯಿತ್ ಇರಿ. ನಾಕ್ ಎಣ್ಣ್‌ನ ಪ್ರಕಾರ ಆಪಾಂದ್ ದೇವಡ ಮೇಲೆ ನಾಕ್ ನಂಬಿಕೆ ಉಂಡ್. 26 ಆಚೇಂಗಿಯು ನಂಗೆಲ್ಲಾರು ಒರ್ ದ್ವೀಪತ್‍ರ ಕರೆಕ್ ಪೋಯಿತ್ ಮುಟ್ಟಿತ್ ನಿಪ್ಪಾಂದ್ ಪೌಲ ಎಣ್ಣ್‌ಚಿ. 27 ಪದನಾಲನೆ ಬಯಿಟ್ ಬಪ್ಪಕ, ನಂಗೆಲ್ಲಾರು ಆದ್ರಿಯ ಸಮುದ್ರತ್‍ಲ್ ಗಾಳಿಲ್ ಬಡಿಚಂಡ್ ಪೋಯಂಡಿಪ್ಪಕ, ನಡ್‍ಪಾದ್ರೆಲ್ ಹಡಗ್‍ಲ್ ಉಳ್ಳಯಿಂಗಕ್, ಕಡಕರೆ ಬಾತ್‍ೕಂದ್ ಗೇನ ಆಚಿ. 28 ಅಕ್ಕ, ಅಯಿಂಗ ಕಡಲ್‍ರ ಆಳತ್‍ನ ಅಳ್‌ತೆ ಮಾಡಿತ್ ನೋಟ್‍ವಕ, ಕಡಲ್‍ರ ಆಳ, ನೂಯಿಟ ಇರುವದ್ ಅಡೀಂದ್ ಕಂಡತ್. ಇಂಞು ಮಿಂಞಕ್ ಪೋಪಕ, ತೊಂಬದ್ ಅಡೀಂದ್ ಕಂಡತ್. 29 ಕಲ್ಲ್ ಜಾಗತ್‍ಲ್ ಪೋಯಿತ್ ಬೂವಾಂದ್ ಪೋಡಿಯಾಯಿತ್, ಹಡಗ್‍ರ ಬೆಂಬರತ್‍ರ ಬಾಗತ್ಂಜ ನಾಲ್ ನಂಗೂರತ್‍ನ ಬುಟ್ಟಿತ್ ಹಡಗ್‍ನ ನಿಪ್ಪ್‌ಚಿಟ್ಟತ್. ಪಿಂಞ ಪೊಲಾಕ ಎಕ್ಕ ಆಪಾಂದ್ ಪಾರಕಾತಂಡ್, ಪ್ರಾರ್ಥನೆ ಮಾಡಿಯಂಡ್ ಇಂಜತ್. 30 ಆಚೇಂಗಿ ನಾವಿಕಂಗ ಹಡಗ್‍ರ ಮಿಂಞತ್‍ರ ಬರಿಲ್ ನಂಗೂರತ್‍ನ ಇಡ್‍ವನೆಕೆ ನಾಟಕ ಮಾಡಿತ್, ತಪ್ಪಿಚಿಡ್‌ವಕ್‌ ಉಳ್ಳ ದೋಣಿನ ಸಮುದ್ರತ್‍ಲ್ ಇಳ್‌ಪಿತ್ ಹಡಗ್‍ನ ಬುಟ್ಟಿತ್ ತಪ್ಪಿ ಪೋಪಕ್ ಪ್ರಯತ್ನಪಟ್ಟತ್. 31 ಅಕ್ಕ, ಪೌಲ, ನೂರ್ ಸಿಪಾಯಿಯಂಗಡ ಅದಿಕಾರಿನ ಪಿಂಞ ಸಿಪಾಯಿಯಂಗಳ ನೋಟಿತ್, ಈಂಗ ಹಡಗ್‍ಲ್ ನಿಕ್ಕತೆ ಪೋಚೇಂಗಿ, ನಿಂಗ ಬಚಾವ್ ಆಪುಲೇಂದ್ ಎಣ್ಣ್‌ಚಿ. 32 ಅಕ್ಕ ಸಿಪಾಯಿಯಂಗ ದೋಣಿರ ಕೇರ್‌ನ ಮುರ್‌ಚಿತ್, ಅದ್ ಬುದ್ದ್ ಪೋಪನೆಕೆ ಮಾಡ್‍ಚಿ. 33 ಪೊಲಾಕ ಆಪಕ, ಪೌಲ ಅಯಿಂಗಕೆಲ್ಲ ದೈರ್ಯ ಎಣ್ಣಿತ್, ಉಂಬಕ್ ಎಣ್ಣ್‌ಚಿ. ನೋಟಿ, ಇಂದ್‍ಕತ್ತನೆ, ನಿಂಗ ಒಂದು ತಿಂಗತೆ ಪದನಾಲ್ ನಾಳಾಚಿ. ಇಂಞು ಮಿಂಞಕ್ ಎಂತಾಪಾಂದ್ ನೋಟಿಯಂಡ್ ಒಂದು ತಿಂಗತೆ ಉಳ್ಳಿರ. 34 ಆನಗುಂಡ್, ಇಕ್ಕ, ಎಂತಾಚು ತಿನ್ನೀಂದ್ ಬೋಡಿಯಂಡತ್. ಇದ್ ನಿಂಗಡ ಪ್ರಾಣ ರಕ್ಷಣೆ ಆಪಕ್ ಸಹಾಯ ಮಾಡ್‌ವ. ನಿಂಗಡ ಮಂಡೆರ ತಲ್‍ಮಿ ಸಹ ಬುದ್ದ್‌ಪೋಪುಲೇಂದ್ ಎಣ್ಣ್‌ಚಿ. 35 ಇನ್ನನೆ ಎಣ್ಣ್‌ನ ಪಿಂಞ, ಅಂವೊ ಒಟ್ಟಿನ ಎಡ್‍ತಿತ್, ಎಲ್ಲಾಡ ಮಿಂಞ ದೇವಕ್ ವಂದನೆ ಮಾಡಿತ್ ಅದ್‍ನ ತಿಂಬಕ್ ಸುರ್ ಮಾಡ್‍ಚಿ. 36 ಅಕ್ಕ ಎಲ್ಲಾರು ದೈರ್ಯ ಎಡ್‍ತಂಡ್, ತಿಂಬಕ್ ಸುರು ಮಾಡ್‍ಚಿ. 37 ಆ ಹಡಗ್‍ಲ್ ಇಂಜ ನಂಗೆಲ್ಲಾರು ಇರ್‍ನೂಯಿಟ್ ಎಳ್‍ವತ ಆರ್ ಜನ ಆಯಿತ್ಂಜತ್. 38 ಬೋಂಡಿಯಚ್ಚಕ್ ತಿಂದ ಪಿಂಞ, ಗೋದಿನ ಸಮುದ್ರಕ್ ಕನ್‍ಚಿತ್ ಹಡಗ್‍ರ ಬಾರತ್‍ನ ಕಮ್ಮಿ ಮಾಡ್‍ಚಿ. 39 ಆ ದಿನ ಪೊಲಿಂಜ ಪಿಂಞ ಆ ಜಾಗ ಏದ್‍ೕಂದ್ ಗೊತ್ತಿಲ್ಲತೆ ಇಂಜತ್. ಅಕ್ಕ, ಸಮವಾಯಿತ್ ಕಾಂಬ ಹಡಗ್ ನಿಪ್ಪ್‌ಚಿಡುವ ಜಾಗತ್‍ನ ಕಂಡತ್. ಕಯ್ಯುವೇಂಗಿ, ಅದ್ಂಡ ಒಳ್‍ಲ್ ಹಡಗ್‍ನ ಉಂದಿತ್ ನೆಲಕ್ ಮುಟ್ಟ್‌ಚಿಡುವಕ್ ಗೇನ ಮಾಡ್‍ಚಿ. 40 ನಂಗೂರತ್‍ನ ಕೆತ್ತಿತ್, ಸಮುದ್ರತ್‍ಲೇ ಬುಟ್ಟಿತ್, ಹಡಗ್‍ನ ಪೋಪಕ್ ಮಾಡ್‌ವ ಮರಪಾರ್‌ರ ಕೆಟ್ಟ್‌ನೆಲ್ಲ ಉತ್ತಿತ್, ಹಡಗ್‍ರ ಮಿಂಞತ್ ಇಂಜ ಬಟ್ಟೇರ ಪಲಂಬ್‌ನ ಗಾಳಿಕ್ ನೇರಾಯಿತ್ ನೇತ್‍ಚಿ. ಅನ್ನನೆ ಗಾಳಿ ಅದ್‍ನ ಕರೆಕ್ ಉಂದಿಯಂಡ್ ಇಂಜತ್. 41 ಆಚೇಂಗಿ ಮದ್ಯತ್‍ಲ್ ಅಯಿಂಗಕ್ ಮಣ ಗುಂಡೆ ನೀರ್‌ರ ಅಡಿಲ್ ಕ್‍ಟ್ಟ್‌ವಕ, ಹಡಗ್ ಅಲ್ಲಿಯೇ ನಿಂದತ್. ಹಡಗ್‍ರ ಮಿಂಞತೆ ಬಾಗ ಚಾಯಿತೆ ಮಣಲ್‍ಲ್ ಚಿಕ್ಕಿಯಂಡತ್. ಆಚೇಂಗಿ ಹಡಗ್‍ರ ಬೆಂಬರತ್‍ರ ಬಾಗ, ಬಾರಿ ಅಲೆ ಪೊಜ್ಜಗೊಂಡ್ ಒಡದಂಡ್ ಪೋಚಿ. 42 ಅಕ್ಕ, ಕೈದಿಯಂಗ ದಾರೂ ಮೀಂದಿತ್ ತಪ್ಪಿಚಿಡ್‌ವಕ್ಕಾಗಾಂದ್, ಅಯಿಂಗಳ ಕೊಲ್ಲಂಡೂಂದ್ ಸಿಪಾಯಿಯಂಗ ಆಲೋಚನೆ ಮಾಡ್‍ಚಿ. 43 ಆಚೇಂಗಿ ನೂರ್ ಸಿಪಾಯಿಯಂಗಡ ಅದಿಕಾರಿ, ಪೌಲನ ಕಾಪಾಡ್‌ವಕ್ ಮನಸ್ಸ್ ಬೆಚ್ಚಿತ್, ಅಯಿಂಗಡ ಆಲೋಚನೆನ ತಡ್‍ತತ್. ಅಂವೊ ಅಯಿಂಗಕ್: ಮೀಂದಿತ್ ಪೋಪಯಿಂಗ ನೀರ್‌ಕ್ ಪಾರಿತ್, ಮಿಂಞ ಕರೆಕ್ ಪೋಕಡೂಂದ್ ಎಣ್ಣ್‌ಚಿ. 44 ಬಾಕಿ ಉಳ್ಳಯಿಂಗ, ಅಯಿಂಗಡ ಕೈಕ್ ಕ್‍ಟ್ಟುವ ಹಡಗ್‍ರ ಬಾಗತ್‍ನ ಪುಡ್‍ಚಂಡ್ ಮೀಂದಿತ್, ಚೆನ್ನ ಜನ ಮರಪಾರ್‌ರ ಮೇಲೆ ಅಳ್‌ತಂಡ್ ಕರೆಕ್ ಪೋಪಕ್ ಹುಕುಮ್ ಕೊಡ್‍ತತ್. ಇನ್ನನೆ ಎಲ್ಲಾರು ತಪ್ಪಿಚಿಟ್ಟಂಡ್ ಕರೆಕ್ ಬಂತ್ ಕೂಡ್‍ಚಿ. |
© 2017, New Life Literature (NLL)