ಅಪೊಸ್ತಲ 15 - ಕೊಡವ ಬೈಬಲ್ಯೆರೂಸಲೇಮ್ಲ್ ಅಪೊಸ್ತಲಂಗಡ ಆಲೋಚನೆ ಕೂಟ 1 ಪೌಲ ಪಿಂಞ ಬಾರ್ನಬ ಅಂತಿಯೋಕ್ಯ ಪಟ್ಟಣತ್‍ಲ್ ಇಂಜ ಸಮಯತ್‍ಲ್, ಚೆನ್ನ ಯೆಹೂದ್ಯ ಜನ ಯೂದಾಯತ್ಂಜ ಅಂತಿಯೋಕ್ಯಕ್ ಬಂದಿತ್: ನಿಂಗ ನ್ಯಾಯಪ್ರಮಾಣತ್‍ಲ್ ಎಣ್ಣ್‌ನ ಪ್ರಕಾರ ಸುನ್ನತಿ ಮಾಡತೆ ಪೋಚೇಂಗಿ ನಿಂಗಕ್ ರಕ್ಷಣೆ ಕ್‍ಟ್ಟ್‌ಲೇಂದ್ ಅಲ್ಲಿಯತ್‍ರ ಯೇಸುನ ನಂಬ್‍ನ ಜನಕ್ ಉಪದೇಶ ಮಾಡಿಯಂಡ್ ಇಂಜತ್. 2 ಅಕ್ಕ, ಅಯಿಂಗಕು ಪಿಂಞ ಪೌಲ ಬಾರ್ನಬಂಗಕು ಬಲ್ಯ ತರ್ಕ ಆಚಿ. ಈ ವಿಷಯಕಾಯಿತ್, ಅಲ್ಲಿಂಜ ಪೆರಿಯಯಿಂಗ, ಪೌಲ ಪಿಂಞ ಬಾರ್ನಬಂಡ ಕೂಡೆ ಇಂಞು ಚೆನ್ನ ಜನಳ ಯೆರೂಸಲೇಮ್‍ಲ್ ಉಳ್ಳ ಅಪೊಸ್ತಲಂಗ ಪಿಂಞ ಸಬೆರ ಪೆರಿಯಯಿಂಗಡ ಪಕ್ಕ ಪೋಪಕ್ ಅಯಿಂಗಳ ನೇಮಿಚಿಟ್ಟತ್. 3 ಸಬೆರ ಜನ ಅಯಿಂಗಳ ಅಯಿಚ ಪಿಂಞ, ಅಯಿಂಗ ಫೊಯಿನಿಕೆ ಪಿಂಞ ಸಮಾರ್ಯ ಸೀಮೆರ ಬಟ್ಟೇಲ್ ಪೋಯಂಡಿಪ್ಪಕ, ಯೆಹೂದ್ಯ ಅಲ್ಲತ ಬೋರೆ ಜನಳು ದೇವಡ ಪಕ್ಕ ಬಂದ ಸಂಗತಿನ, ಅಯಿಂಗಡ ಬಟ್ಟೇಲ್ ಕಂಡ ಯೇಸುನ ನಂಬ್‍ನಯಿಂಗಕ್ ವಿವರವಾಯಿತ್ ಎಣ್ಣ್‌ಚಿ. ಅಯಿಂಗ ಇದ್‍ನ ಕ್‍ೕಪಕ ದುಂಬ ಕುಶಿಪಟ್ಟತ್. 4 ಅಯಿಂಗ ಯೆರೂಸಲೇಮ್‌ಕ್ ಬಂದ ಪಿಂಞ ಸಬೇಲ್ ಉಳ್ಳಯಿಂಗ, ಅಪೊಸ್ತಲಂಗ ಪಿಂಞ ಪೆರಿಯಯಿಂಗ ಅಯಿಂಗಳ ಸ್ವೀಕಾರ ಮಾಡ್‍ಚಿ. ಪಿಂಞ, ಈಂಗ ದೇವ ತಂಗಡ ಮೂಲಕ ಮಾಡ್‍ನ ಕಾರ್ಯತ್‍ನೆಲ್ಲಾ ಅಯಿಂಗಕ್ ಎಣ್ಣ್‌ಚಿ. 5 ಅಕ್ಕ ಫರಿಸಾಯಂಗಡ ಕೂಟತ್‌ಂಜ ಯೇಸುರ ಮೇಲೆ ನಂಬಿಕೆ ಇಟ್ಟಿತ್ಂಜ ಚೆನ್ನ ಜನ, ದೇವಡ ಬರಿಕ್ ಮನಸ್ಸ್ ತಿರುಗ್‍ನ ಯೆಹೂದ್ಯರಲ್ಲತ ಬೋರೆ ಜನಕ್ ಸುನ್ನತಿ ಮಾಡಿತ್ ಮೋಶೇರ ನ್ಯಾಯಪ್ರಮಾಣತ್‍ರ ಪ್ರಕಾರ ನಡ್‍ಪಕ್ ಪಡಿಪ್‍ಚಿಡಂಡೂಂದ್ ಎಣ್ಣ್‌ಚಿ. 6 ಅಕ್ಕ, ಅಪೊಸ್ತಲಂಗ ಪಿಂಞ ಸಬೆರ ಪೆರಿಯಯಿಂಗ ಈ ವಿಷಯತ್‍ನ ಚರ್ಚೆ ಮಾಡ್‌ವಕ್ ಕೂಡಿ ಬಾತ್. 7 ದುಂಬ ತರ್ಕ ಆಪಕ, ಪೇತ್ರ ಎದ್ದಿತ್ ನಿಪ್ಪಂಜಿ ಅಯಿಂಗಳ ನೋಟಿತ್, ಅಣ್ಣತಮ್ಮಣಂಗಳೇ, ನಿಂಗಕ್ ಗೊತ್ತುಳ್ಳನೆಕೆ, ಯೆಹೂದ್ಯಂಗ ಅಲ್ಲತ ಬೋರೆ ಜನ, ನಾಡ ಬಾಯಿಂಜ ನಲ್ಲ ಸುದ್ದಿನ ಕ್‍ೕಟಿತ್ ನಂಬಂಡೂಂದ್, ದೇವ ದುಂಬ ದಿವಸಕ್ ಮಿಂಞಲೇ, ನಿಂಗಡಡೆಲ್ ಒಬ್ಬನಾನ ನನ್ನ ಗೊತ್ತ್ ಮಾಡ್‍ಚಿ. 8 ಹೃದಯತ್‍ನ ಅರಿಂಜಿತುಳ್ಳ ದೇವ, ಎನ್ನನೆ ಪವಿತ್ರಾತ್ಮತ್‍ನ ನಂಗಕ್ ಕೊಡ್‍ತತೊ, ಅನ್ನನೆ ಅಯಿಂಗ ಸಹ ತಾಂಡ ಜನಾಂಗಾಂದ್ ಒತ್ತಂಡಾಂಗ್ ಅಯಿಂಗಕು ಪವಿತ್ರಾತ್ಮತ್‍ನ ಕೊಡ್‌ತಿತ್ ಸಾಕ್ಷಿ ಕೊಡ್‌ತತ್‍ೕಂದ್ ಎಣ್ಣ್‌ಚಿ. 9 ಇದ್‍ಲ್ಲತೆ ನಂಗಕು ಅಯಿಂಗಕು ಪಕ್ಷಪಾತ ಮಾಡತೆ, ಅಯಿಂಗಡ ಹೃದಯತ್‍ನ ನಂಬಿಕೇರ ಮೂಲಕ ಪವಿತ್ರ ಮಾಡ್‍ಚಿ. 10 ಇನ್ನನೆ ಇಪ್ಪಕ, ನಂಗಡ ಅಜ್ಜಂಗಕೂ, ನಂಗಕು ಪೊರ್‍ಪಕೈಯ್ಯತ ನೊಗತ್‌ನ ಯೇಸುನ ನಂಬ್‍ವ ಯೆಹೂದ್ಯ ಅಲ್ಲತಯಿಂಗಡ ಬೋಳೆಕ್ ಇಟ್ಟಿತ್ ದೇವನ ಎನ್ನಂಗ್ ಪರೀಕ್ಷೆ ಮಾಡಂಡು? 11 ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆಯಿಂಜ ನಂಗಕ್ ಎನ್ನನೆ ರಕ್ಷಣೆ ಕ್‍ಟ್ಟ್‌ಚೋ ಅನ್ನನೆ ಅಯಿಂಗಕು ರಕ್ಷಣೆ ಕ್‍ಟ್ಟ್‌ಚೀಂದ್ ನಂಗ ನಂಬುವಾಂದ್ ಎಣ್ಣ್‌ಚಿ. 12 ಅಕ್ಕ, ಅಲ್ಲಿ ಕೂಡಿತ್ಂಜ ಎಲ್ಲಾರು ಒರ್ ತಕ್ಕು ಎಣ್ಣತೆ, ಬಾರ್ನಬ ಪಿಂಞ ಪೌಲಂಡ ಮೂಲಕ ದೇವ ಯೆಹೂದ್ಯ ಅಲ್ಲತಯಿಂಗಡ ಮದ್ಯತ್‍ಲ್ ಮಾಡ್‍ನ ಎಲ್ಲಾ ಆಶ್ಚರ್ಯ ಗುರ್‌ತ್ ಕಾರ್ಯತ್‍ನ ಅಯಿಂಗ ವಿವರಿಚಿಡುವಾನ ಕ್‍ೕಟತ್. 13 ಅಯಿಂಗ ತಕ್ಕ್ ಪರ್ಂದಿತ್ ಆನ ಪಿಂಞ ಯಾಕೋಬ ಅಯಿಂಗಳ ನೋಟಿತ್ ತಕ್ಕ್ ಪರಿಯುವಕ್ ಸುರು ಮಾಡ್‍ಚಿ. ಅಣ್ಣತಮ್ಮಣಂಗಳೇ, ನಾನ್ ಎಣ್ಣುವಾನ ಕ್‍ೕಳಿ. 14 ದೇವ ಅಂವೊಂಡ ಪೆದಕಾಯಿತ್, ಯೆಹೂದ್ಯ ಅಲ್ಲತ ಬೋರೆ ಜನಡ ಮದ್ಯತ್ಂಜ ಒರ್ ಗುಂಪ್‍ನ ಗೊತ್ತ್ ಮಾಡಿತ್, ಆದ್ಯವಾಯಿತ್ ಅಯಿಂಗಡ ಮೇಲೆ ದೇವ ಕಾಟ್‍ನ ಅಕ್ಕರೆನೆ ಸಿಮೆಯೋನ ನಂಗಕ್ ಚಾಯಿತೆ ವಿವರಿಚಿಟ್ಟತ್ತಲ್ಲ. 15 ಇದ್ಂಗ್ ಪ್ರವಾದಿಯಂಗಡ ತಕ್ಕ್ ಒಪ್ಪುವ. ಎನ್ನನೆ ಎಣ್ಣ್‌ಚೇಂಗಿ: 16 ಇದ್ ಆನ ಪಿಂಞ ನಾನ್ ಪುನಃ ಬಂದಿತ್ ಬುದ್ದ್ ಪೋನ ದಾವೀದಂಡ ಗುಡಾರತ್‍ನ ಕೆಟ್ಟ್‌ವಿ. ಅಲ್ಲಿ ಒಡಂದ್ ಪೋನದೆಲ್ಲಾನ ಸರಿಮಾಡಿತ್ ಅದ್‍ನ ನೇರೆ ನಿಪ್ಪ್‌ಚಿಡುವಿ. 17 ನಾನ್ ಇನ್ನನೆ ಮಾಡ್‌ವಗುಂಡ್, ಬಾಕಿಯುಳ್ಳ ಎಲ್ಲಾ ಜನಳು, ವಿಶೇಷವಾಯಿತ್ ನಾಕಾಯಿತ್ ನಾನ್ ಕಾಕಿತುಳ್ಳ ಯೆಹೂದ್ಯ ಅಲ್ಲತ ಜನ ಒಡೆಯನಾನ ದೇವನ ತ್‍ೕಡ್‌ವ. ಇನ್ನನೆ ಮಾಡ್‌ವ ನಾನ್ ಇದ್‍ನ ಎಣ್ಣಿಯೆ. ಅದ್ ಅನ್ನನೆ ಆಪ, 18 ಈ ಬೂಲೋಕ ಸೃಷ್ಟಿ ಆಪಕ್ ಮಿಂಞಲೇ, ಎಲ್ಲಾ ಎನ್ನನೆ ಆಪಾಂದ್ ಗೊತ್ತುಳ್ಳ ದೇವ ಇನ್ನನೆ ಎಣ್ಣ್‌ಚೀಂದ್ ಒಳ್‍ದಿ ಬೆಚ್ಚಿತುಂಡ್. 19 ಇನ್ನನೆ ಇಪ್ಪಕ ನಾಡ ಅಬಿಪ್ರಾಯ ಎಂತ ಎಣ್ಣ್‌ಚೇಂಗಿ: ಯೆಹೂದ್ಯಂಗ ಅಲ್ಲತ ಬೋರೆ ಜನತ್‍ಂಜ ದೇವಡ ಕಡೇಕ್ ಬಪ್ಪಯಿಂಗಕ್ ತೊಂದರೆ ಮಾಡ್‌ವಕ್ಕಾಗ. 20 ಅದ್ಂಡ ಬದ್‍ಲ್ ಅಯಿಂಗ ವಿಗ್ರಹಕ್ ಅರ್ಪಿಚಿಟ್ಟ ಅಶುದ್ದ ಆನ ಕೂಳ್‍ಕ್, ಚೋರೆ ತಿಂಬಕ್, ನೆರ್‌ಕಿತ್ ಚತ್ತ್‌ಪೋನ ಪ್ರಾಣಿಯಡ ಯರ್ಚಿಕ್ ಪಿಂಞ ಲೈಂಗಿಕ ಪಾಪಕ್ ದೂರವಾಯಿತ್ ಇರಂಡೂಂದ್ ಅಯಿಂಗಕ್ ಕಾಗದತ್‍ನ ಒಳ್‍ದಿತ್ ಅಪ್ಪಣೆ ಕೊಡಕನ. 21 ದುಂಬ ಕಾಲವಾಯಿತ್, ಸಬ್ಬತ್ ದಿವಸತ್‍ಲ್, ಅಯಿಂಗ ವಾಸ ಮಾಡ್‌ವ ಪಟ್ಟಣ ಪಿಂಞ ಊರ್‌ರ ಸಬಾಮಂದಿರತ್‍ಲ್ ಎಕ್ಕಾಲು ಓದಿತ್ ಇದ್‍ನ ಬೋದನೆ ಮಾಡಿಯಂಡ್ ಉಂಡ್. ಯೆಹೂದ್ಯ ಅಲ್ಲತಯಿಂಗಕ್ ಉಳ್ಳ ಕಾಗದ 22 ಅಕ್ಕ ಅಪೊಸ್ತಲಂಗ, ಸಬೆರ ಪೆರಿಯಯಿಂಗ ಪಿಂಞ ಸಬೇಲ್ ಉಳ್ಳಯಿಂಗ ತಂಗಡಲಿಂಜ ಚೆನ್ನ ಜನಳ ಗೊತ್ತ್ ಮಾಡಿಯಂಡ್ ಪೌಲ ಪಿಂಞ ಬಾರ್ನಬಂಡ ಕೂಡೆ ಅಂತಿಯೋಕ್ಯಕ್ ಅಯಿಪದ್ ನಲ್ಲದ್‍ೕಂದ್ ತೀರ್ಮಾನ ಮಾಡ್‍ಚಿ. ಅಯಿಂಗ ದಾರ್ ಎಣ್ಣ್‌ಚೇಂಗಿ: ಸಬೇಲ್ ಮುಕ್ಯಪಟ್ಟಯಿಂಗಳಾನ ಬಾರ್ಸಬ್ಬ ಎಣ್ಣುವ ಯೂದ ಪಿಂಞ ಸೀಲ ಎಣ್ಣ್‌ವಯಿಂಗಳೇ. 23 ಅಯಿಂಗಡ ಕೈಯಿಲ್ ಕಾಗದ ಒಳ್‍ದಿತ್ ಕೊಡ್‍ತತ್. ಅದ್ ಎಂತ ಎಣ್ಣ್‌ಚೇಂಗಿ: ಕ್ರಿಸ್ತಂಡ ಮೂಲಕ ಅಣ್ಣತಮ್ಮಣಯಿಂಗಳಾತುಳ್ಳ ಅಪೊಸ್ತಲಂಗ ಪಿಂಞ ಸಬೆರ ಪೆರಿಯಯಿಂಗ, ಅಂತಿಯೋಕ್ಯ, ಸಿರಿಯ ಪಿಂಞ ಕಿಲಿಕ್ಯ ಸೀಮೆಲ್ ವಾಸ ಮಾಡ್‌ವ ಯೇಸುನ ನಂಬ್‍ನ ಯೆಹೂದ್ಯ ಅಲ್ಲತಯಿಂಗಕ್ ವಂದನೆ ಮಾಡಿತ್ ಒಳ್‍ದ್‍ವ ಕಾಗದ ಎಂತ ಎಣ್ಣ್‌ಚೇಂಗಿ: 24 ನಂಗ ಅಪ್ಪಣೆ ಕೊಡ್‌ತಿತ್ ಅಯಿಕತ ಚೆನ್ನ ಜನ ನಂಗಡ ಕಡೇಯಿಂಜ ನಿಂಗಡ ಪಕ್ಕ ಬಂದಿತ್, ನಿಂಗಡ ಮನಸ್ಸ್‌ನ ಗಲಿಬಿಲಿ ಮಾಡ್‌ಚೀಂದ್ ನಂಗಕ್ ಗೊತ್ತಾಚಿ. 25 ಆನಗುಂಡ್ ನಂಗ ಎಲ್ಲಾರು ಒತ್ತಂಡ್ ತೀರ್ಮಾನ ಮಾಡಿತ್, ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಪೆದಕಾಯಿತ್ ತಂಗಡ ಜೀವತ್‍ನ ಅರ್ಪಿಚಿಟ್ಟಯಿಂಗಳು ನಂಗಡ ಪ್ರೀತಿರ ತಮ್ಮಣಂಗಳು ಆನ ಬಾರ್ನಬ ಪಿಂಞ ಪೌಲಂಡ ಕೂಡೆ, 26 ನಂಗಡ ಕಡೇಯಿಂಜ ಚೆನ್ನ ಜನತ್‍ನ ಗೊತ್ತ್ ಮಾಡಿತ್ ಅಯಿಪಕ್ ತೀರ್ಮಾನ ಎಡ್‍ತತ್. 27 ಅನ್ನನೆ ನಂಗ ಯೂದ ಪಿಂಞ ಸೀಲನ ಅಯಿಚಿಯೆ. ಅಯಿಂಗ ನಂಗ ಒಳ್‍ದ್‍ನ ಈ ಸಂಗತಿನೆಲ್ಲ ಬಾಯಿ ತಕ್ಕ್‌ಯಿಂಜ ನಿಂಗಕ್ ಅರಿಚಿಡುವ. 28-29 ಅದ್ ಎಂತ ಎಣ್ಣ್‌ಚೇಂಗಿ: ವಿಗ್ರಹಕ್ ಅರ್ಪಿಚಿಟ್ಟ ಕೂಳ್‍ಕ್, ಚೋರೆ ತಿಂಬಕ್, ನೆರ್‌ಕಿತ್ ಚತ್ತ್‌ಪೋನ ಪ್ರಾಣಿಯಡ ಯರ್ಚಿಕ್ ಪಿಂಞ ಲೈಂಗಿಕ ಪಾಪಕ್ ದೂರವಾಯಿತ್ ಇಕ್ಕಂಡು. ಇದ್‍ನ ಬುಟ್ಟಿತ್ ಬೋರೆ ಏದ್ ವಿಷಯತು ನಿಂಗಡ ಮೇಲೆ ಬಾರತ್‍ನ ಇಡ್‍ವದ್ ಚಾಯಾಪುಲೇಂದ್ ಪವಿತ್ರಾತ್ಮಂಗು ನಂಗಕು ಗೊತ್ತಾಚಿ. ನಿಂಗಕ್ ನಲ್ಲದ್ ಆಡ್. 30 ಅಯಿಂಗ ಅಪ್ಪಣೆ ಎಡ್‍ತಂಡ್ ಅಂತಿಯೋಕ್ಯಕ್ ಬಂತ್ ಅಯಿಂಗಳ ಎಲ್ಲಾ ಕೂಟಿತ್, ಆ ಕಾಗದತ್‍ನ ಅಯಿಂಗಕ್ ಒಪ್ಪ್‌ಚಿಟ್ಟತ್. 31 ಅಯಿಂಗ ಅದ್‍ನ ಓದಿತ್, ಅದ್ಂಡ ಮೂಲಕ ದುಂಬ ಪುರ್‌ಡ್ ಕ್‍ಟ್ಟ್‌ನಗುಂಡ್ ಕುಶಿಪಟ್ಟತ್. 32 ಯೂದ ಪಿಂಞ ಸೀಲ ಪ್ರವಾದಿಯಳಾಯಿತ್ ಇಂಜಗುಂಡ್, ಅಲ್ಲಿ ಇಂಜ ಯೇಸುನ ನಂಬ್‍ನಯಿಂಗಕ್ ದುಂಬ ಬೋದನೆ ಮಾಡಿತ್, ಅಯಿಂಗಳ ದೈರ್ಯಪಡ್‍ತಿತ್ ದೃಡಪಡ್‍ತ್‍ಚಿ. 33 ಅಲ್ಲಿ ಚೆನ್ನ ಕಾಲ ಕಯಿಂಜ ಪಿಂಞ, ಅಯಿಂಗಳ ಅಯಿಚಯಿಂಗಡ ಪಕ್ಕ ಪೋಪಕಾಯಿತ್ ಅಲ್ಲಿಯತ್‍ರ ದೇವಡ ಮಕ್ಕಡಯಿಂಜ ಸಮಾದಾನತ್‍ಲ್ ಅಪ್ಪಣೆ ಎಡ್‍ತಂಡತ್. 34 ಆಚೇಂಗಿ ಸೀಲಂಗ್ ಅಲ್ಲಿ ಇಪ್ಪದ್ ನಲ್ಲದ್‍ೕಂದ್ ಗೇನ ಆಚಿ. 35 ಆಚೇಂಗಿ ಪೌಲ ಪಿಂಞ ಬಾರ್ನಬ ಅಂತಿಯೋಕ್ಯತ್‍ಲ್ ನಿಂದಿತ್ ಬೋರೆ ಜನಡ ಕೂಡೆ ಬೋದನೆ ಮಾಡಿಯಂಡ್ ಒಡೆಯಂಡ ವಾಕ್ಯ ಎಣ್ಣುವ ನಲ್ಲ ಸುದ್ದಿನ ಎಣ್ಣಿಯಂಡ್ ಇಂಜತ್. ಪೌಲಂಡ ದಂಡನೆ ಮಿಶನರಿ ಪ್ರಯಾಣ 15.36–18.22 36 ಚೆನ್ನ ದಿವಸ ಆನ ಪಿಂಞ ಪೌಲ, ಬಾರ್ನಬನ ನೋಟಿತ್: ನಂಗ ದೇವಡ ನಲ್ಲ ಸುದ್ದಿನ ಎಣ್ಣಿತುಳ್ಳ ಊರುಕೆಲ್ಲಾ ಪುನಃ ಪೋಯಿತ್ ಅಲ್ಲಿ ಕ್ರಿಸ್ತಂಡ ಮೇಲೆ ನಂಬಿಕೆ ಬೆಚ್ಚ ಅಣ್ಣತಮ್ಮಣಂಗ ಎನ್ನನೆ ಉಂಡ್‍ೕಂದ್ ನೋಟನ ಬಾಂದ್ ಎಣ್ಣ್‌ಚಿ. 37 ಅಕ್ಕ, ಮಾರ್ಕ ಎಣ್ಣುವ ಯೋಹಾನನ ಅಯಿಂಗಡ ಕೂಡೆ ಕಾಕಿಯಂಡ್ ಪೋಂಡೂಂದ್ ಬಾರ್ನಬ ಎಣ್ಣ್‌ಚಿ. 38 ಆಚೇಂಗಿ, ಪೌಲ: ಪಂಫುಲ್ಯ ನಾಡ್‍ಲ್ ನಂಗ ಇಪ್ಪಕ, ಮಾರ್ಕ ದೇವಡ ಸೇವೆ ಮಾಡ್‌ವಕ್ ನಂಗಡ ಕೂಡೆ ಬರತೆ, ನಂಗಳ ಬುಟ್ಟಿತ್ ಪೋನಗುಂಡ್, ಇಕ್ಕ ಅಂವೊನ ಕಾಕಿಯಂಡ್ ಪೋಪದ್ ಚಾಯಾಪುಲೇಂದ್ ಎಣ್ಣ್‌ಚಿ. 39 ಈ ವಿಷಯತ್‍ಲ್ ಅಯಿಂಗ ದಂಡಾಳು ಬಲ್ಯ ತರ್ಕ ಮಾಡಿತ್ ಒತ್ತಂಡಿತ್‌ಲ್ಲೆ. ಅನ್ನನೆ ಅಯಿಂಗ ಒಬ್ಬನೊಬ್ಬನ ಬುಟ್ಟಿತ್ ಪೋಚಿ. ಬಾರ್ನಬ ಮಾರ್ಕನ ಕಾಕಿಯಂಡ್ ಸಮುದ್ರತ್‍ರ ಮಾರ್ಗವಾಯಿತ್ ಕುಪ್ರ ದ್ವೀಪಕ್ ಪೋಚಿ. 40 ಆಚೇಂಗಿ ಪೌಲ, ಸೀಲನ ಆಯ್ಕೆ ಮಾಡಿಯಂಡ್ ಪೋಪಕ, ಅಲ್ಲಿಯತ್ ಯೇಸುನ ನಂಬ್‍ನ ಅಣ್ಣತಮ್ಮಣಂಗ ಒಡೆಯಂಡ ಕೃಪೆಕ್ ಅಯಿಂಗಳ ಒಪ್ಪ್‌ಚಿಟ್ಟಿತ್ ಅಯಿಚತ್. 41 ಅಕ್ಕ ಅಯಿಂಗ ಅಲ್ಲಿಂಜ ಪೊರಟಿತ್ ಸಿರಿಯ ಕಿಲಿಕ್ಯ ಸೀಮೆಲ್ ಪ್ರಯಾಣ ಮಾಡಿತ್, ಅಲ್ಲಿ ಇಂಜ ಸಬೇನೆಲ್ಲ ದೃಡಪಡ್‍ತ್‍ಚಿ. |
© 2017, New Life Literature (NLL)