2 ಥೆಸಲೊನೀಕ 2 - ಕೊಡವ ಬೈಬಲ್ಪಾಳ್ ಮಾಡ್‌ವಂವೊ 1 ಇಕ್ಕ ನೋಟಿ, ನಂಗಡ ಅಣ್ಣತಮ್ಮಣಂಗಳೇ, ನಂಗಡ ಒಡೆಯನಾನ ಯೇಸು ಕ್ರಿಸ್ತ ಪುನಃ ಬಪ್ಪಕುಳ್ಳ ವಿಷಯತ್‍ಲ್ ಪಿಂಞ ನಂಗ ಅಂವೊಂಡ ಪಕ್ಕ ಪೋಪಕುಳ್ಳ ವಿಷಯತ್‍ಲ್ ನಂಗ ನಿಂಗಳ ಬೋಡ್‍ವದ್ ಎಂತ ಎಣ್ಣ್‌ಚೇಂಗಿ: 2 ಒರ್ ಆತ್ಮತ್ಂಜ ಬಂದದ್‍ೕಂದ್ ಎಣ್ಣುವ ಪ್ರವಾದನೆಯಾಡ್, ನಂಗ ಎಣ್ಣ್‌ನದಾಯಿತ್ ಬಪ್ಪ ಸುದ್ದಿಯಾಡ್, ನಂಗಡಿಂಜ ಬಂದದ್‍ೕಂದ್ ಎಣ್ಣ್‌ವ ಕಾಗದವಾಡ್, ಕ್ರಿಸ್ತಂಡ ದಿವಸ ಬಂದ್‍ರ್‌ತ್‍ೕಂದ್ ಎಣ್ಣ್‌ಚೇಂಗಿ, ನಿಂಗ ಅದ್ಂಡ ವಿಷಯತ್ ಒಡನೆ ಬೇಜಾರ್ ಮಾಡಿಯಂಡ್ ವ್ಯಸನ ಪಟ್ಟಂಡ್ ಇಪ್ಪಕ್ಕಾಗ. 3 ಈ ವಿಷಯತ್‍ಲ್ ನಿಂಗಳ ದಾರೂ ವಂಚನೆ ಮಾಡತನೆಕೆ ಎಚ್ಚರತ್‍ಲ್ ಇರಂಡು; ಎನ್ನಂಗೆಣ್ಣ್‌ಚೇಂಗಿ, ದೇವಕ್ ವಿರೋದ ಮಾಡಿತ್ ಜನ ದಂಗೆ ಮಾಡಿತ್, ಪಾಳಾಯಿ ಪೋಪಕಾಯಿತ್ ಪುಟ್ಟ್‌ನ ಬಲ್ಯ ದುಷ್ಟ ಮನುಷ್ಯ ಪೊರಮೆ ಬಪ್ಪಕತ್ತನೆ, ಆ ದಿವಸ ಬಪ್ಪುಲೆ. 4 ಆ ಮನುಷ್ಯ ದೇವಕ್ ವಿರೋದವಾಯಿತ್ ನಿಂದಂಡ್, ಜನ ದೇವಾಂದ್ ಕಾಕುವ ಎಲ್ಲಾಂಗ್ ಬಲ್ಯದಾಯಿತ್, ಆರಾದನೆ ಮಾಡ್‌ವ ಎಲ್ಲಾಂಗ್ ಬಲ್ಯದಾಯಿತ್ ಅಂವೊ ಅಂವೊನನೇ ಕೊಚ್ಚ್‌ವ. ದೇವನ ಆರಾದನೆ ಮಾಡ್‌ವ ಜಾಗತ್‍ಲ್ ದೇವಡನೆಕೆ ಅಂವೊ ಅಳ್‌ತಂಡ್, ನಾನೇ ದೇವಾಂದ್ ಎಲ್ಲಾ ಜನಕು ಎಣ್ಣಿಯಂಡಿಪ್ಪ. 5 ನಾನ್ ನಿಂಗಡ ಕೂಡೆ ಇಪ್ಪಕಾಪಕ, ನಿಂಗಕ್ ಈ ವಿಷಯ ಎಣ್ಣ್‌ನದ್ ನಿಂಗಕ್ ಗೇನ ಇಲ್ಲೆಯಾ? 6 ಆಚೇಂಗಿಯು, ಅಂವೊ ಪೊರಮೆ ಬಪ್ಪಕ್ ಕಯ್ಯತನೆಕೆ, ಇಕ್ಕ ಅಂವೊನ ತಡೆ ಮಾಡ್‍ವದ್ ಎಂತದ್‍ೕಂದ್ ನಿಂಗಕ್ ಗೊತ್ತುಂಡಲ್ಲ. ಆಚೇಂಗಿ, ಅಂವೊ ಕಂಡಿತವಾಯಿತ್ ತಕ್ಕ ಸಮಯತ್‍ಲ್ ಪೊರಮೆ ಬಪ್ಪ. 7 ದಾರ್‌ಕು ಗೊತ್ತಿಲ್ಲತೆ, ಇಕ್ಕಲೆ ಅದ್ಂಡ ಬಲ್ಯ ದುಷ್ಟ ಶಕ್ತಿ ಲೋಕತ್‍ಲ್ ಕ್ರಿಯೆ ಮಾಡಿಯಂಡುಂಡ್. ಆಚೇಂಗಿಯು, ಅಂವೊ ಪೂರ್ಣವಾಯಿತ್ ಪೊರಮೆ ಬಪ್ಪಕ್ ಅಂವೊನ ತಡೆ ಮಾಡ್‌ವಂವೊ ಇಲ್ಲಿಂಜ ಪೋಪಕತ್ತನೆ ಅಂವೊನ ಅಂವೊಂಗ್ ಪೊರಮೆ ಕಾಂಬ್‍ಚಿಡುವಕ್ ಕಯ್ಯುಲೆ. 8 ಅಂವೊನ ತಡೆ ಮಾಡ್‌ವಂವೊ ಇಲ್ಲಿಂಜ ಪೋಪಕ, ದುಷ್ಟ ಮನುಷ್ಯ ಪೊರಮೆ ಬಪ್ಪ; ಆಚೇಂಗಿ, ಒಡೆಯನಾನ ಯೇಸು ಬಂದಿತ್ ಅಂವೊನ ತಾಂಡ ಬಾಯಿರ ಉಸ್‍ರ್‌ರ ಮೂಲಕ ಕೊಂದಿತ್, ತಾನ್ ಬಪ್ಪ ಮಹಿಮೇರ ಬೊಳಿರಗುಂಡ್ ನಾಶ ಮಾಡ್‌ವ. 9 ಆ ಬಲ್ಯ ದುಷ್ಟ ಮನುಷ್ಯ ಪೊರಮೆ ಬಪ್ಪಕ, ಸೈತಾನಂಡ ಎಲ್ಲಾ ಶಕ್ತಿನ ಕೊಂಡ್ ಬಪ್ಪ. ನಾನಾ ತರತ್‍ರ ಅದ್ಬುತ, ಆಶ್ಚರ್ಯ ಕಾರ್ಯತ್‍ನ ಪಿಂಞ ಗುರ್‍ತ್‍ನ ದೇವ ಮಾಡ್‌ವನೆಕೆ ಅಂವೊನು ಮಾಡ್‌ವ, ಆಚೇಂಗಿ ಅದ್ ದೇವಡಯಿಂಜ ಬಪ್ಪದಲ್ಲ. 10 ಅಂವೊ ಇನ್ನನೆಯೆಲ್ಲಾ ಮೋಸ ಮಾಡಿತ್, ದುಂಬ ಜನಳ ವಂಚನೆ ಮಾಡ್‌ವ. ಈ ಜನ ನೇರಾಯಿತ್ ಪಾಳಾಯಿ ನರಕಕ್ ಪೋಪಕಾಯಿತ್ ಉಳ್ಳಯಿಂಗ, ಎನ್ನಂಗಾಯಿತ್ ಅಯಿಂಗ ಪಾಳಾಪ ಎಣ್ಣ್‌ಚೇಂಗಿ, ಈ ಜನ ಅಯಿಂಗಕ್ ರಕ್ಷಣೆ ತಪ್ಪ ಸತ್ಯತ್‍ನ ಸ್ವೀಕಾರ ಮಾಡತೆ ಪ್ರೀತಿ ಮಾಡತೆ ಪೋಚಿ. 11 ಆನಗುಂಡ್, ದೇವ ಈ ಜನ ಬಲ್ಯ ಮೋಸತ್‍ಲ್ ಚಿಕ್ಕ್‌ವನೆಕೆ ಮಾಡ್‌ವ, ಅನ್ನನೆ, ಆ ಮನುಷ್ಯ ಎಣ್ಣುವ ಪೊಟ್ಟ್‌ನೆಲ್ಲ ಅಯಿಂಗ ನಂಬುವನೆಕೆ ಮಾಡ್‍ಚಿ. 12 ಅದ್ಂಗಾಯಿತ್, ಸತ್ಯತ್‍ನ ನಂಬತೆ, ಪಾಪತ್‍ಲ್ ಕುಶಿಪಟ್ಟಂಡ್ ಇಂಜಯಿಂಗಕ್ ತೀರ್ಪ್ ತಪ್ಪನೆಕೆ ದೇವ ಮಾಡ್‍ಚಿ. ರಕ್ಷಣೆಕಾಯಿತ್ ದೇವ ನಿಂಗಳ ನೇಮಿಚಿಟ್ಟತ್ 13 ಒಡೆಯಂಡ ಪ್ರೀತಿರ ಅಣ್ಣತಮ್ಮಣಂಗಳೇ, ದೇವ ನಿಂಗಳ ಪವಿತ್ರಾತ್ಮತ್‍ರ ಶಕ್ತಿರಗುಂಡ್ ಬೋರೆ ಮಾಡಿತ್, ಶುದ್ದ ಮಾಡ್‍ನಗುಂಡ್ ಪಿಂಞ ನಿಂಗ ಸತ್ಯತ್‍ನ ನಂಬ್‍ನಗುಂಡ್ ನಿಂಗಕ್ ರಕ್ಷಣೆ ಕ್‍ಟ್ಟುವನೆಕೆ ಅಂವೊ ಮಾಡ್‍ಚಿ. ಅನ್ನನೆ ಅಂವೊ ಈ ಲೋಕತ್‍ನ ಸೃಷ್ಟಿ ಮಾಡ್‌ವಕ್ ಮಿಂಞಲೇ ನಿಂಗಳ ಗೊತ್ತ್ ಮಾಡ್‍ನಗುಂಡ್, ನಿಂಗಕಾಯಿತ್ ದೇವಕ್ ನಂಗ ಎಕ್ಕಾಲು ವಂದನೆ ಮಾಡ್‌ವಕ್ ನಂಗ ಜವಾಬ್ದಾರಂಗಳಾಯಿತ್ ಉಂಡ್. 14 ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಮಹಿಮೇಕ್ ಪಾಲ್‍ದಾರಂಗಳಾಯಿತ್ ಇಪ್ಪಕ್, ನಂಗ ನಿಂಗಕ್ ಮಾಡ್‍ನ ನಲ್ಲ ಸುದ್ದಿರ ಬೋದನೆರ ಮೂಲಕ ಅಂವೊಂಡ ಪಕ್ಕ ನಿಂಗಳ ಕಾಕ್‍ಚಿ. 15 ಆನಗುಂಡ್ ನಾಡ ಅಣ್ಣತಮ್ಮಣಂಗಳೇ, ನಿಂಗ ಸ್ತಿರವಾಯಿತ್ ನಿಂದಂಡ್, ನಂಗ ನಿಂಗಡ ಕೂಡೆ ಇಪ್ಪಕ ಮಾಡ್‍ನ ಬೋದನೆನ ಮಾತ್ರ ಅಲ್ಲ ನಂಗ ನಿಂಗಕ್ ಒಳ್‍ದ್‍ನ ಕಾಗದತ್‍ರ ಮೂಲಕ ಕ್‍ಟ್ಟ್‌ನ ಬೋದನೆನ ಸಹ ಗಟ್ಟಿಯಾಯಿತ್ ಪುಡ್‍ಚೊಳಿ. 16 ನಂಗಡ ಒಡೆಯನಾನ ಯೇಸು ಕ್ರಿಸ್ತನು, ನಂಗಡ ಮೇಲೆ ಪ್ರೀತಿ ಬೆಚ್ಚಿತ್ ನಂಗಡ ಹೃದಯತ್‍ಲ್ ನಿತ್ಯ ಒತ್ತಾಸೆನೆ, ಕುಶೀರ ನಿರಿಕ್ಷೇನ, ನಂಗಕ್ ಕೃಪೆಯಾಯಿತ್ ದಾನಮಾಡ್‍ನ ಅಪ್ಪನಾನ ದೇವನು, 17 ನಿಂಗಡ ಹೃದಯಕ್ ಒತ್ತಾಸೆ ಮಾಡಿತ್, ಎಲ್ಲಾ ನಲ್ಲ ಕೆಲಸ ಮಾಡ್‌ವಕ್ ಪಿಂಞ ನಲ್ಲ ತಕ್ಕ್ ಪರಿಯುವಕ್ ಬಲಪಡ್‍ತಡ್. |
© 2017, New Life Literature (NLL)