2 ಪೇತ್ರ 1 - ಕೊಡವ ಬೈಬಲ್ವಂದನೆ 1 ನಂಗಡ ದೇವನು ರಕ್ಷಕನು ಆನ ಯೇಸು ಕ್ರಿಸ್ತಂಡ ನೀತಿರಗುಂಡ್ ನಂಗಡನೆಕೆ ಬೆಲೆಯುಳ್ಳ ನಂಬಿಕೆ ಕ್‍ಟ್ಟ್‌ನ ನಿಂಗಕ್, ಯೇಸು ಕ್ರಿಸ್ತಂಡ ಅಪೊಸ್ತಲನು ಸೇವಕನು ಆಯಿತುಳ್ಳ ಸೀಮೋನ ಪೇತ್ರ ಒಳ್‍ದ್‍ವ ಕಾಗದ ಇದ್. 2 ದೇವನ ಪಿಂಞ ನಂಗಡ ಒಡೆಯನಾನ ಯೇಸು ಕ್ರಿಸ್ತನ ಅರಿಂಜಿತುಳ್ಳ ಬುದ್ದಿರಗುಂಡ್ ನಿಂಗಕ್ ದುಂಬ್‍ನ ಕೃಪೆಯು ಸಮಾದಾನವು ಕ್‍ಟ್ಟಡ್. 3 ದೇವಡ ಶಕ್ತಿ ನಂಗಡ ಈ ಬದ್‍ಕ್‍ಕ್ ಬೋಂಡಿಯಾನ ಎಲ್ಲಾನ ತಂದಿತ್, ದೇವಡ ಬಕ್ತಿಲ್ ಬದ್‍ಕ್‍ವಕ್ ಮಾಡಿಯಂಡುಂಡ್. ಅಂವೊಂಡ ಮಹಿಮೇರಗುಂಡ್ ಪಿಂಞ ನಲ್ಲ ಗುಣತ್‍ರಗುಂಡ್ ನಂಗಳ ಕಾಕ್‍ನಂವೊನ ಗೊತ್ತಾನಗುಂಡ್ ಇದೆಲ್ಲ ನಂಗಕ್ ಕ್‍ಟ್ಟ್‌ಚಿ. 4 ಇದ್‍ನಗುಂಡ್, ಅಂವೊ ನಂಗಕ್ ದುಂಬ ಬಲ್ಯ ಬೆಲೆಯುಳ್ಳ ವಾಗ್ದಾನವೆಲ್ಲ ತಂದಿಯತ್. ಅನ್ನನೆ, ಇದ್ಂಡ ಮೂಲಕ ದೇವಡ ಗುಣತ್‍ಲ್ ನಂಗ ಪಾಲ್‍ದಾರಂಗಳಾಯಿತ್ ಈ ಲೋಕತ್‍ಲ್ ಉಳ್ಳ ಇಚ್ಛೆರ ಮೂಲಕ ಬಪ್ಪ ಕ್‍ೕಡ್‍ಕ್ ತಪ್ಪ್‌ಚಿಡ್‌ವನೆಕೆ ಮಾಡ್‍ಚಿ. ನಂಬಿಕೇಲ್ ಬೊಳಿಯುವದ್ 5 ಈ ಕಾರಣಕಾಯಿತ್, ನಿಂಗ ದುಂಬ ಜಾಗ್ರತೆಲ್, ನಿಂಗಡ ನಂಬಿಕೇರ ಕೂಡೆ ದುಂಬ ನಲ್ಲ ಗುಣತ್‍ನ, ನಲ್ಲ ಗುಣತ್‍ರ ಕೂಡೆ ದೈರ್ಯತ್‍ನ, ದೈರ್ಯತ್‍ರ ಕೂಡೆ ಜ್ಞಾನತ್‍ನ, 6 ಜ್ಞಾನತ್‍ರ ಕೂಡೆ ತನ್ನಡಕತ್‍ನ, ತನ್ನಡಕತ್‍ರ ಕೂಡೆ ಪೊರುಮೆನ, ಪೊರುಮೆರ ಕೂಡೆ ದೇವ ಬಕ್ತಿನ, 7 ದೇವ ಬಕ್ತಿರ ಕೂಡೆ ಯೇಸುನ ನಂಬ್‍ನಯಿಂಗಡ ಮೇಲೆ ಉಳ್ಳ ಪ್ರೀತಿನ, ಯೇಸುನ ನಂಬ್‍ನಯಿಂಗಡ ಮೇಲೆ ಉಳ್ಳ ಪ್ರೀತಿರ ಕೂಡೆ ಎಲ್ಲಾ ಜನಳ ಪ್ರೀತಿಚಿಡುವ ಪ್ರೀತಿನ ಕೂಟ್‍ವಕ್ ಪೇಚಾಡಿಯಂಡಿರಿ. 8 ಈ ಗುಣವೆಲ್ಲ ನಿಂಗಕ್ ಇಂಜಿತ್, ಬೊಳ್‌ಂದತೇಂಗಿ, ನಿಂಗ ನಂಗಡ ಒಡೆಯನಾನ ಯೇಸು ಕ್ರಿಸ್ತನ ಗೊತ್ತಾಯಿತುಳ್ಳ ಬುದ್ದಿಲ್ ಪ್ರಯೋಜನ ಇಲ್ಲತಯಿಂಗಳು, ಫಲ ಕೊಡ್‍ಪಕ್ ಕಯ್ಯತಯಿಂಗಳು ಆಯಿತ್ ಇಪ್ಪಕ್ ಬುಡುಲೆ. 9 ಈ ಗುಣವೆಲ್ಲ ದಾರ್‌ಕ್ ಇಲ್ಲೆಯೋ, ಅಯಿಂಗ ಮಿಂಞ ಮಾಡ್‍ನ ಪಾಪತ್ಂಜ ಪವಿತ್ರ ಆನದ್‍ನ ಮರ್ಂದ್ ಪೋಯಿತ್, ದೂರತ್‍ಲ್ ಉಳ್ಳದ್‍ನ ಕಾಂಬಕ್ ಕಯ್ಯತ ಕುರ್‌ಡಂಗನೆಕೆ ಆಯಿತ್‌ಪ್ಪ. 10 ಆನಗುಂಡ್ ನಾಡ ಅಣ್ಣತಮ್ಮಣಂಗಳೇ, ನಿಂಗಳ ದೇವ ಕಾಕ್‍ನದ್‌ಲ್ ಪಿಂಞ ದೇವ ಆಯ್ಕೆ ಮಾಡ್‍ನದ್‍ಲ್ ದೃಡವಾಯಿತ್ ಇಪ್ಪಕಾಯಿತ್ ಎಚ್ಚರತ್‍ಲ್ ಇರಿ; ಇನ್ನನೆ ನಿಂಗ ಮಾಡ್‍ಚೇಂಗಿ ನಿಂಗ ಬುದ್ದ್ ಪೋಪುಲೆ. 11 ಇನ್ನನೆ ನಂಗಡ ಒಡೆಯನು ರಕ್ಷಕನುವಾಯಿತುಳ್ಳ ಯೇಸು ಕ್ರಿಸ್ತಂಡ ನಿತ್ಯ ರಾಜ್ಯತ್‍ರ ಒಳ್‍ಕ್ ಪೋಪಕುಳ್ಳ ಪೂರ್ತಿ ಸತ್ಕಾರ ನಿಂಗಕ್ ಕ್‍ಟ್ಟುವ. ದೇವಡ ವಾಕ್ಯತ್‍ರ ಮಹಿಮೆ 12 ಆನಗುಂಡ್, ನಿಂಗಕ್ ಇದ್‍ನೆಲ್ಲಾ ಗೊತ್ತ್ಂಜತೇಂಗಿಯು, ಇಕ್ಕ ನಿಂಗಕ್ ಗೊತ್ತುಳ್ಳ ಸತ್ಯತ್‍ಲ್ ಸ್ತಿರವಾಯಿತ್ ಇಂಜತೇಂಗಿಯು, ಇದ್‍ನೆಲ್ಲಾ ಎಕ್ಕಾಲು ನಿಂಗಕ್ ಗೇನ ಮಾಡಿಯಂಡಿಪ್ಪಿ. 13-14 ನಂಗಡ ಒಡೆಯನಾನ ಯೇಸು ಕ್ರಿಸ್ತ ನಾಕ್ ಕಾಂಬ್‌ಚಿಟ್ಟನೆಕೆ, ನಾನ್ ಬೆರಿಯ ಈ ತಡಿಯಿಂಜ ಪೋಪದ್ ಗೊತ್ತಾನಗುಂಡ್, ನಾನ್ ಈ ತಡೀಲ್ ಬದ್‍ಕಿಯಂಡ್ ಇಪ್ಪಕತ್ತನೆ ನಿಂಗಡ ಗೇನಕ್ ಇದ್‍ನೆಲ್ಲಾ ಎಣ್ಣಿಯಂಡ್ ಇಪ್ಪದ್ ಸರಿಯಾಯಿತ್ ಉಂಡ್‍ೕಂದ್ ಗೇನ ಮಾಡ್‌ವಿ. 15 ಆನಗುಂಡ್, ನಾನ್ ಈ ಲೋಕತ್ಂಜ ಪೋನ ಪಿಂಞ ನಿಂಗ ಇದ್‍ನೆಲ್ಲಾ ಗೇನತ್‍ಲ್ ಬೆಚ್ಚಂಡಿಪ್ಪಕಾಯಿತ್ ಪ್ರಯತ್ನಪಟ್ಟಂಡುಂಡ್. 16 ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಶಕ್ತಿನ ಪಿಂಞ ಅಂವೊ ಪುನಃ ಬಪ್ಪದ್‍ನ ನಂಗ ನಿಂಗಕ್ ಎಣ್ಣುವಕ, ತಂತ್ರವಾನ ಕಥೇನ ಕಂಡ್‍ಪುಡ್‌ಚಿತ್ ನಿಂಗಕ್ ಎಣ್ಣಿತ್‌ಲ್ಲೆ. ಆಚೇಂಗಿ ಅಂವೊಂಡ ಮಹತ್ವತ್‌ನ ನಂಗಳೇ ಕಂಡಿತುಳ್ಳಯಿಂಗಳಾಯಿತ್ ಎಣ್ಣಿಯೆ. 17 ಇಂವೊ ನಾಡ ಕೊದಿರ ಮೋಂವೊ, ಇಂವೊಂಡ ಮೇಲೆ ನಾಕ್ ದುಂಬ ಕುಶಿ ಉಂಡ್‍ೕಂದ್ ಎಣ್ಣುವ ಆ ಸದ್ದ್ ಮಹತ್ವವಾನ ಮಹಿಮೇಯಿಂಜ ಅಂವೊಂಗ್ ಬಂದಿತ್, ಅಪ್ಪನಾನ ದೇವಡ ಕಡೇಯಿಂಜ ಅಂವೊಂಗ್ ಗನ ಪಿಂಞ ಮಹಿಮೆ ಕ್‍ಟ್ಟ್‌ಚಿ. 18 ಅಕ್ಕ ಅಂವೊಂಡ ಕೂಡೆ ನಂಗಳು ಪವಿತ್ರವಾನ ಕುಂದ್‍ಲ್ ಇಂಜಂಡ್ ಆ ಸದ್ದ್ ಪರಲೋಕತ್ಂಜ ಬಂದಾನ ಕ್‍ೕಟತ್. 19 ಈ ಅನುಬವ ನಂಗಕ್ ಕ್‍ಟ್ಟ್‌ನಗುಂಡ್, ಪ್ರವಾದಿಯಂಗ ಪ್ರವಾದನೆ ಮಾಡ್‍ನ ವಿಷಯತ್‍ಲ್ ನಂಗಕ್ ದುಂಬ ನಂಬಿಕೆ ಉಂಡ್. ಅಯಿಂಗ ಒಳ್‍ದಿ ಬೆಚ್ಚಿತುಳ್ಳದ್‍ನ ನಿಂಗ ಚಾಯಿ ನೋಟಂಡು. ಅಯಿಂಗಡ ವಾಕ್ಯವೆಲ್ಲ, ಇರ್‌ಟ್‌ಲ್ ಬೊಳಿ ತಪ್ಪ ಬೊಳ್‌ಚತ್‍ರನೆಕೆ ಉಂಡ್. ಪೊಲಾಕ ಆಪಕ ಬೊಳ್ಳಿ ಮೀನ್ ಬಪ್ಪನೆಕೆ, ಅಯಿಂಗಡ ವಾಕ್ಯ ನಿಂಗಡ ಹೃದಯತ್‍ಲ್ ಬೊಳಿಯುವಕತ್ತನೆ ಅದ್‍ನ ನೋಟಿಯಂಡ್ ಇಪ್ಪದ್ ನಲ್ಲದಾಯಿತಿಪ್ಪ. 20 ಎಲ್ಲಾಕಿಂಜ ಮುಕ್ಯವಾಯಿತ್, ದೇವಡ ವಾಕ್ಯತ್‍ಲ್ ಉಳ್ಳ ಏದ್ ಪ್ರವಾದನೆಯು ಪ್ರವಾದಿಯಂಗಡ ಸ್ವಂತ ಗೇನತ್ಂಜ ಬಂದದ್ ಅಲ್ಲಾಂದ್ ನಿಂಗಕ್ ಗೊತ್ತಿರಡ್. 21 ಅಥವ, ಏದ್ ಪ್ರವಾದನೆಯು ಮನುಷ್ಯಂಗಡ ಚಿತ್ತತ್‍ರನೆಕೆ ಬಂದದ್ ಅಲ್ಲ; ದೇವಡ ಪವಿತ್ರವಾನ ಮನುಷ್ಯಂಗ ಪವಿತ್ರಾತ್ಮ ಎಣ್ಣುವಕ, ಅದ್ಂಗ್ ತಕ್ಕಂತದಾಯಿತ್ ಪರ್ಂದತ್. |
© 2017, New Life Literature (NLL)