2 ಯೋಹಾನ 1 - ಕೊಡವ ಬೈಬಲ್ವಂದನೆ 1 ಮೂಪನಾನ ನಾನ್ ನೇರಾಯಿತ್ ಪ್ರೀತಿಚಿಡ್‍ವ ದೇವ ಗೊತ್ತ್ ಮಾಡ್‍ನ ಪ್ರೀತಿರ ಅವ್ವಂಗ್ ಪಿಂಞ ಅವಡ ಮಕ್ಕಕ್ ಒಳ್‍ದ್‍ವ ಕಾಗದ. ನಾನ್ ಒಬ್ಬ ಮಾತ್ರ ಅಲ್ಲ, ಆಚೇಂಗಿ ನೇರಾನ ಸತ್ಯ ಗೊತ್ತುಳ್ಳ ಎಲ್ಲಾರು ನಿಂಗಳ ಪ್ರೀತಿ ಮಾಡ್‌ವ. 2 ಎನ್ನಂಗೆಣ್ಣ್‌ಚೇಂಗಿ ಸತ್ಯ ನಂಗಡ ಹೃದಯತ್‍ರ ಒಳ್‍ಲ್ ವಾಸ ಮಾಡಿಯಂಡ್, ಎಕ್ಕಾಲು ನಂಗಡ ಕೂಡೆ ಉಂಡ್. 3 ನಂಗಡ ಅಪ್ಪನಾನ ದೇವಡಯಿಂಜಲು, ಅಪ್ಪಂಡ ಮೋಂವೊನಾನ ಯೇಸು ಕ್ರಿಸ್ತಡಿಂಜಲು, ನಿಂಗಕ್ ಕೃಪೆ ಕರುಣೆ ಪಿಂಞ ಸಮಾದಾನ, ಸತ್ಯತ್‍ಲ್ ಪ್ರೀತಿಲ್ ನಿಂಗಡ ಕೂಡೆ ಇರಡ್. ಸತ್ಯ ಪಿಂಞ ಪ್ರೀತಿ 4 ಅಪ್ಪ ನಂಗಕ್ ಆಜ್ಞೆ ತಂದನೆಕೆ, ನೀಡ ಮಕ್ಕಡಲ್ಲಿ ಚೆನ್ನ ಮಕ್ಕ ಸತ್ಯತ್‍ಲ್ ಬದ್‍ಕಿಯಂಡುಂಡ್‍ೕಂದ್ ಗೊತ್ತಾನಗುಂಡ್ ನಾಕ್ ದುಂಬ ಕುಶಿ ಆಚಿ. 5 ಇಕ್ಕಲು ಅವ್ವ, ನಂಗ ಒಬ್ಬೊಬ್ಬನ ಪ್ರೀತಿ ಮಾಡಂಡೂಂದ್, ನಿಂಗಕ್ ಪುದಿಯ ಆಜ್ಞೆಯಾಯಿತ್ ಒಳ್‍ದತೆ, ಆದಿಯಿಂಜಲೆ ನಂಗಕ್ ಇಂಜ ಆಜ್ಞೆನ ಒಳ್‍ದಿತ್ ನಿಂಗಳ ಬೋಡುವಿ. 6 ನಂಗ ಅಂವೊಂಡ ಆಜ್ಞೆಕ್ ಬಗ್ಗಿತ್ ನಡ್‍ಪದೇ ಪ್ರೀತಿ. ನಿಂಗ ಆದಿಯಿಂಜಲೆ ಕ್‍ೕಟನೆಕೆ, ಮಾಡ್‍ವಕುಳ್ಳ ಆಜ್ಞೆ ಎಂತ ಎಣ್ಣ್‌ಚೇಂಗಿ ನಿಂಗ ಎಲ್ಲಾರು ಪ್ರೀತಿಲ್ ಬದ್‍ಕಂಡೂಂದ್ ಉಳ್ಳದೇ. 7 ಯೇಸು ಕ್ರಿಸ್ತ ಮನುಷ್ಯ ರೂಪತ್‌ಲ್ ಈ ಬೂಲೋಕಕ್ ಬಾತ್‍ೕಂದ್ ಉಳ್ಳದ್‍ನ ಒತ್ತತೆ, ವಂಚನೆ ಮಾಡ್‌ವಯಿಂಗ ಈ ಲೋಕತ್‍ಲ್ ದುಂಬ ಬಂದಿತುಂಡ್. ಅನ್ನನೆ ಮಾಡ್‌ವಂವೊ ವಂಚನೆ ಮಾಡ್‌ವಂವೊನು, ಕಳ್ಳ ಕ್ರಿಸ್ತನಾಯಿತು ಉಂಡ್. 8 ನಿಂಗಡ ಕೆಲಸತ್‌ರ ಫಲತ್‍ನ ಕಳೆಂದ್ ಪೋಕತನೆಕೆ, ಅದ್ಂಗ್ ಪೂರ್ತಿ ಪ್ರತಿಫಲ ಕ್‍ಟ್ಟ್‌ವನೆಕೆ ಎಚ್ಚರತ್‍ಲ್ ಇರಿ. 9 ಕ್ರಿಸ್ತಂಡ ಬೋದನೆರನೆಕೆ ನಡ್‍ಕತೆ ಅದ್‍ನ ಮೀರಿತ್ ನಡ್‍ಪಯಿಂಗಡ ಕೂಡೆ ದೇವ ಇಲ್ಲೆ. ಯೇಸು ಕ್ರಿಸ್ತಂಡ ಉಪದೇಶಕ್ ಬಗ್ಗಿತ್ ನಡ್‍ಪಯಿಂಗಡ ಕೂಡೆ ಅಪ್ಪನಾನ ದೇವ ಪಿಂಞ ಮೋಂವೊ ಉಂಡ್. 10 ಈ ಉಪದೇಶಕ್ ಒತ್ತತೆ ನಿಂಗಡ ಪಕ್ಕ ದಾರಾಚೇಂಗಿ ಬಂದಕ, ಅಯಿಂಗಳ ನಿಂಗಡ ಮನೆರ ಒಳ್‍ಕ್ ಕೂಟ್‌ವಕ್ಕಾಗ; ಅಯಿಂಗಳ ಸತ್ಕಾರ ಸಹ ಮಾಡ್‌ವಕ್ಕಾಗ. 11 ಅನ್ನನೆ ಸತ್ಕಾರ ಮಾಡ್‌ವಯಿಂಗ, ಅಯಿಂಗಡ ಕೆಟ್ಟ ಕೆಲಸತ್‍ಲ್ ಪಾಲ್‍ದಾರಂಗ ಆಪ. ಕಡೆ ತಕ್ಕ್ 12 ನಿಂಗಡ ಪಕ್ಕ ಎಣ್ಣುವಕ್ ದುಂಬ ವಿಷಯ ಉಂಡ್, ಆಚೇಂಗಿ ನಾಕ್ ಈ ಕಾಗದತ್‍ಲ್ ಎಲ್ಲಾನ ಒಳ್‍ದ್‍ವಕ್ ಮನಸ್ಸಿಲ್ಲೆ. ನಾನ್ ನಿಂಗಡ ಪಕ್ಕ ಬಪ್ಪಂಜಿ ಮೂಡ್ ನೋಟಿತ್ ತಕ್ಕ್ ಪರಿಯುವಕ್ ಪಾರಕಾತಂಡ್ ಉಳ್ಳ. ಅಕ್ಕ ನಂಗಡ ಸಂತೋಷ ಉಕ್ಕಿ ಬಪ್ಪ. 13 ದೇವ ಗೊತ್ತ್ ಮಾಡಿತುಳ್ಳ ನೀಡ ತಂಗೆರ ಮಕ್ಕ ನೀಕ್ ವಂದನೆ ಎಣ್ಣಿಯಂಡುಂಡ್. |
© 2017, New Life Literature (NLL)