2 ಕೊರಿಂಥ 9 - ಕೊಡವ ಬೈಬಲ್ಯೆರೂಸಲೇಮ್ ಪಟ್ಟಣತ್‍ರ ದೇವಡ ಮಕ್ಕಕ್ ಪಣ ಸಹಾಯ 1 ದೇವಡ ಮಕ್ಕಕ್ ಮಾಡ್‌ವಕುಳ್ಳ ಪಣ ಸಹಾಯತ್‍ರ ವಿಷಯತ್ ನಿಂಗಕ್ ನಾನ್ ದುಂಬ ಒಳ್‍ದಂಡೂಂದ್ ಇಲ್ಲೆ. 2 ನಿಂಗಡ ಮನಸ್ಸ್‌ರ ಆಸೆ ನಾಕ್ ಗೊತ್ತುಂಡ್; ಅಖಾಯ ಪ್ರಾಂತ್ಯತ್‍ಲ್ ಉಳ್ಳ ದೇವಡ ಮಕ್ಕ ಇದ್‍ನ ಮಾಡ್‌ವಕ್ ಒರ್ ಕಾಲತ್ಂಜ ತಯಾರಾಯಿತ್ ಉಂಡ್‍ೕಂದ್, ಮಕೆದೋನ್ಯ ಪಟ್ಟಣತ್‍ರ ಮಕ್ಕಕ್ ಎಣ್ಣಿತ್ ನಿಂಗಳ ಹೊಗಳ್‍ಚಿಟ್ಟಿಯೆ; ನಿಂಗಡ ಅಪೇಕ್ಷೆ ದುಂಬ ಜನಕ್ ಪುರ್‌ಡ್ ಕೊಡ್‍ತತ್. 3 ಆಚೇಂಗಿ, ನಿಂಗಡ ವಿಷಯತ್ ನಾನ್ ಎಣ್ಣ್‌ನ ಹೊಗಳಿಕೆ ಈ ವಿಷಯತ್‍ಲ್ ಪ್ರಯೋಜನ ಇಲ್ಲತೆ ಪೋಕತನೆಕೆ, ನಾನ್ ಎಣ್ಣ್‌ನನೆಕೆ ನಿಂಗ ತಯಾರಾಯಿತ್ ಇಪ್ಪಕ್, ಈ ತಮ್ಮಣಂಗಳ ನಾನ್ ಅಯಿಚಿಯೆ. 4 ಮಕೆದೋನ್ಯತ್‍ರ ಜನ ನಾಡ ಕೂಡೆ ಬಂದಿತ್, ನಿಂಗ ತಯಾರಾಯಿತ್ ಇಲ್ಲತದ್‍ನ ಕಾಂಬಕ, ಇಚ್ಚಕ್ ಬಲ್ಯದಾಯಿತ್ ನಾನ್ ನಿಂಗಡ ವಿಷಯತ್‍ನ ಎಣ್ಣ್‌ನಾಂಗ್, ನಿಂಗಕ್ ಞಾಣ ಆಪಾಂದ್ ನಾನ್ ಎಣ್ಣುವಕ್ ಬದ್‍ಲಾಯಿತ್, ನಂಗಳೇ ಞಾಣ ಪಡುವನೆಕೆ ಆಪ. 5 ಆನಗುಂಡ್, ನಿಂಗ ವಾಗ್ದಾನ ಮಾಡ್‍ನ ಈ ಪಣದಾನ ಒತ್ತಾಯ ಮಾಡ್‍ನಗುಂಡ್ ಅಲ್ಲ, ನಿಂಗಡ ಉದಾರ ಮನಸ್ಸ್‌ಲ್ ಕೊಡ್‍ಪನೆಕೆ, ನಿಂಗಳ ತಯಾರ್ ಮಾಡ್‌ವಕಾಯಿತ್ ಈಂಗಳ ನಾನ್ ನಿಂಗಡ ಪಕ್ಕ ಮಿಂಞಲೇ ಅಯಿಕಂಡೂಂದ್ ನಾಕ್ ಗೇನ ಆಚಿ. 6 ಚೆನ್ನ ಬಿತ್ತ್ ಇಡ್‌ವಂವೊ ಚೆನ್ನ ಕೊಯ್ಯುವ, ದುಂಬ ಬಿತ್ತ್ ಇಡ್‌ವಂವೊ, ದುಂಬ ಕೊಯ್ಯುವಾಂದ್ ಉಳ್ಳದ್‍ನ ಗೇನ ಮಾಡಿಯೊಳಿ. 7 ಒಬ್ಬೊಬ್ಬನು ಮನಸ್ಸ್ ಕಷ್ಟಪಟ್ಟಿತೋ ಒತ್ತಾಯ ಮಾಡಿತೋ ಅಲ್ಲ, ತಾಂಡ ಮನಸ್ಸ್‌ಲ್ ತೀರ್ಮಾನ ಮಾಡ್‍ನನೆಕೆ ಕೊಡ್‌ಕಡ್; ಕುಶೀಲ್ ಕೊಡ್‍ಪಂವೊನ ದೇವ ಪ್ರೀತಿಚಿಡುವ. 8 ನಿಂಗ ಎಕ್ಕಾಲು ಎಲ್ಲಾ ವಿಷಯತ್‍ಲು ಪೂರ್ತಿಯಾಯಿತ್ ಇಪ್ಪಕು, ಎಲ್ಲಾ ನಲ್ಲ ಕ್ರಿಯೇಲ್ ಬೊಳಿಯುವಕು ದೇವ ನಿಂಗಕ್ ಎಲ್ಲಾ ಕೃಪೇನ ದಾರಾಳಾವಾಯಿತ್ ತಪ್ಪಕ್ ಶಕ್ತಿವಂತಂವೊನಾಯಿತುಂಡ್. 9 ದಾರಾಳವಾಯಿತ್ ಕೊಡ್‍ತತ್, ಗರೀಬಂಗಕ್ ದಾನ ಮಾಡ್‍ಚಿ, ಅಂವೊಂಡ ನೀತಿ ಎಕ್ಕಾಲು ನಿಪ್ಪಾಂದ್ ಒಳ್‍ದಿತುಳ್ಳನೆಕೆ ಆಪ. 10 ಬಿತ್ತ್‌ವಂವೊಂಗ್ ಕುರುನ ಪಿಂಞ ತಿಂಬಕ್ ಕೂಳ್‌ನ ತಪ್ಪ ದೇವ, ನಿಂಗಕ್ ಕುರುನ ತಂದಿತ್, ಅದ್‍ನ ಜಾಸ್ತಿ ಮಾಡಿತ್, ನಿಂಗಡ ನೀತಿರ ಬೊಳೆನ ಜಾಸ್ತಿ ಮಾಡ್‌ವ. 11 ಇನ್ನನೆ ನಿಂಗ ಎಲ್ಲಾ ವಿಷಯತ್‍ಲ್ ಐಶ್ವರ್ಯವಂತಯಿಂಗಳಾಯಿತ್ ದಾರಾಳವಾಯಿತ್ ಕೊಡ್‍ಪಕ್ ಶಕ್ತಿವಂತಯಿಂಗಳಾಪಿರ. ಅದ್ ನಂಗಡ ಮೂಲಕ ದೇವಕ್ ವಂದನೆ ಕ್‍ಟ್ಟುವಕ್ ಕಾರಣವಾಯಿತ್‌ಪ್ಪ. 12 ಈ ಪಣದಾನ ಸೇವೆ ದೇವಡ ಮಕ್ಕಡ ಗರೀಬತನತ್‍ನ ಬದ್‍ಲ್ ಮಾಡ್‌ವ, ಅದಲ್ಲತೆ, ದುಂಬ ಜನ ದೇವಕ್ ವಂದನೆ ಎಣ್ಣ್‌ವಗುಂಡ್, ಪೂರ್ತಿ ಫಲವು ಕ್‍ಟ್ಟುವ. 13 ಅಯಿಂಗ ಈ ಪಣದಾನತ್‍ರ ಸಹಾಯತ್‍ನ ಅನುಬವಿಚಿಟ್ಟಿತ್, ನಿಂಗ ಕ್ರಿಸ್ತಂಡ ನಲ್ಲ ಸುದ್ದಿಕ್ ತಗ್ಗಿತ್ ಅರಿಕೆ ಮಾಡ್‍ನಗುಂಡ್, ಅಯಿಂಗಕು ಬೋರೆ ಎಲ್ಲಾರ್‌ಕು ನಿಂಗ ದಾರಾಳವಾಯಿತ್ ದಾನ ಮಾಡ್‍ನಂಗಾಯಿತ್ ದೇವನ ತುದಿಪ. 14 ಆನಗುಂಡ್ ದೇವ ನಿಂಗಕ್ ದಾರಾಳವಾಯಿತ್ ಕೊಡ್‍ತ ಕೃಪೆಕಾಯಿತ್ ನಿಂಗಕ್ ಪ್ರಾರ್ಥನೆ ಮಾಡಿತ್, ನಿಂಗಡ ಮೇಲೆ ದುಂಬ ಪ್ರೀತಿಲ್ ಇಪ್ಪ. 15 ದೇವ ಮಾಡ್‍ನ ಎಣ್ಣ್‌ವಕಯ್ಯತ ಅಂವೊಂಡ ಇನಾಮ್‍ಕಾಯಿತ್ ಅಂವೊಂಗ್ ವಂದನೆ. |
© 2017, New Life Literature (NLL)