2 ಕೊರಿಂಥ 1 - ಕೊಡವ ಬೈಬಲ್1 ದೇವಡ ಚಿತ್ತತ್‍ರನೆಕೆ ಯೇಸು ಕ್ರಿಸ್ತಂಡ ಅಪೊಸ್ತಲನಾನ ಪೌಲ ಪಿಂಞ ನಂಗಡ ತಮ್ಮಣನಾನ ತಿಮೊಥೆಯ ಕೂಡಿತ್, ಕೊರಿಂಥ ಪಟ್ಟಣತ್‍ಲ್ ಉಳ್ಳ ಸಬೇಕ್ ಪಿಂಞ ಅಖಾಯ ಪ್ರಾಂತ್ಯತ್‍ರ ಎಲ್ಲಾ ಜಾಗತ್‍ಲ್ ಉಳ್ಳ ಯೇಸುನ ನಂಬ್‍ನ ಎಲ್ಲಾ ಜನಕ್ ಒಳ್‍ದ್‍ವ ಕಾಗದ ಇದ್. 2 ನಂಗಡ ಅಪ್ಪನಾನ ದೇವಡ ಪಿಂಞ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆಯು ಸಮಾದಾನವು ನಿಂಗಕ್ ಕ್‍ಟ್ಟಡ್. ಸಮಾದಾನತ್‍ರ ದೇವ 3 ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಅಪ್ಪನಾಯಿತು, ಕನಿಕರತ್‍ರ ಅಪ್ಪನಾಯಿತು, ಎಲ್ಲಾ ಸಮಾದಾನವು ತಪ್ಪ ದೇವನಾಯಿತುಳ್ಳ ದೇವಕ್ ವಂದನೆ. 4 ಎಂತ ಕಷ್ಟತ್‍ಲ್ ಇಂಜತೇಂಗಿಯು ಅಯಿಂಗಳ ಸಮಾದಾನ ಮಾಡ್‌ವಕ್ ಬಲ ಉಳ್ಳಯಿಂಗಳಾಯಿತ್ ನಂಗ ಬೊಳಿಯುವನೆಕೆ, ನಂಗಕ್ ಬಪ್ಪ ಎಲ್ಲಾ ಕಷ್ಟತ್‍ಲು, ದೇವ ಮಾತ್ರ ನಂಗಕ್ ಸಮಾದಾನ ತಂದಂಡುಂಡ್. 5 ಅದ್ ಎನ್ನನೆ ಎಣ್ಣ್‌ಚೇಂಗಿ, ಕ್ರಿಸ್ತಂಡ ಕಷ್ಟ ನಂಗಡಲ್ಲಿ ಎನ್ನನೆ ಜಾಸ್ತಿ ಆಯಂಡುಂಡೊ ಅನ್ನನೆ ಕ್ರಿಸ್ತನಗುಂಡ್ ನಂಗಕ್ ಸುಕವೂ ಜಾಸ್ತಿ ಆಯಂಡುಂಡ್. 6 ಆನಗುಂಡ್, ನಂಗ ಹಿಂಸೆ ಪಟ್ಟತೇಂಗಿಯು, ಅದ್ ನಿಂಗಡ ಸುಕಕು ರಕ್ಷಣೆಕು ಆಯಿತ್‌ಪ್ಪ; ನಂಗಕ್ ಸಮಾದಾನ ಕ್‍ಟ್ಟ್‌ಚೇಂಗಿಯು ಅದ್ ಸಹ ನಿಂಗಡ ಸಮಾದಾನಕು ರಕ್ಷಣೆಕು ಆಯಿತ್‌ಪ್ಪ; ನಂಗ ಕಷ್ಟಪಡ್‌ವನೆಕೆ ನಿಂಗಳು ಕಷ್ಟಪಟ್ಟಿತ್ ಸಹಿಸಿಯಂಡ್ ಉಳ್ಳಗುಂಡ್, ಆ ರಕ್ಷಣೆ ಫಲ ತಂದಂಡುಂಡ್. 7 ನಿಂಗ ಸಹ ನಂಗಡ ಕೂಡೆ ಕಷ್ಟ ಅನುಬವಿಚಿಡುವಗುಂಡ್, ನಂಗಡ ಕೂಡೆ ನಿಂಗಕ್ ಸುಕ ಕ್‍ಟ್ಟಿಯಂಡುಂಡ್‍ೕಂದ್ ನಂಗಕ್ ಗೊತ್ತಾಯಿತ್, ನಿಂಗಡ ವಿಷಯತ್‍ಲ್ ನಂಗಕ್ ದೃಡವಾನ ನಿರೀಕ್ಷೆ ಉಂಡ್. 8 ಆನಗುಂಡ್, ನಾಡ ಅಣ್ಣತಮ್ಮಣಂಗಳೇ, ಆಸ್ಯ ಪ್ರಾಂತ್ಯತ್‍ಲ್ ನಂಗಕ್ ಉಂಟಾನ ಕಷ್ಟತ್‍ನ ನಿಂಗ ಅರಿಯತೆ ಇಪ್ಪಕ್ ನಂಗಕ್ ಮನಸ್ಸಿಲ್ಲೆ. ಅದ್ ಎನ್ನನೆ ಎಣ್ಣ್‌ಚೇಂಗಿ, ನಂಗ ಇಂಞು ಮಿಂಞಕ್ ಬದ್‌ಕ್‌ವಾಂದ್ ಉಳ್ಳ ನಂಬಿಕೆ ಇಲ್ಲತಚ್ಚಕ್ ನಂಗ ಸಹಿಸುವಕ್ ಕಯ್ಯತನೆಕೆ ದುಂಬ ಕಷ್ಟಪಟ್ಟತ್. 9 ನಂಗ ಎಲ್ಲಾರು ಚತ್ತ್ ಪೋಪಾಂದ್ ಗೇನ ಮಾಡ್‍ಚಿ. ಆಚೇಂಗಿ, ನಂಗ ನಂಗಡ ಮೇಲೆ ನಂಬಿಕೆ ಬೆಕ್ಕತೆ, ಚತ್ತಯಿಂಗಳ ಜೀವವಾಯಿತ್ ಎಪ್ಪ್‌ಚಿಡುವ ದೇವಡ ಮೇಲೆ ನಂಬಿಕೆ ಬೆಪ್ಪನೆಕೆ ನಂಗಕ್ ಅನ್ನನೆ ನಡ್ಂದತ್. 10 ಅಂಥಾ ಒರ್ ಚಾವ್‍ಯಿಂಜ ಅಂವೊ ನಂಗಳ ಕಾಪಾಡ್‍ಚಿ. ಇಕ್ಕಲು ನಂಗಳ ಕಾಪಾಡಿಯಂಡುಂಡ್, ಇಂಞು ಮಿಂಞಕು ಅಂವೊ ನಂಗಳ ಕಾಪಾಡ್‌ವಾಂದ್ ಅಂವೊಂಡ ಮೇಲೆ ನಿರೀಕ್ಷೆ ಬಿಚ್ಚಿತುಂಡ್. 11 ನಿಂಗ ನಿಂಗಡ ಪ್ರಾರ್ಥನೆರ ಮೂಲಕ ನಂಗಕ್ ಸಹಾಯ ಮಾಡಂಡು. ಅಕ್ಕ, ನಂಗಡ ಬದ್ರತೆಕಾಯಿತ್ ಮಾಡ್‍ನ ಪ್ರಾರ್ಥನೆಕ್ ದೇವ ಉತ್ತರ ಕೊಡ್‌ತಿತ್ ನಂಗಳ ಆಶೀರ್ವಾದ ಮಾಡ್‍ಚೇಂದ್ ದುಂಬ ಜನ ನಂಗಕಾಯಿತ್ ವಂದನೆ ಎಣ್ಣುವ. ಪೌಲ ಅಂವೊಂಡ ತೀರ್ಮಾನತ್‍ನ ಬದ್‍ಲ್ ಮಾಡ್‍ವದ್ 12 ನಂಗ ಮನುಷ್ಯಂಗಡಿಂಜ ಬಂದ ಜ್ಞಾನತ್‍ಲ್ ನಡ್‍ಕತೆ, ದೇವಡ ಕೃಪೇರಗುಂಡ್, ಈ ಲೋಕತ್‌ಲು, ಮುಕ್ಯವಾಯಿತ್ ನಿಂಗಡ ಕೂಡೆಯು, ಕಪಟ ಇಲ್ಲತ ಪವಿತ್ರವಾನ ಸತ್ಯತ್‍ಲ್ ನಡ್ಂದತ್‍ೕಂದ್, ನಂಗಡ ಮನಸಾಕ್ಷಿ ನಂಗಕ್ ಎಣ್ಣುವ ಸಾಕ್ಷಿಯೇ ನಂಗಡ ಹೆಮ್ಮೆ ಆಯಿತುಂಡ್. 13 ನಿಂಗ ಓದಿತು, ಒತ್ತಂಡು ಉಳ್ಳ ಕಾರ್ಯತ್‍ನ ಬುಟ್ಟಿತ್ ಬೋರೆ ಏದುನು ಒಳ್‍ದಿತ್‌ಲ್ಲೆ. ಪಿಂಞ ಅರ್ಥ ಮಾಡ್‌ವಕ್ ಕಯ್ಯತ್ತದ್‍ನ ನಂಗ ನಿಂಗಕ್ ಒಳ್‍ದಿತ್‌ಲ್ಲೆ; ಕಡೇಕತ್ತನೆ ಅನ್ನನೆ ಒತ್ತೊವಿರಾಂದ್ ನಾನ್ ನಂಬುವಿ. 14 ಒಡೆಯನಾನ ಯೇಸು ಪುನಃ ಬಪ್ಪ ದಿವಸತ್‍ಲ್, ನಿಂಗಡ ವಿಷಯತ್ ನಂಗ ಹೆಮ್ಮೆ ಪಡ್‌ವನೆಕೆ, ನಿಂಗಳು ಸಹ ನಂಗಡ ವಿಷಯತ್ ಹೆಮ್ಮೆ ಪಡ್‍ವಿರಾಂದ್ ಚೆನ್ನಮಟ್ಟಕ್ ನಿಂಗ ಒತ್ತಂಡುಳ್ಳಿರಲ್ಲ. 15 ಇದ್‍ಲ್ ನಾಕ್ ದೃಡವಾನ ನಂಬಿಕೆ ಇಂಜಗುಂಡ್, ನಿಂಗಕ್ ದಂಡನೆ ಕುರಿಯು ಪ್ರಯೋಜನವಾಯಿತ್ ಇಪ್ಪಕ್, ಮಿಂಞ ನಿಂಗಡ ಪಕ್ಕ ಬಪ್ಪಿ. 16 ನಾನ್ ಮಕೆದೋನ್ಯ ಪ್ರಾಂತ್ಯಕ್ ಪೋಪಕ ನಿಂಗಳ ಕಂಡಿತ್ ಪೋಪಿ, ಪುನಃ ಅಲ್ಲಿಂಜ ಬಪ್ಪಕಲು ನಿಂಗಳ ಕಂಡಿತ್ ಬಪ್ಪಕ್ ಗೇನ ಮಾಡಿಯಂಡುಳ್ಳ. ಬಯ್ಯ ನಿಂಗ ನನ್ನ ಯೂದಾಯಕ್ ಅಯಿಕಲು. 17 ನಾನ್ ಇನ್ನನೆ ಗೇನ ಮಾಡ್‍ನದ್ ವ್ಯಾರ್ತಾಂದ್ ನಾನ್ ಗೇನ ಮಾಡ್‍ನನಾ? ಅಥವ ಅಕ್ಕು ಅಕ್ಕೂಂದು, ಇಲ್ಲೆ ಇಲ್ಲೇಂದು, ನಾಡಲ್ಲಿ ಇಪ್ಪನೆಕೆ ಮನುಷ್ಯ ರೀತಿಲ್ ಒರೇ ಸಮಯತ್‍ಲ್ ಗೇನಮಾಡಿಯಂಡುಂಡಾ? 18 ನಾನ್ ನಿಂಗಕ್ ಎಣ್ಣ್‌ನ ತಕ್ಕ್ ಒರ್ ಕುರಿ ಅಕ್ಕೂಂದು ಇಂಞೊರ್ ಕುರಿ ಇಲ್ಲೇಂದು ಇಂಜಿತ್‌ಲ್ಲೆ, ಅದ್ಂಗ್ ಸತ್ಯವಂತ ದೇವ ಸಾಕ್ಷಿಯಾಯಿತುಂಡ್. 19 ನಾನು, ಸಿಲ್ವಾನನೂ ತಿಮೊಥೆಯನು ನಿಂಗಡ ಮದ್ಯತ್‍ಲ್ ಬೋದನೆ ಮಾಡ್‍ನ ದೇವಡ ಮೋಂವೊನಾನ ಯೇಸು ಕ್ರಿಸ್ತನು ಅಕ್ಕೂಂದು, ಇಲ್ಲೇಂದು ಇಕ್ಕತೆ, ಅಕ್ಕೂಂದ್ ಮಾತ್ರ ಉಂಡ್. 20 ಅನ್ನನೆ ನಂಗಡಗುಂಡ್ ದೇವಕ್ ಮಹಿಮೆ ಕ್‍ಟ್ಟ್‌ವಕಾಯಿತ್, ದೇವಡ ವಾಗ್ದಾನವೆಲ್ಲಾ ಕ್ರಿಸ್ತಂಡಲ್ಲಿ ಅಕ್ಕೂಂದು, ಅಂವೊಂಡಲ್ಲಿ ಆಮೆನ್‍ಂದು ಉಂಡಲ್ಲ. 21 ಆಚೇಂಗಿ, ಇಕ್ಕ ದೇವನೇ ನಂಗಳ ಕ್ರಿಸ್ತಂಡಲ್ಲಿ ನಿಂಗಡ ಕೂಡೆ ಸ್ತಿರಪಡ್‌ತಿತ್, ಅಂವೊನೇ ನಂಗಳ ಅಬಿಷೇಕವೂ ಮಾಡ್‍ಚಿ. 22 ಅಂವೊನೇ ನಂಗಕ್ ಮುದ್ರೆ ಇಟ್ಟಿತ್, ನಂಗಡ ಹೃದಯತ್‍ಲ್ ಪವಿತ್ರಾತ್ಮತ್‍ನ ಬಪ್ಪಕುಳ್ಳ ವಿಷಯಕ್ ಸಂಚಕಾರವಾಯಿತ್ ತಂದಿತುಂಡ್. 23 ನಿಂಗಳ ನಾನ್ ಜೋರ್ ಮಾಡತನೆಕೆ ಇಪ್ಪಕಾಯಿತೇ ಇಲ್ಲಿಕತ್ತನೆ ಕೊರಿಂಥ ಪಟ್ಟಣಕ್ ಬಂತ್‌ಲ್ಲೇಂದ್ ದೇವಡ ಮೇಲೆ ನಾಡ ಸಾಕ್ಷಿಯಾಯಿತ್ ಎಣ್ಣ್‌ವಿ. 24 ನಿಂಗಡ ನಂಬಿಕೇಕ್ ನಂಗ ಅದಿಕಾರ ಉಳ್ಳಯಿಂಗಳಾಯಿತ್ ಇಕ್ಕತೆ, ನಿಂಗಡ ಕುಶೀಕ್ ಸಹಾಯ ಮಾಡ್‌ವಯಿಂಗಳಾಯಿತುಂಡ್; ನಂಬಿಕೇರಗುಂಡ್ ನಿಂಗ ನಿಂದಂಡುಳ್ಳಿರಲ್ಲ. |
© 2017, New Life Literature (NLL)