1 ತಿಮೊಥೆಯ 6 - ಕೊಡವ ಬೈಬಲ್ಅಡಿಯಾಳ್ಂಗಡ ವಿಷಯತ್ ಬುದ್ದಿ ಎಣ್ಣ್‌ವದ್ 1 ದೇವಡ ಪೆದಕ್ ಪಿಂಞ ನಂಗ ಕೊಡ್‍ತ ಬೋದನೆಕ್, ದೂಷಣೆ ಬರತನೆಕೆ, ಅಡಿಯಾಳಂಗಳಾಯಿತ್ ಉಳ್ಳ ಎಲ್ಲಾರು ಅಯಿಂಗಡ ಎಜಮಾನಂಗಕ್ ಪೂರ್ತಿ ಮರ್ಯಾದೆ ಕೊಡ್‍ಕಂಡು. 2 ದೇವಡ ಮೇಲೆ ನಂಬಿಕೆ ಬೆಚ್ಚಿತುಳ್ಳ ಎಜಮಾನಂಗ ಇಂಜತೇಂಗಿ, ಅಯಿಂಗಕ್ ನಿಂಗ ಕಮ್ಮಿ ಮರ್ಯಾದೆ ಕೊಡ್‍ಪಕ್ಕಾಗ. ಎನ್ನಂಗೆಣ್ಣ್‌ಚೇಂಗಿ ಅಯಿಂಗಳು ನಿಂಗಳು ದೇವಡ ಮಿಂಞತ್‍ಲ್ ಅಣ್ಣತಮ್ಮಣಂಗಳಾಯಿತುಳ್ಳಿರ. ಅಡಿಯಾಳನಾನ ನಿಂಗ ನಿಂಗಡ ಎಜಮಾನಂಗ ಇಂಞು ದುಂಬ ಕಷ್ಟಪಟ್ಟಿತ್ ನಯಿಕಂಡು. ಎನ್ನಂಗೆಣ್ಣ್‌ಚೇಂಗಿ ದೇವಡ ಪ್ರೀತಿ ನಿಂಗ ದಂಡಾಳ್‍ಕು ಕ್‍ಟ್ಟಿತುಂಡ್. ತಿಮೊಥೆಯ, ಇದ್‍ನೆಲ್ಲ ಎಲ್ಲಾರ್‌ಕು ಎಣ್ಣಿ ಕೊಡ್‌ತಿತ್ ಅನ್ನನೆ ನಡ್‍ಪಕ್ ಪುರ್‌ಡ್ ಕೊಡ್. ಕಳ್ಳ ಬೋದನೆ ಪಿಂಞ ನೇರಾನ ಆಸ್ತಿ 3 ದಾರಾಚೇಂಗಿ ಕಳ್ಳ ಬೋದನೆ ಮಾಡಿಯಂಡ್, ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಆರೋಗ್ಯವಾನ ಬೋದನೆನ ಪಿಂಞ ದೇವ ಬಕ್ತಿರ ಬೋದನೆನ ಒತ್ತತೆ ಪೋಚೇಂಗಿ, 4 ಅಂವೊ ಪೆರ್‌ಮೆ ಉಳ್ಳಂವೊನು, ಒಂದು ಅರ್ಥ ಆಕತಂವೊನಾಯಿತ್‌ಪ್ಪ. ಅನ್ನನೆ ಮಾಡ್‌ವಂವೊ, ಆಂಗಾರತ್‍ಲ್ ಕಳಿಪ ಸೊಮಾರಿಯನೆಕೆ ಮುಂಡತೆ ತರ್ಕ ಮಾಡ್‌ವಕು, ವಾಕ್ಯತ್‍ರ ಮೇಲೆ ಜಗಳ ಕಳಿಪಕೇ ಕುಶಿ ಪಡುವ. ಇದೆಲ್ಲ ವಾದ ಮಾಡ್‌ವಕ್, ಒಟ್ಟೆಕಿಚ್ಚ್, ಜಗಳ, ದೂಷಣೆ ಪಿಂಞ ಬೋಂಡತ ಕೆಟ್ಟ ಸಂಶಯತ್‍ನ ಉಂಟ್ ಮಾಡ್‌ವ. 5 ಅಯಿಂಗಡ ಮನಸ್ಸ್ ಪಾಳಾಯಿತ್, ಎಕ್ಕಾಲು ಜಗಳ ಮಾಡ್‌ವ. ಅಯಿಂಗಡ ಹೃದಯತ್ಂಜ ಸತ್ಯತ್‍ನ ಎಡ್‍ತ್‍ರ್‌ತ್. ಅಯಿಂಗ ದುಡ್ಡ್ ಮಾಡ್‌ವಕಾಯಿತ್ ಅಯಿಂಗಳ, ದೇವಡ ಬಕ್ತಂಗಳಾಯಿತ್ ಕಾಂಬ್‍ಚಿಡ್‍ವ. 6 ನಂಗಡ ಪಕ್ಕ ಉಳ್ಳದ್ ಮದೀಂದ್ ಎಣ್ಣಿಯಂಡ್ ನೇರಾನ ಬಕ್ತಿಲ್ ಬದ್‍ಕ್‍ವದೇ ನಂಗಡ ಬಲ್ಯ ಲಾಬ. 7 ನಂಗ ಈ ಲೋಕಕ್ ಬಪ್ಪಕ ಒಂದು ಎಡ್‍ತಂಡ್ ಬಂದಿತ್‌ಲ್ಲೆ ಅನ್ನನೆ ನಂಗ ಇಲ್ಲಿಂಜ ಪೋಪಕ ಒಂದು ಎಡ್‍ತಂಡ್ ಪೋಪ್‌ಲೇಂದ್ ಎಣ್ಣ್‌ವದ್ ನೇರ್. 8 ಆನಗುಂಡ್ ನಂಗಕ್ ಕೂಳ್, ಬಟ್ಟೆ ಉಂಡೇಂಗಿ ಅದ್ ಮದೀಂದ್ ತೃಪ್ತಿ ಪಟ್ಟಂಡ್ ಇಕ್ಕನ. 9 ಪಣಕಾರಂಗಳಾಂಡೂಂದ್ ಆಸೆ ಉಳ್ಳಯಿಂಗ ಸೋದನೆರ ಕೆಣಿಕ್ ಚಿಕ್ಕಿತ್, ಅಯಿಂಗ, ಮನುಷ್ಯಂಗಳ ಕ್‍ೕಡಾನ, ಪಾಳಾನ ಕುಂಡ್‍ಲ್ ಬೂವನೆಕೆ ಮಾಡ್‌ವ, ಬೆಲೆಯಿಲ್ಲತ ಪಿಂಞ ಪಾಳಾನ ಇಚ್ಛೆಲ್ ಬುದ್ದ್ ಪೋಪ. 10 ದುಡ್ಡ್‌ರ ಮೇಲೆ ಉಳ್ಳ ಪ್ರೀತಿ ಎಲ್ಲಾ ತರ ಕ್‍ೕಡ್‍ಕ್ ಮೂಲ ಕಾರಣವಾಯಿತುಂಡ್. ಚೆನ್ನ ಜನ ದುಡ್ಡ್‌ರ ಮೇಲೆ ಉಳ್ಳ ಅತಿ ಆಸೆರಗುಂಡ್ ದೇವಡ ಮೇಲೆ ಉಳ್ಳ ನಂಬಿಕೇನ ಬುಟ್ಟಿತ್, ದುಂಬ ನೊಂಬಲತ್‍ಲ್ ಅಯಿಂಗಳ, ಅಯಿಂಗಳೇ ಕುತ್ತಿಯಂಡುಂಡ್. ಪೌಲಂಡ ಆಕೀರ್ ಬೋದನೆ 11 ಆಚೇಂಗಿ, ದೇವಡ ಮನುಷ್ಯನಾನ ನೀನ್ ಇದ್‍ನೆಲ್ಲಾ ಬುಟ್ಟಿತ್ ಓಡಿ ಪೋಯಿತ್, ನೀತಿನ, ದೇವಡ ಬಕ್ತಿನ, ನಂಬಿಕೇನ, ಪ್ರೀತಿನ, ತಾಳ್ಮೆನ, ಶಾಂತ ಗುಣತ್‍ನ ಸಂಪಾದನೆ ಮಾಡ್‌ವಕ್ ಪೇಚಾಡ್. 12 ನಂಬಿಕೇರ ನಲ್ಲ ಪೋರಾಟತ್‍ನ ಪೋರಾಡ್, ನಿತ್ಯ ಜೀವತ್‍ನ ಗಟ್ಟಿಯಾಯಿತ್ ಪುಡ್‌ಚ; ಇದ್ಂಗಾಯಿತ್ ದೇವ ನಿನ್ನ ಕಾಕಿತುಂಡ್; ಅಕ್ಕ, ನೀನ್ ದುಂಬ ಜನಡ ಮಿಂಞತ್‍ಲ್ ನೀಡ ನಂಬಿಕೇರ ವಿಷಯತ್ ನೇರಾನ ಸಾಕ್ಷಿ ಕೊಡ್‍ತಿತುಳ್ಳಿಯ. 13 ಎಲ್ಲಾಂಗ್ ಜೀವ ತಪ್ಪ ದೇವಡ ಮಿಂಞತ್, ಪಿಂಞ ಪೊಂತ್ಯ ಪಿಲಾತಂಡ ಮಿಂಞ ನಿಂದಿತ್ ನೇರಾನ ಸಾಕ್ಷಿನ ಗೊತ್ತ್ ಮಾಡ್‍ನ ಯೇಸು ಕ್ರಿಸ್ತನಗುಂಡ್ ನಾನ್ ನೀಕ್ ಆಜ್ಞೆ ಮಾಡ್‍ವದ್ ಎಂತ ಎಣ್ಣ್‌ಚೇಂಗಿ: 14 ನಂಗಡ ಒಡೆಯನಾನ ಯೇಸು ಕ್ರಿಸ್ತ ಬಪ್ಪಕತ್ತನೆ ನೀನ್ ಈ ಆಜ್ಞೆನ ಏದ್ ಕಳಂಗ ಇಲ್ಲತೆ, ಏದ್ ಕುತ್ತವು ಇಲ್ಲತೆ ಮಾಡಿಯಂಡಿರ್. 15 ಅಂವೊ ಪ್ರತ್ಯಕ್ಷವಾಯಿತ್ ಬಪ್ಪದ್‍ನ ದೇವ ತಕ್ಕ ಸಮಯತ್‍ಲ್ ಕಾಟಿತಪ್ಪ. ಅಂವೊನೇ ಆಶೀರ್ವಾದ ಪಡ್ಂದಂವೊ, ಎಲ್ಲಾನ ಅಂವೊನೇ ಆಳ್‍ವಂವೊ. ಅಂವೊ ಒಬ್ಬನೇ ರಾಜಾದಿ ರಾಜನು, ದೇವಾದಿ ದೇವನು, 16 ಚಾವೇ ಇಲ್ಲತ ಒಬ್ಬನಾಯಿತು, ದಾರೂ ಪಕ್ಕತ್‍ಲ್ ಪೋಪಕಯ್ಯತ ಬೊಳಿಲ್ ಇಪ್ಪಂವೊನಾಯಿತು, ದಾರೂ ಕಾಂಬಕ್ ಕಯ್ಯತ ಬೊಳಿಲ್ ಬದ್‍ಕ್‍ವಂವೊನಾಯಿತು, ಏದ್ ಮನುಷ್ಯನು ಇಲ್ಲಿಕತ್ತನೆ ಕಾಂಗತ, ಇಂಞು ಮಿಂಞಕು ಕಾಂಬಕ್ ಕಯ್ಯತಂವೊನಾಯಿತ್ತುಳ್ಳ ಅಂವೊಂಗೇ ಗನ, ನಿತ್ಯ ಶಕ್ತಿ ಎಕ್ಕಾಲು ಇರಡ್. ಆಮೆನ್. ಪಣಕಾರಂಗಕ್ ಬುದ್ದಿ ಎಣ್ಣ್‌ವದ್ 17 ಈ ಲೋಕತ್‍ಲ್ ಐಶ್ವರ್ಯತ್‍ಲ್ ಉಳ್ಳಯಿಂಗ ಗರ್ವತ್‍ಲ್ ಇಕ್ಕತನೆಕೆ ಪಿಂಞ ಸ್ತಿರಯಿಲ್ಲತ ಅಯಿಂಗಡ ಐಶ್ವರ್ಯತ್‍ರ ಮೇಲೆ ನಂಬಿಕೆ ಬೆಕ್ಕತನೆಕೆ ಅಯಿಂಗಕ್ ಆಜ್ಞೆ ಮಾಡ್. ಅದ್ಂಡ ಬದ್‍ಲ್, ನಂಗ ಅನುಬವಿಚಿಡ್‍ವಕ್, ಎಲ್ಲಾ ನಲ್ಲದ್‍ನ ನಂಗಕ್ ಪೂರ್ತಿಲ್ ಕೊಡ್‍ಪ ಜೀವವುಳ್ಳ ದೇವಡ ಮೇಲೆ ನಂಬಿಕೆ ಬೆಪ್ಪಕ್ ಎಚ್ಚರ ಮಾಡ್. 18 ನಲ್ಲದ್ ಮಾಡ್‌ವದ್‍ಲ್, ಸಹಾಯ ಮಾಡ್‌ವದ್‍ಲ್ ಐಶ್ವರ್ಯವಂತಂಗಳಾಯಿತ್, ಉದಾರ ಮನಸ್ಸ್‌ಲ್ ಕೊಡ್‍ಪಯಿಂಗಳಾಯಿತ್, ಅಯಿಂಗಡದ್‍ನ ಕಷ್ಟತ್‍ಲ್ ಉಳ್ಳಯಿಂಗಕ್ ಕೊಡ್‍ಪಕ್ ಎಣ್ಣ್. 19 ಇನ್ನನೆ ಮಾಡ್‍ಚೇಂಗಿ, ಬಪ್ಪಕುಳ್ಳ ಯುಗಕಾಯಿತ್ ಅಯಿಂಗಡ ಬಂಡಾರತ್‌ಲ್ ಕೂಟಿ ಬೆಪ್ಪನೆಕೆ ಚಾಯಿ ಅಡಿಪಾಯ ಇಡ್‌ವ. ಅಕ್ಕ ಅಯಿಂಗ ಸತ್ಯವಾನ ಬದ್‍ಕ್‍ನ ಅನುಬವಿಚಿಡುವಾಂದ್ ನೀನ್ ಅಯಿಂಗಕ್ ಎಣ್ಣಿ ಕೊಡ್. ಆಕೀರ್ ತಕ್ಕ್ 20 ಓ ತಿಮೊಥೆಯನೇ, ನೀಡ ಪಕ್ಕ ಒಪ್ಪ್‌ಚಿಟ್ಟಾನೆಲ್ಲ ಬದ್ರವಾಯಿತ್ ಕಾಪಾಡ್. ದೇವಬಕ್ತಿಕ್ ಆಕತ ಒರ್ ಪ್ರಯೋಜನವಿಲ್ಲತ ಹರಟೆ ತಕ್ಕ್‌ಕ್ ಪಿಂಞ ಜ್ಞಾನಾಂದ್ ಜನ ನಂಬಿತುಳ್ಳ ಪೊಟ್ಟ್ ತಕ್ಕ್‌ರ ಬೋದನೆಕ್ ನೀನ್ ದೂರ ಇರ್. 21 ಚೆನ್ನ ಜನ ಅದ್‍ನ ಸ್ವೀಕಾರ ಮಾಡಿತ್, ಕ್ರಿಸ್ತಂಡ ಮೇಲೆ ಬೆಚ್ಚ ನಂಬಿಕೇನ ಬುಟ್ಟಿತ್ ದೂರ ಪೋಯಿತುಂಡ್. ದೇವಡ ಕೃಪೆ ನೀಡ ಕೂಡೆ ಇರಡ್. |
© 2017, New Life Literature (NLL)