1 ತಿಮೊಥೆಯ 5 - ಕೊಡವ ಬೈಬಲ್ಸಬೇಲ್ ಉಳ್ಳಯಿಂಗಕ್ ಬುದ್ದಿ ಎಣ್ಣ್‌ವದ್ 1 ವಯಸಾನಯಿಂಗಳ ಎಕ್ಕಾಲು ಜೋರ್ ಮಾಡತೆ, ನೀಡ ಅಪ್ಪಂಗ್ ಎನ್ನನೆ ಮರ್ಯಾದೆಲ್ ಬುದ್ದಿ ಎಣ್ಣ್‌ವಿಯೊ ಅನ್ನನೆ ಅಯಿಂಗಕ್ ಬುದ್ದಿ ಎಣ್ಣ್. ಯೌವನಸ್ತನ ನೀಡ ಸ್ವಂತ ಅಣ್ಣತಮ್ಮಣಂಗಡನೆಕೆ ನೋಟ್. 2 ವಯಸಾನ ಪೊಣ್ಣಾಳ್‍ನ ನೀಡ ಅವ್ವಂಡನೆಕೆ ನೋಟ್, ಪಿಂಞ ಬಾಲೆಕಾರ್ತಿಯಂಗಳ ನೀಡ ಸ್ವಂತ ಅಕ್ಕತಂಗೆರನೆಕೆ ಪೂರ್ತಿ ಪವಿತ್ರತ್‍ಲ್ ನೋಟ್. 3 ದಾರೂ ಇಲ್ಲತೆ, ವಡಿಯ ಚತ್ತ್‌ಪೋನ ಪೊಣ್ಣಾಳ್‌ಕ್ ಸಹಾಯ ಮಾಡ್. 4 ಆಚೇಂಗಿ ಅವಕ್ ಮಕ್ಕ, ಕ್‍ರ್‍ಮಕ್ಕ ಉಂಡೇಂಗಿ, ಅಯಿಂಗ ಆದ್ಯವಾಯಿತ್ ತಾಂಡ ಸ್ವಂತ ಕುಟುಂಬತ್‍ನ ದೇವಡ ಬಕ್ತಿಲ್ ನೋಟಂಡು. ಅನ್ನನೆ ಮಾಡ್‍ಚೇಂಗಿ, ಪೆತ್ತಯಿಂಗ ಮಾಡ್‍ನ ಎಲ್ಲಾ ನಲ್ಲ ಕಾರ್ಯಕ್ ಬದ್‍ಲಾಯಿತ್ ಅಯಿಂಗಳ ಚಾಯಿತೆ ನೋಟ್‍ವಕ್, ಅಯಿಂಗ ಪಡಿಪ. ಇದ್ ದೇವನ ಕುಶಿಪಡ್‌ತ್‌ವ. 5 ದಾರೂ ಸಹಾಯ ಮಾಡ್‌ವಕ್ ಇಲ್ಲತೆ, ಒರ್ ವಡಿಯ ಚತ್ತ್‌ಪೋನ ಪೊಣ್ಣಾಳ್, ದೇವಡ ಮೇಲೆ ನಂಬಿಕೆ ಬೆಚ್ಚಿತ್, ಬಯಿಟ್ ಪೋಲ್ ದೇವಡ ಪಕ್ಕ ಪ್ರಾರ್ಥನೆ ಮಾಡಿಯಂಡ್, ದೇವ ಸಹಾಯ ಮಾಡ್‌ವಕಾಯಿತ್ ಅವ ಬೋಡಿಯಂಡಿಪ್ಪ. 6 ಆಚೇಂಗಿ ಸುಕ ಬೋಗತ್‍ಲ್ ಬದ್‍ಕ್‍ವಕ್ ಕುಶಿ ಪಡುವ ಒರ್ ವಿದವೆ ಜೀವವಾಯಿತ್ ಉಂಡೇಂಗಿಯು, ಆತ್ಮೀಯ ಬದ್‍ಕ್‍ಲ್, ಅವ ಚತ್ತನೆಕೆ. 7 ದಾರೂ ಅಯಿಂಗಳ ಕುತ್ತ ಪರಿಯತನೆಕೆ, ಈ ತಕ್ಕ್‌ನ ಎಲ್ಲಾರ್‌ಕು ಎಣ್ಣಿ ಕೊಡ್. 8 ಆಚೇಂಗಿ ಒಬ್ಬ ತಾಂಡ ಬೆಂದ್‍ಕಕ್, ಮುಕ್ಯವಾಯಿತ್ ಅಂವೊಂಡ ಸ್ವಂತ ಕುಟುಂಬಕ್ ಸಹಾಯ ಮಾಡತೆ ಪೋಚೇಂಗಿ, ಅಂವೊ ದೇವಡ ನಂಬಿಕೇಕ್ ಮೋಸ ಮಾಡ್‍ನನೆಕೆ ಪಿಂಞ ದೇವಡ ನಂಬಿಕೇಲ್ ಇಲ್ಲತಯಿಂಗಕಿಂಜ ಕ್‍ೕಳಾನಂವೊ. 9 ವಡಿಯ ಚತ್ತ್‌ಪೋನ ಪೊಣ್ಣಾಳ್‍ರ ಕೂಟ್‍ಕ್ ದಾರ್‌ನ ಕೂಟೊಂಡೂಂದ್ ಎಣ್ಣ್‌ಚೇಂಗಿ; ಅರ್‌ವದ್ ವಯಸ್‍ಕ್ ಮೇಲೆ ಉಳ್ಳ ವಡಿಯ ಚತ್ತ್‌ಪೋನ ಪೊಣ್ಣಾಳಾಯಿತ್ ಇರಂಡು. ವಡಿಯಂಗ್ ನಂಬಿಕಸ್ತಳಾಯಿತ್ ಇಂಜವ, 10 ಮಕ್ಕಳ ಚಾಯಿತೆ ಚಾಕ್‍ನವ, ಮನೆಕ್ ಬಂದಯಿಂಗಳ ಚಾಯಿತೆ ಸತ್ಕಾರ ಮಾಡ್‍ನವ, ಯೇಸುನ ನಂಬ್‍ನಯಿಂಗಕ್ ಸೇವೆ ಮಾಡ್‍ನವ, ಕಷ್ಟತ್‍ಲ್ ಉಳ್ಳಯಿಂಗಕ್ ಸಹಾಯ ಮಾಡ್‍ನವ, ಎಲ್ಲಾ ನಲ್ಲ ಕೆಲಸತ್‍ನ ಎಚ್ಚರತ್‍ಲ್ ಮಾಡ್‍ನವ, ನಲ್ಲ ಕೆಲಸ ಮಾಡ್‍ನವ, ಈ ಎಲ್ಲಾಂಗು ನಲ್ಲ ಪೆದ ಎಡ್‍ತವಳಾಯಿತ್ ಉಳ್ಳವಳ ನೀನ್ ಈ ಕೂಟ್‍ಕ್ ಕೂಟಂಡು. 11 ಆಚೇಂಗಿ ಚೆರಿಯ ವಯಸ್ಸುಳ್ಳ ವಿದವೆಯಳ ಈ ಕೂಟ್‍ಕ್ ಕೂಟತೆ. ಎನ್ನಂಗೆಣ್ಣ್‌ಚೇಂಗಿ, ಅಯಿಂಗಡ ತಡೀರ ಇಚ್ಛೆ, ಕ್ರಿಸ್ತಂಡ ಮೇಲೆ ಉಳ್ಳ ಅರ್ಪಣೆಕಿಂಜ ಜಾಸ್ತಿ ಆಯಿತ್, ಕ್ರಿಸ್ತಂಡ ಪಕ್ಕ ಮಾಡ್‍ನ ಒಪ್ಪಂದತ್‍ನ ಬುಟ್ಟಿತ್, ಪುನಃ ಮಂಗಲ ಮಾಡಂಡೂಂದ್ ಆಸೆ ಪಡುವ. 12 ಅನ್ನನೆ ಮಾಡ್‌ವಯಿಂಗ, ಆದ್ಯ ಕೊಡ್‍ತ ವಾಕ್ಯತ್ಂಜ ತಪ್ಪ್‌ನಗುಂಡ್, ಅಯಿಂಗ ತೀರ್ಪ್‌ಕ್ ಒಳಪಡ್‌ವ. 13 ಅದೂ ಅಲ್ಲತೆ ಅಯಿಂಗ ಸೋಮಾರಿಯಾಯಿತ್, ಮನೆಮನೆಕ್ ಸುತ್ತಿಯಂಡಿಪ್ಪ. ಸೋಮಾರಿಯಾಯಿತ್ ಮಾತ್ರ ಅಲ್ಲತೆ, ಬೋರೆಯಿಂಗಡ ಕೆಲಸತ್‍ಲ್ ಬಂತ್, ಎಣ್ಣುವಕ್ಕಾಗಾಂತ ವಿಷಯತ್‍ನ ಪರ್‌ದಂಡ್, ಹರಟೆ ಪೊಯ್ಯುವ. 14 ಅದ್ಂಗಾಯಿತ್, ಚೆರಿಯ ವಯಸ್ಸುಳ್ಳ ವಿದವೆಯಂಗ ಪುನಃ ಮಂಗಲ ಕಯಿಚಿತ್, ಮಕ್ಕಳ ಪೆತ್ತಿತ್, ಮನೆರ ಜವಾಬ್ದಾರಿನ ಎಡ್‍ತಂಡ್ ಇರಂಡೂಂದ್ ನಾನ್ ಅಯಿಂಗಕ್ ಬುದ್ದಿ ಎಣ್ಣ್‌ವಿ. ಅನ್ನನೆ ಮಾಡ್‍ನಕ ವಿರೋದಿಯಾನಂವೊ ಕುತ್ತ ಪರಿಯುವಕ್ ಬಟ್ಟೆ ಕ್‍ಟ್ಟ್‌ಲೆ. 15 ಚೆನ್ನ ವಿದವೆಯಂಗ ಇಕ್ಕಲೆ ದೂರ ಪೋಯಂಡ್, ಸೈತಾನಂಗ್ ಬಗ್ಗಿತ್ ನಡ್ಂದಂಡುಂಡ್. 16 ಯೇಸು ನಂಬುನ ಒರ್ ಪೊಣ್ಣಾಳ್‌ಕ್, ಅವಡ ಮನೆಕಾರಂಗ ದಾರೇಂಗಿ ವಿದವೆಯಂಗ ಉಂಡೇಂಗಿ, ಅವ ಆ ವಿದವೆಯಂಗಕ್ ಸಹಾಯ ಮಾಡಂಡು. ಆ ಬಾರತ್‍ನ ಅವ ಸಬೆರ ಮೇಲೆ ಇಡ್‍ವದ್ ಬೋಂಡ. ಅಕ್ಕ ಒರ್ ಸಬೆ, ನೇರಾಯಿತು ದಾರೂ ಇಲ್ಲತೆ ವಿದವೆಯಂಗಕ್ ಸಹಾಯ ಮಾಡಡ್. ಪೆರಿಯಯಿಂಗಡ ವಿಷಯತ್ ಬುದ್ದಿ ಎಣ್ಣ್‌ವದ್ 17 ಸಬೆರ ಜವಾಬ್ದಾರಿನ ಚಾಯಿತೆ ಮಾಡಿಯಂಡುಳ್ಳ ಪೆರಿಯಯಿಂಗಕ್ ದಂಡ್ ಅಳ್‌ತೆಲ್ ಮರ್ಯಾದೆ ಕ್‍ಟ್ಟ್‌ವಕ್ ಯೋಗ್ಯವಾಯಿತುಂಡ್. ಎನ್ನಂಗೆಣ್ಣ್‌ಚೇಂಗಿ ಮುಕ್ಯವಾಯಿತ್ ಅಯಿಂಗ ದುಂಬ ಪ್ರಯತ್ನ ಪಟ್ಟಿತ್ ದೇವಡ ವಾಕ್ಯತ್‍ನ ಚಾಯಿತೆ ಪ್ರಸಂಗ ಮಾಡಿಯಂಡ್ ಪಿಂಞ ಬೋದನೆ ಮಾಡಿಯಂಡುಂಡ್. 18 ಎತ್ತ್ ಒಕ್ಕಾಟಿಯಂಡ್ ಇಪ್ಪಕ ಬಾಯಿನ ಕೆಟ್ಟ್‌ವಕ್ಕಾಗಾಂದ್ ಪಿಂಞ ಒರ್ ಆಳ್‍ಕ್ ಅಂವೊಂಡ ಕೂಲಿನ ಕೊಡ್‍ಕಂಡೂಂದೂ ದೇವಡ ವಾಕ್ಯ ಎಣ್ಣಿತುಂಡಲ್ಲ? 19 ಒರ್ ಸಬೆರ ಪೆರಿಯಯಿಂಗಕ್ ವಿರೋದವಾಯಿತ್ ದಾರೇಂಗಿ ಕುತ್ತಪರ್ಂದತೇಂಗಿ, ಅದ್ಂಗ್ ದಂಡ್ ಅಥವ ಮೂಂದ್ ಸಾಕ್ಷಿ ಇಲ್ಲತೆಪೋಚೇಂಗಿ ಅದ್ಂಗ್ ಒತ್ತತೆ. 20 ಅನ್ನನೆ ಅಂವೊ ಪಾಪ ಮಾಡಿಯಂಡೇ ಇಂಜತೇಂಗಿ, ಅಲ್ಲಿ ಉಳ್ಳಯಿಂಗಕ್ ಪಾಪ ಮಾಡ್‌ವಕ್ ಪೋಡಿ ಬಪ್ಪನೆಕೆ ಎಲ್ಲಾಡ ಮಿಂಞತ್ ಅಂವೊನ ಎಚ್ಚರ ಮಾಡ್. 21 ನೀನ್ ದಾರ್‌ನು ಮೂಡ್ ನೋಟಿತ್ ನ್ಯಾಯಮಾಡತ, ಪಕ್ಷಪಾತ ಮಾಡತೆ, ನೀನ್ ಇದ್‍ನೆಲ್ಲಾ ಮಾಡಿಯಂಡಿರ್‍ೕಂದ್ ದೇವಡ ಮಿಂಞತ್, ಯೇಸು ಕ್ರಿಸ್ತಂಡ ಪ್ರಸನ್ನತ್‌ಲ್ ಪಿಂಞ ಗೊತ್ತ್ ಮಾಡಿತುಳ್ಳ ದೂತಂಗಡ ಮಿಂಞತ್ ಆಜ್ಞೆ ಮಾಡ್‌ವಿ. 22 ದೇವಡ ಸೇವೇಕ್ ನೇಮಿಚಿಡ್‍ವಕ್ ಏದ್ ಮನುಷ್ಯಂಡ ಮಂಡೆರ ಮೇಲೆ ಅವಸರತ್‌ಲ್ ಕೈ ಬೆಕ್ಕತೆ. ಅನ್ನನೆ ಮಾಡ್‍ಚೇಂಗಿ, ಬೋರೆಯಿಂಗ ಮಾಡ್‌ವ ಪಾಪತ್‍ಲ್ ನೀನ್ ಸಹ ಪಾಲ್‍ದಾರನಾಯಿತ್‌ಪ್ಪಿಯ, ನೀನ್ ಪವಿತ್ರ ಉಳ್ಳಂವೊನಾಯಿತಿರ್. 23 ಬರಿ ನೀರ್ ಮಾತ್ರ ಕುಡಿಕತೆ, ನೀಡ ಕೆಲ ನೊಂಬಲಕಾಯಿತ್, ಅಕ್ಕಕ್ಕ ನೀಕ್ ಬಪ್ಪ ಕಾಯಿಲೆಕಾಯಿತ್ ಚೆನ್ನ ದ್ರಾಕ್ಷಿರಸತ್‍ನ ಕೂಟಿತ್ ಕುಡಿ. 24 ಚೆನ್ನ ಜನ ಮಾಡ್‍ನ ಪಾಪ ನ್ಯಾಯತೀರ್ಪ್‌ಕ್ ಮಿಂಞಲೇ ಗೊತ್ತಾಯಿ ಪೋಪ. ಆಚೇಂಗಿ ಇಂಞು ಚೆನ್ನ ಜನ ಮಾಡ್‍ನ ಪಾಪ ಬಯ್ಯ ಗೊತ್ತಾಪ. 25 ಅನ್ನನೆ ಚೆನ್ನ ಜನಡ ನಲ್ಲ ಕಾರ್ಯ ಎಲ್ಲಾರು ಕಾಂಬನೆಕೆ ಇಪ್ಪ. ಅನ್ನನೆ ಕಾಂಗತೆ ಇಪ್ಪದು, ಸಮಯ ಬಪ್ಪಕ ಎಲ್ಲಾರ್‌ಕು ಗೊತ್ತಾಪ. |
© 2017, New Life Literature (NLL)