1 ತಿಮೊಥೆಯ 4 - ಕೊಡವ ಬೈಬಲ್ಕಳ್ಳ ಬೋದಕಂಗಡ ವಿಷಯತ್ ಎಚ್ಚರ ಮಾಡ್‍ವದ್ 1 ಪವಿತ್ರಾತ್ಮ ಚಾಯಿತೆ ಎಣ್ಣ್‌ವನೆಕೆ, ಬಪ್ಪ ಕಾಲತ್‍ಲ್ ಚೆನ್ನ ಜನ ವಂಚನೆ ಮಾಡ್‌ವ ಆತ್ಮತ್‌ನ ನಂಬಿತ್, ಕೂಳಿಯಡ ಬೋದನೆಕ್ ಕೆಮಿ ಕೊಡ್‌ತಿತ್, ಸತ್ಯತ್‍ರ ನಂಬಿಕೇನ ಬುಟ್ಟಿತ್ ಪೋಪ. 2 ಈಂಗ, ಕಪಟತನತ್‍ಲ್ ಪೊಟ್ಟ್ ಪರ್ಂದಂಡ್, ತಂಗಡ ಮನಸಾಕ್ಷಿ ತಿತ್ತ್‌ಲ್ ಬೆಂಜಿಪೋನನೆಕೆ, 3 ಮಂಗಲ ಆಪಕ್ಕಾಗಾಂದ್ ಪಿಂಞ ಯೇಸುನ ನಂಬ್‍ನಯಿಂಗಳು, ಸತ್ಯತ್‍ನ ಗೊತ್ತುಳ್ಳಯಿಂಗಳು, ದೇವಕ್ ವಂದನೆ ಮಾಡಿತ್ ಕುಶೀಲ್ ತಿಂಗಂಡೂಂದ್ ದೇವ ಸೃಷ್ಟಿ ಮಾಡ್‍ನ ವಸ್ತುನೆಲ್ಲಾ, ತಿಂಬಕ್ಕಾಗಾಂದ್ ಆ ಪೊಟ್ಟ್‌ಮಾರಿಯಂಗ ಎಣ್ಣ್‌ವ. 4 ದೇವ ಸೃಷ್ಟಿ ಮಾಡ್‍ನ ಎಲ್ಲಾ ವಸ್ತು ನಲ್ಲದೇ. ಏದ್ ವಸ್ತುನ ಸಹ ಪಾಳ್‍ೕಂದ್ ನಂಗ ಅಲ್ಲಗೆಳೆಯುವಕ್ಕಾಗ. ಆಚೇಂಗಿ ಎಲ್ಲಾ ವಸ್ತುಕಾಯಿತ್ ನಂಗ ವಂದನೆ ಎಣ್ಣಿತ್ ತಿಂಗಂಡು. 5 ಎನ್ನಂಗೆಣ್ಣ್‌ಚೇಂಗಿ ದೇವಡ ವಾಕ್ಯ ಪಿಂಞ ಪ್ರಾರ್ಥನೆ ಅದ್‍ನ ಪವಿತ್ರ ಮಾಡ್‌ವ. ಯೇಸು ಕ್ರಿಸ್ತಂಡ ಒರ್ ನಲ್ಲ ಸೇವಕ 6 ನೀನ್ ಇದ್‍ನೆಲ್ಲ ಯೇಸುನ ನಂಬ್‍ನಯಿಂಗಕ್ ಬೋದನೆ ಮಾಡಿಯಂಡ್ ಬಾತೇಂಗಿ, ನಂಬಿಕೇಕ್ ಉಳ್ಳ ತಕ್ಕ್‌ಲು ನೀನ್ ಮಾಡಿಯಂಡುಳ್ಳ ನಲ್ಲ ಬೋದನೆಲು ಬೊಳ್ಂದಿತ್, ಯೇಸು ಕ್ರಿಸ್ತಂಗ್ ನಲ್ಲ ಸೇವಕನಾಯಿತ್ ಇಪ್ಪಿಯ. 7 ಪ್ರಯೋಜನವಿಲ್ಲತ ವಿಷಯತ್ ತರ್ಕ ಮಾಡಿಯಂಡ್, ಸತ್ಯ ಇಲ್ಲತ ಅಜ್ಜಿಯಡ ಕಥೇನ ಕ್‍ೕಟಂಡ್ ಸಮಯ ಕಳೆಯಂಡ. ಅದ್ಂಡ ಬದ್‍ಲ್ ದೇವಬಕ್ತಿಲ್ ಇಪ್ಪಕ್ ಪ್ರಯತ್ನಪಡ್. 8 ತಡೀರ ವ್ಯಯಾಮ ಮಾಡ್‍ವದ್ ನಲ್ಲದ್, ಆಚೇಂಗಿ ಆತ್ಮೀಯ ವ್ಯಯಾಮ ಎಲ್ಲಾಕಿಂಜ ಮೇಲಾನದ್, ಇಕ್ಕತ್‍ರ ಬದ್‍ಕ್‍ಕ್ ಪಿಂಞ ಬಪ್ಪಕುಳ್ಳ ಬದ್‍ಕ್‍ಕ್ ಅದ್ ಪ್ರಯೋಜನ ಆಪ. 9 ಈ ತಕ್ಕ್ ಸತ್ಯ, ಪಿಂಞ ಎಲ್ಲಾ ಅಂಗಿಕಾರಕೂ ಯೋಗ್ಯವಾಯಿತುಂಡ್. 10 ಇದ್ಂಗಾಯಿತ್ ನಂಗ ನಯಿಪ ಪಿಂಞ ನೊಂಬಲ ತಿಂಬ; ಎನ್ನಂಗೆಣ್ಣ್‌ಚೇಂಗಿ ಎಲ್ಲಾ ಜನಕ್, ಮುಕ್ಯವಾಯಿತ್ ಯೇಸುನ ನಂಬ್‍ನಯಿಂಗಕ್, ಜೀವವುಳ್ಳ ದೇವಡ ಮೇಲೆ ನಂಬಿಕೆ ಬೆಚ್ಚಿತುಂಡ್. 11 ಇದ್‍ನ ನೀ ಬೋದನೆ ಮಾಡಿತ್, ನೀ ಎಣ್ಣ್‌ವಾನೆಲ್ಲ ಅಯಿಂಗ ಮಾಡ್‌ವಕ್ ಪಡಿಪ್‍ಚಿಡ್. 12 ನೀನ್ ಬಾಲೆಕಾರೆನಾನಗುಂಡ್ ದಾರೂ ನಿನ್ನ ಕ್‍ೕಳಾಯಿತ್ ನೋಟತನೆಕೆ, ನೀಡ ತಕ್ಕ್‌ಲ್, ನಡತೇಲ್, ಪ್ರೀತಿಲ್, ನಂಬಿಕೇಲ್ ಪಿಂಞ ಶುದ್ದತ್‍ಲ್ ಯೇಸುನ ನಂಬ್‍ನಯಿಂಗಕ್ ಉದಾರಣೆಯಾಯಿತ್‌ರ್. 13 ನಾನ್ ಬಪ್ಪಕತ್ತನೆ ದೇವಡ ವಾಕ್ಯತ್‍ನ ಜನಡ ಮದ್ಯತ್‍ಲ್ ಓದ್‍ವಕ್, ಬುದ್ದಿ ಎಣ್ಣ್‌ವಕ್, ಬೋದನೆ ಮಾಡ್‌ವಕ್ ಎಚ್ಚರತ್‍ಲ್ ಇರ್. 14 ಸಬೆರ ಪೆರಿಯಯಿಂಗ ನೀಡ ಮಂಡೆಕ್ ಕೈ ಬೆಪ್ಪಕ, ಪ್ರವಾದನೆರ ಮೂಲಕ ನೀಕ್ ಕ್‍ಟ್ಟ್‌ನ ಆತ್ಮೀಯ ವರತ್‍ರ ವಿಷಯತ್‍ನ ಅಲ್ಲಗೆಳೆಯತೆ. 15 ನೀನ್ ಆತ್ಮೀಯ ವಿಷಯತ್‍ಲ್ ಬೊಳ್ಂದಂಡ್ ಬಪ್ಪದ್ ಎಲ್ಲಾರ್‌ಕು ಗೊತ್ತಾಪನೆಕೆ ನೀನ್ ಈ ವಿಷಯತ್‍ನ ಗೇನ ಮಾಡಿಯಂಡ್ ಅದ್‍ಲ್ ಜಾಗ್ರತೆಲ್ ಇರ್. 16 ನೀಡ ವಿಷಯತ್‍ಲ್, ನೀಡ ಬೋದನೆರ ವಿಷಯತ್‍ಲ್ ಎಚ್ಚರತ್‍ಲ್ ಇರ್. ಅನ್ನನೆ ಮಾಡಿಯಂಡಿಂಜತೇಂಗಿ, ನೀಡ ಬದ್‍ಕ್‍ನ ಪಿಂಞ ನೀಡ ಬೋದನೆನ ಕ್‍ೕಪಯಿಂಗಡ ಬದ್‍ಕ್‍ನ ಕಾಪಾಡ್‍ವಿಯ. |
© 2017, New Life Literature (NLL)