1 ತಿಮೊಥೆಯ 2 - ಕೊಡವ ಬೈಬಲ್ಆರಾದನೆ ವಿಷಯತ್ ಬೋದನೆ 1 ಮುಕ್ಯವಾಯಿತ್ ನಾನ್ ನಿಂಗಕ್ ಎಣ್ಣ್‌ವದ್ ಎಂತ ಎಣ್ಣ್‌ಚೇಂಗಿ, ನಿಂಗ ಎಲ್ಲಾ ಜನಕಾಯಿತ್ ಪ್ರಾರ್ಥನೆ ಮಾಡಿಯಂಡ್, ತುದಿಚಂಡ್, ಬೋಡಿಯಂಡ್, ವಂದನೆ ಮಾಡಿಯಂಡ್ ಇರಿ. 2 ನಂಗೆಲ್ಲಾ ಬಕ್ತಿಲ್, ಮರ್ಯಾದೆಲ್, ಏದ್ ತೊಂದರೆ ಇಲ್ಲತೆ, ಸುಕ ಸಮಾದಾನತ್‍ಲ್ ಬದ್‍ಕ್‍ವಕಾಯಿತ್ ನಂಗಡ ರಾಜಂಗಕು ಅದಿಕಾರಿಯಂಗಕು ಪ್ರಾರ್ಥನೆ ಮಾಡಂಡು. 3 ಇನ್ನನೆ ಮಾಡ್‍ವದ್ ನಂಗಡ ರಕ್ಷಕನಾನ ದೇವಡ ಮಿಂಞತ್‍ಲ್ ನಲ್ಲದಾಯಿತು ಕುಶಿ ಆಯಿತು ಉಂಡ್. 4 ಎಲ್ಲಾ ಜನಕು ರಕ್ಷಣೆ ಕ್‍ಟ್ಟಂಡೂಂದು, ಎಲ್ಲಾರ್‌ಕು ಸತ್ಯ ಗೊತ್ತಾಂಡೂಂದು ಉಳ್ಳದೇ ಅಂವೊಂಡ ಚಿತ್ತವಾಯಿತುಂಡ್. 5 ದೇವ ಒಬ್ಬನೇ, ದೇವ ಪಿಂಞ ಮನುಷ್ಯಂಗಕ್ ಮದ್ಯಸ್ತನು ಒಬ್ಬನೇ. ಅಂವೊನೇ ಮನುಷ್ಯನಾಯಿತ್ ಬಂದ ಯೇಸು ಕ್ರಿಸ್ತ. 6 ಎಲ್ಲಾ ಜನಳು ಬುಡ್‍ಗಡೆ ಆಂಡೂಂದ್ ಅದ್ಂಗುಳ್ಳ ಬೆಲೆಯಾಯಿತ್ ಅಂವೊನ ಅಂವೊನಾಯಿತೇ ಬಲಿಯಾಪನೆಕೆ ಮರಣಕ್ ಒಪ್ಪ್‌ಚಿಟ್ಟಂವೊನು ಅಂವೊನೇ. ತಕ್ಕ ಸಮಯತ್‍ಲ್ ದೇವ ಈ ನಲ್ಲ ಸುದ್ದಿನ ಈ ಲೋಕಕ್ ಕೊಡ್‌ತಿತುಂಡ್. 7 ಈ ನಲ್ಲ ಸುದ್ದಿಕಾಯಿತೇ ದೇವ ನನ್ನ ಒರ್ ಬೋದಕನಾಯಿತ್ ಪಿಂಞ ಒರ್ ಅಪೊಸ್ತಲನಾಯಿತ್ ನೇಮಿಚಿಟ್ಟತ್. ನಂಬಿಕೇರ ವಿಷಯತ್‍ನ, ಸತ್ಯತ್‍ರ ವಿಷಯತ್‍ನ ಅನ್ಯ ಜನಕ್ ಬೋದನೆ ಮಾಡ್‌ವಕಾಯಿತ್ ನನ್ನ ಅಯಿಚತ್. ನಾನ್ ಪೊಟ್ಟ್ ಪರಿಯತೆ ಯೇಸು ಕ್ರಿಸ್ತಂಡ ಪೆದತ್‍ಲ್ ಸತ್ಯತ್‍ನ ಎಣ್ಣಿಯಂಡುಂಡ್. 8 ಅದಲ್ಲತೆ, ಎಲ್ಲಾ ಆಣಾಳ್‍ವ ಚೆಡಿ ಇಲ್ಲತೆ, ತರ್ಕ ಇಲ್ಲತೆ, ಪವಿತ್ರವಾನ ಕೈಯಿನ ನೇತಿತ್, ಎಲ್ಲಾ ಜಾಗತ್‍ಲು ಪ್ರಾರ್ಥನೆ ಮಾಡಂಡೂಂದ್ ನಾಕ್ ಆಸೆ ಉಂಡ್. 9 ಅನ್ನನೆ ಪೊಣ್ಣಾಳ್‍ವ ಸಹ ಯೋಗ್ಯವಾನ ಪಿಂಞ ಮರ್ಯಾದೆರ ಬಟ್ಟೆ ಇಡಂಡು. ಅಯಿಂಗ ತಲ್‌ಮಿನ ಸಿಂಗಾರ ಮಾಡಿಯಂಡ್, ಪೊನ್ನ್, ಮುತ್ತ್ ಪಿಂಞ ಬೆಲೆ ಉಳ್ಳ ಬಟ್ಟೇಲ್ ಅಲಂಕಾರ ಮಾಡ್‌ವಕ್ಕಾಗ. 10 ಆಚೇಂಗಿ, ದೇವಡ ಮೇಲೆ ಬಕ್ತಿ ಉಂಡ್‍ೕಂದ್ ಎಣ್ಣುವ ಪೊಣ್ಣಾಳ್, ಅಯಿಂಗ ಮಾಡ್‌ವ ನಲ್ಲ ಕೆಲಸತ್‍ಲ್ ಅಲಂಕಾರ ಮಾಡಂಡು. 11 ಪೊಣ್ಣಾಳ್‍ವ ಎಲ್ಲಾ ವಿಷಯತ್‍ಲ್ ಮೌನವಾಯಿತ್ಂಜಿತ್ ಅಡಕತ್‍ಲ್ ಪಡಿಕಂಡು. 12 ಬೋದನೆ ಮಾಡ್‌ವಕ್ ಪಿಂಞ ಆಣಾಳ್‌ರ ಮೇಲೆ ಅದಿಕಾರ ಮಾಡ್‌ವಕ್, ಪೊಣ್ಣಾಳ್‌ಕ್ ನಾನ್ ಅನುಮತಿ ಕೊಡ್‍ಪ್‍ಲೆ. ಅಯಿಂಗ ಮುಂಡತೆ ಇರಂಡು 13 ಎನ್ನಂಗೆಣ್ಣ್‌ಚೇಂಗಿ, ದೇವ ಆದ್ಯವಾಯಿತ್ ಆದಾಮನ ಸೃಷ್ಟಿ ಮಾಡ್‍ಚಿ. ಬಯ್ಯ ಹವ್ವಳನ ಸೃಷ್ಟಿ ಮಾಡ್‍ಚಿ. 14 ಇಂಞು, ಆದಾಮ, ಸೈತಾನಂಡ ವಂಚನೆಕ್ ಒಳಪಟ್ಟಿತ್‌ಲ್ಲೆ. ಪೊಣ್ಣಾಳೇ ವಂಚನೆಕ್ ಒಳಪಟ್ಟಿತ್ ಪಾಪ ಮಾಡ್‍ಚಿ. 15 ಆಚೇಂಗಿಯು ಪೊಣ್ಣಾಳ್‍ವ ನಲ್ಲರಿಕೆಲ್ ಬದ್‌ಕಿತ್, ನಂಬಿಕೇಲ್, ಪ್ರೀತಿಲ್, ಪವಿತ್ರತ್‍ಲ್ ಬೇರೂರಿತ್ಂಜತೇಂಗಿ ಕುಂಞಿನ ಪೆರುವ ಮೂಲಕ ಅವಕ್ ರಕ್ಷಣೆ ಆಪ. |
© 2017, New Life Literature (NLL)