1 ತಿಮೊಥೆಯ 1 - ಕೊಡವ ಬೈಬಲ್ವಂದನೆ 1 ನಂಗಡ ರಕ್ಷಕನಾನ ದೇವ ಪಿಂಞ ನಂಗಡ ನಿರೀಕ್ಷೆಯಾಯಿತುಳ್ಳ ಒಡೆಯನಾನ ಯೇಸು ಕ್ರಿಸ್ತಂಡ ಆಜ್ಞೆರ ಪ್ರಕಾರ, ಯೇಸು ಕ್ರಿಸ್ತಂಡ ಅಪೊಸ್ತಲನಾಯಿತುಳ್ಳ ಪೌಲನಾನ ನಾನ್, 2 ದೇವಡ ನಂಬಿಕೇಲ್ ನಾಡ ನೇರಾನ ಮೋಂವೊನಾನ ತಿಮೊಥೆಯಂಗ್ ಒಳ್‍ದ್‍ವ ಕಾಗದ ಇದ್. ನಂಗಡ ಅಪ್ಪನಾನ ದೇವಡಯಿಂಜಲು, ನಂಗಡ ಒಡೆಯನಾನ ಯೇಸು ಕ್ರಿಸ್ತಡಿಂಜಲು ಕೃಪೆ, ಕರುಣೆ ಪಿಂಞ ಸಮಾದಾನ ಕ್‍ಟ್ಟಡ್. ಕಳ್ಳ ಬೋದನೆರ ವಿಷಯತ್ ಎಚ್ಚರ ಮಾಡ್‍ವದ್ 3 ನಾನ್ ಮಕೆದೋನ್ಯಕ್ ಪೋಯಂಡಿಪ್ಪಕ, ನೀನ್ ಎಫೆಸತ್‍ಲ್ ಇಪ್ಪಂಜಿ, ಕಳ್ಳ ಬೋದನೆ ಮಾಡ್‌ವಯಿಂಗ ಇಂಞು ಮಿಂಞಕ್ ಅದ್‍ನ ಮಾಡತನೆಕೆ ನೀನ್ ಅಯಿಂಗಳ ಎಚ್ಚರ ಮಾಡಂಡೂಂದ್ ನಾನ್ ನೀಕ್ ಒತ್ತಾಯ ಮಾಡ್‍ನ. 4 ಅರ್ಥ ಇಲ್ಲತ ಕಥೇನ ಪರ್ಂದಂಡ್, ಪಂಡತ್‌ರ ಜನಡ ವಿಷಯತ್‍ನ ತಕ್ಕ್ ಪರ್ಂದಂಡ್ ಇಪ್ಪಯಿಂಗಳ ಸಹ ನೀನ್ ಎಚ್ಚರ ಮಾಡ್. ಎನ್ನಂಗೆಣ್ಣ್‌ಚೇಂಗಿ ಈ ತಕ್ಕೆಲ್ಲಾ ವಾದ ಮಾಡ್‌ವಕ್ ಬಟ್ಟೆ ಕೊಡ್‍ಪದ್‍ನ ಬುಟ್ಟಿತ್ ನಂಬಿಕೆಯಿಂಜ ಮಾಡ್‍ವಕ್ಕುಳ್ಳ ದೇವಡ ಕೆಲಸತ್‍ನ ಮಾಡ್‌ವಕ್ ಬಟ್ಟೆ ಕಾಟುಲೆ. 5 ಈ ಆಜ್ಞೆರ ಉದ್ದೇಶ ಎಂತ ಎಣ್ಣ್‌ಚೇಂಗಿ, ಶುದ್ದವಾನ ಹೃದಯತ್‍ಲ್, ನಲ್ಲ ಮನಸಾಕ್ಷಿಲ್, ಕಪಟ ಇಲ್ಲತ ನಂಬಿಕೆಯಿಂಜ ಬಪ್ಪ ನೇರಾನ ಪ್ರೀತಿಲ್ ದುಂಬಿತಿರಂಡೂಂದ್ ಎಣ್ಣ್‌ವದೇ. 6 ಆಚೇಂಗಿ, ಚೆನ್ನ ಜನ ಇದ್‍ಯಿಂಜ ತಪ್ಪಿ ಪೋಯಿತ್ ಅರ್ಥ ಇಲ್ಲತ ತಕ್ಕ್‌ಕ್ ಬಟ್ಟೆ ಕೊಡ್‌ತಿತುಂಡ್. 7 ಅಯಿಂಗ ಅಚ್ಚಕ್ ದೃಡವಾಯಿತ್ ಗತ್ತ್‌ಲ್ ತಕ್ಕ್ ಪರ್ಂದತೇಂಗಿಯು, ಅಯಿಂಗ ಪರಿಯುವ ತಕ್ಕ್‌ರ ಅರ್ಥ ಎಂತ್‍ೕಂದ್ ಅಯಿಂಗಕೇ ಗೊತ್ತಿಲ್ಲತೆ ಪೋಚೇಂಗಿಯು, ಅಯಿಂಗ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳಾಯಿತ್ ಇರಂಡೂಂದ್ ಕುಶಿ ಪಡುವ. 8 ನ್ಯಾಯಪ್ರಮಾಣತ್‍ನ ಸರಿಯಾಯಿತ್ ಉಪಯೋಗಿಚಿಟ್ಟತೇಂಗಿ ಮಾತ್ರ ಅದ್ ನಲ್ಲದ್‍ೕಂದ್ ನಂಗಕೆಲ್ಲ ಗೊತ್ತುಂಡ್. 9 ಈ ನ್ಯಾಯಪ್ರಮಾಣ ನೀತಿರ ಜನಕ್ ಮಾಡ್‍ನದ್ ಅಲ್ಲ, ಆಚೇಂಗಿ, ಕಾನೂನ್‌ನ ಪೊಳಿಪಯಿಂಗಕು, ದಂಗೆ ಏವಯಿಂಗಕು, ದೇವಡ ಮೇಲೆ ಪೋಡಿ ಇಲ್ಲತಯಿಂಗಕು, ಪಾಪಿಯಂಗಕು, ಎಲ್ಲಾನ ಅಪವಿತ್ರವಾಯಿತ್ ಕಾಂಬಯಿಂಗಕು, ಪವಿತ್ರತ್‍ನ ಪಾಳ್ ಮಾಡ್‌ವಯಿಂಗಕು, ತಾಂಡ ಅಪ್ಪವ್ವನ ಕೊಲ್ಲ್‌ವಯಿಂಗಕು, ಕೊಲೆಗಾರಂಗಕು, 10 ವೇಶಿಯಂಗಕು, ಆಣಾಳ್‍ಗಾಮಿಕಂಗಕು, ಅಥವ ಮನುಷ್ಯಂಗಳ ಕಟ್ಟಂಡ್ ಪೋಪಯಿಂಗಕು, ಪೊಟ್ಟ್ ಪರಿಯುವಯಿಂಗಕು, ಪೊಟ್ಟ್ ಸಾಕ್ಷಿ ಕೊಡ್‍ಪಯಿಂಗಕು, ಪಿಂಞ 11 ಆಶೀರ್ವಾದತ್‍ರ ದೇವಡ ಮಹಿಮೆಯಾನ ನಲ್ಲ ಸುದ್ದಿರನೆಕೆ ನಾಕ್ ತಂದ ನಲ್ಲ ಬೋದನೆಕ್ ವಿರೋದವಾಯಿತ್ ಮಾಡ್‌ವಯಿಂಗಕೇ ಅದ್‍ನ ಕೊಡ್‍ತತ್. ದೇವಡ ಕರುಣೆಕ್ ಪೌಲಂಡ ವಂದನೆ 12 ದೇವಡ ಸೇವೇನ ಮಾಡ್‌ವಕಾಯಿತ್ ನಾಕ್ ಶಕ್ತಿ ತಂದ ಒಡೆಯನಾನ ಯೇಸು ಕ್ರಿಸ್ತಂಗ್ ವಂದನೆ ಎಣ್ಣ್‌ವಿ. ಅಂವೊಂಗ್ ಸೇವೆ ಮಾಡ್‌ವಕ್ ನನ್ನ ಯೋಗ್ಯನಾಯಿತ್ ಗೇನ ಮಾಡಿತ್, ಅದ್ಂಗ್ ನನ್ನ ನೇಮಿಚಿಟ್ಟಾಂಗ್ ವಂದನೆ ಮಾಡ್‌ವಿ. 13 ಮಿಂಞ, ನಾನ್ ಅಂವೊನ ಎಚ್ಚಕೋ ದೇವ ದೂಷಣೆ ಮಾಡಿತ್, ಅಂವೊಂಡ ಜನಳ ಹಿಂಸೆ ಮಾಡಿತ್, ಕ್ರೂರವಾಯಿತ್ ಇಂಜ. ಆಚೇಂಗಿಯು, ನಾಕ್ ಅಂವೊಂಡ ಮೇಲೆ ನಂಬಿಕೆ ಇಲ್ಲತೆ, ಗೊತ್ತಿಲ್ಲತೆ ಇನ್ನನೆ ಮಾಡ್‌ನಾಂಗ್ ಯೇಸು ಕ್ರಿಸ್ತ ನಾಡ ಮೇಲೆ ಕನಿಕರ ಕಾಟ್‍ಚಿ. 14 ನಂಗಡ ಒಡೆಯಂಡ ಕೃಪೆ, ಯೇಸು ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ರ ನಂಬಿಕೆ ಪಿಂಞ ಪ್ರೀತಿನ ನಾಡ ಮೇಲೆ ಪೂರ್ತಿಯಾಯಿತ್ ದುಂಬ್‍ಚಿಟ್ಟತ್. 15 ಪಾಪಿಯಳ ರಕ್ಷಣೆ ಮಾಡ್‌ವಕ್ ಯೇಸು ಬೂಲೋಕಕ್ ಬಾತ್. ಇದ್ ನೇರಾನ ತಕ್ಕ್ ಪಿಂಞ ಎಲ್ಲಾ ಅಂಗಿಕಾರಕೂ ಯೋಗ್ಯವುಳ್ಳದ್; ಎಲ್ಲಾ ಪಾಪಿಯಂಗಕಿಂಜ ಮುಕ್ಯಪಟ್ಟ ಪಾಪಿ ನಾನೇ. 16 ನಾನ್ ಪಾಪಿಯಂಗಡಲ್ಲಿ ಬಲ್ಯ ಪಾಪಿಯಾಯಿತ್ ಇಂಜತೇಂಗಿಯು, ಯೇಸು ಕ್ರಿಸ್ತ ಅಂವೊಂಡ ದುಂಬ್‍ನ ತಾಳ್ಮೆನ ಕಾಂಬ್‍ಚಿಡುವಕಾಯಿತ್, ನಾಡ ಮೇಲೆ ಕರುಣೆ ಕಾಟ್‍ಚಿ. ಅನ್ನನೆ ಅಂವೊ ಎನ್ನಂಗ್ ಮಾಡ್‍ಚಿ ಎಣ್ಣ್‌ಚೇಂಗಿ, ನಿತ್ಯ ಜೀವ ಕ್‍ಟ್ಟ್‌ವಕ್, ಯೇಸು ಕ್ರಿಸ್ತಂಡ ಮೇಲೆ ಇಂಞು ಮಿಂಞಕ್ ಅಂವೊಂಡ ನಂಬಿಕೆ ಬೆಪ್ಪ ಜನಕ್ ನಾನ್ ಒರ್ ಉದಾರಣೆಯಾಯಿತ್ ಇಪ್ಪೀಂದ್ ಮಾಡ್‍ಚಿ. 17 ನಿತ್ಯವಾಯಿತುಳ್ಳಂವೊನೂ ಚಾವ್ ಇಲ್ಲತಂವೊನು ಕಣ್ಣ್‌ಕ್ ಕಾಂಗತ ರಾಜನಾಯಿತ್, ತಾನ್ ಒಬ್ಬನೇ ಜ್ಞಾನವುಳ್ಳಂವೊನಾಯಿತ್ ಇಪ್ಪ ದೇವಕ್ ಎಕ್ಕಾಲು ಗನ ಪಿಂಞ ಮಹಿಮೆ ಇರಡ್. ಆಮೆನ್. ತಿಮೊಥೆಯಂಡ ಜವಾಬ್ದಾರಿ 18 ನಾಡ ಮೋಂವೊನಾನ ತಿಮೊಥೆಯ, ನೀಡ ವಿಷಯತ್, ಪ್ರವಾದಿಯಂಗ ಮಿಂಞಲೇ ಎಣ್ಣ್‌ನ ಪ್ರವಾದನೆನ ಗೇನ ಮಾಡಿತ್ ಈ ಆಜ್ಞೆನ ನೀಡ ಮಿಂಞತ್ ಬೆಪ್ಪಿ. ಆನಗುಂಡ್, ಈ ಆಜ್ಞೆರನೆಕೆ ನೀನ್ ಮಾಡ್‍ಚೇಂಗಿ, ದೇವಡ ಪಡೆಲ್ ನೀನ್ ಚಾಯಿತೆ ಪೋರಾಡ್‍ವಕ್ ಸಹಾಯ ಆಪ. 19 ನೀನ್ ನಂಬಿಕೆಯು, ನಲ್ಲ ಮನಸಾಕ್ಷಿಯು ಉಳ್ಳಂವೊನಾಯಿತಿರ್. ಚೆನ್ನ ಜನ ಈ ನಲ್ಲ ಮನಸಾಕ್ಷಿನ ಕ್‍ೕಕತೆ, ಕ್ರಿಸ್ತಂಡ ಮೇಲೆ ಉಳ್ಳ ನಂಬಿಕೇನ, ಒಡಂದ್ ಪೋನ ಹಡ್‍ಗ್‍ರನೆಕೆ ಮಾಡಿತ್‌ಪ್ಪ. 20 ಹುಮೆನಾಯ ಪಿಂಞ ಅಲೆಕ್ಸಾಂದ್ರ ಅನ್ನನೆ ಉಳ್ಳಯಿಂಗಳೇ. ಅಯಿಂಗ ದೇವ ದೂಷಣೆ ಮಾಡತೆ ಇರಂಡೂಂದ್ ಅಯಿಂಗಕ್ ಶಿಕ್ಷೆ ಕ್‍ಟ್ಟ್‌ವಕಾಯಿತ್ ನಾನ್ ಅಯಿಂಗಳ ಸೈತಾನಂಗ್ ಒಪ್ಪ್‌ಚಿಟ್ಟಿಯೆ. |
© 2017, New Life Literature (NLL)