1 ಥೆಸಲೊನೀಕ 4 - ಕೊಡವ ಬೈಬಲ್ದೇವಕ್ ಕುಶಿಯಾನ ಬದ್‍ಕ್ 1 ನಂಗಡ ಅಣ್ಣತಮ್ಮಣಂಗಳೇ, ಆಕೀರಾಯಿತ್ ನಾನ್ ಎಣ್ಣ್‌ವದ್ ಎಂತ ಎಣ್ಣ್‌ಚೇಂಗಿ: ದೇವನ ಕುಶಿಪಡ್‌ತ್‌ವಕಾಯಿತ್ ನಿಂಗ ಎನ್ನನೆಯೆಲ್ಲಾ ಬದ್‍ಕಂಡೂಂದ್ ನಂಗ ಎಣ್ಣಿತಂದದ್‍ನ ನಿಂಗ ಸ್ವೀಕಾರ ಮಾಡ್‍ನನೆಕೆ, ಇಂಞು ಅದ್‍ಲ್ ದುಂಬ ಬೊಳಿಯುವಕ್ ಒಡೆಯನಾನ ಯೇಸುರಗುಂಡ್ ನಿಂಗಳ ಬೋಡಿತ್, ನಿಂಗಕ್ ಬುದ್ದಿ ಎಣ್ಣಿಯಂಡ್ ಉಂಡ್. 2 ಒಡೆಯನಾನ ಯೇಸುರಗುಂಡ್ ನಂಗಕ್ ಕ್‍ಟ್ಟ್‌ನ ಆಜ್ಞೆರನೆಕೆ, ನಿಂಗಕ್ ನಂಗ ಮಾಡ್‍ನ ಆಜ್ಞೆನ ನಿಂಗ ಗೇನ ಬೆಚ್ಚಿತುಳ್ಳಿರ. 3 ನಿಂಗ ಪವಿತ್ರವಾನಯಿಂಗಳಾಯಿತ್ ಬದ್‍ಕಂಡೂಂದ್ ಉಳ್ಳದೇ ದೇವಡ ಚಿತ್ತ. ಆನಗುಂಡ್ ನಿಂಗ ಲೈಂಗಿಕ ಪಾಪಕ್ ದೂರವಾಯಿತ್ ಇರಂಡು. 4 ನಿಂಗ, ಅಯಿಂಗಯಿಂಗಡ ಪೊಣ್ಣ್‌ರ ಕೂಡೆ, ವಡಿಯಂಡ ಕೂಡೆ ಪವಿತ್ರವಾಯಿತ್, ದಾರೂ ತಪ್ಪ್ ಕಂಡ್‍ಪುಡಿಕತನೆಕೆ ಮರ್ಯಾದೆಲ್ ಬದ್‍ಕಂಡು. 5 ದೇವನ ನಂಬತಯಿಂಗ ಪಿಂಞ ಗೊತ್ತಿಲ್ಲತಯಿಂಗ ಬದ್‍ಕ್‍ವನೆಕೆ, ಮೋಹತ್‍ಲ್ ಬದ್‍ಕವಕ್ಕಾಗ. 6 ಈ ವಿಷಯತ್‍ಲ್ ಯೇಸುನ ನಂಬ್‍ನ ನಿಂಗಡ ಅಣ್ಣತಮ್ಮಣಂಗಳ ವಂಚನೆ ಮಾಡ್‌ವಕ್ಕಾಗ; ಮಿಂಞಲೇ ನಂಗ ನಿಂಗಕ್ ಎಣ್ಣಿತ್ ಸಾಕ್ಷಿಯಾಯಿತ್ ಎಚ್ಚರ ಮಾಡ್‍ನನೆಕೆ, ಇನ್ನನೆ ಮಾಡ್‌ವಯಿಂಗಕ್ ದೇವ ಕಂಡಿತವಾಯಿತ್ ಶಿಕ್ಷೆ ತಪ್ಪ. 7 ಈ ತರ ಪವಿತ್ರ ಇಲ್ಲತ ಕೆಲಸ ಮಾಡ್‌ವಕ್ ದೇವ ನಂಗಳ ಕಾಕಿತ್‌ಲ್ಲೆ, ದೇವ ನಂಗಳ ಪವಿತ್ರವಾಯಿತ್ ಪಾಪ ಇಲ್ಲತೆ ಬದ್‍ಕಂಡೂಂದ್ ಕಾಕಿತುಂಡ್. 8 ಆನಗುಂಡ್, ಈ ಬೋದನೆನ ದಾರೇಂಗಿ ಅಲ್ಲಗೆಳೆದ್‌ಚೇಂಗಿ, ಅಯಿಂಗ ಮನುಷ್ಯನ ಅಲ್ಲ, ನಂಗಕ್ ಪವಿತ್ರಾತ್ಮತ್‍ನ ತಂದ ದೇವನ ಅಲ್ಲಗೆಳ್ಂದನೆಕೆ ಆಪ. 9 ಯೇಸುನ ನಂಬ್‍ನಯಿಂಗಳ ಪ್ರೀತಿ ಮಾಡ್‌ವ ವಿಷಯತ್‍ನ ನಾನ್ ನಿಂಗಕ್ ಒಳ್‍ದ್‍ವಕ್ ಅವಸ್ಯ ಇಲ್ಲೆ; ಎಲ್ಲಾರು ಒಬ್ಬೊಬ್ಬನ ಎನ್ನನೆ ಪ್ರೀತಿ ಮಾಡಂಡೂಂದ್ ದೇವ ನಿಂಗಕೇ ಪಡಿಪ್‌ಚಿಟ್ಟಿತಲ್ಲ. 10 ಅನ್ನನೆ ಮಕೆದೋನ್ಯ ನಾಡ್‍ಲ್ ಉಳ್ಳ ಯೇಸುನ ನಂಬ್‍ನ ಅಣ್ಣತಮ್ಮಣಂಗಳ ನಿಂಗ ಪ್ರೀತಿ ಮಾಡಿಯಂಡ್ ಉಳ್ಳಿರ. ಆಚೇಂಗಿ, ನಿಂಗ ಇಂಞು ಪ್ರೀತಿಲ್ ಬೊಳಿಯಂಡೂಂದ್ ನಂಗ ನಿಂಗಳ ಬೋಡುವ. 11 ಇದ್ ನಿಂಗಡ ನೋಕವಾಯಿತ್ ಇರಂಡು. ನಿಂಗ ಸಮಾದಾನತ್‍ರ ಬದ್‍ಕ್ ಬದ್‍ಕ್‍ವಕ್, ಪೊರಮೆ ಉಳ್ಳಯಿಂಗಡ ಬದ್‍ಕ್‍ರ ವಿಷಯತ್ ನುಗ್ಗ್‌ವಕ್ಕಾಗ. ನಿಂಗ ನಿಂಗಡ ಸ್ವಂತ ಕೆಲಸ ಮಾಡಂಡೂಂದ್ ನಿಂಗಕ್ ನಂಗ ಮಿಂಞಲೇ ಎಣ್ಣಿತುಂಡ್. 12 ನಿಂಗ ಇನ್ನನೆ ಮಾಡ್‍ಚೇಂಗಿ, ನಿಂಗಡ ಪ್ರತಿ ದಿನ ಬದ್‍ಕ್‍ಲ್ ಚಾಯಿತೆ ಬದ್‍ಕಿಯಂಡ್ ಉಳ್ಳಾನ ಪೊರಮೆ ಉಳ್ಳಯಿಂಗ ಕಾಂಬ, ಪಿಂಞ ಎಲ್ಲಾರು ನಿಂಗಕ್ ಮರ್ಯಾದೆ ತಪ್ಪ. ಅಕ್ಕ ನಿಂಗ ದಾಡ ಮೇಲೆಯು ಬಾರ ಇಟ್ಟಿತ್ ಬದ್‌ಕುವನೆಕೆ ಇಪ್ಪುಲೆ. ಯೇಸು ಪುನಃ ಬಪ್ಪದ್ 13 ನಂಗಡ ಅಣ್ಣತಮ್ಮಣಂಗಳೇ, ನಂಗಡ ಆಸೆ ಎಂತ ಎಣ್ಣ್‌ಚೇಂಗಿ, ಚತ್ತಯಿಂಗಕಾಯಿತ್, ಯೇಸುನ ನಂಬತಯಿಂಗ ನಂಬಿಕೆ ಇಲ್ಲತೆ ವ್ಯಸನ ಪಡ್‌ವನೆಕೆ, ದೇವಡ ಮೇಲೆ ನಂಬಿಕೆ ಬೆಚ್ಚಿತ್ ಚತ್ತಯಿಂಗಕಾಯಿತ್ ನಿಂಗ ವ್ಯಸನಪಟ್ಟಿತ್, ಅಯಿಂಗಡ ವಿಷಯತ್ ಸತ್ಯ ಎಂತ್‍ೕಂದ್ ಗೊತ್ತಿಲ್ಲತೆ ಇಪ್ಪಕ್ಕಾಗ. 14 ಯೇಸು ಚತ್ತಿತ್, ಪುನಃ ಜೀವವಾಯಿತ್ ಎದ್ದಿತ್ ಬಾತ್‍ೕಂದ್ ನಂಗ ನಂಬಿಯಂಡುಂಡಲ್ಲ? ಅನ್ನನೆ ಯೇಸುನ ನಂಬಿತ್ ದೇವಡ ಮಕ್ಕಳಾಯಿತ್ ಚತ್ತಯಿಂಗಳ, ಯೇಸು ಬಪ್ಪಕಾಪಕ, ಯೇಸುರ ಕೂಡೆ ದೇವ ಕೊಂಡ್ ಬಪ್ಪ. 15 ಒಡೆಯ ನಂಗಕ್ ಪಡಿಪಿಚಿಟ್ಟನೆಕೆ ನಂಗ ನಿಂಗಕ್ ಎಣ್ಣಿಯಂಡುಂಡ್: ಯೇಸು ಬಪ್ಪಕತ್ತನೆ ಬದ್‍ಕಿಯಂಡ್ ಉಳ್ಳ ನಂಗ, ಯೇಸುನ ನಂಬಿತ್ ದೇವಡ ಮಕ್ಕಳಾಯಿತ್ ಚತ್ತ್ ಪೋನಯಿಂಗ, ಅಂವೊ ಬಪ್ಪಕ, ಅಂವೊಂಡ ಕೂಡೆ ಪೋಪಕ್ ಮಿಂಞ ನಂಗ ಅಂವೊಂಡ ಪಕ್ಕ ಪೋಪುಲೆ. 16 ಎನ್ನಂಗೆಣ್ಣ್‌ಚೇಂಗಿ, ಅಕ್ಕ ಒಡೆಯನೇ ಪರಲೋಕತ್ಂಜ ಇಳಿಂಜಿತ್ ಬಪ್ಪ. ಅಕ್ಕ ಅಂವೊ ಬಲ್ಯ ಸ್ವರತ್‍ಲ್ ಹುಕುಮ್ ತಪ್ಪ, ದೇವಡ ಸೈನ್ಯತ್‍ರ ದೂತ ತಕ್ಕ್ ಪರಿಯುವ, ದೇವದೂತ ದೇವಡ ವಾಲಗತ್‌ನ ಊದ್‍ವ. ಆ ವಾಣಿನ ನಂಗ ಕ್‍ೕಪಕ, ಯೇಸುನ ನಂಬಿತ್ ಚತ್ತ್ ಪೋನಯಿಂಗ ಪುನಃ ಜೀವವಾಯಿತ್ ಆದ್ಯ ಎದ್ದಿತ್ ಬಪ್ಪ. 17 ಅದಾನ ಪಿಂಞ ಬದ್‍ಕಿಯಂಡ್ ಉಳ್ಳ ನಂಗಳು, ಅಯಿಂಗಡ ಕೂಡೆ ಒಟ್ಟ್ ಕೂಡಿತ್, ಗಾಳಿಲ್ ಮೋಡತ್‍ಲ್ ಉಳ್ಳ ಒಡೆಯನ ಕಾಂಬಕಾಯಿತ್ ಕೊಡಿಕ್ ಪೋಪ. ಇನ್ನನೆ ನಂಗ ಒಡೆಯಂಡ ಕೂಡೆ ಎಕ್ಕಾಲು ಇಪ್ಪಕಾಪ. 18 ಇದ್ ಸತ್ಯವಾಯಿತ್ ಆಪಗುಂಡ್, ಈ ತಕ್ಕ್‌ನ ನಿಂಗ ಎಲ್ಲಾರ್‌ಕು ಎಣ್ಣಿಯಂಡ್ ಪುರ್‌ಡ್ ಕೊಡ್‌ತಂಡ್ ಇರಿ. |
© 2017, New Life Literature (NLL)