1 ಪೇತ್ರ 4 - ಕೊಡವ ಬೈಬಲ್ಬದ್ಲಾನ ಬದ್‍ಕ್ 1 ಇನ್ನನೆ ಇಪ್ಪಕ, ಕ್ರಿಸ್ತ ನಂಗಕಾಯಿತ್ ತಡೀಲ್ ಕಷ್ಟಪಟ್ಟಗುಂಡ್ ನಿಂಗಳು ಸಹ ಆ ತರ ಮನಸ್ಸ್‌ನ ನಿಂಗಡ ಆಯುದವಾಯಿತ್ ಇಟ್ಟೊಳಿ. ಎನ್ನಂಗೆಣ್ಣ್‌ಚೇಂಗಿ, ಅನ್ನನೆ ತಡೀಲ್ ಕಷ್ಟಪಡ್‌ವಂವೊ, ಪಾಪತ್‍ನ ಬುಟ್ಟಿತ್‌ಪ್ಪ. 2 ಆನಗುಂಡ್, ಇಂಞು ಮಿಂಞಕ್ ತಡೀಲ್ ಇಪ್ಪಕತ್ತನೆ, ಮನುಷ್ಯಂಗಡ ಇಚ್ಛೆಕಾಯಿತ್ ಬದ್‍ಕತೆ, ದೇವಡ ಚಿತ್ತತ್‍ರನೆಕೆ ಬದ್‍ಕ್‍ವ. 3 ಕಯಿಂಜ ಕಾಲತ್‍ಲ್ ನಂಗ ದೇವನ ಗೊತ್ತ್‌ಲ್ಲತಯಿಂಗ ಎನ್ನನೆ ಬದ್‍ಕಂಡೂಂದ್ ಗೇನಮಾಡ್‍ಚೋ ಅನ್ನನೆ ಬೋಂಡಿಯಚ್ಚಕ್ ಬದ್‍ಕಿರ್‌ತ್. ಅಕ್ಕ ನಂಗ ತಡೀರ ಮೋಹತ್‍ಲ್, ಇಚ್ಛೆಲ್ ನಡ್‌ದಂಡ್, ಕುಡಿಚಂಡ್, ಕೂಟ್‌ಕಳಿ ಮಾಡ್‌ವಯಿಂಗಳಾಯಿತ್, ಕುಡ್‍ಕಂಗಳಾಯಿತ್ ಅಸಹ್ಯವಾನ ವಿಗ್ರಹ ಆರಾದನೆ ಮಾಡಿಯಂಡ್ ಇಂಜತ್. 4 ಅಯಿಂಗಡ ಕೂಡೆ ಈ ತರ ತಡೀರ ಮೋಹತ್‍ಲ್ ನಿಂಗ ಮುಳ್‍ಂಗಿ ಪೋಕತನೆಕೆ ಉಳ್ಳಾಂಗ್ ಅಯಿಂಗ ಆಶ್ಚರ್ಯತ್‍ಲ್ ನಂಗಳ ದುಂಬ ದೂಷಣೆ ಮಾಡಿಯಂಡುಂಡ್. 5 ಆಚೇಂಗಿ, ಅನ್ನನೆ ಬದ್‍ಕಿಯಂಡ್ ಉಳ್ಳಯಿಂಗಕ್ ಪಿಂಞ ಚತ್ತಯಿಂಗಕ್ ನ್ಯಾಯತೀರ್ಪ್ ಕೊಡ್‍ಪಕ್ ತಯಾರಾಯಿತ್ ಉಳ್ಳಂವೊಂಗ್ ಅಯಿಂಗ ಲೆಕ್ಕ ಕೊಡ್‍ಕಂಡು. 6 ಈ ಕಾರಣಕಾಯಿತ್, ಎಲ್ಲಾರ್‌ಕು ಕ್‍ಟ್ಟುವ ನ್ಯಾಯತೀರ್ಪ್‌ರನೆಕೆ ತಡೀಲ್ ಅಯಿಂಗ ಚತ್ತ್ ಪೋಯಿತ್ಂಜತೇಂಗಿಯು, ಆತ್ಮತ್‍ಲ್ ದೇವಡ ಕೂಡೆ ಅಯಿಂಗ ಬದ್‍ಕ್‍ವನೆಕೆ ದೇವಡ ನಲ್ಲ ಸುದ್ದಿನ ಅರಿಚಿಟ್ಟತ್. ದೇವಡ ಇನಾಮ್‍ನ ಚಾಯಿತೆ ನೋಟ್‍ವಯಿಂಗ 7 ಎಲ್ಲಾಂಗ್ ಆಕೀರ್ ಕಾಲ ಪಕ್ಕ ಬಾತ್. ಆನಗುಂಡ್, ಚಾಯಿ ಮನಸ್ಸ್ ಉಳ್ಳಯಿಂಗಳಾಯಿತ್, ತನ್ನಡಕ್ಕ ಉಳ್ಳಯಿಂಗಳಾಯಿತ್ ಇರಿ. ಅಕ್ಕ ನಿಂಗ ಚಾಯಿ ಪ್ರಾರ್ಥನೆ ಮಾಡ್‌ವಕ್ ಆಪ. 8 ಎಲ್ಲಾಕಿಂಜ ಜಾಸ್ತಿಯಾಯಿತ್, ಒಬ್ಬೊಬ್ಬಂಗಡ ಮೇಲೆ ಆಳವಾನ ಪ್ರೀತಿಲ್ ಇರಿ. ಎನ್ನಂಗೆಣ್ಣ್‌ಚೇಂಗಿ, ಪ್ರೀತಿ ದುಂಬ ಪಾಪತ್‍ನ ಮುಚ್ಚಿರ್‌ವ. 9 ಗೊಣಗತೆ, ಮನೆಲ್ ಎಲ್ಲಾರ್‌ನ ಚಾಯಿ ಸತ್ಕಾರ ಮಾಡಂಡು. 10 ಒಬ್ಬ ಒಬ್ಬಂಗ್ ಚಾಯಿತೆ ಸಹಾಯ ಮಾಡ್‌ವನೆಕೆ, ಅಯಿಂಗಯಿಂಗಕ್ ದೇವ ಎಂತ ವರ ಕೊಡ್‍ತಿತುಂಡೋ ಅದ್ಂಡರನೆಕೆ ನಲ್ಲ ಜವಾಬ್ದಾರಂಗಳಾಯಿತ್ ಪಾಲ್ ಮಾಡಿತ್, ಸತ್ಯವಂತಂವೊನಾಯಿತ್, ಅಂವೊಂಡ ಕೃಪೇರ ನಾನಾ ತರತ್‍ರ ಪ್ರಕಾರ ಮಾಡಂಡು. 11 ಒಬ್ಬ ಬೋದನೆ ಮಾಡ್‌ವದಾಚೇಂಗಿ, ಅಂವೊ ಚಾಯಿತೆ ದೇವಡ ವಾಕ್ಯತ್‍ರ ಪ್ರಕಾರ ಬೋದನೆ ಮಾಡಂಡು. ಒಬ್ಬ ಸೇವೆ ಮಾಡ್‌ವದಾಚೇಂಗಿ ದೇವ ಅಂವೊಂಗ್ ಕೊಡ್‍ತಿತುಳ್ಳ ಶಕ್ತಿರನೆಕೆ ಮಾಡಂಡು, ಅಕ್ಕ ನಿಂಗ ಎಂತ ಮಾಡ್‍ಚೇಂಗಿಯು, ಯೇಸು ಕ್ರಿಸ್ತಂಡ ಮೂಲಕ ದೇವಕ್ ಮಹಿಮೆ ಕ್‍ಟ್ಟುವನೆಕೆ ಮಾಡ್‌ವಕಾಪ. ಅಂವೊಂಗ್ ಎಕ್ಕಾಲು ಮಹಿಮೆ, ಶಕ್ತಿ ಬರಡ್. ಆಮೆನ್. ಕ್ರಿಸ್ತಂಗ್ ಕೂಡ್‍ನಗುಂಡ್ ಬಪ್ಪ ಕಷ್ಟ 12 ನಾಡ ಪ್ರೀತಿರ ಜನಳೇ, ನಿಂಗಕ್ ಎಂತ ಆಯಂಡುಂಡ್‍ೕಂದ್ ಗೇನ ಮಾಡಿಯಂಡ್, ನಿಂಗಡ ಮದ್ಯತ್‍ಲ್ ಆಯಂಡುಳ್ಳ ಕಷ್ಟತ್‍ನ ನೋಟಿತ್, ನಿಂಗ ಬೇಜಾರ್ ಮಾಡತಿ. 13 ಆಚೇಂಗಿ, ಕ್ರಿಸ್ತಂಡ ಕಷ್ಟತ್‍ಲ್ ನಿಂಗ ಪಾಲ್‍ದಾರಂಗಳಾಯಿತ್ ಉಳ್ಳಿರಾಂದ್ ಅದ್‍ಲ್ ಕುಶಿಪಡಿ, ಅಕ್ಕ, ಅಂವೊಂಡ ಮಹಿಮೆ ಎಲ್ಲಾರ್‌ಕು ಕಾಂಬನೆಕೆ ಆಪಕ, ನಿಂಗಕ್ ಬಾರಿ ಕುಶಿ ಆಪ. 14 ಕ್ರಿಸ್ತಂಡ ಪೆದಕಾಯಿತ್ ಜನ ನಿಂಗಳ ಏಜುವದಾಚೇಂಗಿ, ನಿಂಗ ಆಶೀರ್ವಾದ ಪಡ್ಂದಯಿಂಗ, ಮಹಿಮೇರ ಆತ್ಮವಾನ ದೇವಡ ಆತ್ಮ ನಿಂಗಡ ಮೇಲೆ ವಾಸ ಮಾಡ್‌ವ. 15 ಆನಗುಂಡ್, ನಿಂಗಡಲ್ಲಿ ಒಬ್ಬ ಸಹ, ಕೊಲೆಗಾರನಾಯಿತ್, ಕಳ್ಳನಾಯಿತ್, ಕೆಟ್ಟದ್ ಮಾಡ್‌ಂವೊನಾಯಿತ್, ಬೋರೆಯಿಂಗಡ ವಿಷಯತ್ ನುಗ್ಗಿತ್ ಗಲಾಟೆ ಮಾಡ್‌ವಂವೊನಾಯಿತ್, ನಿಂಗ ದಾರೂ ಕಷ್ಟಪಡ್‌ವಕ್ಕಾಗ. 16 ಆಚೇಂಗಿ, ಒಬ್ಬ ಕ್ರಿಸ್ತಂಡಂವೊನಾಯಿತ್ ಕಷ್ಟಪಟ್ಟತೇಂಗಿ, ಅಂವೊ ಞಾಣ ಪಡುವಕ್ಕಾಗ, ಅಂವೊಂಡ ಪೆದ ತಾಂಡ ಮೇಲೆ ಉಳ್ಳಾಂಗ್, ಅದ್ಂಗಾಯಿತ್ ಅಂವೊ ದೇವನ ಮಹಿಮೆಪಡ್‍ತಂಡು. 17 ದೇವಡ ನ್ಯಾಯತೀರ್ಪ್ ಅಂವೊಂಡ ಮಕ್ಕಡಲ್ಲಿಯೇ ಸುರು ಆಪಕುಳ್ಳ ಸಮಯವಾಯಿತುಂಡ್; ಅದ್ ನಂಗಡಲ್ಲಿಯೇ ಸುರು ಆಚೇಂಗಿ, ದೇವಡ ನಲ್ಲ ಸುದ್ದಿಕ್ ಕೆಮಿ ಕೊಡ್‌ಕತಯಿಂಗಡ ಸ್ತಿತಿ ಎನ್ನನೆ ಆಯಿತ್‌ಪ್ಪ? 18 ನೀತಿವಂತವೊನೇ ರಕ್ಷಣೆ ಆಪದ್ ಕಷ್ಟವಾಯಿತ್ಂಜತೇಂಗಿ, ಪಾಪಿಯಂಗಕು ಬಕ್ತಿ ಇಲ್ಲತಯಿಂಗಕು ಎಂತಾಪಾಂದ್ ಗೇನ ಮಾಡಿ? 19 ಆನಗುಂಡ್, ದೇವಡ ಚಿತ್ತತ್‍ರನೆಕೆ ಕಷ್ಟ ಅನುಬವಿಚುಡುವಯಿಂಗ, ನಲ್ಲದ್ ಮಾಡಿಯಂಡ್ ಉಳ್ಳಯಿಂಗಳಾಯಿತ್, ಅಯಿಂಗಡ ಆತ್ಮತ್‌ನ ನೇರಾನ ದೇವನಾನ ಸೃಷ್ಟಿ ಮಾಡ್‍ನಂವೊಂಗ್ ಒಪ್ಪ್‌ಚಿಡಂಡು. |
© 2017, New Life Literature (NLL)