1 ಪೇತ್ರ 1 - ಕೊಡವ ಬೈಬಲ್1 ಯೇಸು ಕ್ರಿಸ್ತಂಡ ಅಪೊಸ್ತಲನಾನ ಪೇತ್ರ, ಪೊಂತ, ಗಲಾತ್ಯ, ಕಪ್ಪದೋಕ್ಯ, ಆಸ್ಯ, ಬಿಥೂನ್ಯ ಎಣ್ಣುವ ಈ ದೇಶತ್‍ಲ್, ಚದ್‌ರಿ ಪೋಯಿತುಳ್ಳ ಜನಡ ಮದ್ಯತ್‍ಲ್ ವಾಸ ಮಾಡಿಯಂಡುಳ್ಳ ದೇವ ಗೊತ್ತ್ ಮಾಡ್‍ನಯಿಂಗಕ್ ಪಿಂಞ ಈ ಲೋಕತ್‍ಲ್ ಚೆನ್ನ ಕಾಲ ಮಾತ್ರ ಬದ್‍ಕ್‍ವನೆಕೆ ಬದ್‍ಕಿಯಂಡ್ ಉಳ್ಳ ನಿಂಗಕ್ ಒಳ್‍ದ್‍ವ ಕಾಗದ ಇದ್. 2 ಅಪ್ಪನಾನ ದೇವ ಎಲ್ಲಾಕಿಂಜ ಮಿಂಞ ಎಂತ ತೀರ್ಮಾನ ಮಾಡಿತ್ಂಜತೋ, ಅನ್ನನೆ ನಿಂಗಳ ಅಂವೊ ಗೊತ್ತ್ ಮಾಡಿತ್, ನಿಂಗ ಯೇಸು ಕ್ರಿಸ್ತಂಗ್ ಬಗ್ಗಿತ್ ನಡ್‍ಪನೆಕೆ, ಅಂವೊಂಡ ಚೋರೆರ ಮೂಲಕ ನಿಂಗ, ನಿಂಗಡ ಪಾಪತ್ಂಜ ಶುದ್ದ ಆಪನೆಕೆ, ಅಂವೊಂಡ ಆತ್ಮತ್‍ರ ಮೂಲಕ ನಿಂಗಳ ಬೋರೆ ಮಾಡಿತ್ ಶುದ್ದಮಾಡ್‍ಚಿ. ದುಂಬ್‍ನ ಕೃಪೆಯು ಸಮಾದಾನವು ನಿಂಗಕ್ ಇಂಞು ಕ್‍ಟ್ಟಡ್. ನಂಗಡ ನಿರೀಕ್ಷೆ 3 ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಅಪ್ಪನಾನ ದೇವಕ್ ತುದಿ ಆಡ್. ಯೇಸು ಕ್ರಿಸ್ತ ಚತ್ತಯಿಂಗಡ ಮದ್ಯತ್ಂಜ ಪುನಃ ಜೀವವಾಯಿತ್ ಎದ್ದಿತ್ ಬಂದಗುಂಡ್, ಅಂವೊಂಡ ಬಲ್ಯ ಕನಿಕರತ್‍ರನೆಕೆ ನಂಗಕ್ ಪುನಃ ಜೀವ ಕೊಡ್‌ತಿತ್, ಜೀವವಾಯಿತುಳ್ಳ ನಿರಿಕ್ಷೇನ ತಂದಿಯತ್. 4 ಒರ್‌ಕಾಲು ಬಾಡಿ ಪೋಕತ ಅಥವ ನಾಶ ಆಯಿ ಪೋಕತ, ಪಾಳಾಯಿ ಪೋಪಕ್ ಕಯ್ಯತ ಬಾದ್ಯತೇನ ಪರಲೋಕತ್‍ಲ್ ನಂಗಕಾಯಿತ್ ಬೆಚ್ಚಿತುಂಡ್. 5 ಅದ್ಂಗಾಯಿತ್ ನಿಂಗಳ ದೇವ ನಂಬಿಕೇರಗುಂಡ್ ದೇವಡ ಶಕ್ತಿರ ಬಲತ್‍ಲ್, ಆಕೀರ್ ಕಾಲತ್‍ಲ್ ರಕ್ಷಣೆ ಪೊರಮೆ ಕಾಂಬಕತ್ತನೆ ತಯಾರಾಯಿತ್ ಬದ್ರವಾಯಿತ್ ಕಾಪಾಡಿಯಂಡ್, 6 ಇದ್‍ನ ಗೇನ ಮಾಡಿತ್ ದುಂಬ ಕುಶೀಲ್ ಇರಿ. ಆಚೇಂಗಿಯು, ಇಂಞು ಚೆನ್ನ ಕಾಲಕ್ ಕಷ್ಟತ್‍ನ ಅನುಬವಿಚಿಡುವಕ್ ಅವಸ್ಯ ಉಳ್ಳಾಂಗ್, ಇಕ್ಕ ನಾನಾತರ ಸೋದನೆಲ್ ಕಷ್ಟಪಡ್‌ವಿರ. 7 ಪಾಳಾಯಿ ಪೋಪ ಪೊನ್ನ್‌ನ ತಿತ್ತ್‌ರಗುಂಡ್ ಸೋದನೆ ಮಾಡ್‌ವ; ಆಚೇಂಗಿ, ಅದ್ಂಗಿಂಜ ಬಲ್ಯ ಬೆಲೆಯುಳ್ಳ ನಿಂಗಡ ನಂಬಿಕೆ ಈ ಕಷ್ಟತ್‍ರಗುಂಡ್ ಸೋದನೆಕ್ ಒಳಪಟ್ಟಿತ್, ನೇರಾನದ್‍ೕಂದ್‌ ಗೊತ್ತಾಪಗುಂಡ್, ಯೇಸು ಕ್ರಿಸ್ತ ಬಪ್ಪಕ, ಅದ್ ನಿಂಗಕ್ ಕೀರ್ತಿಯಾಯಿತ್, ಗನವಾಯಿತ್ ಪಿಂಞ ಮಹಿಮೆಯಾಯಿತ್ ಕ್‍ಟ್ಟುವನೆಕೆ ಆಪ. 8 ನಿಂಗ ಅಂವೊನ ಕಂಡಿತಿಲ್ಲೆ, ಆಚೇಂಗಿಯು ನಿಂಗ ಅಂವೊನ ಪ್ರೀತಿ ಮಾಡ್‌ವಿರ; ಇಕ್ಕ ನಿಂಗ ಅಂವೊನ ಕಾಂಗತ ಪೋನಕ ಸಹ, ನಿಂಗ ಅಂವೊನ ನಂಬುವಿರ. ನಿಂಗ ಎಣ್ಣುವಕಯ್ಯತನೆಕೆ, ಮಹಿಮೆಲ್ ದುಂಬ್‍ನ ಅಚ್ಚಕ್ ಕುಶೀಲ್ ಇಪ್ಪಿರ. 9 ನಿಂಗ ಅಂವೊನ ನಂಬ್‍ನಾಂಗ್ ನಿಂಗಕ್ ಕ್‍ಟ್ಟುವ ಫಲ ನಿಂಗಡ ಆತ್ಮಕ್ ಕ್‍ಟ್ಟುವ ರಕ್ಷಣೆಯಾಯಿತ್‌ಪ್ಪ. 10 ರಕ್ಷಣೆರ ವಿಷಯತ್, ನಿಂಗಕ್ ಕ್‍ಟ್ಟ್‌ವಾಂದ್ ಉಳ್ಳ ಈ ಕೃಪೇನ, ಪ್ರವಾದನೆಯಾಯಿತ್ ಎಣ್ಣ್‌ನ ಪ್ರವಾದಿಯಂಗ ಇದ್ಂಡ ಆಳತ್‍ನ ಗೊತ್ತ್‌ಮಾಡ್‍ವಕ್, ದುಂಬ ಶ್ರಮತ್‍ಲ್ ಪ್ರಯತ್ನಪಟ್ಟತ್. 11 ಅಯಿಂಗಡಲ್ಲಿ ಇಂಜ ಕ್ರಿಸ್ತಂಡ ಆತ್ಮ, ಕ್ರಿಸ್ತಂಗ್ ಬಪ್ಪಕುಳ್ಳ ಕಷ್ಟತ್‍ನ ಪಿಂಞ ಅದ್‍ನಗುಂಡ್ ಬಯ್ಯ ಬಪ್ಪ ಮಹಿಮೆನ ಮಿಂಞಲೇ ಎಣ್ಣುವಕ, ಏದ್ ಕಾಲತ್‍ಲ್ ಇನ್ನನೆಲ್ಲ ಆಪಾ, ಆ ಕಾಲತ್‍ಲ್ ಎಂತೆಲ್ಲಾ ಆಪಾಂದ್ ಸಹ ಪಡಿಚಂಡಿಂಜತ್. 12 ಅಯಿಂಗಕಾಯಿತ್ ಅಲ್ಲತೆ, ನಂಗಕಾಯಿತೇ ಇನ್ನನೆ ಅಯಿಂಗ ಪ್ರವಾದನೆ ಎಣ್ಣ್‌ಚೀಂದ್ ಅಯಿಂಗಕ್ ಗೊತ್ತಾಚಿ. ಪರಲೋಕತ್ಂಜ ಈ ಲೋಕಕ್ ದೇವ ಅಯಿಚ ಪವಿತ್ರಾತ್ಮತ್‍ರಗುಂಡ್, ನಿಂಗಕ್ ದೇವಡ ನಲ್ಲ ಸುದ್ದಿನ ಎಣ್ಣ್‌ನಯಿಂಗಡ ಮೂಲಕ, ಈ ವಿಷಯತ್‌ನೆಲ್ಲ ಇಕ್ಕ ನಿಂಗಕ್ ಎಣ್ಣಿಯಂಡುಂಡ್. ಇದ್‍ನ ದೇವದೂತಂಗ ಸಹ ಚಾಯಿ ನೋಟ್‍ವಕ್ ಕುಶೀಲ್ ಉಂಡ್. ಪವಿತ್ರವಾಯಿತ್ ಬದ್‍ಕಂಡು 13 ಅದ್ಂಗಾಯಿತ್, ನಿಂಗಡ ಮನಸ್ಸ್‌ನ ಗಟ್ಟಿಯಾಯಿತ್ ನಿಂಗಡ ಪುಡ್‍ತತ್‍ಲ್ ಬೆಚ್ಚೊಳಿ. ನಿಂಗ ಎಲ್ಲಾರು ತನ್ನಡಕತ್‍ಲ್ ನಿಂಗಡ ಮನಸ್ಸ್‌ನ ಎಚ್ಚರತ್‍ಲ್ ಬೆಚ್ಚಂಡ್, ಯೇಸು ಕ್ರಿಸ್ತ ಪುನಃ ಬಪ್ಪಕ, ನಿಂಗಕ್ ಕ್‍ಟ್ಟ್‌ವ ಕೃಪೇರ ಮೇಲೆ ಪೂರ್ತಿ ನಿರೀಕ್ಷೆ ಉಳ್ಳಯಿಂಗಳಾಯಿತಿರಿ. 14 ನಿಂಗ ಯೇಸುನ ನಂಬ್‍ನಯಿಂಗಳಾಯಿತ್ ಉಳ್ಳಾಂಗ್, ಅಂವೊ ಎಣ್ಣುವಾನ ಮಾಡಿಯಂಡ್ ಇರಿ. ನಿಂಗಡ ಪಳೆಯ ಬದ್‍ಕ್‍ಲ್ ಗೊತ್ತ್‌ಲ್ಲತೆ ಮಾಡಿಯಂಡಿಂಜ ಇಚ್ಛೆರನೆಕೆ ಮಡ್‌ವಕ್ಕಾಗ. 15 ನಿಂಗಳ ಕಾಕ್‍ನಂವೊ ಪವಿತ್ರವಾಯಿತ್ ಉಳ್ಳನೆಕೆ, ನಿಂಗ ಮಾಡ್‌ವ ಎಲ್ಲಾ ವಿಷಯತ್‍ಲು ಪವಿತ್ರವಾಯಿತಿರಿ. 16 ನಾನ್ ಪವಿತ್ರವಾನಂವೊ ಆನಗುಂಡ್ ನಿಂಗಳು ಪವಿತ್ರವಾಯಿತಿರೀಂದ್ ದೇವಡ ವಾಕ್ಯತ್‍ಲ್ ಒಳ್‍ದಿತುಂಡಲ್ಲ! 17 ಮೂಡ್‍ನ ನೋಟಿತ್ ಪಕ್ಷಪಾತವಿಲ್ಲತೆ, ಅಯಿಂಗಡ ಕ್ರೀಯರನೆಕೆ ನ್ಯಾಯತೀರ್ಪ್‌ನ ತಪ್ಪ ಅಪ್ಪನ ನಿಂಗ ಆರಾದರನೆ ಮಾಡಿಯಂಡ್ ಉಳ್ಳಾಂಗ್, ಈ ಲೋಕತ್‍ಲ್ ಚೆನ್ನ ಕಾಲ ಮಾತ್ರ ಬದ್‍ಕ್‍ವನೆಕೆ, ದೇವಡ ಮೇಲೆ ಪೋಡಿಲ್ ಬದ್‍ಕಂಡು. 18 ನಿಂಗಡ ಮುತ್ತಜ್ಜಂಗಡ ಪದ್ದತಿರ ಪ್ರಕಾರ, ಪ್ರಯೋಜನ ಇಲ್ಲತ ನಿಂಗ ಮಾಡಿಯಂಡ್ ಬಂದ, ಪಾಳಾಯಿ ಪೋಪ ಪೊನ್ನ್ ಬೊಳ್ಳಿರಗುಂಡ್ ನಿಂಗಡ ಪಾಪತ್‍ರ ಶಿಕ್ಷೆಯಿಂಜ ನಿಂಗಳ ಬುಡ್‍ತಿತ್‌ಲ್ಲೆ. 19 ಆಚೇಂಗಿ, ದಾರ್‌ಕು ಕೊಡ್‍ಪಕ್ ಕಯ್ಯತ ಬೆಲೆಯುಳ್ಳ ಕ್ರಿಸ್ತಂಡ ಚೋರೆರಗುಂಡ್ ದೇವ ನಿಂಗಳ ಬೆಲೇಕ್ ಎಡ್‍ತಂಡದ್ ನಿಂಗಕ್ ಗೊತ್ತುಂಡಲ್ಲ? ಅಂವೊ ಒರ್ ಪವಿತ್ರವಾಯಿತುಳ್ಳ, ಏದ್ ಪಾಳು ಇಲ್ಲತ ಕೊರಿ ಕುಟ್ಟಿರನೆಕೆ ಉಂಡ್. 20 ಅಂವೊ, ಬೂಲೋಕ ಉಂಟಾಪಕ್ ಮಿಂಞಲೇ ಗೊತ್ತ್ ಮಾಡ್‍ನಂವೊನಾಯಿತ್ಂಜತ್. ಆಚೇಂಗಿ, ಈ ಆಕೀರ್ ಕಾಲತ್‍ಲ್ ಅಂವೊಂಡ ಮೂಲಕ ನಿಂಗಕಾಯಿತ್ ಕಾಂಬ್‍ಚಿಟ್ಟತ್. 21 ಅಂವೊಂಡ ಮೂಲಕ ನಿಂಗ ದೇವಡ ಮೇಲೆ ನಂಬಿಕೆ ಬೆಪ್ಪನೆಕೆ ಮಾಡಿಯತ್. ದೇವ ಅಂವೊನ ಚತ್ತಯಿಂಗಡ ಮದ್ಯತ್ಂಜ ಪುನಃ ಜೀವವಾಯಿತ್ ಎಪ್ಪ್‌ಚಿಟ್ಟಿತ್, ಅಂವೊಂಗ್ ಬಲ್ಯ ಮಹಿಮೆನ ಕೊಡ್‍ತತ್. ಆನಗುಂಡ್, ನಿಂಗ ದೇವಡ ಮೇಲೆ ನಂಬಿಕೆಯು ನಿರೀಕ್ಷೇಯು ಬೆಚ್ಚಿತುಳ್ಳಿರ. 22 ಆನಗುಂಡ್, ನಿಂಗ ಕಪಟ ಇಲ್ಲತ ಯೇಸುನ ನಂಬ್‍ನಯಿಂಗಡ ಪ್ರೀತಿಲ್ ಇಪ್ಪಕಾಯಿತ್ ಪಿಂಞ ಒಬ್ಬೊಬ್ಬಂಗಡ ಮೇಲೆ ನೇರಾಯಿತ್ ಹೃದಯತ್ಂಜ ಪ್ರೀತಿ ಮಾಡ್‌ವಕಾಯಿತ್, ಇಕ್ಕ ನಿಂಗ ಸತ್ಯಕ್ ಬಗ್ಗಿತ್ ನಡ್‍ಪನೆಕೆ ಇಕ್ಕ ನಿಂಗಳ ಶುದ್ದ ಮಾಡಿರ. ಶುದ್ದ ಹೃದಯತ್ಂಜ, ನಿಂಗ ನೇರಾಯಿತ್ ಒಬ್ಬೊಬ್ಬನ ಪ್ರೀತಿ ಮಾಡಿ. 23 ಪಾಳಾಯಿ ಪೋಪ ಕುರುರ ಮೂಲಕ ಅಲ್ಲ, ಎಕ್ಕಾಲು ಬದ್‍ಕಿಯಂಡಿಪ್ಪ, ಜೀವವಾಯಿತ್ ಉಳ್ಳ ಪಾಳಾಯಿ ಪೋಕತ ಕುರುವಾನ ದೇವಡ ವಾಕ್ಯತ್‍ರ ಮೂಲಕ ನಿಂಗ ಪುನಃ ಪುಟ್ಟಿತುಳ್ಳಿರ. 24 ಎನ್ನಂಗೆಣ್ಣ್‌ಚೇಂಗಿ, ಎಲ್ಲಾ ಮನುಷ್ಯಂಗಳು ಪಿಲ್ಲ್‌ರನೆಕೆ, ಅಯಿಂಗಡ ಮಹಿಮೆಯೆಲ್ಲ ಕಾಡ್‍ಲ್ ಉಳ್ಳ ಪೂವ್‍ರನೆಕೆ; ಪಿಲ್ಲ್ ಬಾಡಿ ಪೋಪ, ಪೂ ಬುದ್ದ್ ಪೋಪ. 25 ಆಚೇಂಗಿ, ಒಡೆಯಂಡ ವಾಕ್ಯ ಎಕ್ಕಾಲು ಇಪ್ಪ. ಈ ವಾಕ್ಯತ್‍ನ ನಂಗ ನಿಂಗಕ್ ನಲ್ಲ ಸುದ್ದಿಯಾಯಿತ್ ಬೋದನೆ ಮಾಡಿಯೆ. |
© 2017, New Life Literature (NLL)