1 ಕೊರಿಂಥ 3 - ಕೊಡವ ಬೈಬಲ್ಕೊರಿಂಥ ಸಬೇಲ್ ವಿಂಗಡ 1 ನಾಡ ಅಣ್ಣತಮ್ಮಣಂಗಳೇ, ನಾನ್ ನಿಂಗಡ ಕೂಡೆ ಇಪ್ಪಕಾಪಕ, ಆತ್ಮೀಯ ಬದ್‍ಕ್‍ಲ್ ಬೊಳ್‌ಂದಯಂಗಳಾಯಿತ್ ನಿಂಗಡ ಕೂಡೆ ತಕ್ಕ್‌ಪರಿವಕ್ ಕಯ್ಯತೆ, ಈ ಲೋಕತ್‍ರ ಜನತ್‍ರನೆಕೆ, ಪಿಂಞ ಕ್ರಿಸ್ತಂಡ ಕೂಡೆ ಉಳ್ಳ ನಿಂಗಡ ಆತ್ಮೀಯ ಬದ್‍ಕ್‍ಲ್ ಚೆರಿಯ ಮಕ್ಕಡನೆಕೆ ನಿಂಗಳ ಗೇನ ಮಾಡಿತ್ ತಕ್ಕ್ ಪರಿವಕಾಚಿ. 2 ನಾನ್ ನಿಂಗಕ್ ಕೂಳ್‍ರನೆಕೆ ಉಳ್ಳ ಆಳವಾನ ಸತ್ಯತ್‍ನ ಬೋದನೆ ಮಾಡತೆ, ಪಾಲ್‍ರನೆಕೆ ಉಳ್ಳ, ಗಟ್ಟಿಯಿಲ್ಲತ ಸತ್ಯತ್‍ನ ಬೋದನೆ ಮಾಡಿಯೆ. ಎನ್ನಂಗೆಣ್ಣ್‌ಚೇಂಗಿ ಅಚ್ಚಕ್ ಶಕ್ತಿ ನಿಂಗಕಿಂಜಿಲೆ. 3 ನಿಂಗಡ ಪಕ್ಕ ಒಟ್ಟೆಕಿಚ್ಚ್ ಉಂಡ್, ಬೋರೆಯಿಂಗಡ ಕೂಡೆ ಜಗಳ ಮಾಡ್‌ವಿರ. ಇದೆಲ್ಲಾನ ನಿಂಗಡ ಪಾಪತ್‍ರ ಗುಣತ್‍ನಗುಂಡ್ ಈ ಲೋಕತ್‍ರ ಜನತ್‍ರನೆಕೆ ಮಾಡಿಯಂಡುಳ್ಳಿರಾಂದ್ ನಿಂಗಕ್ ಗೊತ್ತ್‌ಲ್ಲೆಯಾ? 4 ಒಬ್ಬ, ನಾನ್ ಪೌಲಂಡ ಕೂಟ್‍ಕ್ ಕೂಡ್‍ನಂವೋಂದೂ, ಇಂಞೊಬ್ಬ ನಾನ್ ಅಪೊಲ್ಲೋಸಂಡ ಕೂಟ್‍ಕ್ ಕೂಡ್‍ನಂವೋಂದೂ ಎಣ್ಣಿಯಂಡುಳ್ಳಗುಂಡ್, ನಿಂಗ ಈ ಲೋಕತ್‍ರ ಜನತ್‍ರನೆಕೆ ಬದ್‍ಕಿಯಂಡುಳ್ಳಿರಲ್ಲಾ? 5 ಅಪೊಲ್ಲೋಸ ದಾರ್? ಪೌಲ ದಾರ್? ನಂಗ ದೇವಡ ಸೇವಕಂಗ ಮಾತ್ರ ಅಚ್ಚಕೆ. ನಿಂಗ ನಂಗಡ ಮೂಲಕ ಕ್ರಿಸ್ತಂಡ ಮೇಲೆ ನಂಬಿಕೆ ಇಡ್‍ವಕಾಚಿ. ದೇವ ನಂಗ ಒಬ್ಬೊಬ್ಬಂಗ್ ಕೊಡ್‍ತ ಕೆಲಸತ್‍ನ ನಂಗ ಮಾಡಿಯೆ. 6 ನಾನ್ ಕುರುನ ಬಿತ್ತಿಯೆ, ಅಪೊಲ್ಲೋಸ ನೀರ್ ಬೂಕ್‌ಚ್. ಆಚೇಂಗಿ ದೇವನೇ ಗಿಡತ್‍ನ ಬೊಳಿಯುವಕ್ ಮಾಡ್‍ಚಿ. 7 ದಾರ್ ಕುರು ಬಿತ್ತುವ, ದಾರ್ ನೀರ್ ಬೂಕ್‌ವ ಎಣ್ಣ್‌ವದ್ ಮುಕ್ಯ ಅಲ್ಲ. ಅದ್‍ನ ಬೊಳಿಯುವಕ್ ಮಾಡ್‌ವ ದೇವನೇ ಮುಕ್ಯ. 8 ಇಂಞು ಕುರುನ ಬಿತ್ತ್‌ವಂವೊನು ನೀರ್ ಬೂಕ್‍ವಂವೊನು ಒರೇ ಉದ್ದೇಶಕಾಯಿತ್ ಕೆಲಸ ಮಾಡ್‌ವ. ದಂಡಾಳ್‍ಕು ಅಯಿಂಗಯಿಂಗ ಮಾಡ್‍ನ ಕೆಲಸಕ್ ತಕ್ಕಂತ ಸಂಬಳ ಕ್‍ಟ್ಟ್‌ವ. 9 ಎನ್ನಂಗೆಣ್ಣ್‌ಚೇಂಗಿ ನಂಗ ದಂಡಾಳು ದೇವಡ ಸೇವೇಲ್ ಪಾಲ್‍ದಾರಂಗಳಾಯಿತ್ ಉಂಡ್; ನಿಂಗ ದೇವಡ ಬೇಲ್ ಆಯಿತು, ದೇವಡ ಕಟ್ಟಡವಾಯಿತೂ ಉಳ್ಳಿರ. 10 ದೇವ ನಾಕ್ ತಂದ ಕೃಪೆಯಿಂಜ ಒರ್ ಬುದ್ದಿವಂತೆ ಶಿಲ್ಪಿರನೆಕೆ ನಾನ್ ಅಡಿಪಾಯ ಇಟ್ಟಿಯೆ. ಇಕ್ಕ ಬೋರೊಬ್ಬ ಅದ್ಂಡಮೇಲೆ ಕೆಟ್ಟಿಯಂಡುಂಡ್. ಆಚೇಂಗಿ ಒಬ್ಬೊಬ್ಬನು ಈ ಅಡಿಪಾಯತ್‍ರ ಮೇಲೆ ಕೆಟ್ಟ್‌ವಾನ ಎಚ್ಚರತ್‍ಲ್ ಕೆಟ್ಟಂಡು. 11 ಇಟ್ಟಿತ್ತುಳ್ಳ ಅಡಿಪಾಯವಾನ ಯೇಸು ಕ್ರಿಸ್ತನ ಬುಟ್ಟಿತ್ ಬೋರೆ ಅಡಿಪಾಯತ್‍ನ ದಾರೂ ಇಡ್‌ವಕ್ ಕಯ್ಯುಲೆ. 12 ಆ ಅಡಿಪಾಯತ್‍ರ ಮೇಲೆ ಕೆಟ್ಟ್‌ವಂವೊ ಪೊನ್ನ್, ಬೊಳ್ಳಿ, ಬೆಲೆಯುಳ್ಳ ಕಲ್ಲ್, ಮರ, ಪಿಲ್ಲ್ ಪಿಂಞ ಒಣಕ್ ಪಿಲ್ಲ್‌ನೆಲ್ಲಾ ಇಟ್ಟಿತ್ ಕೆಟ್ಟ್‌ವ. 13 ಆಚೇಂಗಿ ಕ್ರಿಸ್ತಂಡ ದಿವಸತ್‍ಲ್ ತಿತ್ತ್‌ರ ಮೂಲಕ ಒಬ್ಬೊಬ್ಬನು ಎಚ್ಚಕ್ ಚಾಯಿ ಕೆಟ್ಟ್‌ಚೀಂದ್ ಗೊತ್ತಾಪ. ಎನ್ನಂಗೆಣ್ಣ್‌ಚೇಂಗಿ ತಿತ್ತ್ ಅದ್‍ನ ಕಾಂಬ್‌ಚಿಡುವ. ಒಬ್ಬೊಬ್ಬಂಡ ಕಾರ್ಯತ್‍ನ ತಿತ್ತ್ ಪರೀಕ್ಷ ಮಾಡ್‌ವ. 14 ಆ ತಿತ್ತ್ಂಜ ಅಂವೊ ಕೆಟ್ಟ್‌ನದ್ ಬಚಾವ್ ಆಚೇಂಗಿ, ಕೆಟ್ಟ್‌ನಂವೊಂಗ್ ಇನಾಮ್ ಕ್‍ಟ್ಟ್‌ವ. 15 ಅಂವೊ ಕೆಟ್ಟ್‌ನದ್ ತಿತ್ತ್‌ಲ್ ಬೆಂಜಿ ಪೋಚೇಂಗಿ ಅಂವೊಂಗ್ ಬಲ್ಯ ನಷ್ಟ ಆಪ. ಆಚೇಂಗಿ, ಕೆಟ್ಟ್‌ನಂವೊ ಮಾತ್ರ ರಕ್ಷಣೆ ಆಪ, ಅದೂ, ಕತ್ತಿಯಂಡುಳ್ಳ ತಿತ್ತ್ಂಜ ಬಚಾವ್ ಆನನೆಕೆ ಇಪ್ಪ. 16 ನಿಂಗ ದೇವಡ ಆಲಯವಾಯಿತ್ ಉಳ್ಳೀರಾಂದೂ, ನಿಂಗಡ ಹೃದಯತ್‍ಲ್ ದೇವಡ ಆತ್ಮ ವಾಸ ಮಾಡಿಯಂಡ್ ಉಂಡ್‍ೕಂದು ನಿಂಗಕ್ ಗೊತ್ತ್‌ಲ್ಲೆಯಾ? 17 ದೇವಡ ಆಲಯತ್‍ನ ಪಾಳ್ ಮಾಡ್‍ವಂವೊನ ದೇವ ಪಾಳ್ ಮಾಡ್‌ವ; ಎನ್ನಂಗೆಣ್ಣ್‌ಚೇಂಗಿ ದೇವಡ ಆಲಯ ಪವಿತ್ರವಾಯಿತ್ ಉಂಡ್. ನಿಂಗಳೇ ಆ ದೇವಡ ಆಲಯ. 18 ನಿಂಗಡಲ್ಲಿ ದಾರೂ ನಿಂಗಳ ನಿಂಗಳೇ ವಂಚನೆ ಮಾಡ್‌ವಕ್ಕಾಗ, ಈ ಲೋಕತ್‍ರ ಜನತ್‍ರ ಮಿಂಞತ್‍ಲ್ ನಿಂಗ ಬಲ್ಯ ಬುದ್ದಿವಂತಯಿಂಗಾಂದ್ ನಿಂಗ ಗೇನಮಾಡಿಯಂಡಿಂಜತೇಂಗಿ, ಅಯಿಂಗಡ ಮಿಂಞತ್ ನಿಂಗ ಮುಠಾಳಂಗಳಾಯಿತ್ ಇರಂಡು, ಅಕ್ಕ ನಿಂಗ ಬುದ್ದಿವಂತಯಿಂಗಳಾಯಿತಿಪ್ಪಿರ. 19 ಎನ್ನಂಗೆಣ್ಣ್‌ಚೇಂಗಿ ಈ ಲೋಕತ್‍ರ ಜ್ಞಾನ ದೇವಡ ಮಿಂಞತ್ ಪುಚ್ಚಿರನೆಕೆ ಉಂಡ್. ಜ್ಞಾನಿಯಡ ಮುಠಾಳತನತ್‍ರ ಮೂಲಕ ದೇವ ಅಯಿಂಗಳ ಪುಡ್‍ಚಿರುವಾಂದ್ ದೇವಡ ವಾಕ್ಯತ್‍ಲ್ ಒಳ್‍ದಿತುಂಡ್. 20 ಪಿಂಞ ಜ್ಞಾನಿಯಡ ಗೇನ ಎಲ್ಲ ಒಂದಾಂಗು ಪ್ರಯೋಜನಯಿಲ್ಲತದ್‍ೕಂದ್ ದೇವಕ್ ಗೊತ್ತುಂಡ್‍ೕಂದ್ ದೇವಡ ವಾಕ್ಯತ್‍ಲ್ ಒಳ್‍ದಿತುಂಡ್. 21 ಆನಗುಂಡ್ ಒಬ್ಬಂಗಿಂಜ ಇಂಞೊಬ್ಬ ಬಲ್ಯಂವೋಂದ್ ಹೊಗಳುವದ್‍ನ ಬುಡಿ, ಎಲ್ಲಾ ನಿಂಗಡದೇ. 22 ಪೌಲ ಆಡ್, ಅಪೊಲ್ಲೋಸ ಆಡ್ ಅಲ್ಲತಪೋಚೇಂಗಿ ಕೇಫ ಆಡ್, ಈ ಲೋಕ ಆಡ್, ಬದ್‍ಕ್ ಆಡ್, ಚಾವ್ ಆಡ್, ಇಕ್ಕತ್‍ರ ಕಾಲ ಆಡ್ ಅಥವ ಬಪ್ಪ ಕಾಲ ಆಡ್, ಎಲ್ಲಾ ನಿಂಗಡದೇ. 23 ನಿಂಗ ಕ್ರಿಸ್ತಂಗ್ ಕೂಡ್‍ನಯಿಂಗ, ಕ್ರಿಸ್ತ ದೇವಕ್ ಕೂಡ್‍ನಂವೊ. |
© 2017, New Life Literature (NLL)