1 ಕೊರಿಂಥ 14 - ಕೊಡವ ಬೈಬಲ್ಬೋರೆ ಬೋರೆ ಬಾಷೆಲ್ ತಕ್ಕ್ ಪರಿವ ಬೋದನೆ ಪಿಂಞ ಪ್ರವಾದನೆ ಎಣ್ಣ್‌ವ ವರತ್‍ರ ಬೋದನೆ 1 ಪ್ರೀತಿನ ತ್‍ೕಡಂಡು; ಆತ್ಮೀಯ ವರಕ್ ಕುಶೀಲ್ ಆಸೆ ಪಡಂಡು. ವಿಶೇಷವಾಯಿತ್ ಪ್ರವಾದನೆ ಎಣ್ಣುವ ವರ ಬೋಂಡೂಂದ್ ನಿಂಗ ಆಸೆ ಪಡಂಡು. 2 ಬೋರೆ ಬೋರೆ ಬಾಷೆಲ್ ತಕ್ಕ್ ಪರಿಯುವಂವೊ ದೇವಡ ಪಕ್ಕ ತಕ್ಕ್ ಪರ್ಂದಂಡುಂಡ್, ಮನುಷ್ಯಂಗಡ ಪಕ್ಕ ಅಲ್ಲ. ಎನ್ನಂಗೆಣ್ಣ್‌ಚೇಂಗಿ ಜನಕ್ ಅದ್ ಅರ್ಥ ಆಪುಲೆ. ಪವಿತ್ರಾತ್ಮತ್‍ರ ಸಹಾಯತ್ಂಜ ಗುಟ್ಟಾನದ್‍ನ ಅಂವೊ ತಕ್ಕ್ ಪರ್ಂದಂಡುಂಡ್. 3 ಆಚೇಂಗಿ ಪ್ರವಾದನೆ ಎಣ್ಣ್‌ವಂವೊ, ಜನ ಆತ್ಮೀಯ ವಿಷತಯತ್‍ಲ್ ಬಲಪಡ್‍ವಕಾಯಿತ್, ಪುರ್‌ಡ್ ಕ್‍ಟ್ಟುವಕಾಯಿತ್ ಪಿಂಞ ಸಮಾದಾನ ಕ್‍ಟ್ಟುವಕಾಯಿತ್ ತಕ್ಕ್ ಪರ್ಂದಡುಂಡ್. 4 ಬೋರೆ ಬೋರೆ ಬಾಷೆಲ್ ತಕ್ಕ್ ಪರಿಯುವಂವೊ, ಅಂವೊ ಬಕ್ತಿಲ್ ಬೊಳಿಯುವನೆಕೆ ಮಾಡ್‌ವ. ಆಚೇಂಗಿ, ಪ್ರವಾದನೆ ಎಣ್ಣ್‌ವಂವೊ, ಇಡೀ ಸಬೆ ಬಕ್ತಿಲ್ ಬೊಳಿಯುವನೆಕೆ ಮಾಡ್‌ವ. 5 ನಿಂಗ ಎಲ್ಲಾರು ಬೋರೆ ಬೋರೆ ಬಾಷೆಲ್ ತಕ್ಕ್ ಪರಿಯಂಡೂಂದ್ ನಾಕ್ ಕುಶಿ; ಆಚೇಂಗಿಯು, ಬೋರೆ ಬಾಷೆಲ್ ತಕ್ಕ್ ಪರಿಯುವಂವೊ ದೇವಡ ಸಬೇಲ್ ದೇವಡ ಮಕ್ಕಕ್ ಅರ್ಥ ಆಪನೆಕೆ ಅದ್ ಎಂತ್‍ೕಂದ್ ಎಣ್ಣತೆ ಪೋನಕ, ಪ್ರವಾದನೆ ಎಣ್ಣ್‌ವಂವೊ ಅಂವೊಗಿಂಜ ಬಲ್ಯಂವೊ; ಆನಗುಂಡ್ ನಿಂಗ ಎಲ್ಲಾರು ಪ್ರವಾದನೆ ಎಣ್ಣಂಡೂಂದ್ ನಾಕ್ ದುಂಬ ಆಸೆ, ಅಕ್ಕ ಸಬೆ ಬಕ್ತಿಲ್ ಬೊಳಿಯುವ. 6 ಇಕ್ಕ, ನಾಡ ಅಣ್ಣತಮ್ಮಣಂಗಳೇ, ನಾನ್ ನಿಂಗಡ ಪಕ್ಕ ಬಂದಿತ್, ನಿಂಗಕ್ ಬೋರೆ ಬೋರೆ ಬಾಷೆಲ್ ನಿಂಗಡ ಕೂಡೆ ತಕ್ಕ್ ಪರ್ಂದಂಡಿಂಜತೇಂಗಿ, ನಾಡಗುಂಡ್ ನಿಂಗಕ್ ಎಂತ ಪ್ರಯೋಜನ? ಅದ್ಂಗ್ ಬದ್‍ಲ್, ದೇವ ನಾಕ್ ಎಣ್ಣ್‌ನ ವಿಷಯತ್‍ನ ಎಣ್ಣ್‌ಚೇಂಗಿ, ಅಥವ ನಿಂಗಕ್ ಬುದ್ದಿ ಎಣ್ಣ್‌ಚೇಂಗಿ, ಅಥವ ಪ್ರವಾದನೆ ಎಣ್ಣ್‌ಚೇಂಗಿ, ಅಥವ ಬೋದನೆ ಮಾಡ್‍ಚೇಂಗಿ, ಅದ್ ನಿಂಗಕ್ ಪ್ರಯೋಜನ ಆಪ. 7 ಅನ್ನನೆ, ಪಾಂಗೊಳ ಪಿಂಞ ವೀಣೆ ಎಣ್ಣ್‌ವ ಜೀವ ಇಲ್ಲತ ಸಂಗೀತ ವಾದ್ಯತ್ಂಜ ಬಪ್ಪ ಸದ್ದೆಲ್ಲಾ ವ್ಯತ್ಯಾಸ ಇಲ್ಲತೆಪೋಚೇಂಗಿ, ಪಾಂಗೊಳತ್‍ರ ಸಂಗೀತ ಎಂತ, ವೀಣೇರ ಸಂಗೀತ ಎಂತ್‍ೕಂದ್ ಎನ್ನನೆ ಗೊತ್ತಾಪ? 8 ಅದೇ ತರ ಯುದ್ದತ್‍ರ ವಾಲಗ ಗೊತ್ತಾಕತೆ ಪೋಚೇಂಗಿ, ದಾರ್ ಯುದ್ದಕ್ ತಯಾರಾಪ? 9 ಅನ್ನನೆ ನಿಂಗಳು, ಅರ್ಥಾಕತ ಬೋರೆ ಬಾಷೆಲ್ ತಕ್ಕ್ ಪರ್ಂದತೇಂಗಿ, ನಿಂಗ ತಕ್ಕ್ ಪರ್ಂದದ್ ಎಂತ್‍ೕಂದ್ ಎನ್ನನೆ ಅರ್ಥ ಆಪ? ನೀನ್ ಪರ್ಂದ ತಕ್ಕ್ ಗಾಳಿಲ್ ತಕ್ಕ್ ಪರ್ಂದನೆಕೆ ಆಯಿಪೋಪ. 10 ಈ ಲೋಕತ್‍ಲ್ ಎಚ್ಚಕೋ ಬೋರೆ ಬೋರೆ ತರ ಬಾಷೆ ಉಂಡ್, ಅದ್‍ಲ್ ಒರ್ ಬಾಷೆಕ್ ಸಹ ಅರ್ಥ ಇಲ್ಲತೆ ಇಪ್ಪುಲೆ. 11 ಆಚೇಂಗಿಯು, ನಾಕ್ ಆ ತಕ್ಕ್ ಗೊತ್ತ್‌ಲ್ಲೆ ಎಣ್ಣ್‌ಚೇಂಗಿ, ಆ ಬಾಷೆಲ್ ತಕ್ಕ್ ಪರಿಯುವಂಗ್ ನಾನ್ ಗೊತ್ತಿಲ್ಲತಂವೊನಾಯಿತ್‌ಪ್ಪಿ, ನಾಕ್ ಅಂವೊ ಗೊತ್ತಿಲ್ಲತಂವೊನಾಯಿತ್‌ಪ್ಪ. 12 ನಿಂಗಳು ಸಹ ಆತ್ಮತ್‍ರ ವರ ಬೋಂಡೂಂದ್ ದುಂಬ ಆಸೇಲ್ ಉಳ್ಳಗುಂಡ್, ದೇವಡ ಸಬೇಲ್ ಯೇಸುನ ನಂಬ್‍ನಯಿಂಗ ಆತ್ಮೀಯ ಬದ್‍ಕ್‍ಲ್ ಬೊಳಿಯುವಕ್ ಸಹಾಯ ಮಾಡ್‌ವ ವರತ್‍ನ ಪಡೆಯುವಕ್ ಕುಶಿಪಡಿ. 13 ದಾರ್‍ಕೆಲ್ಲ ಬೋರೆ ಬೋರೆ ಬಾಷೆಲ್ ತಕ್ಕ್ ಪರಿಯುವ ವರ ಉಂಡೋ, ಅಯಿಂಗ ಅದ್ಂಡ ಅರ್ಥ ಎಣ್ಣಿ ಕೊಡ್‍ಪ ವರಕಾಯಿತ್ ಪ್ರಾರ್ಥನೆ ಮಾಡಂಡು. 14 ಜನಕ್ ಬೋರೆ ಬೋರೆ ಬಾಷೆಲ್ ನಾನ್ ಪ್ರಾರ್ಥನೆ ಮಾಡ್‍ಚೇಂಗಿ, ನಾಡ ಆತ್ಮ ಮಾತ್ರ ಪ್ರಾರ್ಥನೆ ಮಾಡಿಯಂಡಿಪ್ಪ, ಆಚೇಂಗಿ ನಾಡ ಬುದ್ದಿಕ್ ಒಂದು ಅರ್ಥ ಆಪುಲೆ. 15 ಆನಗುಂಡ್ ನಾನ್ ಎಂತ ಮಾಡ್‌ವೀಂದ್ ಎಣ್ಣ್‌ವಿ: ನಾನ್ ನಾಡ ಆತ್ಮತ್‍ಲು ಪ್ರಾರ್ಥನೆ ಮಾಡ್‌ವಿ, ನಾಡ ಬುದ್ದಿಲೂ ಪ್ರಾರ್ಥನೆ ಮಾಡ್‌ವಿ; ನಾಡ ಆತ್ಮತ್‍ಲು ಪಾಟ್ ಪಾಡ್‌ವಿ, ನಾಡ ಬುದ್ದಿಲೂ ಪಾಟ್ ಪಾಡ್‌ವಿ. 16 ಅನ್ನನೆ ಮಾಡತ ಪೋಚೇಂಗಿ, ನಿಂಗ ನಿಂಗಡ ಆತ್ಮತ್‍ಲ್ ದೇವಕ್ ವಂದನೆ ಮಾಡ್‌ವಕ, ಆ ಬಾಷೆ ಗೊತ್ತಿಲ್ಲತಂವೊ ನಿಂಗಡ ಆರಾದನೆಲ್ ಇಂಜತೇಂಗಿ, ಅಂವೊ ಎನ್ನನೆ ಆಮೆನ್‍ಂದ್ ಎಣ್ಣುವ? ಅಂವೊಂಗ್ ನೀಡ ತಕ್ಕ್ ಗೊತ್ತ್‌ಲೆಲ್ಲ? 17 ನೀನ್ ದೇವಕ್ ಚಾಯಿ ವಂದನೆ ಮಾಡಿಯಂಡಿಪ್ಪಿಯ, ಆಚೇಂಗಿ, ಅದ್‍ನಗುಂಡ್ ಬೋರೆಯಿಂಗಕ್ ದೇವಡ ಮೇಲೆ ಎನ್ನನೆ ಬಕ್ತಿ ಬಪ್ಪ? 18 ನಾಕ್ ನಿಂಗ ಎಲ್ಲಾಡಕಿಂಜ ದುಂಬ ಬಾಷೆಲ್ ತಕ್ಕ್ ಪರಿಯುವಕ್ ಗೊತ್ತುಳ್ಳಗುಂಡ್ ನಾನ್ ದೇವಕ್ ವಂದನೆ ಮಾಡ್‌ವಿ. 19 ಆಚೇಂಗಿಯು, ಸಬೆರ ಆರಾದನೆಕ್ ಬಪ್ಪಕ, ಜನಕ್ ಗೊತ್ತಿಲ್ಲತ ಬಾಷೆಲ್ ಪತ್ತಾಯಿರ ತಕ್ಕ್ ಪರಿಯುವಕಿಂಜ, ಜನಕ್ ಬುದ್ದಿ ಎಣ್ಣುವನೆಕೆ, ಅಯಿಂಗಕ್ ಗೊತ್ತುಳ್ಳ ಬಾಷೆಲ್ ಒರ್ ಅಂಜ್ ತಕ್ಕ್ ಪರಿವದ್ ನಾಕ್ ದುಂಬ ಕುಶಿ. 20 ನಾಡ, ಅಣ್ಣತಮ್ಮಣಂಗಳೇ, ದೇವಡ ಆತ್ಮ ತಪ್ಪ ವರತ್‍ರ ವಿಷಯತ್‍ಲ್ ಚೆರಿಯ ಮಕ್ಕಡನೆಕೆ ನಿಂಗ ಗೇನ ಮಾಡತಿ, ಕೆಟ್ಟ ವಿಷಯತ್‍ಲ್ ನಿಂಗ ಚೆರಿಯ ಮಕ್ಕಡನೆಕೆ ಗೇನ ಮಾಡಂಡು, ಆಚೇಂಗಿ ಈ ವಿಷಯತ್‍ಲ್ ಬಲ್ಯಂಗಡನೆಕೆ ನಿಂಗ ಗೇನ ಮಾಡಂಡು. 21 ನ್ಯಾಯಪ್ರಮಾಣತ್ಲ್ ಇನ್ನನೆ ಒಳ್‍ದಿತುಂಡ್: ನಾನ್ ನಾಡ ಸ್ವಂತ ಜನಡ ಪಕ್ಕ, ಅಯಿಂಗಕ್ ಗೊತ್ತಿಲ್ಲತ ಬಾಷೆ ಪರಿಯುವಂಗಡ ಮೂಲಕವು ಪಿಂಞ ಗೊತ್ತಿಲ್ಲತ ಬಾಷೆ ಪರಿಯುವಂಗಡ ಕಿರಿರ ಮೂಲಕವು ತಕ್ಕ್ ಪರಿಚಿಡುವಿ. ಆಚೇಂಗಿ ಸಹ ಈ ಜನ ನಾಕ್ ಕೆಮಿ ಕೊಡ್‍ಪ್‍ಲೇಂದ್ ದೇವ ಎಣ್ಣಿತುಂಡ್. 22 ಅಕ್ಕ, ಬೋರೆ ಬಾಷೆಲ್ ತಕ್ಕ್ ಪರಿಯುವ ವರ ದೇವಡ ಮೇಲೆ ನಂಬಿಕೆ ಬೆಚ್ಚಿತುಳ್ಳ ಮಕ್ಕಕ್ ಗುರ್‌ತಾಯಿತ್ ಅಲ್ಲ, ಆಚೇಂಗಿ ದೇವಡ ಮೇಲೆ ನಂಬಿಕೆ ಇಲ್ಲತ ಜನಕ್ ಗುರ್‌ತಾಯಿತುಂಡ್; ಆಚೇಂಗಿ ಪ್ರವಾದನೆ ಎಣ್ಣ್‌ವದ್ ದೇವಡ ಮೇಲೆ ನಂಬಿಕೆ ಇಲ್ಲತ ಜನಕ್ ಅಲ್ಲ, ದೇವಡ ಮೇಲೆ ನಂಬಿಕೆ ಉಳ್ಳ ಜನಕ್ ಗುರ್‌ತಾಯಿತುಂಡ್ 23 ಆನಗುಂಡ್, ನಿಂಗ ಸಬೇಲ್ ಆರಾದನೆಕ್ ಕೂಡಿ ಬಪ್ಪಕ, ಎಲ್ಲಾರು ಬೋರೆ ಬೋರೆ ಬಾಷೆಲ್ ತಕ್ಕ್ ಪರ್ಂದಂಡಿಂಜತೇಂಗಿ, ಪೊರಮೆ ಉಳ್ಳ ಜನ, ಅಥವ ದೇವಡ ಮೇಲೆ ನಂಬಿಕೆ ಇಲ್ಲತಯಿಂಗ ದಾರಾಚೇಂಗಿ ಒಳ್‍ಕ್ ಬಾತೇಂಗಿ, ಅಯಿಂಗ ನಿಂಗಳ ಪುಚ್ಚ್ ಪುಡ್‌ಚಯಿಂಗಾಂದ್ ಎಣ್ಣುವ ಅಲ್ಲ? 24 ಎಲ್ಲಾರು ಪ್ರವಾದನೆ ಎಣ್ಣಿಯಂಡ್ ಇಪ್ಪಕಾಪಕ, ದೇವಡ ಮೇಲೆ ನಂಬಿಕೆ ಬೆಕ್ಕತಯಿಂಗ ಪಿಂಞ ಪೊರಮೆ ಉಳ್ಳಯಿಂಗ ಬಂದಕ, ಅಲ್ಲಿ ದೇವಡ ವಾಕ್ಯತ್‍ನ ಕ್‍ೕಟಿತ್, ತಾನ್ ಒರ್ ಪಾಪೀಂದು, ಅಂವೊ ಕ್‍ೕಟ ಸತ್ಯತ್‍ರಗುಂಡ್ ಅಂವೊಂಗ್ ನ್ಯಾಯತೀರ್ಪ್ ಕ್‍ಟ್ಟ್‌ಚೀಂದ್ ಅರ್ಥ ಆಪ. 25 ಅಕ್ಕ ಅಂವೊ ಮಾಡ್‍ನ ಪಾಪ ದಾರ್‌ಕು ಗೊತ್ತ್‌ಲ್ಲೇಂದ್ ಗೇನ ಮಾಡ್‍ನದ್ ದೇವಕ್ ಗೊತ್ತುಂಡೂಂದ್ ಅರ್ಥ ಮಾಡಿಯಂಡ್, ದೇವಡ ಕಾಲ್‌ಕ್ ಬೂವಂಜಿ ಆರಾದನೆ ಮಾಡ್‌ವ ಪಿಂಞ ನೇರಾಯಿತು ದೇವ ನಿಂಗಡ ಮದ್ಯತ್‍ಲ್ ಉಂಡ್‍ೕಂದ್ ಎಣ್ಣುವ. ಸಬೇಲ್ ಆರಾದನೆರ ವಿಷಯತ್ ಬೋದನೆ 26 ನಾಡ ಅಣ್ಣತಮ್ಮಣಂಗಳೇ, ನಿಂಗ ಒಕ್ಕಚೆ ಕೂಡಿ ಬಪ್ಪಕ ಏದ್ ರೀತಿಲ್ ಆರಾದನೆ ಮಾಡಿಯಂಡುಳ್ಳಿರಾ? ಒಬ್ಬ ಪಾಟ್ ಪಾಡಿಯಂಡುಂಡ್, ಒಬ್ಬ ಬೋದನೆ ಮಾಡಿಯಂಡುಂಡ್, ಬೋರೆ ಒಬ್ಬ ದೇವಡ ಗುಟ್ಟ್‌ನ ಎಣ್ಣಿಯಂಡುಂಡ್, ಒಬ್ಬ ಬೋರೆ ಬೋರೆ ಬಾಷೆಲ್ ತಕ್ಕ್ ಪರ್ಂದಂಡುಂಡ್, ಬೋರೆ ಒಬ್ಬ ಅದ್‍ನ ಅರ್ಥ ಮಾಡಿ ಕೊಡ್‍ತಂಡುಂಡ್. ಇದೆಲ್ಲಾ ಎಂತ? ಸಬೆ ಬಕ್ತಿಲ್ ಬೊಳಿವಕಾಯಿತ್ ಇದ್‍ನೆಲ್ಲಾ ಮಾಡಂಡು. 27 ನಿಂಗಡಲ್ಲಿ ದಾರೇಂಗಿ ಒಬ್ಬ, ಬೋರೆ ಬಾಷೆಲ್ ತಕ್ಕ್ ಪರಿಯುವದಾಚೇಂಗಿ, ಬರಿ ದಂಡಾಳ್ ಮಾತ್ರ ತಕ್ಕ್ ಪರಿಯಡ್, ಇಲ್ಲೇಂಗಿ ಮೂಂದಾಳ್ ಮಾತ್ರ ತಕ್ಕ್ ಪರಿಯಡ್, ಒಬ್ಬ ಆನ ಪಿಂಞ ಇಂಞೊಬ್ಬ ತಕ್ಕ್ ಪರಿಯಂಡು. ಒಬ್ಬ ಎಣ್ಣ್‌ವದ್‍ನ, ಬೋರೆ ಒಬ್ಬ ಅರ್ಥ ಮಾಡಿ ಕೊಡ್‍ಕಂಡು. 28 ಬೋರೆ ಬಾಷೆಲ್ ತಕ್ಕ್ ಪರಿಯುವದ್‍ನ, ಅರ್ಥ ಮಾಡಿ ಕೊಡ್‍ಪಕ್ ದಾರೂ ಇಲ್ಲತಪೋಚೇಂಗಿ, ಅಂವೊ ಮುಂಡತೆ ಇರಂಡು. ಆಚೇಂಗಿ ಅಂವೊ ದೇವಡ ಪಕ್ಕ, ಅಂವೊಂಗು ದೇವಕು ಮಾತ್ರ ಗೊತ್ತಾಪನೆಕೆ ತಕ್ಕ್ ಪರಿಯುಡ್. 29 ದಂಡ್‍ಮೂಂದಾಳ್ ಮಾತ್ರ ಪ್ರವಾದನೆ ಎಣ್ಣಡ್. ಬೋರೆಯಿಂಗ, ಅಯಿಂಗ ಎಣ್ಣುವ ಪ್ರವಾದನೆ ಸರಿಯಾಂದ್ ನೋಟಂಡು. 30 ಅನ್ನನೆ ಒಬ್ಬ ಪ್ರವಾದನೆ ಎಣ್ಣಿಯಂಡಿಪ್ಪಕ, ಅದ್‍ನ ಕ್‍ೕಟಂಡುಳ್ಳ ಬೋರೆ ಒಬ್ಬಂಗ್ ದೇವಡಯಿಂಜ ವಾಕ್ಯ ಕ್‍ಟ್ಟ್‌ಚೇಂಗಿ, ಪ್ರವಾದನೆ ಎಣ್ಣಿಯಂಡಿಂಜಂವೊ ಅದ್‍ನ ನಿಪ್ಪ್‌ಚಿಡಂಡು. 31 ಅನ್ನನೆ ಎಲ್ಲಾರು ದೇವಡ ವಿಷಯತ್ ಬೊಳಿಯುವಕು ಪಿಂಞ ದೇವಡ ಮೇಲೆ ಉಳ್ಳ ನಂಬಿಕೇಲ್ ಇಂಞು ದೃಡವಾಪಕು, ಒಬ್ಬೊಬ್ಬನಾಯಿತ್ ಪ್ರವಾದನೆ ಎಣ್ಣಡ್. 32 ಪ್ರವಾದನೆ ಎಣ್ಣ್‌ವಯಿಂಗಡ ಆತ್ಮ ಅಯಿಂಗಡ ಅದಿಕಾರತ್‍ಲ್ ಇಪ್ಪ ಅಲ್ಲಾ? 33 ಎನ್ನಂಗ್ ಎಣ್ಣ್‌ಚೇಂಗಿ ನಂಗಡ ದೇವ, ಕಲವಳತ್‍ರ ದೇವ ಅಲ್ಲ ಆಚೇಂಗಿ ಸಮಾದಾನತ್‍ರ ದೇವ. ದೇವಡ ಮಕ್ಕಡ ಸಬೇಲ್ ಎಲ್ಲಾ ಅನ್ನನೆ ಉಂಡ್, 34 ಸಬೆರ ಆರಾದನೆಲ್ ಪೊಣ್ಣಾಳುವ ಮುಂಡತೆ ಇರಂಡು. ಅಯಿಂಗ ತಕ್ಕ್ ಪರಿಯುವಕ್ ಅನುಮತಿ ಇಲ್ಲೆ. ನ್ಯಾಯಪ್ರಮಾಣತ್ಲ್ ಎಣ್ಣ್‌ವನೆಕೆ ಪೊಣ್ಣಾಳ್‍ವ ಸಬೇಲ್ ಅಡಕತ್‍ಲ್ ಇರಂಡು. 35 ಅಯಿಂಗಕ್ ಎಂತಾಚೇಂಗಿಯು ಗೊತ್ತಾಂಡೂಂದ್ ಎಣ್ಣ್‌ಚೇಂಗಿ ಮನೆಲ್ ಅಯಿಂಗಡ ವಡಿಯನ ಕ್‍ೕಕಂಡು, ಪೊಣ್ಣಾಳುವ ಸಬೇಲ್ ಬೋಂಡತ ತಕ್ಕ್ ಪರಿಯುವದ್ ಒರ್ ಞಾಣತ್‍ರ ವಿಷಯ. 36 ದೇವಡ ವಾಕ್ಯ ನಿಂಗಡಿಂಜ ಬಾತಾ? ಅಥವ, ನಿಂಗಕ್ ಮಾತ್ರ ಬಾತಾ? 37 ನಾನ್ ದೇವಡ ಪ್ರವಾದೀಂದ್ ಒಬ್ಬ ಎಣ್ಣ್‌ಚೇಂಗಿ, ದೇವಡ ಆತ್ಮ ನಾಡ ಪಕ್ಕ ಉಂಡ್‍ೕಂದ್ ಒಬ್ಬ ಗೇನ ಮಾಡ್‍ಚೇಂಗಿ, ಇಕ್ಕ ನಾನ್ ಇಲ್ಲಿ ಒಳ್‍ದಿಯಂಡ್ ಉಳ್ಳದೆಲ್ಲಾ ಒಡೆಯಂಡ ಕಾನೂನ್‍ೕಂದ್ ಎಣ್ಣಡ್. 38 ಅನ್ನನೆ ಇದ್‍ನ ಒತ್ತತೆ ಪೋಚೇಂಗಿ, ಅಂವೊ ಎಣ್ಣುವ ವಿಷಯಕ್ ಸಬೆ ಒತ್ತವಕ್ಕಾಗ. 39 ಆನಗುಂಡ್ ನಾಡ ಅಣ್ಣತಮ್ಮಣಂಗಳೇ, ಪ್ರವಾದನೆ ಎಣ್ಣ್‌ವಕ್ ದುಂಬ ಕುಶಿ ಪಡಿರಿ, ಬೋರೆ ಬೋರೆ ಬಾಷೆಲ್ ತಕ್ಕ್ ಪರಿಯುವಯಿಂಗಳ ನಿಪ್ಪ್‌ಚಿಡತಿ. 40 ಎಲ್ಲಾನ ಚಾಯಿತೆ ಕ್ರಮವಾಯಿತ್ ಮಾಡಿ. |
© 2017, New Life Literature (NLL)