1 ಕೊರಿಂಥ 12 - ಕೊಡವ ಬೈಬಲ್ಪವಿತ್ರಾತ್ಮತ್ರ ವರ 1 ನಾಡ ಅಣ್ಣತಮ್ಮಣಂಗಳೇ, ಇಕ್ಕ ಪವಿತ್ರಾತ್ಮತ್‍ರ ವರತ್‍ರ ವಿಷಯತ್ ನಿಂಗ ಗೊತ್ತಿಲ್ಲತೆ ಇಪ್ಪದ್ ನಾಕ್ ಕುಶಿಯಿಲ್ಲೆ. 2 ನಿಂಗ ಕ್ರಿಸ್ತಂಡ ಪಕ್ಕ ಬಪ್ಪಕ್ ಮಿಂಞ, ತಕ್ಕ್‌ಪರಿವಕ್ ಕಯ್ಯತ ವಿಗ್ರಹಕ್ ನಿಂಗಡ ಮನಸ್ಸ್‌ನ ಕೊಡ್‍ತೀರಾಂದ್ ನಿಂಗಕ್ ಗೊತ್ತುಂಡ್. 3 ಆನಗುಂಡ್, ಪವಿತ್ರಾತ್ಮತ್‍ರ ಮೂಲಕ, ತಕ್ಕ್ ಪರಿಯುವ ಏದ್ ಮನುಷ್ಯನು, ಯೇಸುನ, ಅಂವೊ ಶಾಪ ಪಡ್ಂದವೋಂದ್ ಎಣ್ಣ್‌ವದೇ ಇಲ್ಲೆ, ಪವಿತ್ರಾತ್ಮಂಡ ಸಹಾಯ ಇಲ್ಲತೆ, ಯೇಸುನ ಒಡೆಯಾಂದ್ ಎಣ್ಣ್‌ವಕ್ ದಾರ್‌ಕು ಕಯ್ಯುಲೇಂದ್ ನಾನ್ ನಿಂಗಕ್ ಎಣ್ಣ್‌ವಿ. 4 ಪವಿತ್ರಾತ್ಮಂಡ ವರ, ನಾನಾ ತರತ್‍ಲ್ ಉಂಡ್, ಆಚೇಂಗಿ ಪವಿತ್ರಾತ್ಮ ಒಬ್ಬನೇ. 5 ದೇವಡ ಸೇವೆ ನಾನಾ ತರತ್‍ಲ್ ಉಂಡ್, ಆಚೇಂಗಿ ನಂಗಡ ಒಡೆಯ ಒಬ್ಬನೇ. 6 ದೇವ ನಾನಾ ತರತ್‍ಲ್ ಕೆಲಸ ಮಾಡ್‌ವ, ಆಚೇಂಗಿ, ನಂಗಡ ಎಲ್ಲಾಡ ಒಳ್‍ಲ್ ಕೆಲಸ ಮಾಡ್‌ವಕ್ ಶಕ್ತಿ ತಪ್ಪ ದೇವ ಒಬ್ಬನೇ. 7 ಎಲ್ಲಾಡ ನಲ್ಲದ್‍ಕಾಯಿತ್, ಪವಿತ್ರಾತ್ಮಂಡ ವರತ್‍ನ ದೇವ ಒಬ್ಬೊಬ್ಬಂಗು ಕೊಡ್‌ತಿತುಂಡ್. 8 ಎನ್ನನೆ ಎಣ್ಣ್‌ಚೇಂಗಿ, ಒಬ್ಬಂಗ್ ಪವಿತ್ರಾತ್ಮನಗುಂಡ್ ಜ್ಞಾನತ್‍ನ ಬೋದನೆ ಮಾಡ್‌ವ ವರ, ಬೋರೆ ಒಬ್ಬಂಗ್ ಅದೇ ಪವಿತ್ರಾತ್ಮನಗುಂಡ್ ಬುದ್ದಿ ಎಣ್ಣುವ ವರ, 9 ಬೋರೆ ಒಬ್ಬಂಗ್ ಅದೇ ಪವಿತ್ರಾತ್ಮನಗುಂಡ್ ದೇವಡ ದೃಡವಾನ ನಂಬಿಕೆ, ಇಂಞೊಬ್ಬಂಗ್ ಅದೇ ಪವಿತ್ರಾತ್ಮನಗುಂಡ್ ಕಾಯಿಲೆನೆ ವಾಸಿ ಮಾಡ್‌ವ ವರ, 10 ಬೋರೆ ಒಬ್ಬಂಗ್ ಅದ್ಬುತ ಕಾರ್ಯ ಮಾಡ್‌ವ ವರ, ಇಂಞೊಬ್ಬಂಗ್ ಪ್ರವಾದನೆ ಎಣ್ಣ್‌ವ ವರ, ಬೋರೆ ಒಬ್ಬಂಗ್ ದೇವಡ ಶಕ್ತಿಯಿಂಜ ಕೂಳಿಯಡ ಶಕ್ತಿನ ಗೊತ್ತ್‌ಮಾಡ್‍ವಕುಳ್ಳ ವರ, ಇಂಞೊಬ್ಬಂಗ್ ನಾನಾತರ ಬಾಷೆನ ಪರಿವಕುಳ್ಳ ವರ, ಬೋರೆ ಒಬ್ಬಂಗ್ ನಾನಾತರ ಬಾಷೆನ ಅರ್ಥ ಮಾಡಿತಪ್ಪ ವರ, ಅನ್ನನೆ ನಾನಾತರ ವರತ್‍ನ ಕೊಡ್‌ತಿತುಂಡ್. 11 ಇದೆಲ್ಲಾ ಒರೇ ಪವಿತ್ರಾತ್ಮ ಮಾಡಿತ್, ಅಂವೊ ತೀರ್ಮಾನ ಮಾಡ್‌ವನೆಕೆ ಒಬ್ಬೊಬ್ಬಂಗ್ ಓರೋರ್ ತರತ್‍ರ ವರತ್‍ನ ತಪ್ಪ. ಒರೇ ತಡಿ, ಬೋರೆ ಬೋರೆ ಬಾಗ 12 ಒರ್ ತಡಿಕ್ ಬೋರೆ ಬೋರೆ ಬಾಗ ಉಂಡ್, ಆಚೇಂಗಿಯು ಅದ್ ಒರೇ ತಡಿಯಾಯಿತುಂಡ್. ಅನ್ನನೆ ಎಲ್ಲಾ ದೇವಡ ಮಕ್ಕಳು ಒರೇ ತಡಿರನೆಕೆ ಉಂಡ್. ಅನ್ನನೆ ನಂಗ ಒಬ್ಬೊಬ್ಬಂಗಕ್ ಬೋರೆ ಬೋರೆ ವರ ಉಂಡೇಂಗಿಯು, ನಂಗ ಎಲ್ಲಾರು ಕ್ರಿಸ್ತಂಡ ಒರೇ ತಡಿಯಾಯಿತುಂಡ್. 13 ನಂಗ ಯೆಹೂದ್ಯ ಜನವಾಯಿತ್ ಇಂಜತೇಂಗಿಯು, ಯೆಹೂದ್ಯರಲ್ಲತ ಬೋರೆ ಜನವಾಯಿತ್ ಇಂಜತೇಂಗಿಯು, ಅಡಿಯಾಳಾಯಿತ್ ಇಂಜತೇಂಗಿಯು, ಬುಡ್‍ಗಡೆ ಆನ ಜನವಾಯಿತ್ ಇಂಜತೇಂಗಿಯು, ಎಲ್ಲಾ ಜನಳು ಒರೇ ಆತ್ಮತ್‍ರಗುಂಡ್ ಒರೇ ತಡಿಕ್ ದೀಕ್ಷಾಸ್ನಾನ ಪಡ್ಂದಿತ್, ಒರೇ ಆತ್ಮ ನಂಗಡ ಕೂಡೆ ವಾಸ ಮಾಡಿಯಂಡುಂಡ್. 14 ನಂಗಡ ತಡೀಲ್ ಒರ್ ಬಾಗ ಮಾತ್ರವಲ್ಲ, ದುಂಬ ಬಾಗ ಉಂಡ್. 15 ಕಾಲ್, ನಾನ್ ಕೈ ಅಲ್ಲಾತಗುಂಡ್ ನಾನ್ ತಡೀರ ಬಾಗವಲ್ಲಾಂದ್ ಎಣ್ಣ್‌ಚೇಂಗಿ, ಆ ಕಾರಣಕಾಯಿತ್ ಅದ್ ತಡೀರ ಬಾಗವಾಯಿತ್‌ಪ್ಪ್‌ಲೆಯಾ? 16 ಕೆಮಿ, ನಾನ್ ಕಣ್ಣ್ ಅಲ್ಲಾತಗುಂಡ್, ನಾನ್ ತಡೀರ ಬಾಗವಲ್ಲಾಂದ್ ಎಣ್ಣ್‌ಚೇಂಗಿ, ಆ ಕಾರಣಕಾಯಿತ್ ಅದ್ ತಡೀರ ಬಾಗವಾಯಿತ್‌ಪ್ಪ್‌ಲೆಯಾ? 17 ನಂಗಡ ಪೂರ್ತಿ ತಡಿ ಕಣ್ಣಾಯಿತ್ ಇಂಜತೇಂಗಿ, ನಂಗಕ್ ಎನ್ನನೆ ಕ್‍ೕಪ? ನಂಗಡ ಪೂರ್ತಿ ತಡಿ ಕೆಮಿಯಾಯಿಂ‌ಜತೇಂಗಿ, ನಂಗ ಎನ್ನನೆ ಮೂಸೊ? 18 ನಂಗಡ ತಡೀಲ್ ನಾನ ತರತ್‍ರ ಬಾಗ ಉಂಡ್. ಆಚೇಂಗಿ ದೇವ ಅಂವೊಂಡ ಚಿತ್ತತ್‍ರನೆಕೆ ಓರೋರ್ ಬಾಗತ್‍ನ ತಡೀಲ್ ಕೂಟಿತುಂಡ್. 19 ತಡೀರ ಪೂರ್ತಿ ಬಾಗ, ಒರೇ ಬಾಗವಾಯಿತ್ ಇಂಜತೇಂಗಿ ಅದ್ ತಡಿ ಆಪಕಿಂಜಿಲೆ. 20 ತಡೀರ ಬಾಗ ನಾನಾ ತರತ್‍ಲ್ ಇಂಜತೇಂಗಿಯು, ತಡಿ ಒಂದೇ. 21 ಕಣ್ಣ್, ಕೈಯಿಕ್, ನೀನ್ ನಾಕ್ ಬೋಂಡಾಂದ್ ಎಣ್ಣುವಕ್ ಕಯ್ಯುಲೆ. ಅನ್ನನೆ ಮಂಡೆ, ಕಾಲ್‌ಕ್, ನೀನ್ ನಾಕ್ ಬೋಂಡಾಂದ್ ಎಣ್ಣುವಕ್ ಕಯ್ಯುಲೆ. 22 ಆಚೇಂಗಿಯು, ನಂಗಡ ತಡೀಲ್ ಬಲಹೀನವಾಯಿತ್ ಉಂಡ್‍ೕಂದ್ ಗೇನ ಮಾಡ್‌ವ ಬಾಗವೆಲ್ಲಾ ದುಂಬ ಬೋಂಡಿಯಾನ ಬಾಗವಾಯಿತುಂಡ್! 23 ಅದಲ್ಲತೆ, ತಡೀಲ್ ಮುಕ್ಯವಿಲ್ಲತದ್‍ೕಂದ್ ಗೇನ ಮಾಡ್‌ವ ಬಾಗಕ್, ನಂಗ ದುಂಬ ಪ್ರಾಮುಕ್ಯತೆ ಕೊಡ್‍ಪ; ನಂಗಡ ತಡೀಲ್ ಚಾಯಿ ಕಾಂಗತ ಬಾಗಕ್ ದುಂಬ ಪ್ರಾಮುಕ್ಯತೆ ಕೊಡ್‌ತಿತ್ ಚಾಯಿ ಮಾಡಿಯಂಡುಂಡ್. 24 ನಂಗಡ ತಡೀಲ್ ಕಾಂಬಕ್ ಚಾಯುಳ್ಳ ಬಾಗಕ್ ದುಂಬ ಅಲಂಗಾರ ಮಾಡುಲೆ. 25 ನಂಗಡ ತಡೀಲ್ ವಿಂಗಡ ಇಪ್ಪಕಾಗಾಂದ್, ಬಾಗವೆಲ್ಲಾ ಒಂದಾಯಿತ್ ಒಕ್ಕಚೆ ಕೆಲಸ ಮಾಡ್‌ವಕಾಯಿತ್ ದೇವ ಇನ್ನನೆ ಮಾಡ್‍ಚಿ. ಆನಗುಂಡ್ ತಡೀರ ಬಾಗ ಒಂದಾಂಗಿಂಜ ಒಂದ್ ಕಮ್ಮಿಯಿಲ್ಲೆ. 26 ಅಕ್ಕ, ತಡೀರ ಒರ್ ಬಾಗ ಕಷ್ಟಪಟ್ಟತೇಂಗಿ, ಅದ್ಂಡಕೂಡೆ ತಡೀರ ಎಲ್ಲಾ ಬಾಗವು ಕಷ್ಟಪಡ್‌ವ. ಒರ್ ಬಾಗ ಕುಶಿಪಟ್ಟತೇಂಗಿ ಬೋರೆ ಎಲ್ಲಾ ಬಾಗವು ಕುಶಿ ಪಡುವ. 27 ಇಕ್ಕ, ನಿಂಗಳೇ ಕ್ರಿಸ್ತಂಡ ತಡಿಯು ಪಿಂಞ ಆ ತಡೀರ ಓರೋರ್ ಬಾಗವು ಆಯಿತುಳ್ಳಿರ. 28 ದೇವಡ ಸಬೇಲ್, ದೇವ ಆದ್ಯವಾಯಿತ್ ಅಪೊಸ್ತಲಂಗಳ, ಪಿಂಞ ಪ್ರವಾದಿಯಂಗಳ, ಪಿಂಞ ಉಪದೇಶ ಮಾಡ್‌ವಯಿಂಗಳ ಪಿಂಞ ಅದ್ಬುದ ಕಾರ್ಯ ಮಾಡ್‌ವಯಿಂಗಳ, ಪಿಂಞ ಕಾಯಿಲೆ ವಾಸಿ ಮಾಡ್‌ವಯಿಂಗಳ, ಪಿಂಞ ಸಹಾಯ ಮಾಡ್‌ವಯಿಂಗಳ ಪಿಂಞ ಆಡಳಿತ ಮಾಡ್‌ವಯಿಂಗಳ, ಪಿಂಞ ಬೋರೆ ಬೋರೆ ಬಾಷೆಲ್ ತಕ್ಕ್ ಪರಿಯುವಯಿಂಗಳ ನೇಮಿಚಿಟ್ಟಿತುಂಡ್. 29 ಅಕ್ಕ, ಎಲ್ಲಾರು ಅಪೊಸ್ತಲಂಗಳಾ? ಎಲ್ಲಾರು ಪ್ರವಾದಿಯಂಗಳಾ? ಎಲ್ಲಾರು ಉಪದೇಶ ಮಾಡ್‌ವಯಿಂಗಳಾ? ಎಲ್ಲಾರು ಅದ್ಬುತ ಕಾರ್ಯ ಮಾಡ್‌ವಯಿಂಗಳಾ? 30 ಎಲ್ಲಾರು ಕಾಯಿಲೆನೆ ವಾಸಿ ಮಾಡ್‌ವಯಿಂಗಳಾ? ಎಲ್ಲಾರು ಬೋರೆ ಬೋರೆ ಬಾಷೆಲ್ ತಕ್ಕ್ ಪರಿಯುವಯಿಂಗಳಾ? ಎಲ್ಲಾರು ಬೋರೆ ಬಾಷೆಲ್ ಎಣ್ಣ್‌ವ ತಕ್ಕ್‌ನ ಅರ್ಥ ಮಾಡಿ ತಪ್ಪಯಿಂಗಳಾ? 31 ಆನಗುಂಡ್, ಮುಕ್ಯವಾನ ದೇವಡ ವರತ್‍ನ ನೇರಾಯಿತು ತ್‍ೕಡಿ; ಇಕ್ಕ, ಎಲ್ಲಾ ವರಕಿಂಜ ಬಲ್ಯ ಒರ್ ಕಾರ್ಯತ್‍ನ ನಾನ್ ನಿಂಗಕ್ ಕಾಟಿತಪ್ಪಿ. |
© 2017, New Life Literature (NLL)