1 ಕೊರಿಂಥ 11 - ಕೊಡವ ಬೈಬಲ್1 ಕ್ರಿಸ್ತ ಎಣ್ಣ್‌ವಾನ ನಾನ್ ಮಾಡ್‌ವನೆಕೆ ನಿಂಗ ನಾನ್ ಮಾಡ್‌ವದ್‍ನ ಮಾಡಿ. ಆರಾದನೆಲ್ ಮಂಡೆಕ್ ತುಣಿ ಇಡ್‌ವದ್ 2 ನಿಂಗ ನನ್ನ, ನಿಂಗಡ ಗೇನತ್‍ಲ್ ಬೆಚ್ಚಿತ್, ನಿಂಗಡ ಎಲ್ಲಾ ವಿಷಯತ್‍ಲ್, ನಾನ್ ನಿಂಗಕ್ ಬೋದನೆ ಮಾಡ್‍ನದ್‍ನ ಗೇನ ಮಾಡಿಯಂಡ್, ನಾನ್ ನಿಂಗಕ್ ಒಪ್ಪ್‌ಚಿಟ್ಟದ್‍ನ ಮಾಡಿಯಂಡ್ ಉಳ್ಳಗುಂಡ್ ನಿಂಗಳ ನಾನ್ ಕೊಂಡಾಡುವಿ. 3 ಆಚೇಂಗಿ ಇಕ್ಕ, ಇದ್ ನಿಂಗಕ್ ಗೊತ್ತಾಯಿತಿರಂಡೂಂದ್ ನಾಕ್ ಆಸೆ. ಪ್ರತಿಯೊರ್ ಆಣಾಳ್‍ಕು ಕ್ರಿಸ್ತ ಮಂಡೆಯಾಯಿತ್ ಉಂಡ್, ಪ್ರತಿಯೊರ್ ಪೊಣ್ಣಾಳ್‍ಕು ಅವಡ ವಡಿಯ ಮಂಡೆಯಾಯಿತ್ ಉಂಡ್, ಕ್ರಿಸ್ತಂಗ್ ದೇವ ಮಂಡೆಯಾಯಿತ್ ಉಂಡ್. 4 ಒರ್ ಆಣಾಳ್ ಪ್ರಾರ್ಥನೆ ಮಾಡ್‌ವ ಸಮಯತ್‍ಲ್ ಆಡ್, ಇಲ್ಲೆ ಪ್ರವಾದನೆ ಎಣ್ಣುವ ಸಮಯತ್‍ಲ್ ಆಡ್ ತಾಂಡ ಮಂಡೆಕ್ ತುಣಿ ಇಟ್ಟತೇಂಗಿ, ಅಂವೊ ಅಂವೊಂಡ ಮಂಡೆಯಾಯಿತುಳ್ಳ ಕ್ರಿಸ್ತಂಗ್ ಮರ್ಯಾದೆ ಕೊಡ್‍ತಂಡಿಲ್ಲೆ. 5 ಅನ್ನನೆ ಒರ್ ಪೊಣ್ಣಾಳ್ ಪ್ರಾರ್ಥನೆ ಮಾಡ್‌ವ ಸಮಯತ್‍ಲ್ ಆಡ್, ಅಥವ ಪ್ರವಾದನೆ ಎಣ್ಣುವ ಸಮಯತ್‍ಲ್ ಆಡ್ ತಾಂಡ ಮಂಡೆಕ್ ತುಣಿ ಇಡತೆ ಪೋಚೇಂಗಿ, ಅವಡ ಮಂಡೆಯಾನ ವಡಿಯಂಗ್ ಮರ್ಯಾದೆ ಕೊಡ್‍ತಂಡಿಲ್ಲೆ; ಅದ್ ಅವಡ ಮಂಡೆನ ಬೋಳ್‍ಚಿಟ್ಟನೆಕೆ ಆಪ. 6 ಒರ್ ಪೊಣ್ಣಾಳ್ ತಾಂಡ ಮಂಡೆಕ್ ತುಣಿ ಇಡತೆ ಪೋಚೇಂಗಿ, ಅವ ಅವಡ ತೆಲ್‍ಮಿನ ಕತ್ತರಿಚಿಡಡ್. ಆಚೇಂಗಿ ತೆಲ್‍ಮಿನ ಕತ್ತರಿಚಿಡ್‍ವದ್ ಅಥವ ಬೋಳ್‍ಚಿಡ್‍ವದ್ ಅವಕ್ ಅವಮಾನ ಕೊಂಡ್ ಬಾತೇಂಗಿ, ಅವ ಮಂಡೆಕ್ ತುಣಿ ಇಡಡ್. 7 ಒರ್ ಆಣಾಳ್ ಮಂಡೆಕ್ ತುಣಿ ಇಡ್‌ವಕ್ಕಾಗ, ಎನ್ನಂಗೆಣ್ಣ್‌ಚೇಂಗಿ, ಅಂವೊ ದೇವಡ ರೂಪತ್‌ಲ್ ಪಿಂಞ ದೇವಡ ಮಹಿಮೇರ ಪ್ರತಿಮೆಲ್ ಉಂಡ್. ಆಚೇಂಗಿ ಪೊಣ್ಣಾಳ್ ಆಣಾಳ್‌ರ ಮಹಿಮೆಯಾಯಿತ್ ಉಂಡ್. 8 ಆಣಾಳ್, ಪೊಣ್ಣಾಳ್‍ಯಿಂಜ ಬಂದಂವೊನಲ್ಲ, ಆಚೇಂಗಿ ಪೊಣ್ಣಾಳ್ ಆಣಾಳ್‍ಯಿಂಜ ಬಂದವ. 9 ದೇವ ಆಣಾಳ್‍ನ, ಪೊಣ್ಣಾಳ್‍ಕಾಯಿತ್ ಸೃಷ್ಟಿ ಮಾಡಿತ್ತ್‌ಲ್ಲೆ ಆಚೇಂಗಿ ಪೊಣ್ಣಾಳ್‍ನ ಆಣಾಳ್‍ಕಾಯಿತ್ ಸೃಷ್ಟಿ ಮಾಡ್‍ಚಿ. 10 ಅದ್ಂಗಾಯಿತ್ ದೇವದೂತಂಗ ನೋಟಿಯಂಡುಳ್ಳಗುಂಡ್, ಪೊಣ್ಣಾಳ್‍ವ ಅಯಿಂಗಡ ಅದಿಕಾರಕ್ ಒಳಪಟ್ಟಿತುಂಡ್‍ೕಂದ್ ಕಾಟ್‌ವಕಾಯಿತ್ ಅಯಿಂಗಡ ಮಂಡೆಕ್ ತುಣಿ ಇಡಂಡು. 11 ಆಚೇಂಗಿಯು, ಒಡೆಯಂಡಲ್ಲಿ, ದೇವಡ ಮೇಲೆ ನಂಬಿಕೆ ಉಳ್ಳ ಜನಕ್, ಆಣಾಳ್‍ವಕ್‌ ಪೊಣ್ಣಾಳ್‍ವ ಪಿಂಞ ಪೊಣ್ಣಾಳ್‍ವಕ್‌ ಆಣಾಳ್ವ ಇಲ್ಲತೆ ಒಂದು ಮಾಡ್ವಕ್ ಕಯ್ಯುಲೆ . 12 ಆದ್ಯ ಪೊಣ್ಣಾಳ್ ಆಣಾಳ್‍ಯಿಂಜ ಬಂದನೆಕೆ, ಇಕ್ಕ ಆಣಾಳ್ವ ಪೊಣ್ಣಾಳ್‍ಯಿಂಜ ಬಂದಂಡುಂಡ್. ಇದೆಲ್ಲಾ ದೇವಡಯಿಂಜ ಬಂದಂಡುಂಡ್. 13 ಒರ್ ಪೊಣ್ಣಾಳ್ ದೇವಡ ಪಕ್ಕ ಪ್ರಾರ್ಥನೆ ಮಾಡ್‌ವಕ, ಮಂಡೆಕ್ ತುಣಿ ಇಡತೆ ಇಪ್ಪದ್ ಸರಿಯಾಂದ್ ನಿಂಗಳೇ ಗೇನ ಮಾಡಿ. 14 ಒರ್ ಆಣಾಳ್ ಅಂವೊಂಡ ತೆಲ್‍ಮಿನ ಉದ್ದವಾಯಿತ್ ಬೊಳ್‍ತ್‍ವದ್ ಅಂವೊಂಗ್ ಅವಮಾನವಾಯಿತುಂಡ್‍ೕಂದು, 15 ಒರ್ ಪೊಣ್ಣಾಳ್ ಅವಡ ತೆಲ್‍ಮಿನ ಉದ್ದವಾಯಿತ್ ಬೊಳ್‍ತ್‍ವದ್ ಅವಕ್ ಗೌರವವಾಯಿತು ಉಂಡ್‍ೕಂದು ಗೊತ್ತಾಯಂಡುಂಡಲ್ಲಾ? ಅವಡ ತಲ್‍ಮಿಯೇ ಅವಡ ಮಂಡೆನ ಪೊತ್ತ್‌ವ ತುಣಿರನೆಕೆ ದೇವ ಕೊಡ್‍ತಿತುಂಡಲ್ಲಾ! 16 ಆಚೇಂಗಿ, ಒಬ್ಬಂಗ್ ಈ ವಿಷಯತ್‍ಲ್ ತರ್ಕ ಮಾಡ್ವಕ್ ಮನಸ್ಸ್ ಇಂಜತೇಂಗಿ, ನಂಗಕ್ ಪಿಂಞ ದೇವಡ ಸಬೇಕ್, ಈ ತರ ಅಬ್ಯಾಸ ಇಲ್ಲೇಂದ್ ಅಯಿಂಗಕ್ ಗೊತ್ತಿರಡ್. ಒಡೆಯಂಡ ಗದ್ದಾಳತ್‍ರ ನೇಮ 17 ಆಚೇಂಗಿ ಇಕ್ಕ ನಾನ್ ಎಣ್ಣ್‌ವಕುಳ್ಳ ವಿಷಯತ್‍ಲ್, ನಾನ್ ನಿಂಗಳ ಕೊಂಡಾಡು‍ಲೆ. ಎನ್ನಂಗೆಣ್ಣ್‌ಚೇಂಗಿ ನಿಂಗ ಆರಾದನೆ ಮಾಡ್ವಕ್ ಒಕ್ಕಚೆ ಕೂಡಿ ಬಪ್ಪಕ, ಅದ್ ನಿಂಗಕ್ ನಲ್ಲದ್ ಮಾಡ್ವಕ್ ಬದ್‍ಲಾಯಿತ್ ಕೆಟ್ಟದ್ ಮಾಡಿಯಂಡುಂಡ್. 18 ಮುಕ್ಯವಾಯಿತ್, ದೇವಡ ಸಬೇಲ್ ನಿಂಗ ಕೂಡಿ ಬಪ್ಪಕ, ನಿಂಗಡಡೆಲ್ ಬೋರೆ ಬೋರೆ ಗುಂಪ್ ಉಂಡ್‍ೕಂದ್ ನಾಕ್ ಸುದ್ದಿ ಬಾತ್; ಅದ್‍ಲ್ ನಾನ್ ಚೆನ್ನ ವಿಷಯತ್‍ನ ನಂಬುವಿ. 19 ನಿಂಗಡಲ್ಲಿ ಬೋರೆ ಬೋರೆ ಅಬಿಪ್ರಾಯ ಬೋಂಡು, ಅನ್ನನೆ ಇಂಜತೇಂಗಿ ದಾರ್ ದೇವಡ ವಿಷಯತ್‍ಲ್ ನೇರಾನಯಿಂಗಾಂದ್ ಜನಕ್ ಗೊತ್ತಾಪ. 20 ನಿಂಗ ಒರ್ ಜಾಗತ್‍ಲ್ ಕೂಡಿ ಬಪ್ಪಕ, ನಿಂಗ ತಿಂಬದ್ ಒಡೆಯಂಡ ನೇರಾನ ಗದ್ದಾಳ ಅಲ್ಲ. 21 ಎನ್ನಂಗೆಣ್ಣ್‌ಚೇಂಗಿ, ನಿಂಗ ಉಂಬಕಾಪಕ, ನಿಂಗ ದಾರ್‌ಕು ಪಾರಕಾಕತೆ, ಅಯಿಂಗಯಿಂಗ ಅಯಿಂಗಯಿಂಗಡ ಆಹಾರತ್‍ನ ಉಂಬಿರ; ಒಬ್ಬಂಗ್ ಕೆಲ ಪಯಿಚಂಡಿಪ್ಪಕ, ಇಂಞೊಬ್ಬ ಕಳ್ಳ್ ಕುಡಿಚಿತಿಪ್ಪ. 22 ಉಂಬಕ್ ತಿಂಬಕ್ ನಿಂಗಕ್ ನಿಂಗಡ ಮನೆ ಇಲ್ಲೆಯಾ? ಇದ್ ದೇವಡ ಸಬೇನ ತ್‍ಕ್ಕಾರ ಮಾಡಿತ್, ಉಳ್ಳಯಿಂಗ ಇಲ್ಲತಯಿಂಗಳ ಞಾಣಪಡ್‍ತ್‍ವನೆಕೆ ಉಂಡ್. ನಾನ್ ನಿಂಗಡ ಪಕ್ಕ ಎಂತ ಎಣ್ಣಡ್? ಈ ವಿಷಯತ್‍ಲ್ ನಾನ್ ನಿಂಗಳ ಕೊಂಡಾಡುವಕಯ್ಯುವಾ? ನಾನ್ ಅದ್‍ನ ಮಾಡುಲೆ. ಒಡೆಯಂಡ ಗದ್ದಾಳ ( ಮತ್ತಾಯ 26.26–29 ; ಮಾರ್ಕ 14.22–25 ; ಲೂಕ 22.14–20 ) 23 ನಾನ್ ಒಪ್ಪ್‌ಚಿಟ್ಟ ಈ ಬೋದನೆನ, ದೇವಡಯಿಂಜ ನಾನ್ ಪಡ್ಂದಿಯೆ. ಅದ್ ಎಂತ ಎಣ್ಣ್‌ಚೇಂಗಿ, ಒಡೆಯನಾನ ಯೇಸುನ ವಿರೋದಿಯಂಗಡ ಕೈಯಿಕ್ ಪುಡ್‍ಚಿ ಕೊಡ್‍ಪಕ್ ಮಿಂಞ, ಆ ಬಯಿಟ್ ಒಟ್ಟಿನ ಎಡ್‌ಪಂಜಿ, 24 ದೇವಕ್ ವಂದನೆ ಮಾಡಿತ್, ಪೊಳ್‌ಚಿತ್, ಇದ್‍ನ ನಿಂಗ ಎಡ್‍ತಿತ್ ತಿಂದೊಳಿ, ಇದ್ ನಿಂಗಕಾಯಿತ್ ತಪ್ಪ ನಾಡ ತಡಿ; ನನ್ನ ಗೇನ ಮಾಡ್‌ವಕಾಯಿತ್ ಇದ್‍ನ ತಿಂಗಂಡೂಂದ್ ಎಣ್ಣ್‌ಚಿ. 25 ಪಿಂಞ ಅಂವೊ ಅನ್ನನೆ ದ್ರಾಕ್ಷಿರಸತ್‍ರ ಕಪ್ಪ್‌ನ ಎಡ್‍ತಂಡ್: ಇದ್ ನಿಂಗಕಾಯಿತ್ ಬೂಕ್‌ವ ನಾಡ ಚೋರೆನಗುಂಡ್ ಮಾಡ್‍ನ ದೇವಡ ಪುದಿಯ ಒಪ್ಪಂದಾಂದ್ ಎಣ್ಣಿತ್ ಅಯಿಂಗಕ್ ಕೊಡ್‍ತತ್. ನಿಂಗ ಇದ್‍ನ ಎಕ್ಕೆಲ್ಲಾ ಕುಡಿಪಿರ ಅಕ್ಕೆಲ್ಲಾ ನನ್ನ ಗೇನ ಮಾಡ್‌ವಕಾಯಿತ್ ಇದ್‍ನ ಮಾಡೀಂದ್ ಎಣ್ಣ್‌ಚಿ. 26 ಆನಗುಂಡ್, ಈ ಒಟ್ಟಿನ ತಿಂದಿತ್ ಈ ಪಾತ್ರತ್‍ಲ್ ಎಕ್ಕೆಲ್ಲಾ ಕುಡಿಪಿರ ಅಕ್ಕೆಲ್ಲಾ ಅಂವೊ ಪುನಃ ಬಪ್ಪಕತ್ತನೆ ಒಡೆಯಂಡ ಚಾವ್‍ನ ಜನಕ್ ಅರಿಚಿಟ್ಟಂಡುಳ್ಳಿರ. 27 ಇನ್ನನೆ ಇಪ್ಪಕ, ದಾರೇಂಗಿಯು, ಅಯೋಗ್ಯವಾಯಿತ್ ಈ ಒಡೆಯಂಡ ಒಟ್ಟಿನ ತಿಂದಿತ್, ಈ ಪಾತ್ರತ್‍ಲ್ ಕುಡ್‌ಚತೇಂಗಿ, ಅಂವೊ ಅಂವೊಂಡ ತಡೀನ ಪಿಂಞ ಚೋರೆನ ಅಶುದ್ದ ಮಾಡಿತ್ ಅಪರಾದ ಮಾಡ್‍ನಂವೊನಾಯಿತ್‍ಪ್ಪ. 28 ಆನಗುಂಡ್ ಈ ಒಟ್ಟಿನ ತಿಂಬಂವೊ, ಈ ಪಾತ್ರತ್‍ಲ್ ಕುಡಿಪಂವೊ, ಅದ್‍ನ ಮಾಡ್ವಕ್ ಮಿಂಞ ಅಂವೊ ಅಂವೊನ ಪರೀಕ್ಷೆ ಮಾಡಂಡು. 29 ಒಟ್ಟಿನ ಪಿಂಞ ದ್ರಾಕ್ಷಿರಸತ್‍ನ ಅಯೋಗ್ಯವಾಯಿತ್ ತಿಂದಿತ್ ಕುಡಿಪಂವೊ, ಒಡೆಯಂಡ ತಡಿ ಎಂತದ್‍ೕಂದ್ ಗೊತ್ತಿಲ್ಲತಗುಂಡ್, ಅಂವೊಂಗ್ ನ್ಯಾಯತೀರ್ಪ್ ಕ್‍ಟ್ಟುವನೆಕೆ ಮಾಡಿಯಂಡುಂಡ್. 30 ಅದ್ಂಗಾಯಿತ್ ನಿಂಗಡಲ್ಲಿ ದುಂಬ ಜನ ಬಲಹೀನವಾನಯಿಂಗಳು, ಕಾಯಿಲೆ ಉಳ್ಳಯಿಂಗಳು ಆಯಿತುಳ್ಳಿರ. ಚೆನ್ನ ಜನ ಚತ್ತ್ ಪೋಚಿ. 31 ಆನಗುಂಡ್ ನಂಗಳ, ನಂಗ ನೇರಾಯಿತು ಪರೀಕ್ಷೆ ಮಾಡ್‍ಚೇಂಗಿ ದೇವಡ ನ್ಯಾಯತೀರ್ಪ್‌ಕ್ ಒಳಪಡ್‌ಲೆ. 32 ಆಚೇಂಗಿಯು, ಒಡೆಯ ನಂಗಳ ನ್ಯಾಯತೀರ್ಪ್ ಮಾಡಿತ್ ಶಿಕ್ಷನೆ ತಪ್ಪಗುಂಡ್, ಈ ಲೋಕತ್‍ರ ಕೂಡೆ ನಂಗಳ ಅಂವೊ ಕಂಡನೆ ಮಾಡುಲೆ. 33 ಆನಗುಂಡ್ ನಾಡ ಅಣ್ಣತಮ್ಮಣಂಗಳೇ, ನಿಂಗ ಒಕ್ಕಚೆ ಕೂಡಿ ಬಂದಿತ್ ಕ್ರಿಸ್ತಂಡ ಚಾವ್‍ನ ಗೇನ ಮಾಡಿತ್ ಉಂಬಕ, ಒಬ್ಬೊಬ್ಬಂಗಾಯಿತ್ ಪಾರಕಾತಂಡ್ ಇರಂಡು. 34 ನಿಂಗ ಒಕ್ಕಚೆ ಕೂಡಿ ಬಪ್ಪದ್, ನಿಂಗಡ ನ್ಯಾಯತೀರ್ಪ್‌ಕ್ ಕಾರಣ ಆಪದ್ ಬೋಂಡ. ಒಬ್ಬಂಗ್ ಕೆಲ ಪಯಿಚತೇಂಗಿ ಅಂವೊ ಅಂವೊಂಡ ಮನೆಲ್ ಉಂಡಿತ್ ಬರಡ್. ಬೋರೆ ವಿಷಯತ್‍ನ ನಾನ್ ನಿಂಗಡ ಪಕ್ಕ ಬಪ್ಪಕ ಸರಿ ಮಾಡ್‌ವಿ. |
© 2017, New Life Literature (NLL)