1 ಕೊರಿಂಥ 10 - ಕೊಡವ ಬೈಬಲ್ವಿಗ್ರಹ ಆರಾದನೆ ಮಾಡ್‌ವಕ್ಕಾಗ 1 ನಾಡ ಅಣ್ಣತಮ್ಮಣಂಗಳೇ, ನಿಂಗಕ್ ಈ ವಿಷಯ ಗೊತ್ತಿರಂಡು. ಅದ್ ಎಂತ ಎಣ್ಣ್‌ಚೇಂಗಿ, ನಂಗಡ ಯೆಹೂದ್ಯ ಮುತ್ತಜ್ಜಂಗ ಐಗುಪ್ತ ದೇಶತ್‍ನ ಬುಟ್ಟಿತ್ ಕಾನಾನ್ ದೇಶಕ್ ಬಚಾವ್ ಆಯಿತ್ ಪೊರಟಿತ್ ಬಪ್ಪಕ, ಅಯಿಂಗ ಎಲ್ಲಾರು ಮೋಡತ್‍ರ ಅಡಿಲ್, ಪಿಂಞ ಚೋಂದ ಸಮುದ್ರತ್‍ರ ಮದ್ಯತ್‍ಲ್ ನಡ್ಂದಂಡ್ ಬಾತ್. 2 ಅಯಿಂಗ ಎಲ್ಲಾರು ಮೋಶೇರ ಶಿಷ್ಯಂಗಳಾಯಿತ್ ಮೋಡತ್‍ರಗುಂಡ್ ಪಿಂಞ ಸಮುದ್ರತ್‌ರಗುಂಡ್ ದೀಕ್ಷಾಸ್ನಾನ ಮಾಡ್‍ನನೆಕೆ ಆಚಿ. 3 ಅಯಿಂಗೆಲ್ಲಾರು, ಒರೇ ಆತ್ಮೀಯ ಆಹಾರತ್‍ನ ತಿಂದತ್. 4 ಪಿಂಞ ಅಯಿಂಗೆಲ್ಲಾರು ಒರೇ ಆತ್ಮೀಯ ನೀರ್‌ನ ಕುಡಿಚತ್. ಎನ್ನನೆ ಎಣ್ಣ್‌ಚೇಂಗಿ ಬಂಡೆ ಕಲ್ಲಿಂಜ ನೀರ್ ಬಪ್ಪಕ್ ಮಾಡ್‍ಚಿ. ಆ ಬಂಡೆ ಕಲ್ಲ್, ಅಯಿಂಗಡ ಕೂಡೆ ಪೋಯಂಡಿಂಜ ಕ್ರಿಸ್ತನೇ. 5 ಆಚೇಂಗಿಯು, ದುಂಬ ಜನಡ ವಿಷಯತ್ ದೇವಕ್ ಕುಶಿ ಇಲ್ಲತೆ ಆಚಿ. ಅಯಿಂಗಡ ಚಾವ್ ತಡಿ ಮಣಬೂಮಿಲ್ ಚಿಲ್ಲಾಪಿಲ್ಲಿ ಆಪನೆಕೆ ಮಾಡ್‍ಚಿ. 6 ಅಯಿಂಗ ಮಾಡ್‍ನನೆಕೆ ನಂಗಳು ಸಹ ಕೆಟ್ಟ ಕೆಲಸ ಮಾಡ್‌ವಕ್ ಕುಶಿಪಡತನೆಕೆ, ಇದೆಲ್ಲಾ ಒರ್ ಎಚ್ಚರವಾಯಿತ್ ನಂಗಕ್ ಉಂಡ್. 7 ಜನ ತಿಂಬಕ್, ಕುಡಿಪಕ್ ಅಳ್‌ತತ್; ಆಡ್‍ವಕ್ ಎದ್ದತ್‍ೕಂದ್ ದೇವಡ ವಾಕ್ಯತ್‍ಲ್ ಒಳ್‍ದಿತುಳ್ಳನೆಕೆ, ಅಯಿಂಗಡಡೆಲ್ ಚೆನ್ನ ಜನ ವಿಗ್ರಹ ಆರಾದನೆ ಮಾಡಿಯಂಡ್ ಇಂಜನೆಕೆ, ನಿಂಗಳು ಅನ್ನನೆ ವಿಗ್ರಹ ಆರಾದನೆ ಮಾಡತನೆಕೆ ಇರಿ. 8 ಅಯಿಂಗಡಲ್ಲಿ ಚೆನ್ನ ಜನ ಲೈಂಗಿಕ ಪಾಪ ಮಾಡ್‍ಚಿ. ಅನ್ನನೆ ಕೆಟ್ಟ ಕೆಲಸ ಮಾಡಿತ್ ಒರ್ ದಿವಸತ್‍ಲ್ ಇರ್‌ವತ್‍ಮೂಂದ್ ಆಯಿರ ಜನ ಚತ್ತಿತ್ ಬುದ್ದತ್. ಅನ್ನನೆ ನಿಂಗಳು ಲೈಂಗಿಕ ಪಾಪತ್‍ನ ಮಾಡತನೆಕೆ ಇರಿ. 9 ಅಯಿಂಗಡಲ್ಲಿ ಚೆನ್ನ ಜನ ಕ್ರಿಸ್ತನ ಪರೀಕ್ಷೆ ಮಾಡ್‍ಚಿ. ಅಯಿಂಗ ಪಾಂಬ್ ಕಡಿಚಿತ್ ಚತ್ತ್ ಪೋಚಿ. ಅನ್ನನೆ ನಂಗಳು ಕ್ರಿಸ್ತನ ಪರೀಕ್ಷೆ ಮಾಡತೆ ಇಕ್ಕನ. 10 ಅಯಿಂಗಡಲ್ಲಿ ಚೆನ್ನ ಜನ ಗೊಣಗ್‍ಚಿ, ಅಕ್ಕ ನಾಶ ಮಾಡ್‌ವಂವೊನಗುಂಡ್ ಅಯಿಂಗ ಚತ್ತ್ ಪೋಚಿ; ಅನ್ನನೆ ನಂಗಳು ಮಾಡತೆ ಇಕ್ಕನ. 11 ನಂಗಡ ಯೆಹೂದ್ಯ ಮುತ್ತಜ್ಜಂಗಕ್ ಆನದ್ ನಂಗಕ್ ಒರ್ ಉದಾರಣೆಯಾಯಿತ್ ಉಂಡ್; ಲೋಕತ್‍ರ ಆಕೀರ್ ಕಾಲತ್‍ಲ್ ಬದ್‍ಕ್‍ವ ನಂಗಕ್ ಇದ್ ಎಚ್ಚರವಾಯಿತ್ ಇಪ್ಪಕ್ ಇದ್‍ನೆಲ್ಲಾ ಒಳ್‍ದಿ ಬೆಚ್ಚಿತುಂಡ್. 12 ಆನಗುಂಡ್ ಒಬ್ಬ, ನಾನ್ ದೇವ ಎಣ್ಣ್‌ವನೆಕೆ ಮಾಡಿಯಂಡುಂಡ್, ದೇವಡ ಮೇಲೆ ಉಳ್ಳ ನಂಬಿಕೇಲ್ ನಾನ್ ದೃಡವಾಯಿತ್ ನಿಂದಂಡುಂಡ್‍ೕಂದ್ ಗೇನ ಮಾಡ್‍ಚೇಂಗಿ, ಅಂವೊ ಅಡಿಕ್ ಬೂವತನೆಕೆ ಎಚ್ಚರತ್‍ಲ್ ಇರಡ್. 13 ಎಲ್ಲಾ ಮನುಷ್ಯಂಗಕ್ ಬಪ್ಪ ಸೋದನೆನ ಬುಟ್ಟಿತ್ ಬೋರೆ ಏದ್ ಸೋದನೆಯು ನಿಂಗಕ್ ಬಂದಿತ್ತ್‌ಲ್ಲೆ. ದೇವ ನಂಬಿಕಸ್ತನಾಯಿತುಂಡ್. ನಿಂಗಡ ಶಕ್ತಿಕ್ ಮೀರ್‍ನ ಸೋದನೆಕ್ ನಿಂಗ ಒಳಪಡ್‍ವಕ್ ಅಂವೊ ಬುಡುಲೆ. ಆಚೇಂಗಿ, ಆ ಸೋದನೆಯಿಂಜ ತಪ್ಪ್‌ಚಿಡ್‌ವಕ್ ಬಟ್ಟೆ ಕಾಟಿತಪ್ಪ. 14 ಆನಗುಂಡ್ ನಾಡ ಪ್ರೀತಿರ ಜನಳೇ, ವಿಗ್ರಹ ಆರಾದನೆ ಮಾಡ್‌ವದ್‍ನ ಬುಟ್ಟಿತ್ ಓಡಂಡು. 15 ನಿಂಗ ಬುದ್ದಿವಂತಯಿಂಗಾಂದ್ ನಾನ್ ಗೇನ ಮಾಡಿತ್ ನಿಂಗಡ ಕೂಡೆ ಎಣ್ಣಿಯಂಡುಂಡ್; ಆನಗುಂಡ್ ನಾನ್ ಎಂತ ಎಣ್ಣಿಯಂಡುಂಡ್‍ೕಂದ್ ನಿಂಗಳೇ ತೀರ್ಪ್ ಮಾಡಿ. 16 ನಂಗ ಆರಾದನೆ ಮಾಡ್‌ವಕ್ ಒಕ್ಕಚೆ ಕೂಡಿ ಬಪ್ಪಕ, ಕ್ರಿಸ್ತ ನಂಗಕಾಯಿತ್ ಚತ್ತ್ ಪೋನದ್‍ನ ಗೇನ ಮಾಡ್‌ವಕಾಯಿತ್, ನಂಗ ದೇವಕ್ ವಂದನೆ ಮಾಡಿತ್ ಕುಡಿಪ ದ್ರಾಕ್ಷಿರಸ, ನಂಗ ಆ ಚೋರೆರ ಪಾಲ್‍ದಾರಂಗಾಂದ್ ಕಾಟಿತಪ್ಪ ಅಲ್ಲಾ? ನಂಗ ತಿಂಬ ಒಟ್ಟಿ ಕ್ರಿಸ್ತಂಡ ತಡೀರ ಪಾಲ್‍ದಾರಂಗಾಂದ್ ಕಾಟಿತಪ್ಪ ಅಲ್ಲಾ? 17 ನಂಗ ಎಲ್ಲಾರು ಒರೇ ಒಟ್ಟಿನ ಪಾಲ್ ಮಾಡಿತ್ ತಿಂಬಗುಂಡ್, ದುಂಬ ಜನಳಾಯಿತ್ ಉಳ್ಳ ನಂಗ, ಒರೇ ತಡೀರ ಬಾಗವಾಯಿತ್ ಉಂಡ್. 18 ಇಸ್ರಾಯೇಲ್ ಜನಳ ಗೇನ ಮಾಡಿ, ಬಲಿ ಕೊಡ್‍ಪ ಯರ್ಚಿನ ಅಯಿಂಗ ತಿಂಬಗುಂಡ್, ಅಯಿಂಗಳು ಆ ಬಲಿಪೀಠತ್‍ರ ಕೂಡೆ ಪಾಲದಾರಂಗಾಳಾಯಿತ್ಂಜತಲ್ಲ? 19 ಅಕ್ಕ, ನಾನ್ ನಿಂಗಕ್ ಎಂತ ಎಣ್ಣಿಯಂಡುಂಡ್? ವಿಗ್ರಹಕ್ ಅರ್ಪಿಚಿಟ್ಟ ಆಹಾರ ಮುಕ್ಯವಾಯಿತುಂಡ್ಂದಾ? ಅಥವ ವಿಗ್ರಹ ಮುಕ್ಯವಾಂದಾ? ಇಲ್ಲೆ, ನಾನ್ ಅನ್ನನೆ ಎಣ್ಣಿಯಂಡಿಲ್ಲೆ. 20 ದೇವನ ಗೊತ್ತ್‌ಲ್ಲತಯಿಂಗ ಬಲಿ ಅರ್ಪಿಚಿಡ್‌ವಕ, ದೇವಕ್ ಅಲ್ಲ, ಆಚೇಂಗಿ ಕೂಳಿಯಂಗಕೇ ಅರ್ಪಿಚಿಟ್ಟಂಡುಂಡ್‍ೕಂದ್ ಎಣ್ಣ್‌ವಿ; ಕೂಳಿಯಡ ಕೂಡೆ, ನಿಂಗ ಐಕ್ಯತ್‍ಲ್ ಇಪ್ಪದ್ ನಾಕ್ ಕುಶಿ ಇಲ್ಲೆ. 21 ನಿಂಗ, ಕ್ರಿಸ್ತಂಡ ಚೋರೆನ ಗೇನ ಮಾಡಿತ್ ಕುಡಿಪ ಪಾತ್ರತ್‌ಲು, ಜನ ಕೂಳಿಯಂಗಕ್ ಕೊಡ್‍ಪ ಪಾತ್ರತ್‌ಲು ಕುಡಿಪಕ್ಕಾಗಾಲ್ಲಾ? ನಿಂಗ ಕ್ರಿಸ್ತಂಡ ತಡೀನ ಗೇನ ಮಾಡಿತ್ ತಿಂಬ ಗದ್ದಾಳತ್‌ಲು, ಕೂಳಿಯಂಗಕ್ ಕೊಡ್‍ಪ ಗದ್ದಾಳತ್‌ಲು ತಿಂಬಕ್ಕಾಗಲ್ಲಾ? 22 ನಂಗ ಇನ್ನನೆ ಮಾಡ್‌ವಕ, ದೇವಕ್ ನಂಗಡ ಮೇಲೆ ಚೆಡಿ ಆಪನೆಕೆ ಮಾಡಿಯಂಡುಂಡಲ್ಲಾ? ಅಂವೊಗಿಂಜ ನಂಗ ದುಂಬ ಬಲಶಾಲಿಯಾ? ದೇವಡ ಮಹಿಮೆಕಾಯಿತ್ ಮಾಡ್‍ವದ್ 23 ಎಂತ ಬೋಂಡ್‍ಚೇಂಗಿಯು ಮಾಡ್‌ವಕ್ ನಂಗಕ್ ಹಕ್ಕ್ ಉಂಡ್, ಆಚೇಂಗಿ ನಂಗ ಮಾಡ್‌ವದೆಲ್ಲ ನಂಗಕ್ ಸಹಾಯ ಆಪುಲೆ. ಎಂತ ಬೋಂಡ್‍ಚೇಂಗಿಯು ಮಾಡ್‌ವಕ್ ನಂಗಕ್ ಹಕ್ಕ್ ಉಂಡ್, ಆಚೇಂಗಿ ನಂಗ ಮಾಡ್‌ವದೆಲ್ಲ, ಬೋರೆಯಿಂಗ ದೇವಡಲ್ಲಿ ಬೊಳಿಯುವಕ್ ಸಹಾಯ ಮಾಡುಲೆ. 24 ನಿಂಗ ದಾರೂ, ನಿಂಗಡ ಸ್ವಂತ ಪ್ರಯೋಜನಕಾಯಿತ್ ಮಾತ್ರ ಮಾಡತೆ, ಬೋರೆಯಿಂಗ ದೇವಡ ಮೇಲೆ ಉಳ್ಳ ನಂಬಿಕೇಲ್ ಬೊಳಿಯುವಕಾಯಿತ್ ಮಾಡಂಡು. 25 ಯರ್ಚಿ ಅಂಗಡಿಲ್ ಮಾರ್‌ವ ಎಂತ ಬೋಂಡ್‍ಚೇಂಗಿಯು ನಿಂಗ ತಿಂಬಕಾಯಿತ್ ಎಡ್‍ಪಕ್ ಕಯ್ಯು; ಅದ್ಂಡ ವಿಷಯತ್ ನಿಂಗಡ ಮನಸಾಕ್ಷಿರಗುಂಡ್ ಒಂದು ಕ್‍ೕಪಕ್ ಪೋಕತಿ. 26 ಈ ಲೋಕ ಪಿಂಞ ಅದ್‍ಲ್ ಉಳ್ಳ ಎಲ್ಲವೂ ಒಡೆಯಂಡದಾಯಿತ್ ಉಂಡ್. 27 ಕ್ರಿಸ್ತಂಡ ಮೇಲೆ ನಂಬಿಕೆ ಬೆಕ್ಕತಂವೊ ಒಬ್ಬ ನಿಂಗಳ ಉಂಬಕ್ ಕಾಕ್‍ಚೇಂಗಿ, ನಿಂಗಕ್ ಪೋಪಕ್ ಮನಸುಂಡೇಂಗಿ ಪೋಯಿ, ಅಲ್ಲಿ ಅಂವೊ ನಿಂಗಕ್ ಉಂಬಕ್ ತಪ್ಪದ್‍ನ ಉಂಗಲು. ವಿಗ್ರಹಕ್ ಅರ್ಪಿಚಿಟ್ಟದ್‍ನ ತಿಂಬದ್ ತಪ್ಪ್‍ೕಂದ್ ನಿಂಗ ಗೇನ ಮಾಡ್‌ವಗುಂಡ್, ಆ ಆಹಾರತ್‍ನ ವಿಗ್ರಹಕ್ ಅಯಿಂಗ ಅರ್ಪಿಚಿಟ್ಟಿತುಂಡಾಂದ್ ಒರ್ ಪ್ರಶ್ನೆಯು ಕೇಕತಿ. 28 ಆಚೇಂಗಿ ಒಬ್ಬ, ಈ ಆಹಾರ ವಿಗ್ರಹಕ್ ಅರ್ಪಿಚಿಟ್ಟದ್‍ೕಂದ್ ಎಣ್ಣ್‌ಚೇಂಗಿ, ಅಂವೊಂಡ ನಂಬಿಕೇನ ಪಾಳಾಕತನೆಕೆ ಪಿಂಞ ಆ ಯರ್ಚಿನ ತಿಂಬದ್ ತಪ್ಪ್‍ೕಂದ್ ಗೇನ ಮಾಡಿಯಂಡುಳ್ಳ ಜನಕಾಯಿತ್ ಅದ್‍ನ ತಿಂಗತಿ. 29 ನಿಂಗಡ ಮನಸಾಕ್ಷಿಲ್ ನಿಂಗಕ್ ಅಪನಂಬಿಕೆ ಉಂಡ್‍ೕಂದ್ ನಾನ್ ಇನ್ನನೆ ಎಣ್ಣಿತ್‌ಲ್ಲೆ, ಆಚೇಂಗಿ ನಿಂಗಕ್ ಅನ್ನನೆ ಎಣ್ಣ್‌ನಂವೊಂಡ ಮನಸಾಕ್ಷಿರಗುಂಡ್ ನಾನ್ ಇನ್ನನೆ ಎಣ್ಣಿಯೆ. ನಾಕ್ ಎಂತ ಬೋಂಡ್‍ಚೇಂಗಿಯು ಮಾಡ್‌ವಕ್ ದೇವ ನನ್ನ ಬಚಾವ್ ಮಾಡಿತ್‌ಪ್ಪಕ, ನಾನ್ ಮಾಡ್‌ವ ವಿಷಯತ್‍ನ, ಬೋರೆ ಒಬ್ಬ, ಅದ್ ತಪ್ಪ್‍ೕಂದ್ ಗೇನಮಾಡ್‍ಚೇಂಗಿಯು, ನಾನ್ ಮಾಡ್‍ವದ್ ತಪ್ಪಿಲ್ಲೇಂದ್ ನಾಕ್ ಗೊತ್ತುಂಡ್. 30 ನಾನ್ ತಿಂಬಕ್ ಮಿಂಞ ಅದ್ಂಗಾಯಿತ್ ದೇವಕ್ ವಂದನೆ ಎಣ್ಣಿತ್ ತಿಂಬಗುಂಡ್, ನಾನ್ ದೇವಕ್ ವಂದನೆ ಮಾಡಿತ್ ತಿಂಬ ಆಹಾರತ್‍ರ ವಿಷಯತ್‍ಲ್ ದಾರೂ ನನ್ನ ಕುತ್ತ ಪರಿಯುವಕ್ ಕಯ್ಯುಲೆ, 31 ಆನಗುಂಡ್ ನಿಂಗ ತಿಂಬದಾಚೇಂಗಿಯು, ಕುಡಿಪದಾಚೇಂಗಿಯು, ಎಂತ ಮಾಡ್‌ವದಾಚೇಂಗಿಯು, ನಿಂಗ ಮಾಡ್‌ವ ಕಾರ್ಯ ದೇವಡ ಮಹಿಮೆಕಾಯಿತ್ ಮಾಡಂಡು. 32 ನಾನ್ ನಾಕ್ ಪ್ರಯೋಜನ ಉಳ್ಳದ್‍ನ ಮಾಡತೆ, ಎಲ್ಲಾಡ ಪ್ರಯೋಜನತ್‍ನ ತ್‍ೕಡಿತ್, ಎನ್ನನೆ ಆಚೇಂಗಿಯು ದುಂಬ ಜನತ್‍ನ ಕುಶಿಪಡುತ್‌ವಕಾಯಿತ್ ನಾನ್ ಮಾಡ್‌ವನೆಕೆ, 33 ನಿಂಗಳು ಯೆಹೂದ್ಯಂಗಕು, ಯೆಹೂದ್ಯರಲ್ಲತಯಿಂಗಕು ಪಿಂಞ ದೇವಡ ಸಬೇಲ್ ಉಳ್ಳಯಿಂಗ ಎಲ್ಲಾರು ರಕ್ಷಣೆ ಆಪಕ್ ತಡೆ ಮಾಡತಯಿಂಗಳಾಯಿತ್ ಇರಿ. |
© 2017, New Life Literature (NLL)