1 ಕೊರಿಂಥ 1 - ಕೊಡವ ಬೈಬಲ್1 ಕ್ರಿಸ್ತ ಯೇಸುರ ಅಪೊಸ್ತಲನಾಯಿತ್, ದೇವ ಅಂವೊಂಡ ಚಿತ್ತತ್‍ರನೆಕೆ ಕಾಕ್‍ನ ಪೌಲನಾನ ನಾನ್ ಪಿಂಞ ತಮ್ಮಣನಾನ ಸೊಸ್ಥೆನನೂ ಕೂಡಿತ್, 2 ಕೊರಿಂಥ ಪಟ್ಟಣತ್‍ಲ್ ಉಳ್ಳ ಸಬೇಲ್ ಯೇಸು ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್ ಮಿಂಞಲೇ ದೇವಡ ಮಕ್ಕಳಾಯಿತ್ ಆನಯಿಂಗಕ್ ಪಿಂಞ ಅಯಿಂಗಕು ನಂಗಕು ಒಡೆಯನಾನ ಯೇಸು ಕ್ರಿಸ್ತಂಡ ಪೆದತ್‍ಲ್, ಎಲ್ಲಾ ಜಾಗತ್‍ಲ್ ಆರಾದನೆ ಮಾಡ್‌ವ ಜನತ್‍ರಕೂಡೆ, ಪವಿತ್ರವಾಯಿತ್ ಇಪ್ಪಕ್ ಕಾಕ್‍ಚಿಟ್ಟ ನಿಂಗಕ್, ಒಳ್‍ದ್‍ವ ಕಾಗದ ಇದ್. 3 ನಂಗಡ ಅಪ್ಪನಾನ ದೇವಡ ಪಿಂಞ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆಯು ಸಮಾದಾನವು ನಿಂಗಕ್ ಕ್‍ಟ್ಟಡ್. ಯೇಸು ಕ್ರಿಸ್ತಂಡ ಆಶೀರ್ವಾದ 4 ಕ್ರಿಸ್ತ ಯೇಸುರ ಮೂಲಕ ನಿಂಗಕ್ ಕ್‍ಟ್ಟ್‌ನ ದೇವಡ ಕೃಪೆಕಾಯಿತ್, ನಾನ್ ನಿಂಗಡ ವಿಷಯತ್‍ಲ್ ಎಕ್ಕಾಲು ದೇವನ ತುದಿಚಂಡುಂಡ್. 5 ಎನ್ನಂಗೆಣ್ಣ್‌ಚೇಂಗಿ, ಕ್ರಿಸ್ತಂಡ ಕೂಡೆ ಐಕ್ಯ ಉಳ್ಳಯಿಂಗಳಾಯಿತ್ ನಿಂಗ ಬದ್‍ಕಿಯಂಡುಳ್ಳಗುಂಡ್, ನಿಂಗಡ ಎಲ್ಲಾ ಆತ್ಮೀಯ ತಕ್ಕ್‌ಲು, ಎಲ್ಲಾ ಜ್ಞಾನತ್‍ಲು ಪಿಂಞ ಬೋರೆ ಎಲ್ಲಾ ವಿಷಯತ್‍ಲು ಆಶೀರ್ವಾದ ಪಡ್ಂದಯಿಂಗಳಾಯಿತ್ ಉಳ್ಳಿರ. 6 ಅನ್ನನೆ ನಂಗ ಎಣ್ಣ್‌ನ ಕ್ರಿಸ್ತಂಡ ಸಾಕ್ಷಿ ನಿಂಗಡೊಳ್‌ಲ್ ಸ್ತಿರವಾಯಿತ್ ಉಂಡ್. 7 ಆನಗುಂಡ್ ನಿಂಗ ದೇವಡ ಏದ್ ವರತ್‍ಲೂ ಕಮ್ಮಿಯಿಲ್ಲತಯಿಂಗಳಾಯಿತ್, ನಂಗಡ ಒಡೆಯನಾನ ಯೇಸು ಕ್ರಿಸ್ತ ಪುನಃ ಬಪ್ಪಕಾಯಿತ್ ಪಾರಕಾತಂಡುಳ್ಳಿರ. 8 ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ದಿವಸತ್‍ಲ್ ನಿಂಗ ಒರ್ ತಪ್ಪು ಇಲ್ಲತಯಿಂಗಳಾಯಿತ್ ನಿಪ್ಪಕ್ ಕಡೇಕತ್ತನೆ ಅಂವೊ ನಿಂಗಳ ಸ್ತಿರಪಡ್‍ತ್‌ವ. 9 ನಂಗಡ ಒಡೆಯನಾಯಿತುಳ್ಳ ದೇವಡ ಮೋಂವೊನಾನ ಯೇಸು ಕ್ರಿಸ್ತಂಡ ಕೂಡೆ ಐಕ್ಯತ್‍ಲ್ ಇಪ್ಪಕ್ ನಿಂಗಳ ಕಾಕ್‍ನ ದೇವ ಸತ್ಯವುಳ್ಳಂವೊನಾಯಿತುಂಡ್. ಕ್ರಿಸ್ತಂಡ ಜನ ಐಕ್ಯತ್‍ಲ್ ಇರಂಡು 10 ನಾಡ ಅಣ್ಣತಮ್ಮಣಂಗಳೇ, ನಿಂಗ ಎಲ್ಲಾಡ ಕೂಡೆ ಸಮಾದಾನತ್‍ಲ್ ಇರೀಂದ್ ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಪೆದತ್‍ಲ್ ನಾನ್ ನಿಂಗಳ ಬೋಡ್‍ವಿ. ಸಬೇಲ್ ನಿಂಗಡಡೆಲ್ ಏದ್ ವಿಂಗಡವೂ ಇಲ್ಲತೆ ನಿಂಗಡ ಗೇನತ್‍ಲ್ ಪಿಂಞ ಉದ್ದೇಶತ್‍ಲ್ ಒರೇ ಮನಸ್ಸ್‌ಲ್ ಇರಂಡು. 11 ಎನ್ನಂಗೆಣ್ಣ್‌ಚೇಂಗಿ ನಾಡ ಅಣ್ಣತಮ್ಮಣಂಗಳೇ, ನಿಂಗಡ ಮದ್ಯತ್‌ಲ್‌ ಜಗಳ ಉಂಡ್‍ೕಂದ್ ಖ್ಲೋಯೆ ಎಣ್ಣ್‌ವವಡ ಮನೆಕಾರ ನಾಕ್ ಎಣ್ಣ್‌ಚಿ. 12 ನಿಂಗಡಡೆಲ್ ಚೆನ್ನ ಜನ: ನಾನ್ ಪೌಲಂಡ ಕೂಟ್‍ಕ್ ಕೂಡ್‍ನಂವೋಂದೂ, ಚೆನ್ನ ಜನ ಅಪೊಲ್ಲೋಸಂಡ ಕೂಟ್‍ಕ್ ಕೂಡ್‍ನಂವೋಂದೂ, ಚೆನ್ನ ಜನ ಕೇಫಂಡ ಕೂಟ್‍ಕ್ ಕೂಡ್‍ನಂವೋಂದೂ ಇಂಞು ಚೆನ್ನ ಜನ ಕ್ರಿಸ್ತಂಗ್ ಕೂಡ್‍ನಂವೋಂದೂ ಎಣ್ಣಿಯಂಡುಂಡ್. 13 ಅಕ್ಕ ನಾನ್ ನಿಂಗಳ ಇನ್ನನೆ ಕ್‍ೕಪಿ, ಕ್ರಿಸ್ತ ಬೋರೆ ಬೋರೆ ಆಯಿತುಂಡಾ? ಅಥವ ಜನ, ಪೌಲನ ನಿಂಗಕಾಯಿತ್ ಶಿಲುಬೇಲ್ ಇಟ್ಟ್‌ಚಾ? ಅಥವ ಪೌಲಂಡ ಪೆದತ್‍ಲ್ ನಿಂಗಕ್ ದೀಕ್ಷಾಸ್ನಾನ ಕ್‍ಟ್ಟ್‌ಚಾ? 14 ನಿಂಗಡಡೆಲ್ ಕ್ರಿಸ್ಪ ಪಿಂಞ ಗಾಯನ ಎಣ್ಣ್‌ವಯಿಂಗಳ ಬುಟ್ಟಿತ್ ಬೋರೆ ದಾರ್‌ಕು ನಾನ್ ದೀಕ್ಷಾಸ್ನಾನ ಕೊಡ್‍ತಿತ್‌ಲ್ಲಾನಗುಂಡ್ ನಾನ್ ದೇವಕ್ ವಂದನೆ ಎಣ್ಣ್‌ವಿ. 15 ಆನಗುಂಡ್, ನಾಡ ಪೆದತ್‍ಲ್ ದೀಕ್ಷಾಸ್ನಾನ ಕ್‍ಟ್ಟ್‌ಚೀಂದ್ ದಾರೂ ಎಣ್ಣ್‌ವಕ್ ಕಯ್ಯುಲೆ. 16 ಇದ್‍ಲ್ಲತೆ ಸ್ತೆಫನಂಡ ಮನೆಕಾರಂಗಕ್ ನಾನ್ ದೀಕ್ಷಾಸ್ನಾನ ಕೊಡ್‌ತಿತುಂಡ್. ಈಂಗಳ ಬುಟ್ಟಿತ್ ಬೋರೆ ದಾರ್‌ಕು ದೀಕ್ಷಾಸ್ನಾನ ಕೊಡ್‍ತನೆಕೆ ನಾಕ್ ಗೇನ ಇಲ್ಲೆ. 17 ದೀಕ್ಷಾನ್ನಾನ ಕೊಡ್‍ಪಕಾಯಿತ್ ಕ್ರಿಸ್ತ ನನ್ನ ಅಯಿಚಿತ್ತ್‌ಲ್ಲೆ; ಆಚೇಂಗಿ, ಅಂವೊಂಡ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವಕಾಯಿತ್ ಮಾತ್ರ ನನ್ನ ಅಯಿಚತ್; ಎನ್ನನೆ ಎಣ್ಣ್‌ಚೇಂಗಿ, ಕ್ರಿಸ್ತ ಶಿಲುಬೇಲ್ ಚತ್ತದ್, ಅರ್ಥ ಇಲ್ಲತೆ ಆಕತನೆಕೆ ಇಪ್ಪಕ್ ಪಿಂಞ ಮನುಷ್ಯಂಡ ಸಾಮರ್ತ್ಯ ಬುದ್ದಿಲ್ ಬೋದನೆ ಮಾಡತೆ ಇಪ್ಪಕಾಯಿತ್ ನನ್ನ ಅಯಿಚತ್. ದೇವಡ ಜ್ಞಾನ 18 ಯೇಸು ಶಿಲುಬೇಲ್ ಚತ್ತತ್‍ೕಂದ್ ಎಣ್ಣುವ ಸುದ್ದಿ, ನಾಶವಾಯಿತ್ ಪೋಯಂಡುಳ್ಳ ಜನಕ್ ಪುಚ್ಚಿ ತಕ್ಕ್‌ರನೆಕೆ ಉಂಡ್, ಆಚೇಂಗಿ ರಕ್ಷಣೆ ಕ್‍ಟ್ಟಿತುಳ್ಳ ನಂಗಕ್ ಆ ಸುದ್ದಿ ದೇವಡ ಶಕ್ತಿಯಾಯಿತುಂಡ್. 19 ದೇವಡ ವಾಕ್ಯತ್‍ಲ್ ಒಳ್‍ದಿತುಳ್ಳನೆಕೆ, ಜ್ಞಾನಿಯರ ಜ್ಞಾನತ್‍ನ ನಾನ್ ಪಾಳ್ ಮಾಡಿತ್, ಬುದ್ದಿವಂತಯಿಂಗಂಡ ಬುದ್ದಿನ ನಾನ್ ಇಲ್ಲತನೆಕೆ ಮಾಡಿಯಂಡುಂಡ್. 20 ಜ್ಞಾನಿ ಎಲ್ಲಿ? ನ್ಯಾಯಪ್ರಮಾಣತ್‍ರ ಉಪಾದ್ಯ ಎಲ್ಲಿ? ಶಾಸ್ತ್ರಿ ಎಲ್ಲಿ? ಈ ಲೋಕತ್‍ಲ್ ನಲ್ಲ ತರ್ಕ ಮಾಡ್‌ವಯಿಂಗ ಎಲ್ಲಿ? ಈ ಲೋಕತ್‍ರ ಜ್ಞಾನತ್‍ನ ದೇವ ಪುಚ್ಚಿತನವಾಯಿತ್ ಮಾಡಿತುಂಡಲ್ಲ. 21 ಎನ್ನನೆ ಎಣ್ಣ್‌ಚೇಂಗಿ, ಮನುಷ್ಯಂಡ ಬುದ್ದಿಲ್ ಈ ಲೋಕ ಅಂವೊನ ಗೊತ್ತ್ ಮಾಡಿತ್‌ಲ್ಲೇಂದ್, ದೇವಕ್ ಅಂವೊಂಡ ಜ್ಞಾನತ್‍ಲ್ ಗೊತ್ತುಂಡ್. ಅನ್ನನೆ ನಂಗ ಎಣ್ಣುವ ಈ ತಕ್ಕ್‌ನ ಲೋಕತ್‍ರ ಜನ ಜ್ಞಾನ ಇಲ್ಲತ ಬೋದನೇಂದ್ ಎಣ್ಣುವ. ಆಚೇಂಗಿ ಅದ್‍ನ ನಂಬುವ ಜನತ್‍ನ ರಕ್ಷಣೆ ಮಾಡ್‌ವಕ್, ದೇವಕ್ ಕುಶಿಯಾಚಿ. 22 ಯೆಹೂದ್ಯಂಗ, ಗುರ್‌ತ್ ನೋಟ್‍ಚೇಂಗಿ ಮಾತ್ರ ನಂಬುವ; ಗ್ರೀಕ್ ಜನ ಜ್ಞಾನತ್‍ನ ನಂಬುವ. 23 ಆಚೇಂಗಿ ನಂಗ, ಶಿಲುಬೇಲ್ ಚತ್ತ ಕ್ರಿಸ್ತನ ಬೋದನೆ ಮಾಡಿಯಂಡುಂಡ್; ಆ ಬೋದನೆನ ಯೆಹೂದ್ಯಂಗ ನಂಬುವಕ್ ಕುಶಿಪಡುಲೆ, ಪಿಂಞ ಯೆಹೂದ್ಯಂಗ ಅಲ್ಲತ ಬೋರೆ ಜನ ಇದ್ ಪುಚ್ಚಿ ತಕ್ಕ್‌ರನೆಕೆ ಉಂಡ್‍ೕಂದ್ ಎಣ್ಣುವ. 24 ಆಚೇಂಗಿ, ದೇವ ದಾರ್‌ನ ಅಂವೊಂಡ ಮಕ್ಕಳಾಯಿತ್ ಕಾಕಿತುಂಡೋ, ಅಯಿಂಗ ಯೆಹೂದ್ಯರಾಚೇಂಗಿಯು, ಯೆಹೂದ್ಯರಲ್ಲತ ಬೋರೆ ಜನ ಆಚೇಂಗಿಯು, ಅಯಿಂಗಕ್ ಕ್ರಿಸ್ತ ದೇವಡ ಶಕ್ತಿಯಾಯಿತು, ದೇವಡ ಜ್ಞಾನವಾಯಿತು ಉಂಡ್. 25 ದೇವಡ ಮೂಡತನ ಎಣ್ಣ್‌ವದ್ ಮನುಷ್ಯಂಡ ಜ್ಞಾನಕಿಂಜ ಬಲ್ಯದಾಯಿತುಂಡ್. ದೇವಡ ಬಲಹೀನ ಎಣ್ಣ್‌ವದ್ ಮನುಷ್ಯಂಡ ಶಕ್ತಿಕಿಂಜ ದುಂಬ ಶಕ್ತಿ ಉಳ್ಳದಾಯಿತುಂಡ್. 26 ನೋಟಿ, ನಾಡ ಅಣ್ಣತಮ್ಮಣಂಗಳೇ, ದೇವ ನಿಂಗಳ ಕಾಕ್‍ವಕ ನಿಂಗ ಎನ್ನನೆ ಇಂಜಿರಾಂದ್ ಚೆನ್ನ ಗೇನ ಮಾಡಿಯೊಳಿ. ಮನುಷ್ಯಂಡ ದೃಷ್ಟಿಲ್ ನಿಂಗಡಲ್ಲಿ ದುಂಬ ಜ್ಞಾನಿಯ ಇಂಜಿತ್ತ್‌ಲ್ಲೆ, ಬಲ್ಯಯಿಂಗ ದುಂಬ ಇಂಜಿತ್ತ್‌ಲ್ಲೆ, ಮುಕ್ಯಪಟ್ಟ ಜನ ದುಂಬ ಇಂಜಿತ್ತ್‌ಲ್ಲೆ. 27 ಆಚೇಂಗಿ, ದೇವ ಜ್ಞಾನಿಯಳ ಞಾಣ ಪಡ್‍ತ್‍ವಕಾಯಿತ್, ಈ ಲೋಕತ್‍ಲ್ ಮೂಡಂಗಳ ಗೊತ್ತ್ ಮಾಡಿಯಂಡತ್. ಬಲಶಾಲಿಯಳ ಞಾಣ ಪಡ್‍ತ್‍ವಕಾಯಿತ್, ಈ ಲೋಕತ್‍ಲ್ ಬಲಹೀನವಾಯಿತುಳ್ಳಯಿಂಗಳ ಗೊತ್ತ್ ಮಾಡಿಯಂಡತ್. 28 ಈ ಲೋಕ ಏದ್ ದುಂಬ ಮುಕ್ಯಾಂದ್ ಎಣ್ಣುವ, ಅದ್‍ನ ತಿರಸ್ಕಾರ ಮಾಡ್‌ವಕಾಯಿತ್, ಕಮ್ಮಿತರತ್‍ನ, ಪ್ರಯೋಜನ ಇಲ್ಲತದ್‍ನ ಪಿಂಞ ಲೋಕತ್‍ರ ಜನ ಕೀಳಾಯಿತ್ ನೋಟ್‍ವಾನ ದೇವ ಗೊತ್ತ್ ಮಾಡಿಯಂಡತ್. 29 ಅನ್ನನೆ ಮಾಡ್‍ನಗುಂಡ್, ದಾರೂ ದೇವಡ ಮಿಂಞತ್‍ಲ್ ಹೊಗಳುವಕ್ ಕಯ್ಯುಲೆ. 30 ಅನ್ನನೆ, ದೇವ ನಿಂಗಳ ಕ್ರಿಸ್ತ ಯೇಸುರ ಕೂಡೆ ಐಕ್ಯತ್‍ಲ್ ಕೂಟಿತುಂಡ್. ಆನಗುಂಡ್ ದೇವ, ಕ್ರಿಸ್ತನ ನಂಗಕ್ ಜ್ಞಾನವಾಯಿತ್ ಮಾಡಿತುಂಡ್. ಅಂವೊಂಡ ಮೂಲಕ ನಂಗಳ, ದೇವಡ ಮಿಂಞತ್‍ಲ್ ನೀತಿವಂತಯಿಂಗಳಾಯಿತು, ಪವಿತ್ರ ಜನಳಾಯಿತು ಪಿಂಞ ನಂಗಕ್ ವಿಮೋಚನ ಕ್‍ಟ್ಟುವನೆಕೆ ಮಾಡಿತುಂಡ್. 31 ದೇವಡ ವಾಕ್ಯ ಎಣ್ಣ್‌ವನೆಕೆ, ಹೊಗಳಿಚಿಡುವಂವೊ ಒಡೆಯಂಡ ವಿಷಯತ್ ಮಾತ್ರ ಹೊಗ್‍ಳಿಚಿಡಡ್. |
© 2017, New Life Literature (NLL)