TYENDO NE SIIREI TUGUL 8 - BUKUIT NE TILIIL Sireet ne Dutero Kanon

¹ Kita kaigai nda ki iuu weeriit ne kitupche, ne ki chuchun kinetap kamennyu! Nda anyoorchinin saang', ta ang'ututin; ama mi chii ne sasa.

² Ak amutin iwe kootap kamennyu, ne po ineendet ne ki ineeta, ak anagin divaik che ki kiburukto nyamdutik, che po peegap logoekyuk che piriireen.

³ Oiye, agase ta tiye metinnyu eunnyi ne po kaataam, ak komuureno eunnyi ne po tai!

⁴ Asoomok, ee tiibiigap Jerusalem, ale, amat otwaa, anan oong'et chamyet, agoi koit kasartanyi.

Choronok Murereet

⁵ Ng'oo ni togosu eng' surkwen, ne tiegei chamanennyi? Ki ang'eetin eng' kelutap keetitap logoek. Ole ki ame moet kamenng'ung' komachei kosichin, kimi yooto koamei moet si kosichin.

⁶ Indea muguleldang'ung' ko uu ng'ookset, ko uu ng'ookset eng' eung'ung'. Amu kiim chamyet ko uu meet, korom ng'et konda ko uu kererit. Lalennyi ko uu laletap maat, liplibenet ne koroom miising'.

⁷ Ma imuuchi peek che chaang' kotis chamyet, ama imaluuchi maranosyek. Ngot kogoito chiito tuguukyik tugul che po koonnyi agobo chamyet, kesasei miising' kot.

⁸ Kitinyei chepto ne ming'in ne kitupche, ne tomo kogun kinet. Ki itoi nee cheptonyo ye tuun kait ye kibwanune koito?

⁹ Ngot ko inaatut ineendet, keteechei paragunnyi irimeet ne po fedha. Ak ngot ko kereiywotap kurgeet, keng'ote ineendet pagoinigap taragonik.

Murereet

¹⁰ Aa inaatut ak ko uu kinaikyuk teeksosyekyik che kooen. Ki aegu anyun eng' konyekyik ineendet ne ibu kaalyeet.

Saandet

¹¹ Ki tinyei Solomon mbareetap sabibuk eng' Baal-hamon. Ki imanakyi mbaranooto po sabibuk riibiik, kinyooljin chii tugul koip fedhaisyek eliphuut che po logoekyik.

¹² Mbareennyu ne po sabibuk, ne nenyu, komi tainnyu. Inyee, ee Solomon, inyooru eliphunooto, ak nyooru pogol aeng' icheeget che riibei logoekyik.

¹³ Inyee ne imenye mbareenik, epchin iit choronok kuting'ung'; koono agas kutinooto.

Murereet

¹⁴ Chaakte, chamanennyu, kergeitu ak kenyeleet anan aarwetap teweretyot eng' tuloonoogap tuguuk che ng'uu ne anyiny.