TYENDO NE SIIREI TUGUL 7 - BUKUIT NE TILIIL Sireet ne Dutero Kanon

Sandet

¹ Korooron ne tya keelyeguk komi kweonik, ee cheptap pounindet! Uu kubesaiguk che muguleen koik che korooron, poisyetap musogindet ne ng'oom.

² Uu mugeng'ung' taabeet ne mugul, ne ma rarchin divaik che purugotin. Uu moeng'ung' karurugutyetap nganuuk ne ki kiyieme taaptook.

³ Uu kinaiguk tuwai aarek aeng' che po chemnyogoset, uu sarameegap kenyeleet.

⁴ Uu kaating'ung' teekseet ne kooi ne po kelegap peeleek, Uu konyeguk tamboinik che mi Hesbon, ole neegitee ormariichetap Bat-rabim, Uu serung'ung' teekseet ne kooi ne po Lebanon ne tokyingei Damasko.

⁵ Uu meting'ung' Karmel, ak arusen ne piriir suumeeguk, luulei `suumeekyik laitoryat.

⁶ Ii karaaran ne tya ak ko ii chamat, Ee chamaneet, ne iboiboisye!

⁷ Uu tononaniitong'ung'et tiiret, ak uu kinaiguk logoek.

⁸ Ki amwa ale, “Alaanye tiiret, aname mooriikyik.” Ingoigei kinaiguk logoegap sabibuk, ak ingoigei ng'uunetap kabuseng'ung', logoek,

⁹ ak ingoigei kuting'ung' divaik che myachen miising', che rektoi komyee eng' chamanennyu, che punei paragutap kutinnyi ak kelekyik.

¹⁰ Aa po chamanennyu, ak tokyinagei magennyi.

¹¹ Nyoo anyun chamanennyu, keebe mbar, ngemeng'oote nganasook che mengeechen.

¹² Ngemusyi mbareenigap logoegap sabibuk, ngegeer ngo kagong'atyo keetiigap sabibuk ak koyesyo taaptokyik, ak ngo kogoyesyo taaptogap logoek che piriireen. Agoonin chamyennyu eng' olooto.

¹³ Ng'uu ne anyiny tuguuk che uu labotik, ak mi seremusyekyok logoek alak tugul che korooron, che leelach ak che po keny, che ki agonorun, ee chamanennyu.