TYENDO NE SIIREI TUGUL 6 - BUKUIT NE TILIIL Sireet ne Dutero Kanon

Choronok

¹ Kawo ano chamaneng'ung', Ee inyee ne ii karaaran isiir tiibiik tugul? Kamasta kwo ano chamaneng'ung', si kobiit ketoretin kecheeng' ineendet?

² Kachoorchigei chamanennyu mbareennyi, mbareenigap tuguuk che ng'uu ne anyiny, kwo koyaga akweennyi eng' mbareenik ak koyum taaptook.

³ Aa po chamanennyu ak ko nenyu chamanennyu. Iyagisyei eng' ole mi taaptook.

⁴ Ee chamanennyu, itinye itoon kot ko uu Tirzah, ii karaaran ko uu Jerusalem, ii ne imuisei ko uu lugeet ne tinyei songolik.

⁵ Keer oliin, amu kagotertera konyeguk. Uu suumeeguk akweetap ng'oroorek, che ruitos eng' tegeiyatap Gilead.

⁶ Uu keleguk akweetap keechiirek, che punu ole kiuune, ne tinyei age tugul sarameek, ama mi agot agenge eng' icheek ne kimee aarwet.

⁷ Uu ng'esyemtang'ung' logoek che piriireen ne katuch kitambaeng'ung'.

⁸ Miitei osotik tamanwogik lo che po laitoryat, ak chebaigeinik tamanwogik sisiit, kobooto pergeinik che ma iitoksei.

⁹ Agenge cheptugennyu, nenyu ne libwoop, ne ki kisich ineegei; chamat ineendet eng' kamet. Ki keer tiibiik ineendet ak koguure ne iberuurot, ee, ki ilas ineendet osotigap laitoryat ak chebaigeinik.

¹⁰ Ng'oo ne tabendoi ko uu karoonet, ne karaaran ko uu arawet, ne iluu ko uu asiista, ne imuisei ko uu lugeet ne tinyei songolik?

¹¹ Ki achoorchigei mbareetap logoek che uu njuguk, si kobiit ageer keetiik che ing'atos che po atebweet, ageer ngo kayesyo keetiigap sabibuk, ak ageer ngo kayesyo logoek che piriireen.

¹² Kingo tomo anai, komutwaa muguleldanyu, anyo kwenutap kariisyegap piikyuk che eecheen.

Chebyosok

¹³ Weeguge, weeguge, ee Chepsulamindet. Weeguge, weeguge, si kegeerin. Kalya si omach ogeer Chepsulamindet, ko uu ye ogeere ureryetap kiplugotinik aeng'?