TYENDO NE SIIREI TUGUL 4 - BUKUIT NE TILIIL Sireet ne Dutero Kanon

Kalasunetap Murereet

¹ Iman, itinye itoon chamanennyu; ii karaaran ne tya! Uu konyeguk che po cheptugenik che katuch kitambaet. Uu suumeeguk akweetap ng'oroorek, che ruitos eng' tegeiyatap tulweetap Gilead.

² Uu keleguk akweetap keechiirek che kagetil koroorikwak, che punu ole kiuune; ne tinyei age tugul sarameek, ama mi agot agenge eng' icheek ne kimee aarwet.

³ Uu ng'esyemtang'ung' porowet ne piriir, ak ko karaaran kuting'ung' kot. Uu tagilgiliguk logoek che karuryo ne katuch kitambaeng'ung'.

⁴ Uu kaating'ung' teekseet ne kooi ne po Daudi ne ki kiteekyi kariigap lugeet, ole kigartate long'onik eliphuut, long'onik tugul che po murenigap lugeet.

⁵ Uu kinaiguk tuwai aarek aeng' che po chemnyogoset, che uu sarameegap kenyeleet, che agetee kwenutap taaptook.

⁶ Kotoom koeech ak kobetyo uronok, awendi tulweet ne mi tuguuk che uu igomoik, ak tulweet ne ming'in ne po tuguuk che nyamdut.

⁷ Ii karaaran kot, chamanennyu; ametinye tisya.

⁸ Murerennyu, nyoo keebe tuwai eng' Lebanon, keebe tuwai kemande eng' Lebanon. Chorugei eng' tulweet parak ne po Amana, eng' tulweet parak ne po Senir ak Hermon, eng' kebenonigap ng'etuunyik, eng' tuloonoogap cheplangok.

⁹ Kebaibait muguleldanyu, chepkamennyu, murerennyu; kecheer muguleldanyu eng' kondang'ung', eng' sirimdo agenge ne po kaating'ung'.

¹⁰ Karaaran ne tya chamyeng'ung', chepkamennyu, murerennyu! Siirei miising' chamyeng'ung' divaik, ak ng'uunetap mwaniguk ko siirei tuguuk tugul che ng'uu ne anyiny!

¹¹ Ee murerennyu, saitoi ng'aleeguk ko uu kumyat. Mi ng'elyeptang'ung' kumyat ak cheego. Siiptap ngoroiguk ko uu siiptap Lebanon.

¹² Mbareet ne ng'ootaat chepkamennyu, murerennyu, kondap peek ne ng'ootaat kondametutap peek ne ki king'ooch.

¹³ Mbareetap logoek che piriireen keetiiguk, che tinyei logoek che korooron miising'; chooto che kiguure henna ak nard.

¹⁴ Nard ak safron, kalamus ak kinamon, kobooto keetiik tugul che po tuguuk che nyamdut; tuguuk che uu igomoik ak ahalot, kobooto tuguuk tugul che ng'uu ne anyiny miising'.

¹⁵ Ii kondametutap peegap mbareenik, keriingetap peek che saptos, ak kereruusyek che rootei che punu Lebanon.

Murereet

¹⁶ Ng'eet, ee usoonetap murot kaataam, ak inyoo inyee usoonetap murot tai; ousyi mbareennyu, si kobiit komuuch kong'uu nyamdutikyik. Ingonyo chamanennyu mbareennyi, ak koam logoekyik che korooron miising'.