TYENDO NE SIIREI TUGUL 2 - BUKUIT NE TILIIL Sireet ne Dutero Kanon

¹ Anee ko aa taapteetap Sharon, auu taapteetap atebwosyek.

Saandet

² Ko uu ye uu taapteet ne mi kwenutap katook, ko uu nooto chamanennyu eng' tiibiik.

Murereet

³ Ko uu ye uu keetitap logoek eng' keetiigap timiin, ko uu nooto chamanennyu eng' murenik che neran. Ki atebee urwennyi eng' poiboiyet ne oo, ak ki anyiny logoiyandenyi ye ki achamchami.

⁴ Ki imutwaa anyo kootap igoorto, ak kiting'ena chamyet ne ma ung'aksei.

⁵ Igimiitena sabibuk che ki keyaam, igoigoena logoek, kabara chamyet.

⁶ Oiye, nda tiye metinnyu eunnyi ne po kaataam, ak komuureno eunnyi ne po tai!

⁷ Ayosyewok, ee tiibiigap Jerusalem, eng' cheptirgichik ak kenyelok che kotoy, ale mat otwaa anan oong'et chamyet, agoi koit kasartanyi.

Tyendap aeng' Murereet

⁸ Ogas, tuugeetap chamanennyu! Ogeero, nyoonei ineendet, kotorombenonu eng' tuloonook che eecheen, kotwalonu eng' tuloonook che mengeechen.

⁹ Uu chamanennyu kenyeleet anan aarwetap teweretyot. Ogeero, tononi ineendet tononee inaatunnyo komosin. Iitu ineendet eng' tirisyok, iboorugei eng' tirisyet ne regerat.

¹⁰ Ki ng'alaal chamanennyu ak koleenjo ng'eet chamanennyu, chamanennyu ne karaaran, ak inyoo keebe.

¹¹ Kagosiirto kaitityet, kagomoen, ak kakwo ropta.

¹² Yestos taaptook eng' emet; kagoit peetuusyegap tyendo, kigasei tuugeetap cheptuget eng' emennyo.

¹³ Igoochin `mogoywet logoekyik che tuonen koruryo, ak yestos taaptogap keetiigap sabibuk, ng'uu ne nyamdut. Ng'eet, chamanennyu, ngeet ee, nenyu ne karaaran ak inyoo keebe.

¹⁴ Ee cheptugennyu, imi ole kibetak eng' rwandet, eng' ole ung'aat eng' ye kitogostoe. Ingageer togeng'ung', ngagas tuugeeng'ung'; amu anyiny tuugeeng'ung' ak ko karaaran togeng'ung'.

¹⁵ Namwech lelwek, lelwek che mengeechen, che ng'emei mbareenigap sabibuk; amu kayesyo taaptogap mbareenikyok che po sabibuk.

Murereet

¹⁶ Nenyu chamanennyu ak aa nenyi. Iyagi keechiirekyik eng' ye mi taaptook.

¹⁷ Agoi kogaititit ak kobetyo uronok, Weege, chamanennyu, labat iige kenyeleet anan teweretyot eng' tuloonoogap Beter.