TIENWOGIKAL 99 - BUKUIT NE TILIIL Sireet ne Dutero Kanon

Kamuktaindet ak Tiliilondonyi

¹ Laitorani Kamuktaindet ne Toroor; ingobotanso piik: Tebee ineendet paragutap kerubik; ingobotan ng'wony.

² Oo Kamuktaindet ne Toroor eng' Zion; Ak toroor ineendet kosiir piik tugul.

³ Ingolas icheek kaineng'ung' ne oo ne imuisei. Tiliil ineendet.

⁴ Chamei kimnateetap laitoryat kirwooget; Igimiiti imanda, Iyae kirwooget ak imanda eng' Jakobo.

⁵ Otoroor Kamuktaindet ne Toroor, Kamuktaindennyo, Ak ogutung'ji eng' ng'echereetap keelyekyik keel: Tiliil ineendet.

⁶ Musa ak Aron eng' tisiikyik, Ak Samuel kobooto icheeget che kuurei kainennyi; Ki kuur icheek Kamuktaindet ne Toroor ak ki wolji.

⁷ Ki ng'alaalji icheek eng' toloitap pooldet: Ki riip paornatosyekyik, ak kaneetisyet ne ki igoochi.

⁸ Iwoljini icheek, ee Kamuktaindet ne Toroor, Kamuktaindennyo: Ki Kamuktaindet ne ki inyochini kaat, Agot nganda ki iyaakyi mugetuut agobo poisyonikwak.

⁹ Otoroor Kamuktaindet ne Toroor, Kamuktaindennyo, Ak ogutung'ji eng' tulweennyi ne tiliil; Amu tiliil Kamuktaindet ne Toroor, Kamuktaindennyo.